bha̠dra-ṅkarṇē̍bhi-śśṛṇu̠yāma̍ dēvāḥ |
bha̠dra-mpa̍śyēmā̠kṣabhi̠ryaja̍trāḥ |
sthi̠rairaṅgai̎stuṣṭu̠vāgṃsa̍sta̠nūbhi̍ḥ |
vyaśē̍ma dē̠vahi̍ta̠ṃ yadāyu̍ḥ ||
sva̠sti na̠ indrō̍ vṛ̠ddhaśra̍vāḥ |
sva̍sti na̍ḥ pū̠ṣā vi̠śvavē̍dāḥ |
sva̠̠stina̠stārkṣyō̠ ari̍ṣṭanēmiḥ |
sva̠sti nō̠ bṛha̠spati̍rdadhātu ||
ōṃ śānti̠-śśānti̠-śśānti̍ḥ ||

yō̍-‘pā-mpuṣpa̠ṃ vēda̍ |
puṣpa̍vā-npra̠jāvā̎-npaśu̠mā-nbha̍vati |
cha̠ndramā̠ vā a̠pā-mpuṣpam̎ |
puṣpa̍vā-npra̠jāvā̎-npaśu̠mā-nbha̍vati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

a̠gnirvā a̠pāmā̠yata̍nam |
ā̠yata̍navā-nbhavati |
yō̎-‘gnērā̠yata̍na̠ṃ vēda̍ |
ā̠yata̍navā-nbhavati |
āpō̠vā a̠gnērā̠yata̍nam |
ā̠yata̍navā-nbhavati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

vā̠yurvā a̠pāmā̠yata̍nam |
ā̠yata̍navā-nbhavati |
yō vā̠yōrā̠yata̍na̠ṃ vēda̍ |
ā̠yata̍navā-nbhavati |
āpō̠ vai vā̠yōrā̠yata̍nam |
ā̠yata̍navā-nbhavati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

a̠sau vai tapa̍nna̠pāmā̠yata̍nam |
ā̠yata̍navā-nbhavati |
yō̍-‘muṣya̠tapa̍ta ā̠yata̍na̠ṃ vēda̍ |
ā̠yata̍navā-nbhavati |
āpō̠ vā a̠muṣya̠tapa̍ta ā̠yata̍nam |
ā̠yata̍navā-nbhavati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

cha̠ndramā̠ vā a̠pāmā̠yata̍nam |
ā̠yata̍navā-nbhavati |
yaścha̠ndrama̍sa ā̠yata̍na̠ṃ vēda̍ |
ā̠yata̍navā-nbhavati |
āpō̠ vai cha̠ndrama̍sa ā̠yata̍nam |
ā̠yata̍navā-nbhavati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

nakṣatra̍trāṇi̠ vā a̠pāmā̠yata̍nam |
ā̠yata̍navā-nbhavati |
yō nakṣatra̍trāṇāmā̠yata̍na̠ṃ vēda̍ |
ā̠yata̍navā-nbhavati |
āpō̠ vai nakṣa̍trāṇāmā̠yata̍nam |
ā̠yata̍navā-nbhavati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

pa̠rjanyō̠ vā a̠pāmā̠yata̍nam |
ā̠yata̍navā-nbhavati |
yaḥ pa̠rjanya̍syā̠yata̍na̠ṃ vēda̍ |
ā̠yata̍navā-nbhavati |
āpō̠ vai pa̠rjanya̍syā̠yata̍nam |
ā̠yata̍navā-nbhavati |
ya ē̠vaṃ vēda̍ |
yō̍-‘pāmā̠yata̍na̠ṃ vēda̍ |
ā̠yata̍navā-nbhavati ||

sa̠ṃva̠tsa̠rō vā a̠pāmā̠yata̍na̠m |
ā̠yata̍navā-nbhavati |
ya-ssa̍ṃvatsa̠rasyā̠yata̍na̠ṃ vēda̍ |
ā̠yata̍navā-nbhavati |
āpō̠ vai sa̍ṃvatsa̠rasyā̠yata̍nam |
ā̠yata̍navā-nbhavati |
ya ēvaṃ vēda̍ |
yō̎-‘phsu nāva̠-mprati̍ṣṭhitā̠ṃ vēda̍ |
pratyē̠va ti̍ṣṭhati ||

ōṃ rā̠jā̠dhi̠rā̠jāya̍ prasahya sā̠hinē̎ |
namō̍ va̠yaṃ vai̎śrava̠ṇāya̍ kurmahē |
sa mē̠ kāmā̠n kāma̠ kāmā̍ya̠ mahyam̎ |
kā̠mē̠śva̠rō vai̎śrava̠ṇō da̍dātu |
ku̠bē̠rāya̍ vaiśrava̠ṇāya̍ |
ma̠hā̠rājāya̠ nama̍ḥ ||

ō̎-ntadbra̠hma |
ō̎-ntadvā̠yuḥ |
ō̎-ntadā̠tmā |
ō̎-ntathsa̠tyam |
ō̎-ntatsarvam̎ |
ō̎-ntatpurō̠rnamaḥ ||

antaścharati̍ bhūtē̠ṣu guhāyāṃ vi̍śvamū̠rtiṣu |
tvaṃ yajñastvaṃ vaṣaṭkārastva-mindrastvagṃ
rudrastvaṃ viṣṇustva-mbrahmatva̍-mprajā̠patiḥ |
tva-nta̍dāpa̠ āpō̠ jyōtī̠rasō̠-‘mṛta-mbrahma̠ bhūrbhuva̠ssuva̠rōm |

īśānassarva̍ vidyā̠nāmīśvarassarva̍bhūtā̠nāṃ
brahmādhi̍pati̠-rbrahma̠ṇō-‘dhi̍pati̠-rbrahmā̍ śi̠vō mē̍ astu sadāśi̠vōm |

tadviṣṇō̎ḥ para̠ma-mpa̠dagṃ sadā̍ paśyanti sū̠raya̍ḥ |
di̠vīva̠ chakṣu̠rāta̍tam |
tadviprā̍sō vipa̠nyavō̍ jāgṛ̠vāgṃ sassami̍ndhatē |
viṣnō̠ryatpa̍ra̠ma-mpa̠dam |

ṛtagṃ sa̠tya-mpa̍ra-mbra̠hma̠ pu̠ruṣa̍-ṅkṛṣṇa̠piṅga̍lam |
ū̠rdhvarē̍taṃ vi̍rūpā̠kṣa̠ṃ vi̠śvarū̍pāya̠ vai namō̠ nama̍ḥ ||

ō-nnā̠rā̠ya̠ṇāya̍ vi̠dmahē̍ vāsudē̠vāya̍ dhīmahi |
tannō̍ viṣṇuḥ prachō̠dayā̎t ||

ōṃ śānti̠-śśānti̠-śśānti̍ḥ |