ৱংদে ৱংদারু মংদারমিংদিরানংদকংদলম্ |
অমংদানংদসংদোহ বংধুরং সিংধুরাননম্ ||
অংগং হরেঃ পুলকভূষণমাশ্রযংতী
ভৃংগাংগনেৱ মুকুলাভরণং তমালম্ |
অংগীকৃতাখিলৱিভূতিরপাংগলীলা
মাংগল্যদাস্তু মম মংগলদেৱতাযাঃ || ১ ||
মুগ্ধা মুহুর্ৱিদধতী ৱদনে মুরারেঃ
প্রেমত্রপাপ্রণিহিতানি গতাগতানি |
মালাদৃশোর্মধুকরীৱ মহোত্পলে যা
সা মে শ্রিযং দিশতু সাগরসংভৱাযাঃ || ২ ||
ৱিশ্ৱামরেংদ্রপদৱিভ্রমদানদক্ষ-
-মানংদহেতুরধিকং মুরৱিদ্ৱিষোঽপি |
ঈষন্নিষীদতু মযি ক্ষণমীক্ষণার্থ-
-মিংদীৱরোদরসহোদরমিংদিরাযাঃ || ৩ ||
আমীলিতাক্ষমধিগম্য মুদা মুকুংদ-
-মানংদকংদমনিমেষমনংগতংত্রম্ |
আকেকরস্থিতকনীনিকপক্ষ্মনেত্রং
ভূত্যৈ ভৱেন্মম ভুজংগশযাংগনাযাঃ || ৪ ||
বাহ্ৱংতরে মধুজিতঃ শ্রিতকৌস্তুভে যা
হারাৱলীৱ হরিনীলমযী ৱিভাতি |
কামপ্রদা ভগৱতোঽপি কটাক্ষমালা
কল্যাণমাৱহতু মে কমলালযাযাঃ || ৫ ||
কালাংবুদালিললিতোরসি কৈটভারে-
-র্ধারাধরে স্ফুরতি যা তটিদংগনেৱ |
মাতুস্সমস্তজগতাং মহনীযমূর্তিঃ
ভদ্রাণি মে দিশতু ভার্গৱনংদনাযাঃ || ৬ ||
প্রাপ্তং পদং প্রথমতঃ খলু যত্প্রভাৱা-
-ন্মাংগল্যভাজি মধুমাথিনি মন্মথেন |
ময্যাপতেত্তদিহ মংথরমীক্ষণার্ধং
মংদালসং চ মকরালযকন্যকাযাঃ || ৭ ||
দদ্যাদ্দযানুপৱনো দ্রৱিণাংবুধারা-
-মস্মিন্ন কিংচন ৱিহংগশিশৌ ৱিষণ্ণে |
দুষ্কর্মঘর্মমপনীয চিরায দূরং
নারাযণপ্রণযিনীনযনাংবুৱাহঃ || ৮ ||
ইষ্টাৱিশিষ্টমতযোঽপি যযা দযার্দ্র-
-দৃষ্ট্যা ত্রিৱিষ্টপপদং সুলভং লভংতে |
দৃষ্টিঃ প্রহৃষ্টকমলোদরদীপ্তিরিষ্টাং
পুষ্টিং কৃষীষ্ট মম পুষ্করৱিষ্টরাযাঃ || ৯ ||
গীর্দেৱতেতি গরুডধ্ৱজসুংদরীতি
শাকংভরীতি শশিশেখরৱল্লভেতি |
সৃষ্টিস্থিতিপ্রলযকেলিষু সংস্থিতাযৈ
তস্যৈ নমস্ত্রিভুৱনৈকগুরোস্তরুণ্যৈ || ১০ ||
শ্রুত্যৈ নমোঽস্তু শুভকর্মফলপ্রসূত্যৈ
রত্যৈ নমোঽস্তু রমণীযগুণার্ণৱাযৈ |
শক্ত্যৈ নমোঽস্তু শতপত্রনিকেতনাযৈ
পুষ্ট্যৈ নমোঽস্তু পুরুষোত্তমৱল্লভাযৈ || ১১ ||
নমোঽস্তু নালীকনিভাননাযৈ
নমোঽস্তু দুগ্ধোদধিজন্মভূম্যৈ |
নমোঽস্তু সোমামৃতসোদরাযৈ
নমোঽস্তু নারাযণৱল্লভাযৈ || ১২ ||
[* অধিক শ্লোকাঃ –
নমোঽস্তু হেমাংবুজপীঠিকাযৈ
নমোঽস্তু ভূমংডলনাযিকাযৈ |
নমোঽস্তু দেৱাদিদযাপরাযৈ
নমোঽস্তু শার্ঙ্গাযুধৱল্লভাযৈ ||
নমোঽস্তু দেৱ্যৈ ভৃগুনংদনাযৈ
নমোঽস্তু ৱিষ্ণোরুরসিস্থিতাযৈ |
নমোঽস্তু লক্ষ্ম্যৈ কমলালযাযৈ
নমোঽস্তু দামোদরৱল্লভাযৈ ||
নমোঽস্তু কাংত্যৈ কমলেক্ষণাযৈ
নমোঽস্তু ভূত্যৈ ভুৱনপ্রসূত্যৈ |
নমোঽস্তু দেৱাদিভিরর্চিতাযৈ
নমোঽস্তু নংদাত্মজৱল্লভাযৈ ||
*]
সংপত্করাণি সকলেংদ্রিযনংদনানি
সাম্রাজ্যদানৱিভৱানি সরোরুহাক্ষি |
ত্ৱদ্ৱংদনানি দুরিতাহরণোদ্যতানি
মামেৱ মাতরনিশং কলযংতু মান্যে || ১৩ ||
যত্কটাক্ষসমুপাসনাৱিধিঃ
সেৱকস্য সকলার্থসংপদঃ |
সংতনোতি ৱচনাংগমানসৈ-
-স্ত্ৱাং মুরারিহৃদযেশ্ৱরীং ভজে || ১৪ ||
সরসিজনিলযে সরোজহস্তে
ধৱলতমাংশুকগংধমাল্যশোভে |
ভগৱতি হরিৱল্লভে মনোজ্ঞে
ত্রিভুৱনভূতিকরি প্রসীদ মহ্যম্ || ১৫ ||
দিগ্ঘস্তিভিঃ কনককুংভমুখাৱসৃষ্ট-
-স্ৱর্ৱাহিনীৱিমলচারুজলপ্লুতাংগীম্ |
প্রাতর্নমামি জগতাং জননীমশেষ-
-লোকাধিনাথগৃহিণীমমৃতাব্ধিপুত্রীম্ || ১৬ ||
কমলে কমলাক্ষৱল্লভে ত্ৱং
করুণাপূরতরংগিতৈরপাংগৈঃ |
অৱলোকয মামকিংচনানাং
প্রথমং পাত্রমকৃত্রিমং দযাযাঃ || ১৭ ||
[* অধিক শ্লোকাঃ –
বিল্ৱাটৱীমধ্যলসত্সরোজে
সহস্রপত্রে সুখসন্নিৱিষ্টাম্ |
অষ্টাপদাংভোরুহপাণিপদ্মাং
সুৱর্ণৱর্ণাং প্রণমামি লক্ষ্মীম্ ||
কমলাসনপাণিনা ললাটে
লিখিতামক্ষরপংক্তিমস্য জংতোঃ |
পরিমার্জয মাতরংঘ্রিণা তে
ধনিকদ্ৱারনিৱাস দুঃখদোগ্ধ্রীম্ ||
অংভোরুহং জন্মগৃহং ভৱত্যাঃ
ৱক্ষঃস্থলং ভর্তৃগৃহং মুরারেঃ |
কারুণ্যতঃ কল্পয পদ্মৱাসে
লীলাগৃহং মে হৃদযারৱিংদম্ ||
*]
স্তুৱংতি যে স্তুতিভিরমূভিরন্ৱহং
ত্রযীমযীং ত্রিভুৱনমাতরং রমাম্ |
গুণাধিকা গুরুতরভাগ্যভাজিনো
ভৱংতি তে ভুৱি বুধভাৱিতাশযাঃ || ১৮ ||
[* অধিক শ্লোকং –
সুৱর্ণধারাস্তোত্রং যচ্ছংকরাচার্য নির্মিতম্ |
ত্রিসংধ্যং যঃ পঠেন্নিত্যং স কুবেরসমো ভৱেত্ ||
*]
ইতি শ্রীমত্পরমহংসপরিৱ্রাজকাচার্যস্য শ্রীগোৱিংদভগৱত্পূজ্যপাদশিষ্যস্য শ্রীমচ্ছংকরভগৱতঃ কৃতৌ কনকধারাস্তোত্রং সংপূর্ণম্ |