জগদ্ধাত্রি নমস্তুভ্যং ৱিষ্ণোশ্চ প্রিযৱল্লভে |
যতো ব্রহ্মাদযো দেৱাঃ সৃষ্টিস্থিত্যংতকারিণঃ ||
নমস্তুলসি কল্যাণি নমো ৱিষ্ণুপ্রিযে শুভে |
নমো মোক্ষপ্রদে দেৱি নমঃ সংপত্প্রদাযিকে ||
তুলসী পাতু মাং নিত্যং সর্ৱাপদ্ভ্যোঽপি সর্ৱদা |
কীর্তিতা ৱাপি স্মৃতা ৱাপি পৱিত্রযতি মানৱম্ ||
নমামি শিরসা দেৱীং তুলসীং ৱিলসত্তনুং |
যাং দৃষ্ট্ৱা পাপিনো মর্ত্যাঃ মুচ্যংতে সর্ৱকিল্বিষাত্ ||
তুলস্যা রক্ষিতং সর্ৱং জগদেতচ্চরাচরং |
যা ৱিনর্হংতি পাপানি দৃষ্ট্ৱা ৱা পাপিভির্নরৈঃ ||
নমস্তুলস্যতিতরাং যস্যৈ বদ্ধাংজলিং কলৌ |
কলযংতি সুখং সর্ৱং স্ত্রিযো ৱৈশ্যাস্তথাঽপরে ||
তুলস্যা নাপরং কিংচিদ্দৈৱতং জগতীতলে |
যথা পৱিত্রিতো লোকো ৱিষ্ণুসংগেন ৱৈষ্ণৱঃ ||
তুলস্যাঃ পল্লৱং ৱিষ্ণোঃ শিরস্যারোপিতং কলৌ |
আরোপযতি সর্ৱাণি শ্রেযাংসি ৱরমস্তকে ||
তুলস্যাং সকলা দেৱা ৱসংতি সততং যতঃ |
অতস্তামর্চযেল্লোকে সর্ৱান্ দেৱান্ সমর্চযন্ ||
নমস্তুলসি সর্ৱজ্ঞে পুরুষোত্তমৱল্লভে |
পাহি মাং সর্ৱ পাপেভ্যঃ সর্ৱসম্পত্প্রদাযিকে ||
ইতি স্তোত্রং পুরা গীতং পুংডরীকেণ ধীমতা |
ৱিষ্ণুমর্চযতা নিত্যং শোভনৈস্তুলসীদলৈঃ ||
তুলসী শ্রীর্মহালক্ষ্মীর্ৱিদ্যাৱিদ্যা যশস্ৱিনী |
ধর্ম্যা ধর্মাননা দেৱী দেৱদেৱমনঃপ্রিযা ||
লক্ষ্মীপ্রিযসখী দেৱী দ্যৌর্ভূমিরচলা চলা |
ষোডশৈতানি নামানি তুলস্যাঃ কীর্তযন্নরঃ ||
লভতে সুতরাং ভক্তিমংতে ৱিষ্ণুপদং লভেত্ |
তুলসী ভূর্মহালক্ষ্মীঃ পদ্মিনী শ্রীর্হরিপ্রিযা ||
তুলসি শ্রীসখি শুভে পাপহারিণি পুণ্যদে |
নমস্তে নারদনুতে নারাযণমনঃপ্রিযে ||
ইতি শ্রীপুংডরীককৃতং তুলসীস্তোত্রম্ ||