ন তাতো ন মাতা ন বংধুর্ন দাতা
ন পুত্রো ন পুত্রী ন ভৃত্যো ন ভর্তা |
ন জাযা ন ৱিদ্যা ন ৱৃত্তির্মমৈৱ
গতিস্ত্ৱং গতিস্ত্ৱং ত্ৱমেকা ভৱানি || ১ ||
ভৱাব্ধাৱপারে মহাদুঃখভীরু
পপাত প্রকামী প্রলোভী প্রমত্তঃ |
কুসংসারপাশপ্রবদ্ধঃ সদাহং
গতিস্ত্ৱং গতিস্ত্ৱং ত্ৱমেকা ভৱানি || ২ ||
ন জানামি দানং ন চ ধ্যানযোগং
ন জানামি তংত্রং ন চ স্তোত্রমংত্রম্ |
ন জানামি পূজাং ন চ ন্যাসযোগং
গতিস্ত্ৱং গতিস্ত্ৱং ত্ৱমেকা ভৱানি || ৩ ||
ন জানামি পুণ্যং ন জানামি তীর্থং
ন জানামি মুক্তিং লযং ৱা কদাচিত্ |
ন জানামি ভক্তিং ৱ্রতং ৱাপি মাত-
-র্গতিস্ত্ৱং গতিস্ত্ৱং ত্ৱমেকা ভৱানি || ৪ ||
কুকর্মী কুসংগী কুবুদ্ধিঃ কুদাসঃ
কুলাচারহীনঃ কদাচারলীনঃ |
কুদৃষ্টিঃ কুৱাক্যপ্রবংধঃ সদাহং
গতিস্ত্ৱং গতিস্ত্ৱং ত্ৱমেকা ভৱানি || ৫ ||
প্রজেশং রমেশং মহেশং সুরেশং
দিনেশং নিশীথেশ্ৱরং ৱা কদাচিত্ |
ন জানামি চান্যত্ সদাহং শরণ্যে
গতিস্ত্ৱং গতিস্ত্ৱং ত্ৱমেকা ভৱানি || ৬ ||
ৱিৱাদে ৱিষাদে প্রমাদে প্রৱাসে
জলে চানলে পর্ৱতে শত্রুমধ্যে |
অরণ্যে শরণ্যে সদা মাং প্রপাহি
গতিস্ত্ৱং গতিস্ত্ৱং ত্ৱমেকা ভৱানি || ৭ ||
অনাথো দরিদ্রো জরারোগযুক্তো
মহাক্ষীণদীনঃ সদা জাড্যৱক্ত্রঃ |
ৱিপত্তৌ প্রৱিষ্টঃ প্রনষ্টঃ সদাহং
গতিস্ত্ৱং গতিস্ত্ৱং ত্ৱমেকা ভৱানি || ৮ ||
ইতি শ্রী ভৱান্যষ্টকম্ |