અસ્ય શ્રીચંડીકવચસ્ય બ્રહ્મા ઋષિઃ, અનુષ્ટુપ્ છંદઃ, શ્રીચામુંડા દેવતા, અંગન્યાસોક્તમાતરો બીજં, દિગ્બંધદેવતાસ્તત્વં, શ્રીજગદંબાપ્રીત્યર્થે સપ્તશતી પાઠાંગ જપે વિનિયોગઃ |
ઓં નમશ્ચંડિકાયૈ |
માર્કંડેય ઉવાચ |
યદ્ગુહ્યં પરમં લોકે સર્વરક્ષાકરં નૃણામ્ |
યન્ન કસ્યચિદાખ્યાતં તન્મે બ્રૂહિ પિતામહ || ૧ ||
બ્રહ્મોવાચ |
અસ્તિ ગુહ્યતમં વિપ્ર સર્વભૂતોપકારકમ્ |
દેવ્યાસ્તુ કવચં પુણ્યં તચ્છૃણુષ્વ મહામુને || ૨ ||
પ્રથમં શૈલપુત્રીતિ દ્વિતીયં બ્રહ્મચારિણી |
તૃતીયં ચંદ્રઘંટેતિ કૂષ્માંડેતિ ચતુર્થકમ્ || ૩ ||
પંચમં સ્કંદમાતેતિ ષષ્ઠં કાત્યાયનીતિ ચ |
સપ્તમં કાલરાત્રીતિ મહાગૌરીતિ ચાષ્ટમમ્ || ૪ ||
નવમં સિદ્ધિદાત્રી ચ નવદુર્ગાઃ પ્રકીર્તિતાઃ |
ઉક્તાન્યેતાનિ નામાનિ બ્રહ્મણૈવ મહાત્મના || ૫ ||
અગ્નિના દહ્યમાનસ્તુ શત્રુમધ્યે ગતો રણે |
વિષમે દુર્ગમે ચૈવ ભયાર્તાઃ શરણં ગતાઃ || ૬ ||
ન તેષાં જાયતે કિંચિદશુભં રણસંકટે |
નાપદં તસ્ય પશ્યામિ શોકદુઃખભયં ન હિ || ૭ ||
યૈસ્તુ ભક્ત્યા સ્મૃતા નૂનં તેષાં વૃદ્ધિઃ પ્રજાયતે | [સિદ્ધિઃ]
યે ત્વાં સ્મરંતિ દેવેશિ રક્ષસે તાન્ન સંશયઃ || ૮ ||
પ્રેતસંસ્થા તુ ચામુંડા વારાહી મહિષાસના |
ઐંદ્રી ગજસમારૂઢા વૈષ્ણવી ગરુડાસના || ૯ ||
માહેશ્વરી વૃષારૂઢા કૌમારી શિખિવાહના |
લક્ષ્મીઃ પદ્માસના દેવી પદ્મહસ્તા હરિપ્રિયા || ૧૦ ||
શ્વેતરૂપધરા દેવી ઈશ્વરી વૃષવાહના |
બ્રાહ્મી હંસસમારૂઢા સર્વાભરણભૂષિતા || ૧૧ ||
ઇત્યેતા માતરઃ સર્વાઃ સર્વયોગસમન્વિતાઃ |
નાનાભરણશોભાઢ્યા નાનારત્નોપશોભિતાઃ || ૧૨ ||
દૃશ્યંતે રથમારૂઢા દેવ્યઃ ક્રોધસમાકુલાઃ |
શંખં ચક્રં ગદાં શક્તિં હલં ચ મુસલાયુધમ્ || ૧૩ ||
ખેટકં તોમરં ચૈવ પરશું પાશમેવ ચ |
કુંતાયુધં ત્રિશૂલં ચ શાર્ઙ્ગમાયુધમુત્તમમ્ || ૧૪ ||
દૈત્યાનાં દેહનાશાય ભક્તાનામભયાય ચ |
ધારયંત્યાયુધાનીત્થં દેવાનાં ચ હિતાય વૈ || ૧૫ ||
નમસ્તેઽસ્તુ મહારૌદ્રે મહાઘોરપરાક્રમે |
મહાબલે મહોત્સાહે મહાભયવિનાશિનિ || ૧૬ ||
ત્રાહિ માં દેવિ દુષ્પ્રેક્ષ્યે શત્રૂણાં ભયવર્ધિનિ |
પ્રાચ્યાં રક્ષતુ મામૈંદ્રી આગ્નેય્યામગ્નિદેવતા || ૧૭ ||
દક્ષિણેઽવતુ વારાહી નૈરૃત્યાં ખડ્ગધારિણી |
પ્રતીચ્યાં વારુણી રક્ષેદ્વાયવ્યાં મૃગવાહિની || ૧૮ ||
ઉદીચ્યાં રક્ષ કૌબેરી ઈશાન્યાં શૂલધારિણી | [કૌમારી]
ઊર્ધ્વં બ્રહ્માણી મે રક્ષેદધસ્તાદ્વૈષ્ણવી તથા || ૧૯ ||
એવં દશ દિશો રક્ષેચ્ચામુંડા શવવાહના |
જયા મે ચાગ્રતઃ પાતુ વિજયા પાતુ પૃષ્ઠતઃ || ૨૦ ||
અજિતા વામપાર્શ્વે તુ દક્ષિણે ચાપરાજિતા |
શિખાં મે દ્યોતિની રક્ષેદુમા મૂર્ધ્નિ વ્યવસ્થિતા || ૨૧ || [ઉદ્યોતિની]
માલાધરી લલાટે ચ ભ્રુવૌ રક્ષેદ્યશસ્વિની |
ત્રિનેત્રા ચ ભ્રુવોર્મધ્યે યમઘંટા ચ નાસિકે || ૨૨ ||
શંખિની ચક્ષુષોર્મધ્યે શ્રોત્રયોર્દ્વારવાસિની |
કપોલૌ કાલિકા રક્ષેત્ કર્ણમૂલે તુ શાંકરી || ૨૩ ||
નાસિકાયાં સુગંધા ચ ઉત્તરોષ્ઠે ચ ચર્ચિકા |
અધરે ચામૃતાકલા જિહ્વાયાં ચ સરસ્વતી || ૨૪ ||
દંતાન્ રક્ષતુ કૌમારી કંઠમધ્યે તુ ચંડિકા |
ઘંટિકાં ચિત્રઘંટા ચ મહામાયા ચ તાલુકે || ૨૫ ||
કામાક્ષી ચિબુકં રક્ષેદ્વાચં મે સર્વમંગળા |
ગ્રીવાયાં ભદ્રકાળી ચ પૃષ્ઠવંશે ધનુર્ધરી || ૨૬ ||
નીલગ્રીવા બહિઃકંઠે નલિકાં નલકૂબરી |
સ્કંધયોઃ ખડ્ગિની રક્ષેદ્બાહૂ મે વજ્રધારિણી || ૨૭ ||
હસ્તયોર્દંડિની રક્ષેદંબિકા ચાંગુળીષુ ચ |
નખાંછૂલેશ્વરી રક્ષેત્ કુક્ષૌ રક્ષેન્નરેશ્વરી || ૨૮ || [કુલેશ્વરી]
સ્તનૌ રક્ષેન્મહાદેવી મનઃ શોકવિનાશિની |
હૃદયં લલિતા દેવી ઉદરે શૂલધારિણી || ૨૯ ||
નાભૌ ચ કામિની રક્ષેદ્ગુહ્યં ગુહ્યેશ્વરી તથા |
ભૂતનાથા ચ મેઢ્રં મે ઊરૂ મહિષવાહિની || ૩૦ || [ગુદે]
કટ્યાં ભગવતી રક્ષેજ્જાનુની વિંધ્યવાસિની |
જંઘે મહાબલા પ્રોક્તા સર્વકામપ્રદાયિની || ૩૧ ||
ગુલ્ફયોર્નારસિંહી ચ પાદપૃષ્ઠામિતૌજસી |
પાદાંગુળીષુ શ્રીરક્ષેત્ પાદાધઃસ્થલવાસિની || ૩૨ ||
નખાન્ દંષ્ટ્રા કરાલી ચ કેશાંશ્ચૈવોર્ધ્વકેશિની |
રોમકૂપેષુ કૌબેરી ત્વચં વાગીશ્વરી તથા || ૩૩ ||
રક્તમજ્જાવસામાંસાન્યસ્થિમેદાંસિ પાર્વતી |
અંત્રાણિ કાલરાત્રિશ્ચ પિત્તં ચ મુકુટેશ્વરી || ૩૪ ||
પદ્માવતી પદ્મકોશે કફે ચૂડામણિસ્તથા |
જ્વાલામુખી નખજ્વાલામભેદ્યા સર્વસંધિષુ || ૩૫ ||
શુક્રં બ્રહ્માણિ મે રક્ષેચ્છાયાં છત્રેશ્વરી તથા |
અહંકારં મનોબુદ્ધિં રક્ષ મે ધર્મચારિણી || ૩૬ || [ધર્મધારિણી]
પ્રાણાપાનૌ તથા વ્યાનમુદાનં ચ સમાનકમ્ |
વજ્રહસ્તા ચ મે રક્ષેત્ પ્રાણાન્ કળ્યાણશોભના || ૩૭ ||
રસે રૂપે ચ ગંધે ચ શબ્દે સ્પર્શે ચ યોગિની |
સત્ત્વં રજસ્તમશ્ચૈવ રક્ષેન્નારાયણી સદા || ૩૮ ||
આયૂ રક્ષતુ વારાહી ધર્મં રક્ષતુ વૈષ્ણવી |
યશઃ કીર્તિં ચ લક્ષ્મીં ચ ધનં વિદ્યાં ચ ચક્રિણી || ૩૯ ||
ગોત્રમિંદ્રાણી મે રક્ષેત્ પશૂન્મે રક્ષ ચંડિકે |
પુત્રાન્ રક્ષેન્મહાલક્ષ્મીર્ભાર્યાં રક્ષતુ ભૈરવી || ૪૦ ||
પંથાનં સુપથા રક્ષેન્માર્ગં ક્ષેમકરી તથા |
રાજદ્વારે મહાલક્ષ્મીર્વિજયા સર્વતઃ સ્થિતા || ૪૧ ||
રક્ષાહીનં તુ યત્ સ્થાનં વર્જિતં કવચેન તુ |
તત્સર્વં રક્ષ મે દેવિ જયંતી પાપનાશિની || ૪૨ ||
પદમેકં ન ગચ્છેત્તુ યદીચ્છેચ્છુભમાત્મનઃ |
કવચેનાવૃતો નિત્યં યત્ર યત્ર હિ ગચ્છતિ || ૪૩ ||
તત્ર તત્રાર્થલાભશ્ચ વિજયઃ સાર્વકામિકઃ |
યં યં ચિંતયતે કામં તં તં પ્રાપ્નોતિ નિશ્ચિતમ્ || ૪૪ ||
પરમૈશ્વર્યમતુલં પ્રાપ્સ્યતે ભૂતલે પુમાન્ |
નિર્ભયો જાયતે મર્ત્યઃ સંગ્રામેષ્વપરાજિતઃ || ૪૫ ||
ત્રૈલોક્યે તુ ભવેત્ પૂજ્યઃ કવચેનાવૃતઃ પુમાન્ |
ઇદં તુ દેવ્યાઃ કવચં દેવાનામપિ દુર્લભમ્ || ૪૬ ||
યઃ પઠેત્પ્રયતો નિત્યં ત્રિસંધ્યં શ્રદ્ધયાન્વિતઃ |
દૈવી કલા ભવેત્તસ્ય ત્રૈલોક્યેષ્વપરાજિતઃ || ૪૭ ||
જીવેદ્વર્ષશતં સાગ્રમપમૃત્યુવિવર્જિતઃ |
નશ્યંતિ વ્યાધયઃ સર્વે લૂતાવિસ્ફોટકાદયઃ || ૪૮ ||
સ્થાવરં જંગમં ચૈવ કૃત્રિમં ચાપિ યદ્વિષમ્ |
અભિચારાણિ સર્વાણિ મંત્રયંત્રાણિ ભૂતલે || ૪૯ ||
ભૂચરાઃ ખેચરાશ્ચૈવ જલજાશ્ચોપદેશિકાઃ |
સહજા કુલજા માલા ડાકિની શાકિની તથા || ૫૦ ||
અંતરિક્ષચરા ઘોરા ડાકિન્યશ્ચ મહાબલાઃ |
ગ્રહભૂતપિશાચાશ્ચ યક્ષગંધર્વરાક્ષસાઃ || ૫૧ ||
બ્રહ્મરાક્ષસવેતાલાઃ કૂષ્માંડા ભૈરવાદયઃ |
નશ્યંતિ દર્શનાત્તસ્ય કવચે હૃદિ સંસ્થિતે || ૫૨ ||
માનોન્નતિર્ભવેદ્રાજ્ઞસ્તેજોવૃદ્ધિકરં પરમ્ |
યશસા વર્ધતે સોઽપિ કીર્તિમંડિતભૂતલે || ૫૩ ||
જપેત્સપ્તશતીં ચંડીં કૃત્વા તુ કવચં પુરા |
યાવદ્ભૂમંડલં ધત્તે સશૈલવનકાનનમ્ || ૫૪ ||
તાવત્તિષ્ઠતિ મેદિન્યાં સંતતિઃ પુત્રપૌત્રિકી |
દેહાંતે પરમં સ્થાનં યત્સુરૈરપિ દુર્લભમ્ || ૫૫ ||
પ્રાપ્નોતિ પુરુષો નિત્યં મહામાયાપ્રસાદતઃ |
લભતે પરમં રૂપં શિવેન સમતાં વ્રજેત્ || ૫૬ ||
| ઓં |
ઇતિ દેવ્યાઃ કવચં સંપૂર્ણમ્ |