নমোঽস্তুতে ভৈরৱ ভীমমূর্তে ত্রৈলোক্য গোপ্ত্রেশিতশূলপাণে |
কপালপাণে ভুজগেশহার ত্রিনেত্র মাং পাহি ৱিপন্ন বুদ্ধিম্ || ১ ||
জযস্ৱ সর্ৱেশ্ৱর ৱিশ্ৱমূর্তে সুরাসুরৈর্ৱংদিতপাদপীঠ |
ত্রৈলোক্য মাতর্গুরৱে ৱৃষাংক ভীতশ্শরণ্যং শরণা গতোস্মি || ২ ||
ত্ৱং নাথ দেৱাশ্শিৱমীরযংতি সিদ্ধা হরং স্থাণুমমর্ষিতাশ্চ |
ভীমং চ যক্ষা মনুজা মহেশ্ৱরং ভূতানি ভূতাধিপ মুচ্চরংতি || ৩ ||
নিশাচরাস্তূগ্রমুপাচরংতি ভৱেতি পুণ্যাঃ পিতরো নমস্তে |
দাসোঽস্মি তুভ্যং হর পাহি মহ্যং পাপক্ষযং মে কুরু লোকনাথ || ৪ ||
ভৱাং-স্ত্রিদেৱ-স্ত্রিযুগ-স্ত্রিধর্মা ত্রিপুষ্করশ্চাসি ৱিভো ত্রিনেত্র |
ত্রযারুণিস্ত্ৱং শ্রুতিরৱ্যযাত্মা পুনীহি মাং ত্ৱাং শরণং গতোঽস্মি || ৫ ||
ত্রিণাচিকেত-স্ত্রিপদপ্রতিষ্ঠ-ষ্ষডংগৱিত্ স্ত্রীৱিষযেষ্ৱলুব্ধঃ |
ত্রৈলোক্যনাথোসি পুনীহি শংভো দাসোঽস্মি ভীতশ্শরণাগতস্তে || ৬ ||
কৃতো মহাশংকর তেঽপরাধো মযা মহাভূতপতে গিরীশ |
কামারিণা নির্জিতমানসেন প্রসাদযে ত্ৱাং শিরসা নতোঽস্মি || ৭ ||
পাপোঽহং পাপকর্মাঽহং পাপাত্মা পাপসংভৱঃ |
ত্রাহি মাং দেৱদেৱেশ সর্ৱপাপহরো ভৱ || ৮ ||
মম দৈৱাপরাধোস্তি ত্ৱযা ৱৈ তাদৃশোপ্যহম্ |
স্পৃষ্টঃ পাপসমাচারো মাং প্রসন্নো ভৱেশ্ৱর || ৯ ||
ত্ৱং কর্তা চৈৱ ধাতা চ জযত্ৱং চ মহাজয |
ত্ৱং মংগল্যস্ত্ৱমোংকার-স্ত্ৱমোংকারো ৱ্যযো ধৃতঃ || ১০ ||
ত্ৱং ব্রহ্মসৃষ্টিকৃন্নাথস্ত্ৱং ৱিষ্ণুস্ত্ৱং মহেশ্ৱরঃ |
ত্ৱমিংদ্রস্ত্ৱং ৱষট্কারো ধর্মস্ত্ৱং তু হিতোত্তমঃ || ১১ ||
সূক্ষ্মস্ত্ৱং ৱ্যক্তরূপস্ত্ৱং ত্ৱমৱ্যক্তশ্চধীৱরঃ |
ত্ৱযা সর্ৱমিদং ৱ্যাপ্তং জগত্ স্থাৱরজংগমম্ || ১২ ||
ত্ৱমাদিরংতো মধ্যং চ ত্ৱমেৱ চ সহস্রপাত্ |
ৱিজযস্ত্ৱং সহস্রাক্ষো চিত্তপাখ্যো মহাভুজঃ || ১৩ ||
অনংতস্সর্ৱগো ৱ্যাপী হংসঃ পুণ্যাধিকোচ্যুতঃ |
গীর্ৱাণপতিরৱ্যগ্রো রুদ্রঃ পশুপতিশ্শিৱঃ || ১৪ ||
ত্রৈৱিদ্যস্ত্ৱং জিতক্রোধো জিতারাতির্জিতেংদ্রিযঃ |
জযশ্চ শূলপাণি স্ত্ৱং পাহি মাং শরণাগতম্ || ১৫ ||
ইতি শ্রীৱামনপুরাণান্তর্গত অংধক কৃত শিৱ স্তুতিঃ |