নিত্যানন্দকরী বরাভযকরী সৌন্দর্যরত্নাকরী
নির্ধূতাখিলদোষপাবনকরী প্রত্যক্ষমাহেশ্বরী |
প্রালেযাচলবংশপাবনকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ১ ||
নানারত্নবিচিত্রভূষণকরী হেমাম্বরাডম্বরী
মুক্তাহারবিডম্বমানবিলসদ্বক্ষোজকুম্ভান্তরী |
কাশ্মীরাগরুবাসিতাঙ্গরুচিরা কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ২ ||
যোগানন্দকরী রিপুক্ষযকরী ধর্মৈকনিষ্ঠাকরী
চন্দ্রার্কানলভাসমানলহরী ত্রৈলোক্যরক্ষাকরী |
সর্বৈশ্বর্যকরী তপঃ ফলকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৩ ||
কৈলাসাচলকন্দরালযকরী গৌরী হ্যুমাশাঙ্করী
কৌমারী নিগমার্থগোচরকরী হ্যোঙ্কারবীজাক্ষরী |
মোক্ষদ্বারকবাটপাটনকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৪ ||
দৃশ্যাদৃশ্যবিভূতিবাহনকরী ব্রহ্মাণ্ডভাণ্ডোদরী
লীলানাটকসূত্রখেলনকরী বিজ্ঞানদীপাঙ্কুরী |
শ্রীবিশ্বেশমনঃ প্রসাদনকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৫ ||
আদিক্ষান্তসমস্তবর্ণনকরী শম্ভুপ্রিযা শাঙ্করী
কাশ্মীরত্রিপুরেশ্বরী ত্রিনযনী বিশ্বেশ্বরী শর্বরী |
স্বর্গদ্বারকবাটপাটনকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৬ ||
উর্বীসর্বজনেশ্বরী জযকরী মাতা কৃপাসাগরী
নারীনীলসমানকুন্তলধরী নিত্যান্নদানেশ্বরী |
সাক্ষান্মোক্ষকরী সদা শুভকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৭ ||
দেবী সর্ববিচিত্ররত্নরচিতা দাক্ষাযণী সুন্দরী
বামা স্বাদুপযোধরা প্রিযকরী সৌভাগ্যমাহেশ্বরী |
ভক্তাভীষ্টকরী সদা শুভকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৮ ||
চন্দ্রার্কানলকোটিকোটিসদৃশী চন্দ্রাংশুবিম্বাধরী
চন্দ্রার্কাগ্নিসমানকুণ্ডলধরী চন্দ্রার্কবর্ণেশ্বরী |
মালাপুস্তকপাশসাঙ্কুশধরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ৯ ||
ক্ষত্রত্রাণকরী মহাভযহরী মাতা কৃপাসাগরী
সর্বানন্দকরী সদা শিবকরী বিশ্বেশ্বরী শ্রীধরী |
দক্ষাক্রন্দকরী নিরামযকরী কাশীপুরাধীশ্বরী
ভিক্ষাং দেহি কৃপাবলম্বনকরী মাতান্নপূর্ণেশ্বরী || ১০ ||
অন্নপূর্ণে সদাপূর্ণে শঙ্করপ্রাণবল্লভে |
জ্ঞানবৈরাগ্যসিদ্ধ্যর্থং ভিক্ষাং দেহি চ পার্বতি || ১১ ||
মাতা চ পার্বতী দেবী পিতা দেবো মহেশ্বরঃ |
বান্ধবাঃ শিবভক্তাশ্চ স্বদেশো ভুবনত্রযম্ || ১২ ||
ইতি শ্রীমত্পরমহংসপরিব্রাজকাচার্যস্য শ্রীগোবিন্দভগবত্পূজ্যপাদশিষ্যস্য শ্রীমচ্ছঙ্করভগবতঃ কৃতৌ অন্নপূর্ণা স্তোত্রম্ |