సర్వదా సర్వభావేన భజనీయో వ్రజాధిపః |
స్వస్యాయమేవ ధర్మో హి నాన్యః క్వాపి కదాచన || ౧ ||
ఏవం సదా స్మ కర్తవ్యం స్వయమేవ కరిష్యతి |
ప్రభుః సర్వసమర్థో హి తతో నిశ్చింతతాం వ్రజేత్ || ౨ ||
యది శ్రీగోకులాధీశో ధృతః సర్వాత్మనా హృది |
తతః కిమపరం బ్రూహి లౌకికైర్వైదికైరపి || ౩ ||
అతః సర్వాత్మనా శశ్వద్గోకులేశ్వరపాదయోః |
స్మరణం భజనం చాపి న త్యాజ్యమితి మే మతిః || ౪ ||
ఇతి శ్రీవల్లభాచార్య విరచితం చతుః శ్లోకీ స్తోత్రమ్ ||