শ্রীমত্পযোনিধিনিকেতনচক্রপাণে
ভোগীংদ্রভোগমণিরাজিতপুণ্যমূর্তে |
যোগীশ শাশ্ৱত শরণ্য ভৱাব্ধিপোত
লক্ষ্মীনৃসিংহ মম দেহি করাৱলংবম্ || ১ ||
ব্রহ্মেংদ্ররুদ্রমরুদর্ককিরীটকোটি-
-সংঘট্টিতাংঘ্রিকমলামলকাংতিকাংত |
লক্ষ্মীলসত্কুচসরোরুহরাজহংস
লক্ষ্মীনৃসিংহ মম দেহি করাৱলংবম্ || ২ ||
সংসারদাৱদহনাকরভীকরোরু-
-জ্ৱালাৱলীভিরতিদগ্ধতনূরুহস্য |
ত্ৱত্পাদপদ্মসরসীরুহমাগতস্য
লক্ষ্মীনৃসিংহ মম দেহি করাৱলংবম্ || ৩ ||
সংসারজালপতিতস্য জগন্নিৱাস
সর্ৱেংদ্রিযার্থবডিশাগ্রঝষোপমস্য |
প্রোত্কংপিতপ্রচুরতালুকমস্তকস্য
লক্ষ্মীনৃসিংহ মম দেহি করাৱলংবম্ || ৪ ||
সংসারকূপমতিঘোরমগাধমূলং
সংপ্রাপ্য দুঃখশতসর্পসমাকুলস্য |
দীনস্য দেৱ কৃপযা পদমাগতস্য
লক্ষ্মীনৃসিংহ মম দেহি করাৱলংবম্ || ৫ ||
সংসারভীকরকরীংদ্রকরাভিঘাত-
-নিষ্পীড্যমানৱপুষঃ সকলার্তিনাশ |
প্রাণপ্রযাণভৱভীতিসমাকুলস্য
লক্ষ্মীনৃসিংহ মম দেহি করাৱলংবম্ || ৬ ||
সংসারসর্পৱিষদগ্ধমহোগ্রতীৱ্র-
-দংষ্ট্রাগ্রকোটিপরিদষ্টৱিনষ্টমূর্তেঃ |
নাগারিৱাহন সুধাব্ধিনিৱাস শৌরে
লক্ষ্মীনৃসিংহ মম দেহি করাৱলংবম্ || ৭ ||
সংসারৱৃক্ষমঘবীজমনংতকর্ম-
-শাখাযুতং করণপত্রমনংগপুষ্পম্ |
আরুহ্য দুঃখফলিতং পততো দযালো [চকিতং]
লক্ষ্মীনৃসিংহ মম দেহি করাৱলংবম্ || ৮ ||
সংসারসাগরৱিশালকরালকাল-
-নক্রগ্রহগ্রসিতনিগ্রহৱিগ্রহস্য |
ৱ্যগ্রস্য রাগনিচযোর্মিনিপীডিতস্য
লক্ষ্মীনৃসিংহ মম দেহি করাৱলংবম্ || ৯ ||
সংসারসাগরনিমজ্জনমুহ্যমানং
দীনং ৱিলোকয ৱিভো করুণানিধে মাম্ |
প্রহ্লাদখেদপরিহারপরাৱতার
লক্ষ্মীনৃসিংহ মম দেহি করাৱলংবম্ || ১০ ||
সংসারঘোরগহনে চরতো মুরারে
মারোগ্রভীকরমৃগপ্রচুরার্দিতস্য |
আর্তস্য মত্সরনিদাঘসুদুঃখিতস্য
লক্ষ্মীনৃসিংহ মম দেহি করাৱলংবম্ || ১১ ||
বদ্ধ্ৱা গলে যমভটা বহুতর্জযংতঃ
কর্ষংতি যত্র ভৱপাশশতৈর্যুতং মাম্ |
একাকিনং পরৱশং চকিতং দযালো
লক্ষ্মীনৃসিংহ মম দেহি করাৱলংবম্ || ১২ ||
লক্ষ্মীপতে কমলনাভ সুরেশ ৱিষ্ণো
যজ্ঞেশ যজ্ঞ মধুসূদন ৱিশ্ৱরূপ |
ব্রহ্মণ্য কেশৱ জনার্দন ৱাসুদেৱ
লক্ষ্মীনৃসিংহ মম দেহি করাৱলংবম্ || ১৩ ||
একেন চক্রমপরেণ করেণ শংখ-
-মন্যেন সিংধুতনযামৱলংব্য তিষ্ঠন্ |
ৱামেতরেণ ৱরদাভযপদ্মচিহ্নং
লক্ষ্মীনৃসিংহ মম দেহি করাৱলংবম্ || ১৪ ||
অংধস্য মে হৃতৱিৱেকমহাধনস্য
চোরৈর্মহাবলিভিরিংদ্রিযনামধেযৈঃ |
মোহাংধকারকুহরে ৱিনিপাতিতস্য
লক্ষ্মীনৃসিংহ মম দেহি করাৱলংবম্ || ১৫ ||
প্রহ্লাদনারদপরাশরপুংডরীক-
-ৱ্যাসাদিভাগৱতপুংগৱহৃন্নিৱাস |
ভক্তানুরক্তপরিপালনপারিজাত
লক্ষ্মীনৃসিংহ মম দেহি করাৱলংবম্ || ১৬ ||
লক্ষ্মীনৃসিংহচরণাব্জমধুৱ্রতেন
স্তোত্রং কৃতং শুভকরং ভুৱি শংকরেণ |
যে তত্পঠংতি মনুজা হরিভক্তিযুক্তা-
-স্তে যাংতি তত্পদসরোজমখংডরূপম্ || ১৭ ||
ইতি শ্রীমত্পরমহংসপরিৱ্রাজকাচার্য শ্রীমচ্ছংকরাচার্য ৱিরচিতং শ্রীলক্ষ্মীনৃসিংহ করাৱলংব স্তোত্রম্ |
— অধিকশ্লোকাঃ —
সংসারযোগ সকলেপ্সিতনিত্যকর্ম
সংপ্রাপ্যদুঃখ সকলেংদ্রিযমৃত্যুনাশ |
সংকল্প সিংধুতনযাকুচ কুংকুমাংক
লক্ষ্মীনৃসিংহ মম দেহি করাৱলংবম্ || ১৮ ||
আদ্যংতশূন্যমজমৱ্যযমপ্রমেযং
আদিত্যরুদ্রনিগমাদিনুতপ্রভাৱম্ |
অংভোধিজাস্য মধুলোলুপ মত্তভৃংগ
লক্ষ্মীনৃসিংহ মম দেহি করাৱলংবম্ || ১৯ ||
ৱারাহ রাম নরসিংহ রমাদিকাংতা
ক্রীডাৱিলোল ৱিধিশূলি সুরপ্রৱংদ্য |
হংসাত্মকং পরমহংস ৱিহারলীলং
লক্ষ্মীনৃসিংহ মম দেহি করাৱলংবম্ || ২০ ||
মাতা নৃসিংহশ্চ পিতা নৃসিংহঃ
ভ্রাতা নৃসিংহশ্চ সখা নৃসিংহঃ |
ৱিদ্যা নৃসিংহো দ্রৱিণং নৃসিংহঃ
লক্ষ্মীনৃসিংহ মম দেহি করাৱলংবম্ || ২১ ||
প্রহ্লাদ মানস সরোজ ৱিহারভৃংগ
গংগাতরংগ ধৱলাংগ রমাস্থিতাংক |
শৃংগার সুংদর কিরীট লসদ্ৱরাংগ
লক্ষ্মীনৃসিংহ মম দেহি করাৱলংবম্ || ২২ ||
শ্রীশংকরার্য রচিতং সততং মনুষ্যঃ
স্তোত্রং পঠেদিহতু সত্ৱগুণপ্রসন্নং |
সদ্যোৱিমুক্ত কলুষো মুনিৱর্য গণ্যো
লক্ষ্মী পদমুপৈতি সনির্মলাত্মা || ২৩ ||
যন্মাযযোর্জিতঃ ৱপুঃ প্রচুর প্রৱাহ
মগ্নার্থ মত্রনিৱহোরু করাৱলংবং |
লক্ষ্মীনৃসিংহ চরণাব্জ মধুৱ্রতেন
স্তোত্রং কৃতং শুভকরং ভুৱি শংকরেণ || ২৪ ||
শ্রীমন্নৃসিংহ ৱিভৱে গরুডধ্ৱজায
তাপত্রযোপশমনায ভৱৌষধায |
তৃষ্ণাদি ৱৃশ্চিক জলাগ্নি ভুজংগ রোগ
ক্লেশাপহায হরযে গুরৱে নমস্তে || ২৫ ||
ইতি শ্রীলক্ষ্মীনৃসিংহ করাৱলংব স্তোত্রম্ |