ব্রহ্মমুরারিসুরার্চিত লিঙ্গং
নির্মলভাসিতশোভিত লিঙ্গম্ |
জন্মজদুঃখবিনাশক লিঙ্গং
তত্প্রণমামি সদা শিব লিঙ্গম্ || ১ ||
দেবমুনিপ্রবরার্চিত লিঙ্গং
কামদহং করুণাকর লিঙ্গম্ |
রাবণদর্পবিনাশন লিঙ্গং
তত্প্রণমামি সদা শিব লিঙ্গম্ || ২ ||
সর্বসুগন্ধসুলেপিত লিঙ্গং
বুদ্ধিবিবর্ধনকারণ লিঙ্গম্ |
সিদ্ধসুরাসুরবন্দিত লিঙ্গং
তত্প্রণমামি সদা শিব লিঙ্গম্ || ৩ ||
কনকমহামণিভূষিত লিঙ্গং
ফণিপতিবেষ্টিতশোভিত লিঙ্গম্ |
দক্ষসুযজ্ঞবিনাশন লিঙ্গং
তত্প্রণমামি সদা শিব লিঙ্গম্ || ৪ ||
কুঙ্কুমচন্দনলেপিত লিঙ্গং
পঙ্কজহারসুশোভিত লিঙ্গম্ |
সঞ্চিতপাপবিনাশন লিঙ্গং
তত্প্রণমামি সদা শিব লিঙ্গম্ || ৫ ||
দেবগণার্চিতসেবিত লিঙ্গং
ভাবৈর্ভক্তিভিরেব চ লিঙ্গম্ |
দিনকরকোটিপ্রভাকর লিঙ্গং
তত্প্রণমামি সদা শিব লিঙ্গম্ || ৬ ||
অষ্টদলোপরিবেষ্টিত লিঙ্গং
সর্বসমুদ্ভবকারণ লিঙ্গম্ |
অষ্টদরিদ্রবিনাশন লিঙ্গং
তত্প্রণমামি সদা শিব লিঙ্গম্ || ৭ ||
সুরগুরুসুরবরপূজিত লিঙ্গং
সুরবনপুষ্পসদার্চিত লিঙ্গম্ |
পরাত্পরং পরমাত্মক লিঙ্গং [** পরমপদং **]
তত্প্রণমামি সদা শিব লিঙ্গম্ || ৮ ||
লিঙ্গাষ্টকমিদং পুণ্যং যঃ পঠেচ্ছিবসন্নিধৌ |
শিবলোকমবাপ্নোতি শিবেন সহ মোদতে ||