નંદિકેશ્વર ઉવાચ |
કૈલાસસ્યોત્તરે શૃંગે શુદ્ધસ્ફટિકસન્નિભે |
તમોગુણવિહીને તુ જરામૃત્યુવિવર્જિતે || ૧ ||
સર્વતીર્થાસ્પદાધારે સર્વજ્ઞાનકૃતાલયે |
કૃતાંજલિપુટો બ્રહ્મા ધ્યાનાસીનં સદાશિવમ્ || ૨ ||
પપ્રચ્છ પ્રણતો ભૂત્વા જાનુભ્યામવનિં ગતઃ |
સર્વાર્થસંપદાધારો બ્રહ્મા લોકપિતામહઃ || ૩ ||
બ્રહ્મોવાચ |
કેનોપાયેન દેવેશ ચિરાયુર્લોમશોઽભવત્ |
તન્મે બ્રૂહિ મહેશાન લોકાનાં હિતકામ્યયા || ૪ ||
શ્રીસદાશિવ ઉવાચ |
શૃણુ બ્રહ્મન્ પ્રવક્ષ્યામિ ચિરાયુર્મુનિસત્તમઃ |
સંજાતો કર્મણા યેન વ્યાધિમૃત્યુવિવર્જિતઃ || ૫ ||
તસ્મિન્નેકાર્ણવે ઘોરે સલિલૌઘપરિપ્લુતે |
કૃતાંતભયનાશાય સ્તુતો મૃત્યુંજયઃ શિવઃ || ૬ ||
તસ્ય સંકીર્તનાન્નિત્યં મર્ત્યો મૃત્યુવિવર્જિતઃ |
ત્વમેવ કીર્તયન્ બ્રહ્મન્ મૃત્યું જેતું ન સંશયઃ || ૭ ||
લોમશ ઉવાચ |
દેવાધિદેવ દેવેશ સર્વપ્રાણભૃતાં વર |
પ્રાણિનામપિ નાથસ્ત્વં મૃત્યુંજય નમોઽસ્તુ તે || ૮ ||
દેહિનાં જીવભૂતોઽસિ જીવો જીવસ્ય કારણમ્ |
જગતાં રક્ષકસ્ત્વં વૈ મૃત્યુંજય નમોઽસ્તુ તે || ૯ ||
હેમાદ્રિશિખરાકાર સુધાવીચિમનોહર |
પુંડરીક પરં જ્યોતિર્મુત્યુંજય નમોઽસ્તુ તે || ૧૦ ||
ધ્યાનાધાર મહાજ્ઞાન સર્વજ્ઞાનૈકકારણ |
પરિત્રાતાસિ લોકાનાં મૃત્યુંજય નમોઽસ્તુ તે || ૧૧ ||
નિહતા યેન કાલેન સદેવાસુરમાનુષાઃ |
ગંધર્વાપ્સરસશ્ચૈવ સિદ્ધવિદ્યાધરાસ્તથા || ૧૨ ||
સાધ્યાશ્ચ વસવો રુદ્રાસ્તથાશ્વિનિસુતાવુભૌ |
મરુતશ્ચ દિશો નાગાઃ સ્થાવરા જંગમાસ્તથા || ૧૩ ||
અનંગેન મનોજેન પુષ્પચાપેન કેવલમ્ |
જિતઃ સોઽપિ ત્વયા ધ્યાનાન્મૃત્યુંજય નમોઽસ્તુ તે || ૧૪ ||
યે ધ્યાયંતિ પરાં મૂર્તિં પૂજયંત્યમરાધિપ |
ન તે મૃત્યુવશં યાંતિ મૃત્યુંજય નમોઽસ્તુ તે || ૧૫ ||
ત્વમોંકારોઽસિ વેદાનાં દેવાનાં ચ સદાશિવઃ |
આધારશક્તિઃ શક્તીનાં મૃત્યુંજય નમોઽસ્તુ તે || ૧૬ ||
સ્થાવરે જંગમે વાપિ યાવત્તિષ્ઠતિ મેદિની |
જીવત્વિત્યાહ લોકોઽયં મૃત્યુંજય નમોઽસ્તુ તે || ૧૭ ||
સોમસૂર્યાગ્નિમધ્યસ્થ વ્યોમવ્યાપિન્ સદાશિવઃ |
કાલત્રય મહાકાલ મૃત્યુંજય નમોઽસ્તુ તે || ૧૮ ||
પ્રબુદ્ધે ચાપ્રબુદ્ધે ચ ત્વમેવ સૃજસે જગત્ |
સૃષ્ટિરૂપેણ દેવેશ મૃત્યુંજય નમોઽસ્તુ તે || ૧૯ ||
વ્યોમ્નિ ત્વં વ્યોમરૂપોઽસિ તેજઃ સર્વત્ર તેજસિ |
પ્રાણિનાં જ્ઞાનરૂપોઽસિ મૃત્યુંજય નમોઽસ્તુ તે || ૨૦ ||
જગજ્જીવો જગત્પ્રાણઃ સ્રષ્ટા ત્વં જગતઃ પ્રભુઃ |
કારણં સર્વતીર્થાનાં મૃત્યુંજય નમોઽસ્તુ તે || ૨૧ ||
નેતા ત્વમિંદ્રિયાણાં ચ સર્વજ્ઞાનપ્રબોધકઃ |
સાંખ્યયોગશ્ચ હંસશ્ચ મૃત્યુંજય નમોઽસ્તુ તે || ૨૨ ||
રૂપાતીતઃ સુરૂપશ્ચ પિંડસ્થા પદમેવ ચ |
ચતુર્યુગકલાધાર મૃત્યુંજય નમોઽસ્તુ તે || ૨૩ ||
રેચકે વહ્નિરૂપોઽસિ સોમરૂપોઽસિ પૂરકે |
કુંભકે શિવરૂપોઽસિ મૃત્યુંજય નમોઽસ્તુ તે || ૨૪ ||
ક્ષયં કરોઽસિ પાપાનાં પુણ્યાનામપિ વર્ધસમ્ |
હેતુસ્ત્વં શ્રેયસાં નિત્યં મૃત્યુંજય નમોઽસ્તુ તે || ૨૫ ||
સર્વમાયાકલાતીત સર્વેંદ્રિયપરાવર |
સર્વેંદ્રિયકલાધીશ મૃત્યુંજય નમોઽસ્તુ તે || ૨૬ ||
રૂપં ગંધો રસઃ સ્પર્શઃ શબ્દઃ સંસ્કાર એવ ચ |
ત્વત્તઃ પ્રકાશ એતેષાં મૃત્યુંજય નમોઽસ્તુ તે || ૨૭ ||
ચતુર્વિધાનાં સૃષ્ટીનાં હેતુસ્ત્વં કારણેશ્વર |
ભાવાભાવપરિચ્છિન્ન મૃત્યુંજય નમોઽસ્તુ તે || ૨૮ ||
ત્વમેકો નિષ્કલો લોકે સકલં ભુવનત્રયમ્ |
અતિસૂક્ષ્માતિરૂપસ્ત્વં મૃત્યુંજય નમોઽસ્તુ તે || ૨૯ ||
ત્વં પ્રબોધસ્ત્વમાધારસ્ત્વદ્બીજં ભુવનત્રયમ્ |
સત્ત્વં રજસ્તમસ્ત્વં હિ મૃત્યુંજય નમોઽસ્તુ તે || ૩૦ ||
ત્વં સોમસ્ત્વં દિનેશશ્ચ ત્વમાત્મા પ્રકૃતેઃ પરઃ |
અષ્ટત્રિંશત્કલાનાથ મૃત્યુંજય નમોઽસ્તુ તે || ૩૧ ||
સર્વેંદ્રિયાણામાધારઃ સર્વભૂતગણાશ્રયઃ |
સર્વજ્ઞાનમયાનંત મૃત્યુંજય નમોઽસ્તુ તે || ૩૨ ||
ત્વમાત્મા સર્વભૂતાનાં ગુણાનાં ત્વમધીશ્વરઃ |
સર્વાનંદમયાધાર મૃત્યુંજય નમોઽસ્તુ તે || ૩૩ ||
ત્વં યજ્ઞઃ સર્વયજ્ઞાનાં ત્વં બુદ્ધિર્બોધલક્ષણા |
શબ્દબ્રહ્મ ત્વમોંકારો મૃત્યુંજય નમોઽસ્તુ તે || ૩૪ ||
શ્રીસદાશિવ ઉવાચ |
એવં સંકીર્તયેદ્યસ્તુ શુચિસ્તદ્ગતમાનસઃ |
ભક્ત્યા શૃણોતિ યો બ્રહ્મન્ ન સ મૃત્યુવશો ભવેત્ || ૩૫ ||
ન ચ મૃત્યુભયં તસ્ય પ્રાપ્તકાલં ચ લંઘયેત્ |
અપમૃત્યુભયં તસ્ય પ્રણશ્યતિ ન સંશયઃ || ૩૬ ||
વ્યાધયો નોપપદ્યંતે નોપસર્ગભયં ભવેત્ |
પ્રત્યાસન્નાંતરે કાલે શતૈકાવર્તને કૃતે || ૩૭ ||
મૃત્યુર્ન જાયતે તસ્ય રોગાન્મુંચતિ નિશ્ચિતમ્ |
પંચમ્યાં વા દશમ્યાં વા પૌર્ણમાસ્યામથાપિ વા || ૩૮ ||
શતમાવર્તયેદ્યસ્તુ શતવર્ષં સ જીવતિ |
તેજસ્વી બલસંપન્નો લભતે શ્રિયમુત્તમામ્ || ૩૯ ||
ત્રિવિધં નાશયેત્પાપં મનોવાક્કાયસંભવમ્ |
અભિચારાણિ કર્માણિ કર્માણ્યાથર્વણાનિ ચ |
ક્ષીયંતે નાત્ર સંદેહો દુઃસ્વપ્નં ચ વિનશ્યતિ || ૪૦ ||
ઇદં રહસ્યં પરમં દેવદેવસ્ય શૂલિનઃ |
દુઃખપ્રણાશનં પુણ્યં સર્વવિઘ્નવિનાશનમ્ || ૪૧ ||
ઇતિ શ્રીશિવબ્રહ્મસંવાદે શ્રીમૃત્યુંજય સ્તોત્રમ્ |