(શ્રીકાલહસ્તિક્ષેત્રસ્થજ્ઞાનપ્રસૂનાંબિકાસ્તુતિઃ)
શ્રીનરકંઠીરવશાસ્ત્રિવિરચિતા |
શ્રીનાકનાથમુખનાનાસહસ્રસુરસેનાગ્રમૌલિવલભી-
સૂનાવલીબહુલલીનાલિનીમધુરગાનાંચિતાંઘ્રિનલિના |
માનાતિલંઘિમહિમાનાદિરાનતજનાનામનેકફલદા
જ્ઞાનાંબિકા ભવતુ દીનાવની કુશલદાનાય મે ભગવતી || 1 ||
રાકાશશાંકરુચિરાકારચારુપાદના(પતદા)કાશસિંધુલહરી-
નીકાશસૂક્તિસરણીકારિણી પ્રકૃતિમૂકાત્મનામપિ નૃણાં |
પાકાહિતપ્રમુખનાકાલયપ્રકરશોકાપનોદનચણા
શ્રીકાલહસ્તિનગરૈકાયનાવતુ પિનાકાયુધસ્ય દયિતા || 2 ||
શ્રેણીભવદ્દિવિષદેણીદૃગુલ્લસિતવેણીપિનદ્ધસુમનો-
દ્રોણીમરંદરસવેણીપ્રસારભૃશશોણીકૃતાંઘ્રિકમલા |
શ્રોણીનટત્સરકૃપાણીમનોજ્ઞઘનવેણી કૃપાર્દ્રહૃદયા
ક્ષોણીધરેંદ્રતનયાણીયસીમપિ ચ વાણીં પ્રગલ્ભયતુ મે || 3 ||
કેલીસમાકલિતતાલીદલશ્રવણપાલીવિભૂષણમણી-
વા(પા)લી મદોદ્ધતમરાલીગતિર્દિંશતુ નાલીકદીર્ઘનયના |
ચૂલીતલાભરણનાલીકવૈરિશકલાલીભવત્સુરવધૂઃઽ
કાલી ગિરં મૃદુ મૃણાલીભુજા મમ મધૂલીરસોર્મિમધુરાં || 4 ||
હૃદ્યાનવદ્યતરગદ્યાનુબદ્ધમૃદુપદ્યાભિરૂપકવિતાં
દદ્યાજ્જગન્મહિતવિદ્યાં ત્રયીશિખરવેદ્યા હિમાદ્રિતનયા |
આદ્યા પરા મમ શરદ્યામિનીશભૃદવિદ્યાવિલાસશમની
વિદ્યાધરી સમભિવાદ્યા જ્વલન્મણિનિષદ્યાયમાણરશના || 5 ||
હાલામદાકલિતહેલાલસદ્બહુલલોલારુણાક્ષિયુગલી
લીલાપિનદ્ધસુરસાલાવલીપ્રસવમાલાસુગંધચિકુરા |
કૈલાસનાથહિતશીલા કરાંચિતશુકાલાપલોલહૃદયા
વેલાતિલંઘિશુભજાલાય મે ભવતુ શૈલાધિનાથતનયા || 6 ||
ચંડાપદાનયુતચંડાભિધાસુરપિચંડાવદારણચણા
ભંડાસુરોગ્રભુજદંડાગ્રનિર્દલનશૌંડાયુધોદ્ધતકરા |
શુંડાનુકારિકરકાંડાવદીર્ણજગદંડાટ્ટહાસભયદા
દંડાયુધાય શશિખંડાવતંસિતશિખંડા ન ચાર્પયતુ માં || 7 ||
હુંકારનિર્ગલદશંકાપતદ્વિષદહંકારમારતિમિરાં
અંકાંતલંબિસિતક્ઙ્કાલહારસદલંકારબંધુરગલાં |
હ્રીંકારિણીં ભયદટંકારકાર્મુકકરાં કાલહસ્તિનિલયાં
પંકાપહામપકલંકાવતંસહરિણાંકાં ભજે ભગવતીં || 8 ||
કંઠારવોદ્યદુપકંઠારિદુર્વિષહકંઠીરવેંદ્રગમનો-
ત્કંઠા નિકામશિતિકંઠાનુકર્ષિકલકંઠાનુલાપલલિતા |
શુંઠીભવદ્દનુજકંઠીરવપ્રકરકુંઠીકૃતિક્ષમબલા
કુંઠીકરોતુ નરકંઠીરવાખ્યકવિકંઠીરવસ્ય દુરિતં || 9 ||
શ્રીકાલહસ્તિનિલયજ્ઞાનપ્રસવાંબિકામુદે રચિતા |
નરકંઠીરવકૃતિના નવરત્નસ્તુતિરિયં ચિરં જયતુ || 10 ||
|| ઇતિ શ્રીનરકંઠીરવશાસ્ત્રિવિરચિતા નવરત્નમાલિકા સમાપ્તા ||