জগজ্জালপালং কচত্কংঠমালং
শরচ্চংদ্রফালং মহাদৈত্যকালম্ |
নভো নীলকাযং দুরাৱারমাযং
সুপদ্মাসহাযং ভজেঽহং ভজেঽহম্ || ১ ||
সদাংভোধিৱাসং গলত্পুষ্পহাসং
জগত্সন্নিৱাসং শতাদিত্যভাসম্ |
গদাচক্রশস্ত্রং লসত্পীতৱস্ত্রং
হসচ্চারুৱক্ত্রং ভজেঽহং ভজেঽহম্ || ২ ||
রমাকংঠহারং শ্রুতিৱ্রাতসারং
জলাংতর্ৱিহারং ধরাভারহারম্ |
চিদানংদরূপং মনোহারিরূপং
ধৃতানেকরূপং ভজেঽহং ভজেঽহম্ || ৩ ||
জরাজন্মহীনং পরানংদপীনং
সমাধানলীনং সদৈৱানৱীনম্ |
জগজ্জন্মহেতুং সুরানীককেতুং
দৃঢং ৱিশ্ৱসেতুং ভজেঽহং ভজেঽহম্ || ৪ ||
কৃতাম্নাযগানং খগাধীশযানং
ৱিমুক্তের্নিদানং হরারাতিমানম্ |
স্ৱভক্তানুকূলং জগদ্ৱৃক্ষমূলং
নিরস্তার্তশূলং ভজেঽহং ভজেঽহম্ || ৫ ||
সমস্তামরেশং দ্ৱিরেফাভকেশং
জগদ্বিংবলেশং হৃদাকাশদেশম্ |
সদা দিৱ্যদেহং ৱিমুক্তাখিলেহং
সুৱৈকুংঠগেহং ভজেঽহং ভজেঽহম্ || ৬ ||
সুরালীবলিষ্ঠং ত্রিলোকীৱরিষ্ঠং
গুরূণাং গরিষ্ঠং স্ৱরূপৈকনিষ্ঠম্ |
সদা যুদ্ধধীরং মহাৱীরৱীরং
ভৱাংভোধিতীরং ভজেঽহং ভজেঽহম্ || ৭ ||
রমাৱামভাগং তলাৱিষ্টনাগং
কৃতাধীনযাগং গতারাগরাগম্ |
মুনীংদ্রৈঃ সুগীতং সুরৈঃ সংপরীতং
গুণৌঘৈরতীতং ভজেঽহং ভজেঽহম্ || ৮ ||
ইদং যস্তু নিত্যং সমাধায চিত্তং
পঠেদষ্টকং কংঠহারং মুরারেঃ |
স ৱিষ্ণোর্ৱিশোকং ধ্রুৱং যাতি লোকং
জরাজন্মশোকং পুনর্ৱিংদতে নো || ৯ ||
ইতি শ্রীমত্পরমহংস স্ৱামি ব্রহ্মানংদ ৱিরচিতং শ্রী হরি স্তোত্রম্ ||