વિશ્વેશ્વરાય નરકાર્ણવતારણાય
કર્ણામૃતાય શશિશેખરધારણાય |
કર્પૂરકાન્તિધવલાય જટાધરાય
દારિદ્ર્યદુઃખદહનાય નમઃ શિવાય || ૧ ||
ગૌરીપ્રિયાય રજનીશકલાધરાય
કાલાન્તકાય ભુજગાધિપકઙ્કણાય |
ગઙ્ગાધરાય ગજરાજવિમર્દનાય
દારિદ્ર્યદુઃખદહનાય નમઃ શિવાય || ૨ ||
ભક્તિપ્રિયાય ભવરોગભયાપહાય
ઉગ્રાય દુઃખભવસાગરતારણાય |
જ્યોતિર્મયાય ગુણનામસુનૃત્યકાય
દારિદ્ર્યદુઃખદહનાય નમઃ શિવાય || ૩ ||
ચર્મામ્બરાય શવભસ્મવિલેપનાય
ફાલેક્ષણાય મણિકુણ્ડલમણ્ડિતાય |
મઞ્જીરપાદયુગલાય જટાધરાય
દારિદ્ર્યદુઃખદહનાય નમઃ શિવાય || ૪ ||
પઞ્ચાનનાય ફણિરાજવિભૂષણાય
હેમાંશુકાય ભુવનત્રયમણ્ડિતાય |
આનન્દભૂમિવરદાય તમોમયાય
દારિદ્ર્યદુઃખદહનાય નમઃ શિવાય || ૫ ||
ગૌરીવિલાસભવનાય મહેશ્વરાય
પઞ્ચાનનાય શરણાગતકલ્પકાય |
શર્વાય સર્વજગતામધિપાય તસ્મૈ
દારિદ્ર્યદુઃખદહનાય નમઃ શિવાય || ૬ ||
ભાનુપ્રિયાય ભવસાગરતારણાય
કાલાન્તકાય કમલાસનપૂજિતાય |
નેત્રત્રયાય શુભલક્ષણ લક્ષિતાય
દારિદ્ર્યદુઃખદહનાય નમઃ શિવાય || ૭ ||
રામપ્રિયાય રઘુનાથવરપ્રદાય
નાગપ્રિયાય નરકાર્ણવતારણાય |
પુણ્યેષુ પુણ્યભરિતાય સુરાર્ચિતાય
દારિદ્ર્યદુઃખદહનાય નમઃ શિવાય || ૮ ||
મુક્તેશ્વરાય ફલદાય ગણેશ્વરાય
ગીતપ્રિયાય વૃષભેશ્વરવાહનાય |
માતઙ્ગચર્મવસનાય મહેશ્વરાય
દારિદ્ર્યદુઃખદહનાય નમઃ શિવાય || ૯ ||
વસિષ્ઠેન કૃતં સ્તોત્રં સર્વદારિદ્ર્યનાશનમ્ |
સર્વસમ્પત્કરં શીઘ્રં પુત્રપૌત્રાદિવર્ધનમ્ || ૧૦ ||
ઇતિ શ્રીવસિષ્ઠ કૃત દારિદ્ર્યદહન સ્તોત્રમ્ |