અખિલાગમસંસ્તુતં અજાદિદેવવંદિતમ્ |
અખંડમંડલાકારં અનેકજનસેવિતમ્ || ૧ ||
અનાદ્યંતસ્વયંભૂતં આશાપાશવિમોચકમ્ |
આનંદકાનનાધીશં ચૈવાનંદપ્રદાયકમ્ || ૨ ||
ઇહલોકસ્પૃહાનેકપરિપૂરકસ્વામિનમ્ |
ઈશિત્વાદ્યષ્ટસિદ્ધિનં ઇંદ્રિયગ્રામદૈવતમ્ || ૩ ||
ઉરગરાજભૂષણં ઉડુરાજવિભૂષિતમ્ |
ઊર્ધ્વલિંગં ઉમાકાંતં ઉરુદુઃખવિમોચકમ્ || ૪ ||
મહોજ્જ્વલસ્વરૂપં ચ ત્રિપુંડ્રાંકિતમસ્તકમ્ |
અન્નપૂર્ણાવિશાલાક્ષીનાથં ગંગાધરં વિભુમ્ || ૫ ||
ભાવનામાત્રસંતુષ્ટહૃદયં હૃદયેશ્વરમ્ |
ભૂતભવ્યભવન્નાથં ભવરોગહરં હરમ્ || ૬ ||
મહાશ્મશાનદેવેશં ભુક્તિમુક્તિફલપ્રદમ્ |
મહોક્ષવાહનારૂઢં મૃગહસ્તં મહેશ્વરમ્ || ૭ ||
ઉગ્રં ભીમં મૃડં શર્વં સર્વૈશ્વર્યપ્રદાયકમ્ |
નંદીશ્વરાદિસંસ્તુતં ત્રિનેત્રં તાંડવેશ્વરમ્ || ૮ ||
વિશ્વેશં વિશ્વરૂપં ચ વિશ્વકારણમવ્યયમ્ |
વિષકંઠં વિરૂપાક્ષં વીરભદ્રપ્રિયં શિવમ્ || ૯ ||
મહાદેવં મહેશાનં મહનીયગુણાકરમ્ |
શ્રીમણિકર્ણિકેશં ચ શ્રીમાધવપ્રિયં પ્રભુમ્ || ૧૦ ||
મહાદેવીસમાયુક્તશરીરં પરમેશ્વરમ્ |
મૃત્યુંજયં મૃડાનીશં મહાભયનિવારકમ્ || ૧૧ ||
ભક્તમાનસરોવરવિહારાસક્તઃ શૂલિનમ્ |
ભવદુઃખવિભંજકં ભક્તવરપ્રદાયકમ્ || ૧૨ ||
ગંગાસ્નપિતસર્વાંગં બિલ્વપત્રાદિપૂજિતમ્ |
નાનાલંકારસંયુક્તં દિવ્યગંધાનુલેપિતમ્ || ૧૩ ||
ત્રયીવેદ્યં ત્રિલોકેશં તાપત્રયપ્રભંજકમ્ |
ત્રિપુરસુંદરીરૂપં ત્ર્યંબકં ત્રિપુરાંતકમ્ || ૧૪ ||
વારાણસીપુરાધીશં વરરુદ્રાક્ષધારિણમ્ |
વ્યાલયજ્ઞોપવીતિનં વ્યાઘ્રચર્મવિભૂષિતમ્ || ૧૫ ||
સુરાસુરનમસ્કૃતશ્રીમચ્ચરણપંકજમ્ |
સદૈકરસરૂપં ચ સદાનટનતત્પરમ્ || ૧૬ ||
સત્યજ્ઞાનાત્મકં સોમં સોમસૂર્યાગ્નિલોચનમ્ |
કાલભૈરવમીશાનં કાલાગ્નિરુદ્રમીશ્વરમ્ || ૧૭ ||
શુદ્ધકૈવલ્યરૂપં ચ શુદ્ધવિદ્યાપ્રદાયકમ્ |
શાંતં પદ્માસનસ્થં ચ શ્રીકંઠં ચંદ્રશેખરમ્ || ૧૮ ||
ગિરીશં ગિરિજાપતિં પશુપાશવિમોચકમ્ |
યજ્ઞેશં નીલગ્રીવં ચ યોગિહૃત્પદ્મવાસિનમ્ || ૧૯ ||
કોટિસૂર્યસમપ્રભં ચંદ્રકોટિસુશીતલમ્ |
જાગ્રત્સ્વપ્નસુષુપ્તીનાં સાક્ષીભૂતં ચિદાત્મકમ્ || ૨૦ ||
સર્વવ્યાપકદેવેશં વિશ્વનાથમહર્નિશમ્ |
સદૈવલિંગરૂપં તં પરાનંદપરાત્પરમ્ || ૨૧ ||
અષ્ટોત્તરૈકશિવનામ સમન્વિતં યત્
સ્તોત્રં પઠંતિ મનુજા ભુવિ ભક્તિયુક્તાઃ |
સંપ્રાપ્ય લૌકિકસુખાનિ પરં લભંતે
દેહાવસાનસમયે શિવ સંપ્રસાદાત્ || ૨૨ ||
ઇતિ શ્રી કાશીવિશ્વનાથ અષ્ટોત્તરશતનામ સ્તોત્રમ્ ||