ধ্য়ানং
বাসুদেবেংদ্রয়োগীংদ্রং নত্বা জ্ঞানপ্রদং গুরুম্ |
মুমুক্ষূণাং হিতার্থায় তত্ত্ববোধোভিধীযতে ||

সাধনচতুষ্টযসংপন্নাধিকারিণাং মোক্ষসাধনভূতং
তত্ত্ববিবেকপ্রকারং বক্ষ্য়ামঃ |

সাধনচতুষ্টযম্
সাধনচতুষ্টয়ং কিম্ ?
নিত্য়ানিত্যবস্তুবিবেকঃ |
ইহামুত্রার্থফলভোগবিরাগঃ |
শমাদিষট্কসংপত্তিঃ |
মুমুক্ষুত্বং চেতি |

নিত্য়ানিত্যবস্তুবিবেকঃ
নিত্য়ানিত্যবস্তুবিবেকঃ কঃ ?
নিত্যবস্ত্বেকং ব্রহ্ম তদ্ব্যতিরিক্তং সর্বমনিত্যম্ |
অযমেব নিত্য়ানিত্যবস্তুবিবেকঃ |

বিরাগঃ
বিরাগঃ কঃ ?
ইহস্বর্গভোগেষু ইচ্ছারাহিত্যম্ |

শমাদিসাধনসংপত্তিঃ
শমাদিসাধনসংপত্তিঃ কা ?
শমো দম উপরমস্তিতিক্ষা শ্রদ্ধা সমাধানং চ ইতি |শমঃ কঃ ?
মনোনিগ্রহঃ |
দমঃ কঃ ?
চক্ষুরাদিবাহ্য়েংদ্রিযনিগ্রহঃ |
উপরমঃ কঃ ?
স্বধর্মানুষ্ঠানমেব |
তিতিক্ষা কা ?
শীতোষ্ণসুখদুঃখাদিসহিষ্ণুত্বম্ |
শ্রদ্ধা কীদৃশী ?
গুরুবেদাংতবাক্য়াদিষু বিশ্বাসঃ শ্রদ্ধা |
সমাধানং কিম্ ?
চিত্তৈকাগ্রতা |

মুমুক্ষুত্বং
মুমুক্ষুত্বং কিম্ ?
মোক্ষো মে ভূয়াদ্ ইতি ইচ্ছা |
এতত্ সাধনচতুষ্টযম্ |
ততস্তত্ত্ববিবেকস্য়াধিকারিণো ভবংতি |

তত্ত্ববিবেকঃ
তত্ত্ববিবেকঃ কঃ ?
আত্মা সত্য়ং তদন্যত্ সর্বং মিথ্য়েতি |আত্মা কঃ ?
স্থূলসূক্ষ্মকারণশরীরাদ্ব্যতিরিক্তঃ পংচকোশাতীতঃ সন্
অবস্থাত্রযসাক্ষী সচ্চিদানংদস্বরূপঃ সন্
যস্তিষ্ঠতি স আত্মা |

শরীরত্রয়ং (স্থূলশরীরম্)
স্থূলশরীরং কিম্ ?
পংচীকৃতপংচমহাভূতৈঃ কৃতং সত্কর্মজন্য়ং
সুখদুঃখাদিভোগাযতনং শরীরম্
অস্তি জাযতে বর্ধতে বিপরিণমতে অপক্ষীযতে বিনশ্যতীতি
ষড্বিকারবদেতত্স্থূলশরীরম্ |

শরীরত্রয়ং (সূক্ষ্মশরীরম্)
সূক্ষ্মশরীরং কিম্ ?
অপংচীকৃতপংচমহাভূতৈঃ কৃতং সত্কর্মজন্য়ং
সুখদুঃখাদিভোগসাধনং
পংচজ্ঞানেংদ্রিয়াণি পংচকর্মেংদ্রিয়াণি পংচপ্রাণাদয়ঃ
মনশ্চৈকং বুদ্ধিশ্চৈকা
এবং সপ্তদশাকলাভিঃ সহ যত্তিষ্ঠতি তত্সূক্ষ্মশরীরম্ |

জ্ঞানেংদ্রিয়াণি
শ্রোত্রং ত্বক্ চক্ষুঃ রসনা ঘ্রাণং ইতি পংচ জ্ঞানেংদ্রিয়াণি |
শ্রোত্রস্য় দিগ্দেবতা |
ত্বচো বায়ুঃ |
চক্ষুষঃ সূর্য়ঃ |
রসনায়া বরুণঃ |
ঘ্রাণস্য় অশ্বিনৌ |
ইতি জ্ঞানেংদ্রিযদেবতাঃ |
শ্রোত্রস্য় বিষয়ঃ শব্দগ্রহণম্ |
ত্বচো বিষয়ঃ স্পর্শগ্রহণম্ |
চক্ষুষো বিষয়ঃ রূপগ্রহণম্ |
রসনায়া বিষয়ঃ রসগ্রহণম্ |
ঘ্রাণস্য় বিষয়ঃ গংধগ্রহণং ইতি |

পংচকর্মেংদ্রিয়াণি
বাক্পাণিপাদপায়ূপস্থানীতি পংচকর্মেংদ্রিয়াণি |
বাচো দেবতা বহ্নিঃ |
হস্তয়োরিংদ্রঃ |
পাদয়োর্বিষ্ণুঃ |
পায়োর্মৃত্য়ুঃ |
উপস্থস্য় প্রজাপতিঃ |
ইতি কর্মেংদ্রিযদেবতাঃ |
বাচো বিষয়ঃ ভাষণম্ |
পাণ্য়োর্বিষয়ঃ বস্তুগ্রহণম্ |
পাদয়োর্বিষয়ঃ গমনম্ |
পায়োর্বিষয়ঃ মলত্য়াগঃ |
উপস্থস্য় বিষয়ঃ আনংদ ইতি |

কারণশরীরম্
কারণশরীরং কিম্ ?
অনির্বাচ্য়ানাদ্যবিদ্য়ারূপং শরীরদ্বযস্য় কারণমাত্রং
সত্স্বরূপাঽজ্ঞানং নির্বিকল্পকরূপং যদস্তি তত্কারণশরীরম্ |

অবস্থাত্রযম্
অবস্থাত্রয়ং কিম্ ?
জাগ্রত্স্বপ্নসুষুপ্ত্যবস্থাঃ |

জাগ্রদবস্থা
জাগ্রদবস্থা কা ?
শ্রোত্রাদিজ্ঞানেংদ্রিয়ৈঃ শব্দাদিবিষয়ৈশ্চ জ্ঞাযতে ইতি যত্
সা জাগ্রদাবস্থা |
স্থূল শরীরাভিমানী আত্মা বিশ্ব ইত্য়ুচ্যতে |

স্বপ্নাবস্থা
স্বপ্নাবস্থা কেতি চেত্ ?
জাগ্রদবস্থায়াং যদ্দৃষ্টং যদ্ শ্রুতম্
তজ্জনিতবাসনয়া নিদ্রাসময়ে যঃ প্রপংচঃ প্রতীযতে সা
স্বপ্নাবস্থা |
সূক্ষ্মশরীরাভিমানী আত্মা তৈজস ইত্য়ুচ্যতে |

সুষুপ্ত্যবস্থা
অতঃ সুষুপ্ত্যবস্থা কা ?
অহং কিমপি ন জানামি সুখেন ময়া নিদ্রাঽনুভূযত ইতি
সুষুপ্ত্যবস্থা |
কারণশরীরাভিমানী আত্মা প্রাজ্ঞ ইত্য়ুচ্যতে |

পংচ কোশাঃ
পংচ কোশাঃ কে ?
অন্নময়ঃ প্রাণময়ঃ মনোময়ঃ বিজ্ঞানময়ঃ আনংদমযশ্চেতি |

অন্নমযকোশঃ
অন্নময়ঃ কঃ ?
অন্নরসেনৈব ভূত্বা অন্নরসেনৈব বৃদ্ধিং প্রাপ্য় অন্নরূপপৃথিব্য়াং
যদ্বিলীযতে তদন্নময়ঃ কোশঃ স্থূলশরীরম্ |

প্রাণমযকোশঃ
প্রাণময়ঃ কঃ ?
প্রাণাদ্য়াঃ পংচবাযবঃ বাগাদীংদ্রিযপংচকং প্রাণময়ঃ কোশঃ |

মনোমযকোশঃ
মনোময়ঃ কোশঃ কঃ ?
মনশ্চ জ্ঞানেংদ্রিযপংচকং মিলিত্বা যো ভবতি স মনোময়ঃ কোশঃ |

বিজ্ঞানমযকোশঃ
বিজ্ঞানময়ঃ কঃ ?
বুদ্ধিজ্ঞানেংদ্রিযপংচকং মিলিত্বা যো ভবতি স বিজ্ঞানময়ঃ কোশঃ

আনংদমযকোশঃ
আনংদময়ঃ কঃ ?
এবমেব কারণশরীরভূতাবিদ্য়াস্থমলিনসত্ত্বং
প্রিয়াদিবৃত্তিসহিতং সত্ আনংদময়ঃ কোশঃ |
এতত্কোশপংচকম্ |

পংচকোশাতীত
মদীয়ং শরীরং মদীয়াঃ প্রাণাঃ মদীয়ং মনশ্চ
মদীয়া বুদ্ধির্মদীয়ং অজ্ঞানমিতি স্বেনৈব জ্ঞাযতে
তদ্যথা মদীযত্বেন জ্ঞাতং কটককুংডল গৃহাদিকং
স্বস্মাদ্ভিন্নং তথা পংচকোশাদিকং স্বস্মাদ্ভিন্নম্
মদীযত্বেন জ্ঞাতমাত্মা ন ভবতি ||

আত্মন্
আত্মা তর্হি কঃ ?
সচ্চিদানংদস্বরূপঃ |
সত্কিম্ ?
কালত্রয়েঽপি তিষ্ঠতীতি সত্ |
চিত্কিম্ ?
জ্ঞানস্বরূপঃ |
আনংদঃ কঃ ?
সুখস্বরূপঃ |
এবং সচ্চিদানংদস্বরূপং স্বাত্মানং বিজানীয়াত্ |

জগত্
অথ চতুর্বিংশতিতত্ত্বোত্পত্তিপ্রকারং বক্ষ্য়ামঃ |

মায়া
ব্রহ্মাশ্রয়া সত্ত্বরজস্তমোগুণাত্মিকা মায়া অস্তি |

পংচভূতাঃ
ততঃ আকাশঃ সংভূতঃ |
আকাশাদ্ বায়ুঃ |
বায়োস্তেজঃ |
তেজস আপঃ |
অভ্ধয়ঃ পৃথিবী |

সত্ত্বগুণঃ
এতেষাং পংচতত্ত্বানাং মধ্য়ে
আকাশস্য় সাত্বিকাংশাত্ শ্রোত্রেংদ্রিয়ং সংভূতম্ |
বায়োঃ সাত্বিকাংশাত্ ত্বগিংদ্রিয়ং সংভূতম্ |
অগ্নেঃ সাত্বিকাংশাত্ চক্ষুরিংদ্রিয়ং সংভূতম্ |
জলস্য় সাত্বিকাংশাত্ রসনেংদ্রিয়ং সংভূতম্ |
পৃথিব্য়াঃ সাত্বিকাংশাত্ ঘ্রাণেংদ্রিয়ং সংভূতম্ |

অংতঃকরণ
এতেষাং পংচতত্ত্বানাং সমষ্টিসাত্বিকাংশাত্
মনোবুদ্ধ্যহংকার চিত্তাংতঃকরণানি সংভূতানি |
সংকল্পবিকল্পাত্মকং মনঃ |
নিশ্চয়াত্মিকা বুদ্ধিঃ |
অহংকর্তা অহংকারঃ |
চিংতনকর্তৃ চিত্তম্ |
মনসো দেবতা চংদ্রমাঃ |
বুদ্ধে ব্রহ্মা |
অহংকারস্য় রুদ্রঃ |
চিত্তস্য় বাসুদেবঃ |

রজোগুণঃ
এতেষাং পংচতত্ত্বানাং মধ্য়ে
আকাশস্য় রাজসাংশাত্ বাগিংদ্রিয়ং সংভূতম্ |
বায়োঃ রাজসাংশাত্ পাণীংদ্রিয়ং সংভূতম্ |
বন্হেঃ রাজসাংশাত্ পাদেংদ্রিয়ং সংভূতম্ |
জলস্য় রাজসাংশাত্ উপস্থেংদ্রিয়ং সংভূতম্ |
পৃথিব্য়া রাজসাংশাত্ গুদেংদ্রিয়ং সংভূতম্ |
এতেষাং সমষ্টিরাজসাংশাত্ পংচপ্রাণাঃ সংভূতাঃ |

তমোগুণঃ
এতেষাং পংচতত্ত্বানাং তামসাংশাত্
পংচীকৃতপংচতত্ত্বানি ভবংতি |
পংচীকরণং কথং ইতি চেত্ |
এতেষাং পংচমহাভূতানাং তামসাংশস্বরূপম্
একমেকং ভূতং দ্বিধা বিভজ্য় একমেকমর্ধং পৃথক্
তূষ্ণীং ব্যবস্থাপ্য় অপরমপরমর্ধং চতুর্ধাং বিভজ্য়
স্বার্ধমন্য়েষু অর্ধেষু স্বভাগচতুষ্টযসংয়োজনং কার্যম্ |
তদা পংচীকরণং ভবতি |
এতেভ্য়ঃ পংচীকৃতপংচমহাভূতেভ্য়ঃ স্থূলশরীরং ভবতি |
এবং পিংডব্রহ্মাংডয়োরৈক্য়ং সংভূতম্ |

জীবঃ, ঈশ্বরঃ চ
স্থূলশরীরাভিমানি জীবনামকং ব্রহ্মপ্রতিবিংবং ভবতি |
স এব জীবঃ প্রকৃত্য়া স্বস্মাত্ ঈশ্বরং ভিন্নত্বেন জানাতি |
অবিদ্য়োপাধিঃ সন্ আত্মা জীব ইত্য়ুচ্যতে |
মায়োপাধিঃ সন্ ঈশ্বর ইত্য়ুচ্যতে |
এবং উপাধিভেদাত্ জীবেশ্বরভেদদৃষ্টিঃ যাবত্পর্য়ংতং তিষ্ঠতি
তাবত্পর্য়ংতং জন্মমরণাদিরূপসংসারো ন নিবর্ততে |
তস্মাত্কারণান্ন জীবেশ্বরয়োর্ভেদবুদ্ধিঃ স্বীকার্য়া |

তত্ ত্বং অসি
ননু সাহংকারস্য় কিংচিজ্জ্ঞস্য় জীবস্য় নিরহংকারস্য় সর্বজ্ঞস্য়
ঈশ্বরস্য় তত্ত্বমসীতি মহাবাক্য়াত্ কথমভেদবুদ্ধিঃ স্য়াদুভয়োঃ
বিরুদ্ধধর্মাক্রাংতত্বাত্ |
ইতি চেন্ন | স্থূলসূক্ষ্মশরীরাভিমানী ত্বংপদবাচ্য়ার্থঃ |
উপাধিবিনির্মুক্তং সমাধিদশাসংপন্নং শুদ্ধং চৈতন্য়ং
ত্বংপদলক্ষ্য়ার্থঃ |
এবং সর্বজ্ঞত্বাদিবিশিষ্ট ঈশ্বরঃ তত্পদবাচ্য়ার্থঃ |
উপাধিশূন্য়ং শুদ্ধচৈতন্য়ং তত্পদলক্ষ্য়ার্থঃ |
এবং চ জীবেশ্বরয়ো চৈতন্যরূপেণাঽভেদে বাধকাভাবঃ |

জীবন্মুক্তঃ
এবং চ বেদাংতবাক্য়ৈঃ সদ্গুরূপদেশেন চ সর্বেষ্বপি
ভূতেষু যেষাং
ব্রহ্মবুদ্ধিরুত্পন্না তে জীবন্মুক্তাঃ ইত্যর্থঃ |ননু জীবন্মুক্তঃ কঃ ?
যথা দেহোঽহং পুরুষোঽহং ব্রাহ্মণোঽহং শূদ্রোঽহমস্মীতি
দৃঢনিশ্চযস্তথা নাহং ব্রাহ্মণঃ ন শূদ্রঃ ন পুরুষঃ
কিংতু অসংগঃ সচ্চিদানংদ স্বরূপঃ প্রকাশরূপঃ সর্বাংতর্য়ামী
চিদাকাশরূপোঽস্মীতি দৃঢনিশ্চয়
রূপোঽপরোক্ষজ্ঞানবান্ জীবন্মুক্তঃ ||ব্রহ্মৈবাহমস্মীত্যপরোক্ষজ্ঞানেন নিখিলকর্মবংধবিনির্মুক্তঃ
স্য়াত্ |

কর্মাণি
কর্মাণি কতিবিধানি সংতীতি চেত্
আগামিসংচিতপ্রারব্ধভেদেন ত্রিবিধানি সংতি |

আগামি কর্ম
জ্ঞানোত্পত্ত্যনংতরং জ্ঞানিদেহকৃতং পুণ্যপাপরূপং কর্ম
যদস্তি তদাগামীত্যভিধীযতে |

সংচিত কর্ম
সংচিতং কর্ম কিম্ ?
অনংতকোটিজন্মনাং বীজভূতং সত্ যত্কর্মজাতং পূর্বার্জিতং
তিষ্ঠতি তত্ সংচিতং জ্ঞেযম্ |

প্রারব্ধ কর্ম
প্রারব্ধং কর্ম কিমিতি চেত্ |
ইদং শরীরমুত্পাদ্য় ইহ লোকে এবং সুখদুঃখাদিপ্রদং যত্কর্ম
তত্প্রারব্ধং
ভোগেন নষ্টং ভবতি প্রারব্ধকর্মণাং ভোগাদেব ক্ষয় ইতি |

কর্ম মুক্তঃ
সংচিতং কর্ম ব্রহ্মৈবাহমিতি নিশ্চয়াত্মকজ্ঞানেন নশ্যতি |আগামি কর্ম অপি জ্ঞানেন নশ্যতি কিংচ আগামি কর্মণাং
নলিনীদলগতজলবত্ জ্ঞানিনাং সংবংধো নাস্তি |

জ্ঞানিঃ
কিংচ যে জ্ঞানিনং স্তুবংতি ভজংতি অর্চয়ংতি তান্প্রতি
জ্ঞানিকৃতং আগামি পুণ্য়ং গচ্ছতি |
যে জ্ঞানিনং নিংদংতি দ্বিষংতি দুঃখপ্রদানং কুর্বংতি তান্প্রতি
জ্ঞানিকৃতং সর্বমাগামি ক্রিযমাণং যদবাচ্য়ং কর্ম
পাপাত্মকং তদ্গচ্ছতি |
সুহৃদঃ পুণ্যকৃতং দুর্হৃদঃ পাপকৃত্য়ং গৃহ্ণংতি |

ব্রহ্মানংদম্
তথা চাত্মবিত্সংসারং তীর্ত্বা ব্রহ্মানংদমিহৈব প্রাপ্নোতি |
তরতি শোকমাত্মবিত্ ইতি শ্রুতেঃ |
তনুং ত্যজতু বা কাশ্য়াং শ্বপচস্য় গৃহেঽথ বা |
জ্ঞানসংপ্রাপ্তিসময়ে মুক্তাঽসৌ বিগতাশয়ঃ | ইতি স্মৃতেশ্চ |ইতি শ্রীশংকরভগবত্পাদাচার্যপ্রণীতঃ তত্ত্ববোধপ্রকরণং সমাপ্তম্ |