పురా ద్విజః కశ్చన దేవదత్తో
నామ ప్రజార్థం తమసాసమీపే |
కుర్వన్ మఖం గోభిలశాపవాచా
లేభే సుతం మూఢమనంతదుఃఖః || ౧౨-౧ ||
ఉతథ్యనామా వవృధే స బాలో
మూఢస్తు దృష్టం న దదర్శ కించిత్ |
శ్రుతం న శుశ్రావ జగాద నైవ
పృష్టో న చ స్నానజపాది చక్రే || ౧౨-౨ ||
ఇతస్తతోఽటన్ సమవాప్తగంగో
జలే నిమజ్జన్ ప్రపిబంస్తదేవ |
వసన్ మునీనాముటజేషు వేద-
-మంత్రాంశ్చ శృణ్వన్ స దినాని నిన్యే || ౧౨-౩ ||
క్రమేణ సత్సంగవివృద్ధసత్వః
సత్యవ్రతః సత్యతపాశ్చ భూత్వా |
నాసత్యవాక్ త్వత్కృపయా స మూఢో-
-ఽప్యున్మీలితాంతర్నయనో బభూవ || ౧౨-౪ ||
కులం పవిత్రం జననీ విశుద్ధా
పితా చ సత్కర్మరతః సదా మే |
మయా కృతం నైవ నిషిద్ధకర్మ
తథాఽపి మూఢోఽస్మి జనైశ్చ నింద్యః || ౧౨-౫ ||
జన్మాంతరే కిం ను కృతం మయాఽఘం
కిం వా న విద్యాఽర్థి జనస్య దత్తా |
గ్రంథోఽప్యదత్తః కిము పూజ్యపూజా
కృతా న కిం వా విధివన్న జానే || ౧౨-౬ ||
నాకారణం కార్యమితీర్యతే హి
దైవం బలిష్ఠం దురతిక్రమం చ |
తతోఽత్ర మూఢో విఫలీకృతోఽస్మి
వంధ్యద్రువన్నిర్జలమేఘవచ్చ || ౧౨-౭ ||
ఇత్యాది సంచింత్య వనే స్థితః స
కదాచిదేకం రుధిరాప్ళుతాంగమ్ |
బీభత్సరూపం కిటిమేష పశ్య-
-న్నయ్యయ్య ఇత్యుత్స్వనముచ్చచార || ౧౨-౮ ||
శరేణ విద్ధః స కిరిర్భయార్తః
ప్రవేపమానో మునివాసదేశే |
అంతర్నికుంజస్య గతశ్చ దైవా-
-దదృశ్యతామాప భయార్తిహంత్రి || ౧౨-౯ ||
వినా మకారం చ వినా చ భక్తి-
-ముచ్చార్య వాగ్బీజమనుం పవిత్రమ్ |
ప్రసన్నబుద్ధిః కృపయా తవైష
బభూవ దూరీకృతసర్వపాపః || ౧౨-౧౦ ||
నాహం కవిర్గానవిచక్షణో న
నటో న శిల్పాదిషు న ప్రవీణః |
పశ్యాత్ర మాం మూఢమనన్యబంధుం
ప్రసన్నబుద్ధిం కురు మాం నమస్తే || ౧౨-౧౧ ||