স্কন্দ উবাচ |
যোগীশ্বরো মহাসেনঃ কার্তিকেযোঽগ্নিনন্দনঃ |
স্কন্দঃ কুমারঃ সেনানীঃ স্বামী শঙ্করসম্ভবঃ || ১ ||
হে স্বামিনাথ করুণাকর দীনবন্ধো
শ্রীপার্বতীশমুখপঙ্কজপদ্মবন্ধো |
শ্রীশাদিদেবগণপূজিতপাদপদ্ম
বল্লীশনাথ মম দেহি করাবলম্বম্ || ১ ||
দেবাদিদেবসুত দেবগণাধিনাথ [নুত]
দেবেন্দ্রবন্দ্য মৃদুপঙ্কজমঞ্জুপাদ |
দেবর্ষিনারদমুনীন্দ্রসুগীতকীর্তে
বল্লীশনাথ মম দেহি করাবলম্বম্ || ২ ||
নিত্যান্নদাননিরতাখিলরোগহারিন্
তস্মাত্প্রদানপরিপূরিতভক্তকাম | [ভাগ্য]
শ্রুত্যাগমপ্রণববাচ্যনিজস্বরূপ
বল্লীশনাথ মম দেহি করাবলম্বম্ || ৩ ||
ক্রৌঞ্চাসুরেন্দ্রপরিখণ্ডনশক্তিশূল-
-পাশাদিশস্ত্রপরিমণ্ডিতদিব্যপাণে | [চাপাদি]
শ্রীকুণ্ডলীশধরতুণ্ডশিখীন্দ্রবাহ
বল্লীশনাথ মম দেহি করাবলম্বম্ || ৪ ||
দেবাদিদেব রথমণ্ডলমধ্যবেদ্য
দেবেন্দ্রপীঠনগরং দৃঢচাপহস্তম্ |
শূরং নিহত্য সুরকোটিভিরীড্যমান
বল্লীশনাথ মম দেহি করাবলম্বম্ || ৫ ||
হীরাদিরত্নমণিযুক্তকিরীটহার [হারাদি]
কেযূরকুণ্ডললসত্কবচাভিরামম্ |
হে বীর তারক জযাঽমরবৃন্দবন্দ্য
বল্লীশনাথ মম দেহি করাবলম্বম্ || ৬ ||
পঞ্চাক্ষরাদিমনুমন্ত্রিতগাঙ্গতোযৈঃ
পঞ্চামৃতৈঃ প্রমুদিতেন্দ্রমুখৈর্মুনীন্দ্রৈঃ |
পট্টাভিষিক্ত হরিযুক্ত পরাসনাথ
বল্লীশনাথ মম দেহি করাবলম্বম্ || ৭ ||
শ্রীকার্তিকেয করুণামৃতপূর্ণদৃষ্ট্যা
কামাদিরোগকলুষীকৃতদুষ্টচিত্তম্ |
সিক্ত্বা তু মামবকলাধর কান্তিকান্ত্যা
বল্লীশনাথ মম দেহি করাবলম্বম্ || ৮ ||
সুব্রহ্মণ্যাষ্টকং পুণ্যং যে পঠন্তি দ্বিজোত্তমাঃ |
তে সর্বে মুক্তিমাযান্তি সুব্রহ্মণ্য প্রসাদতঃ || ৯ ||
সুব্রহ্মণ্যাষ্টকমিদং প্রাতরুত্থায যঃ পঠেত্ |
কোটিজন্মকৃতং পাপং তত্ক্ষণাদেব নশ্যতি || ১০ ||
ইতি শ্রী সুব্রহ্মণ্যাষ্টকম্ |