পশূনাং পতিং পাপনাশং পরেশং
গজেংদ্রস্য কৃত্তিং ৱসানং ৱরেণ্যম্ |
জটাজূটমধ্যে স্ফুরদ্গাংগৱারিং
মহাদেৱমেকং স্মরামি স্মরারিম্ || ১ ||
মহেশং সুরেশং সুরারাতিনাশং
ৱিভুং ৱিশ্ৱনাথং ৱিভূত্যংগভূষম্ |
ৱিরূপাক্ষমিংদ্ৱর্কৱহ্নিত্রিনেত্রং
সদানংদমীডে প্রভুং পংচৱক্ত্রম্ || ২ ||
গিরীশং গণেশং গলে নীলৱর্ণং
গৱেংদ্রাধিরূঢং গুণাতীতরূপম্ |
ভৱং ভাস্ৱরং ভস্মনা ভূষিতাংগং
ভৱানীকলত্রং ভজে পংচৱক্ত্রম্ || ৩ ||
শিৱাকাংত শংভো শশাংকার্ধমৌলে
মহেশান শূলিন্ জটাজূটধারিন্ |
ত্ৱমেকো জগদ্ৱ্যাপকো ৱিশ্ৱরূপঃ
প্রসীদ প্রসীদ প্রভো পূর্ণরূপ || ৪ ||
পরাত্মানমেকং জগদ্বীজমাদ্যং
নিরীহং নিরাকারমোংকারৱেদ্যম্ |
যতো জাযতে পাল্যতে যেন ৱিশ্ৱং
তমীশং ভজে লীযতে যত্র ৱিশ্ৱম্ || ৫ ||
ন ভূমির্ন চাপো ন ৱহ্নির্ন ৱাযু-
-র্ন চাকাশমাস্তে ন তংদ্রা ন নিদ্রা |
ন চোষ্ণং ন শীতং ন দেশো ন ৱেষো
ন যস্যাস্তি মূর্তিস্ত্রিমূর্তিং তমীডে || ৬ ||
অজং শাশ্ৱতং কারণং কারণানাং
শিৱং কেৱলং ভাসকং ভাসকানাম্ |
তুরীযং তমঃপারমাদ্যংতহীনং
প্রপদ্যে পরং পাৱনং দ্ৱৈতহীনম্ || ৭ ||
নমস্তে নমস্তে ৱিভো ৱিশ্ৱমূর্তে
নমস্তে নমস্তে চিদানংদমূর্তে |
নমস্তে নমস্তে তপোযোগগম্য
নমস্তে নমস্তে শ্রুতিজ্ঞানগম্য || ৮ ||
প্রভো শূলপাণে ৱিভো ৱিশ্ৱনাথ
মহাদেৱ শংভো মহেশ ত্রিনেত্র |
শিৱাকাংত শাংত স্মরারে পুরারে
ত্ৱদন্যো ৱরেণ্যো ন মান্যো ন গণ্যঃ || ৯ ||
শংভো মহেশ করুণাময শূলপাণে
গৌরীপতে পশুপতে পশুপাশনাশিন্ |
কাশীপতে করুণযা জগদেতদেক-
-স্ত্ৱং হংসি পাসি ৱিদধাসি মহেশ্ৱরোঽসি || ১০ ||
ত্ৱত্তো জগদ্ভৱতি দেৱ ভৱ স্মরারে
ত্ৱয্যেৱ তিষ্ঠতি জগন্মৃড ৱিশ্ৱনাথ |
ত্ৱয্যেৱ গচ্ছতি লযং জগদেতদীশ
লিংগাত্মকে হর চরাচরৱিশ্ৱরূপিন্ || ১১ ||
ইতি শ্রীমত্পরমহংস পরিৱ্রাজকাচার্য শ্রীমচ্ছংকরাচার্য ৱিরচিতং ৱেদসার শিৱ স্তোত্রং সংপূর্ণম্ |