তপঃস্ৱাধ্যাযনিরতং তপস্ৱী ৱাগ্ৱিদাং ৱরম্ |
নারদং পরিপপ্রচ্ছ ৱাল্মীকির্মুনিপুংগৱম্ || ১ ||
কোঽন্ৱস্মিন্সাংপ্রতং লোকে গুণৱান্ কশ্চ ৱীর্যৱান্ |
ধর্মজ্ঞশ্চ কৃতজ্ঞশ্চ সত্যৱাক্যো দৃঢৱ্রতঃ || ২ ||
চারিত্রেণ চ কো যুক্তঃ সর্ৱভূতেষু কো হিতঃ |
ৱিদ্ৱান্ কঃ কঃ সমর্থশ্চ কশ্চৈকপ্রিযদর্শনঃ || ৩ ||
আত্মৱান্ কো জিতক্রোধো দ্যুতিমান্ কোঽনসূযকঃ |
কস্য বিভ্যতি দেৱাশ্চ জাতরোষস্য সংযুগে || ৪ ||
এতদিচ্ছাম্যহং শ্রোতুং পরং কৌতূহলং হি মে |
মহর্ষে ত্ৱং সমর্থোঽসি জ্ঞাতুমেৱংৱিধং নরম্ || ৫ ||
শ্রুত্ৱা চৈতত্ত্রিলোকজ্ঞো ৱাল্মীকের্নারদো ৱচঃ |
শ্রূযতামিতি চামংত্র্য প্রহৃষ্টো ৱাক্যমব্রৱীত্ || ৬ ||
বহৱো দুর্লভাশ্চৈৱ যে ত্ৱযা কীর্তিতা গুণাঃ |
মুনে ৱক্ষ্যাম্যহং বুদ্ধ্ৱা তৈর্যুক্তঃ শ্রূযতাং নরঃ || ৭ || [বুদ্ধ্যা]
ইক্ষ্ৱাকুৱংশপ্রভৱো রামো নাম জনৈঃ শ্রুতঃ |
নিযতাত্মা মহাৱীর্যো দ্যুতিমান্ধৃতিমান্ৱশী || ৮ ||
বুদ্ধিমান্নীতিমান্ৱাগ্মী শ্রীমান্ শত্রুনিবর্হণঃ |
ৱিপুলাংসো মহাবাহুঃ কংবুগ্রীৱো মহাহনুঃ || ৯ ||
মহোরস্কো মহেষ্ৱাসো গূঢজত্রুররিংদমঃ |
আজানুবাহুঃ সুশিরাঃ সুললাটঃ সুৱিক্রমঃ || ১০ ||
সমঃ সমৱিভক্তাংগঃ স্নিগ্ধৱর্ণঃ প্রতাপৱান্ |
পীনৱক্ষা ৱিশালাক্ষো লক্ষ্মীৱান্ শুভলক্ষণঃ || ১১ ||
ধর্মজ্ঞঃ সত্যসংধশ্চ প্রজানাং চ হিতে রতঃ |
যশস্ৱী জ্ঞানসংপন্নঃ শুচির্ৱশ্যঃ সমাধিমান্ || ১২ ||
প্রজাপতিসমঃ শ্রীমান্ ধাতা রিপুনিষূদনঃ |
রক্ষিতা জীৱলোকস্য ধর্মস্য পরিরক্ষিতা || ১৩ ||
রক্ষিতা স্ৱস্য ধর্মস্য স্ৱজনস্য চ রক্ষিতা |
ৱেদৱেদাংগতত্ত্ৱজ্ঞো ধনুর্ৱেদে চ নিষ্ঠিতঃ || ১৪ ||
সর্ৱশাস্ত্রার্থতত্ত্ৱজ্ঞঃ স্মৃতিমান্প্রতিভানৱান্ |
সর্ৱলোকপ্রিযঃ সাধুরদীনাত্মা ৱিচক্ষণঃ || ১৫ ||
সর্ৱদাভিগতঃ সদ্ভিঃ সমুদ্র ইৱ সিংধুভিঃ |
আর্যঃ সর্ৱসমশ্চৈৱ সদৈৱ প্রিযদর্শনঃ || ১৬ ||
স চ সর্ৱগুণোপেতঃ কৌসল্যানংদৱর্ধনঃ |
সমুদ্র ইৱ গাংভীর্যে ধৈর্যেণ হিমৱানিৱ || ১৭ ||
ৱিষ্ণুনা সদৃশো ৱীর্যে সোমৱত্প্রিযদর্শনঃ |
কালাগ্নিসদৃশঃ ক্রোধে ক্ষমযা পৃথিৱীসমঃ || ১৮ ||
ধনদেন সমস্ত্যাগে সত্যে ধর্ম ইৱাপরঃ |
তমেৱংগুণসংপন্নং রামং সত্যপরাক্রমম্ || ১৯ ||
জ্যেষ্ঠং শ্রেষ্ঠগুণৈর্যুক্তং প্রিযং দশরথঃ সুতম্ |
প্রকৃতীনাং হিতৈর্যুক্তং প্রকৃতিপ্রিযকাম্যযা || ২০ ||
যৌৱরাজ্যেন সংযোক্তুমৈচ্ছত্প্রীত্যা মহীপতিঃ |
তস্যাভিষেকসংভারান্দৃষ্ট্ৱা ভার্যাঽথ কৈকযী || ২১ ||
পূর্ৱং দত্তৱরা দেৱী ৱরমেনমযাচত |
ৱিৱাসনং চ রামস্য ভরতস্যাভিষেচনম্ || ২২ ||
স সত্যৱচনাদ্রাজা ধর্মপাশেন সংযতঃ | [চৈৱ]
ৱিৱাসযামাস সুতং রামং দশরথঃ প্রিযম্ || ২৩ ||
স জগাম ৱনং ৱীরঃ প্রতিজ্ঞামনুপালযন্ |
পিতুর্ৱচননির্দেশাত্কৈকেয্যাঃ প্রিযকারণাত্ || ২৪ ||
তং ৱ্রজংতং প্রিযো ভ্রাতা লক্ষ্মণোঽনুজগাম হ |
স্নেহাদ্ৱিনযসংপন্নঃ সুমিত্রানংদৱর্ধনঃ || ২৫ ||
ভ্রাতরং দযিতো ভ্রাতুঃ সৌভ্রাত্রমনুদর্শযন্ |
রামস্য দযিতা ভার্যা নিত্যং প্রাণসমা হিতা || ২৬ ||
জনকস্য কুলে জাতা দেৱমাযেৱ নির্মিতা |
সর্ৱলক্ষণসংপন্না নারীণামুত্তমা ৱধূঃ || ২৭ ||
সীতাপ্যনুগতা রামং শশিনং রোহিণী যথা |
পৌরৈরনুগতো দূরং পিত্রা দশরথেন চ || ২৮ ||
শৃংগিবেরপুরে সূতং গংগাকূলে ৱ্যসর্জযত্ |
গুহমাসাদ্য ধর্মাত্মা নিষাদাধিপতিং প্রিযম্ || ২৯ ||
গুহেন সহিতো রামো লক্ষ্মণেন চ সীতযা |
তে ৱনেন ৱনং গত্ৱা নদীস্তীর্ত্ৱা বহূদকাঃ || ৩০ ||
চিত্রকূটমনুপ্রাপ্য ভরদ্ৱাজস্য শাসনাত্ |
রম্যমাৱসথং কৃত্ৱা রমমাণা ৱনে ত্রযঃ || ৩১ ||
দেৱগংধর্ৱসংকাশাস্তত্র তে ন্যৱসন্সুখম্ |
চিত্রকূটং গতে রামে পুত্রশোকাতুরস্তথা || ৩২ ||
রাজা দশরথঃ স্ৱর্গং জগাম ৱিলপন্সুতম্ |
মৃতে তু তস্মিন্ভরতো ৱসিষ্ঠপ্রমুখৈর্দ্ৱিজৈঃ || ৩৩ ||
নিযুজ্যমানো রাজ্যায নৈচ্ছদ্রাজ্যং মহাবলঃ |
স জগাম ৱনং ৱীরো রামপাদপ্রসাদকঃ || ৩৪ ||
গত্ৱা তু সুমহাত্মানং রামং সত্যপরাক্রমম্ | [স মহা.]
অযাচদ্ভ্রাতরং রামমার্যভাৱপুরস্কৃতঃ || ৩৫ ||
ত্ৱমেৱ রাজা ধর্মজ্ঞ ইতি রামং ৱচোঽব্রৱীত্ |
রামোঽপি পরমোদারঃ সুমুখঃ সুমহাযশাঃ || ৩৬ ||
ন চৈচ্ছত্পিতুরাদেশাদ্রাজ্যং রামো মহাবলঃ |
পাদুকে চাস্য রাজ্যায ন্যাসং দত্ত্ৱা পুনঃ পুনঃ || ৩৭ ||
নিৱর্তযামাস ততো ভরতং ভরতাগ্রজঃ |
স কামমনৱাপ্যৈৱ রামপাদাৱুপস্পৃশন্ || ৩৮ ||
নংদিগ্রামেঽকরোদ্রাজ্যং রামাগমনকাংক্ষযা |
গতে তু ভরতে শ্রীমান্সত্যসংধো জিতেংদ্রিযঃ || ৩৯ ||
রামস্তু পুনরালক্ষ্য নাগরস্য জনস্য চ |
তত্রাগমনমেকাগ্রো দংডকান্প্রৱিৱেশ হ || ৪০ ||
প্রৱিশ্য তু মহারণ্যং রামো রাজীৱলোচনঃ |
ৱিরাধং রাক্ষসং হত্ৱা শরভংগং দদর্শ হ || ৪১ ||
সুতীক্ষ্ণং চাপ্যগস্ত্যং চ অগস্ত্যভ্রাতরং তথা |
অগস্ত্যৱচনাচ্চৈৱ জগ্রাহৈংদ্রং শরাসনম্ || ৪২ ||
খড্গং চ পরমপ্রীতস্তূণী চাক্ষযসাযকৌ |
ৱসতস্তস্য রামস্য ৱনে ৱনচরৈঃ সহ || ৪৩ ||
ঋষযোঽভ্যাগমন্সর্ৱে ৱধাযাসুররক্ষসাম্ |
স তেষাং প্রতিশুশ্রাৱ রাক্ষসানাং তথা ৱনে || ৪৪ ||
প্রতিজ্ঞাতশ্চ রামেণ ৱধঃ সংযতি রক্ষসাম্ |
ঋষীণামগ্নিকল্পানাং দংডকারণ্যৱাসিনাম্ || ৪৫ ||
তেন তত্রৈৱ ৱসতা জনস্থাননিৱাসিনী |
ৱিরূপিতা শূর্পণখা রাক্ষসী কামরূপিণী || ৪৬ ||
ততঃ শূর্পণখাৱাক্যাদুদ্যুক্তান্সর্ৱরাক্ষসান্ |
খরং ত্রিশিরসং চৈৱ দূষণং চৈৱ রাক্ষসম্ || ৪৭ ||
নিজঘান রণে রামস্তেষাং চৈৱ পদানুগান্ |
ৱনে তস্মিন্নিৱসতা জনস্থাননিৱাসিনাম্ || ৪৮ ||
রক্ষসাং নিহতান্যাসন্সহস্রাণি চতুর্দশ |
ততো জ্ঞাতিৱধং শ্রুত্ৱা রাৱণঃ ক্রোধমূর্ছিতঃ || ৪৯ ||
সহাযং ৱরযামাস মারীচং নাম রাক্ষসম্ |
ৱার্যমাণঃ সুবহুশো মারীচেন স রাৱণঃ || ৫০ ||
ন ৱিরোধো বলৱতা ক্ষমো রাৱণ তেন তে |
অনাদৃত্য তু তদ্ৱাক্যং রাৱণঃ কালচোদিতঃ || ৫১ ||
জগাম সহমারীচস্তস্যাশ্রমপদং তদা |
তেন মাযাৱিনা দূরমপৱাহ্য নৃপাত্মজৌ || ৫২ ||
জহার ভার্যাং রামস্য গৃধ্রং হত্ৱা জটাযুষম্ |
গৃধ্রং চ নিহতং দৃষ্ট্ৱা হৃতাং শ্রুত্ৱা চ মৈথিলীম্ || ৫৩ ||
রাঘৱঃ শোকসংতপ্তো ৱিললাপাকুলেংদ্রিযঃ |
ততস্তেনৈৱ শোকেন গৃধ্রং দগ্ধ্ৱা জটাযুষম্ || ৫৪ ||
মার্গমাণো ৱনে সীতাং রাক্ষসং সংদদর্শ হ |
কবংধং নাম রূপেণ ৱিকৃতং ঘোরদর্শনম্ || ৫৫ ||
তং নিহত্য মহাবাহুর্দদাহ স্ৱর্গতশ্চ সঃ |
স চাঽঽস্য কথযামাস শবরীং ধর্মচারিণীম্ || ৫৬ ||
শ্রমণীং ধর্মনিপুণামভিগচ্ছেতি রাঘৱম্ |
সোঽভ্যগচ্ছন্মহাতেজাঃ শবরীং শত্রুসূদনঃ || ৫৭ ||
শবর্যা পূজিতঃ সম্যগ্রামো দশরথাত্মজঃ |
পংপাতীরে হনুমতা সংগতো ৱানরেণ হ || ৫৮ ||
হনুমদ্ৱচনাচ্চৈৱ সুগ্রীৱেণ সমাগতঃ |
সুগ্রীৱায চ তত্সর্ৱং শংসদ্রামো মহাবলঃ || ৫৯ ||
আদিতস্তদ্যথাৱৃত্তং সীতাযাশ্চ ৱিশেষতঃ |
সুগ্রীৱশ্চাপি তত্সর্ৱং শ্রুত্ৱা রামস্য ৱানরঃ || ৬০ ||
চকার সখ্যং রামেণ প্রীতশ্চৈৱাগ্নিসাক্ষিকম্ |
ততো ৱানররাজেন ৱৈরানুকথনং প্রতি || ৬১ ||
রামাযাৱেদিতং সর্ৱং প্রণযাদ্দুঃখিতেন চ |
প্রতিজ্ঞাতং চ রামেণ তদা ৱালিৱধং প্রতি || ৬২ ||
ৱালিনশ্চ বলং তত্র কথযামাস ৱানরঃ |
সুগ্রীৱঃ শংকিতশ্চাসীন্নিত্যং ৱীর্যেণ রাঘৱে || ৬৩ ||
রাঘৱপ্রত্যযার্থং তু দুংদুভেঃ কাযমুত্তমম্ |
দর্শযামাস সুগ্রীৱো মহাপর্ৱত সন্নিভম্ || ৬৪ ||
উত্স্মযিত্ৱা মহাবাহুঃ প্রেক্ষ্য চাস্থি মহাবলঃ |
পাদাংগুষ্ঠেন চিক্ষেপ সংপূর্ণং দশযোজনম্ || ৬৫ ||
বিভেদ চ পুনঃ সালান্সপ্তৈকেন মহেষুণা |
গিরিং রসাতলং চৈৱ জনযন্প্রত্যযং তদা || ৬৬ ||
ততঃ প্রীতমনাস্তেন ৱিশ্ৱস্তঃ স মহাকপিঃ |
কিষ্কিংধাং রামসহিতো জগাম চ গুহাং তদা || ৬৭ ||
ততোঽগর্জদ্ধরিৱরঃ সুগ্রীৱো হেমপিংগলঃ |
তেন নাদেন মহতা নির্জগাম হরীশ্ৱরঃ || ৬৮ ||
অনুমান্য তদা তারাং সুগ্রীৱেণ সমাগতঃ |
নিজঘান চ তত্রৈনং শরেণৈকেন রাঘৱঃ || ৬৯ ||
ততঃ সুগ্রীৱৱচনাদ্ধত্ৱা ৱালিনমাহৱে |
সুগ্রীৱমেৱ তদ্রাজ্যে রাঘৱঃ প্রত্যপাদযত্ || ৭০ ||
স চ সর্ৱান্সমানীয ৱানরান্ৱানরর্ষভঃ |
দিশঃ প্রস্থাপযামাস দিদৃক্ষুর্জনকাত্মজাম্ || ৭১ ||
ততো গৃধ্রস্য ৱচনাত্সংপাতের্হনুমান্বলী |
শতযোজনৱিস্তীর্ণং পুপ্লুৱে লৱণার্ণৱম্ || ৭২ ||
তত্র লংকাং সমাসাদ্য পুরীং রাৱণপালিতাম্ |
দদর্শ সীতাং ধ্যাযংতীমশোকৱনিকাং গতাম্ || ৭৩ ||
নিৱেদযিত্ৱাঽভিজ্ঞানং প্রৱৃত্তিং চ নিৱেদ্য চ |
সমাশ্ৱাস্য চ ৱৈদেহীং মর্দযামাস তোরণম্ || ৭৪ ||
পংচ সেনাগ্রগান্হত্ৱা সপ্ত মংত্রিসুতানপি |
শূরমক্ষং চ নিষ্পিষ্য গ্রহণং সমুপাগমত্ || ৭৫ ||
অস্ত্রেণোন্মুক্তমাত্মানং জ্ঞাত্ৱা পৈতামহাদ্ৱরাত্ |
মর্ষযন্রাক্ষসান্ৱীরো যংত্রিণস্তান্যদৃচ্ছযা || ৭৬ ||
ততো দগ্ধ্ৱা পুরীং লংকামৃতে সীতাং চ মৈথিলীম্ |
রামায প্রিযমাখ্যাতুং পুনরাযান্মহাকপিঃ || ৭৭ ||
সোঽভিগম্য মহাত্মানং কৃত্ৱা রামং প্রদক্ষিণম্ |
ন্যৱেদযদমেযাত্মা দৃষ্টা সীতেতি তত্ত্ৱতঃ || ৭৮ ||
ততঃ সুগ্রীৱসহিতো গত্ৱা তীরং মহোদধেঃ |
সমুদ্রং ক্ষোভযামাস শরৈরাদিত্যসন্নিভৈঃ || ৭৯ ||
দর্শযামাস চাত্মানং সমুদ্রঃ সরিতাং পতিঃ |
সমুদ্রৱচনাচ্চৈৱ নলং সেতুমকারযত্ || ৮০ ||
তেন গত্ৱা পুরীং লংকাং হত্ৱা রাৱণমাহৱে |
রামঃ সীতামনুপ্রাপ্য পরাং ৱ্রীডামুপাগমত্ || ৮১ ||
তামুৱাচ ততো রামঃ পরুষং জনসংসদি |
অমৃষ্যমাণা সা সীতা ৱিৱেশ জ্ৱলনং সতী || ৮২ ||
ততোঽগ্নিৱচনাত্সীতাং জ্ঞাত্ৱা ৱিগতকল্মষাম্ |
বভৌ রামঃ সংপ্রহৃষ্টঃ পূজিতঃ সর্ৱদৈৱতৈঃ || ৮৩ ||
কর্মণা তেন মহতা ত্রৈলোক্যং সচরাচরম্ |
সদেৱর্ষিগণং তুষ্টং রাঘৱস্য মহাত্মনঃ || ৮৪ ||
অভিষিচ্য চ লংকাযাং রাক্ষসেংদ্রং ৱিভীষণম্ |
কৃতকৃত্যস্তদা রামো ৱিজ্ৱরঃ প্রমুমোদ হ || ৮৫ ||
দেৱতাভ্যো ৱরং প্রাপ্য সমুত্থাপ্য চ ৱানরান্ |
অযোধ্যাং প্রস্থিতো রামঃ পুষ্পকেণ সুহৃদ্ৱৃতঃ || ৮৬ ||
ভরদ্ৱাজাশ্রমং গত্ৱা রামঃ সত্যপরাক্রমঃ |
ভরতস্যাংতিকং রামো হনূমংতং ৱ্যসর্জযত্ || ৮৭ ||
পুনরাখ্যাযিকাং জল্পন্সুগ্রীৱসহিতশ্চ সঃ |
পুষ্পকং তত্সমারুহ্য নংদিগ্রামং যযৌ তদা || ৮৮ ||
নংদিগ্রামে জটাং হিত্ৱা ভ্রাতৃভিঃ সহিতোঽনঘঃ |
রামঃ সীতামনুপ্রাপ্য রাজ্যং পুনরৱাপ্তৱান্ || ৮৯ ||
প্রহৃষ্টমুদিতো লোকস্তুষ্টঃ পুষ্টঃ সুধার্মিকঃ | [প্রহৃষ্টো]
নিরামযো হ্যরোগশ্চ দুর্ভিক্ষভযৱর্জিতঃ || ৯০ ||
ন পুত্রমরণং কিংচিদ্দ্রক্ষ্যংতি পুরুষাঃ ক্ৱচিত্ |
নার্যশ্চাৱিধৱা নিত্যং ভৱিষ্যংতি পতিৱ্রতাঃ || ৯১ ||
ন চাগ্নিজং ভযং কিংচিন্নাপ্সু মজ্জংতি জংতৱঃ |
ন ৱাতজং ভযং কিংচিন্নাপি জ্ৱরকৃতং তথা || ৯২ ||
ন চাপি ক্ষুদ্ভযং তত্র ন তস্করভযং তথা |
নগরাণি চ রাষ্ট্রাণি ধনধান্যযুতানি চ || ৯৩ ||
নিত্যং প্রমুদিতাঃ সর্ৱে যথা কৃতযুগে তথা |
অশ্ৱমেধশতৈরিষ্ট্ৱা তথা বহুসুৱর্ণকৈঃ || ৯৪ ||
গৱাং কোট্যযুতং দত্ৱা ৱিদ্ৱদ্ভ্যো ৱিধিপূর্ৱকম্ |
অসংখ্যেযং ধনং দত্ৱা ব্রাহ্মণেভ্যো মহাযশাঃ || ৯৫ ||
রাজৱংশান্ শতগুণান্ স্থাপযিষ্যতি রাঘৱঃ |
চাতুর্ৱর্ণ্যং চ লোকেঽস্মিন্ স্ৱে স্ৱে ধর্মে নিযোক্ষ্যতি || ৯৬ ||
দশৱর্ষসহস্রাণি দশৱর্ষশতানি চ |
রামো রাজ্যমুপাসিত্ৱা ব্রহ্মলোকং প্রযাস্যতি || ৯৭ ||
ইদং পৱিত্রং পাপঘ্নং পুণ্যং ৱেদৈশ্চ সম্মিতম্ |
যঃ পঠেদ্রামচরিতং সর্ৱপাপৈঃ প্রমুচ্যতে || ৯৮ ||
এতদাখ্যানমাযুষ্যং পঠন্রামাযণং নরঃ |
সপুত্রপৌত্রঃ সগণঃ প্রেত্য স্ৱর্গে মহীযতে || ৯৯ ||
পঠন্ দ্ৱিজো ৱাগৃষভত্ৱমীযা-
-ত্স্যাত্ ক্ষত্রিযো ভূমিপতিত্ৱমীযাত্ |
ৱণিগ্জনঃ পণ্যফলত্ৱমীযা-
-জ্জনশ্চ শূদ্রোঽপি মহত্ত্ৱমীযাত্ || ১০০ ||
ইত্যার্ষে শ্রীমদ্রামাযণে ৱাল্মীকীযে আদিকাৱ্যে বালকাংডে (নারদৱাক্যং নাম) প্রথমঃ সর্গঃ || ১ ||