ગલદ્દાનગંડં મિલદ્ભૃંગષંડં
ચલચ્ચારુશુંડં જગત્ત્રાણશૌંડમ્ |
કનદ્દંતકાંડં વિપદ્ભંગચંડં
શિવપ્રેમપિંડં ભજે વક્રતુંડમ્ || ૧ ||
અનાદ્યંતમાદ્યં પરં તત્ત્વમર્થં
ચિદાકારમેકં તુરીયં ત્વમેયમ્ |
હરિબ્રહ્મમૃગ્યં પરબ્રહ્મરૂપં
મનોવાગતીતં મહઃશૈવમીડે || ૨ ||
સ્વશક્ત્યાદિશક્ત્યંતસિંહાસનસ્થં
મનોહારિસર્વાંગરત્નોરુભૂષમ્ |
જટાહીંદુગંગાસ્થિશમ્યાકમૌળિં
પરાશક્તિમિત્રં નુમઃ પંચવક્ત્રમ્ || ૩ ||
શિવેશાનતત્પૂરુષાઘોરવામા-
-દિભિઃ પંચભિર્હૃન્મુખૈઃ ષડ્ભિરંગૈઃ |
અનૌપમ્ય ષટ્ત્રિંશતં તત્ત્વવિદ્યા-
-મતીતં પરં ત્વાં કથં વેત્તિ કો વા || ૪ ||
પ્રવાલપ્રવાહપ્રભાશોણમર્ધં
મરુત્વન્મણિશ્રીમહઃશ્યામમર્ધમ્ |
ગુણસ્યૂતમેતદ્વપુઃ શૈવમંતઃ
સ્મરામિ સ્મરાપત્તિસંપત્તિહેતુમ્ || ૫ ||
સ્વસેવાસમાયાતદેવાસુરેંદ્રા-
-નમન્મૌલિમંદારમાલાભિષક્તમ્ |
નમસ્યામિ શંભો પદાંભોરુહં તે
ભવાંભોધિપોતં ભવાનીવિભાવ્યમ્ || ૬ ||
જગન્નાથ મન્નાથ ગૌરીસનાથ
પ્રપન્નાનુકંપિન્વિપન્નાર્તિહારિન્ |
મહઃસ્તોમમૂર્તે સમસ્તૈકબંધો
નમસ્તે નમસ્તે પુનસ્તે નમોઽસ્તુ || ૭ ||
વિરૂપાક્ષ વિશ્વેશ વિશ્વાદિદેવ
ત્રયીમૂલ શંભો શિવ ત્ર્યંબક ત્વમ્ |
પ્રસીદ સ્મર ત્રાહિ પશ્યાવમુક્ત્યૈ
ક્ષમાં પ્રાપ્નુહિ ત્ર્યક્ષ માં રક્ષ મોદાત્ || ૮ ||
મહાદેવ દેવેશ દેવાદિદેવ
સ્મરારે પુરારે યમારે હરેતિ |
બ્રુવાણઃ સ્મરિષ્યામિ ભક્ત્યા ભવંતં
તતો મે દયાશીલ દેવ પ્રસીદ || ૯ ||
ત્વદન્યઃ શરણ્યઃ પ્રપન્નસ્ય નેતિ
પ્રસીદ સ્મરન્નેવ હન્યાસ્તુ દૈન્યમ્ |
ન ચેત્તે ભવેદ્ભક્તવાત્સલ્યહાનિ-
-સ્તતો મે દયાલો સદા સન્નિધેહિ || ૧૦ ||
અયં દાનકાલસ્ત્વહં દાનપાત્રં
ભવાનેવ દાતા ત્વદન્યં ન યાચે |
ભવદ્ભક્તિમેવ સ્થિરાં દેહિ મહ્યં
કૃપાશીલ શંભો કૃતાર્થોઽસ્મિ તસ્માત્ || ૧૧ ||
પશું વેત્સિ ચેન્માં તમેવાધિરૂઢઃ
કલંકીતિ વા મૂર્ધ્નિ ધત્સે તમેવ |
દ્વિજિહ્વઃ પુનઃ સોઽપિ તે કંઠભૂષા
ત્વદંગીકૃતાઃ શર્વ સર્વેઽપિ ધન્યાઃ || ૧૨ ||
ન શક્નોમિ કર્તું પરદ્રોહલેશં
કથં પ્રીયસે ત્વં ન જાને ગિરીશ |
તથાહિ પ્રસન્નોઽસિ કસ્યાપિ કાંતા-
-સુતદ્રોહિણો વા પિતૃદ્રોહિણો વા || ૧૩ ||
સ્તુતિં ધ્યાનમર્ચાં યથાવદ્વિધાતું
ભજન્નપ્યજાનન્મહેશાવલંબે |
ત્રસંતં સુતં ત્રાતુમગ્રે મૃકંડો-
-ર્યમપ્રાણનિર્વાપણં ત્વત્પદાબ્જમ્ || ૧૪ ||
શિરોદૃષ્ટિહૃદ્રોગશૂલપ્રમેહ-
-જ્વરાર્શોજરાયક્ષ્મહિક્કાવિષાર્તાન્ |
ત્વમાદ્યો ભિષગ્ભેષજં ભસ્મ શંભો
ત્વમુલ્લાઘયાસ્માન્વપુર્લાઘવાય || ૧૫ ||
દરિદ્રોઽસ્મ્યભદ્રોઽસ્મિ ભગ્નોઽસ્મિ દૂયે
વિષણ્ણોઽસ્મિ સન્નોઽસ્મિ ખિન્નોઽસ્મિ ચાહમ્ |
ભવાન્પ્રાણિનામંતરાત્માસિ શંભો
મમાધિં ન વેત્સિ પ્રભો રક્ષ માં ત્વમ્ || ૧૬ ||
ત્વદક્ષ્ણોઃ કટાક્ષઃ પતેત્ત્ર્યક્ષ યત્ર
ક્ષણં ક્ષ્મા ચ લક્ષ્મીઃ સ્વયં તં વૃણાતે |
કિરીટસ્ફુરચ્ચામરચ્છત્રમાલા-
-કલાચીગજક્ષૌમભૂષાવિશેષૈઃ || ૧૭ ||
ભવાન્યૈ ભવાયાપિ માત્રે ચ પિત્રે
મૃડાન્યૈ મૃડાયાપ્યઘઘ્ન્યૈ મખઘ્ને |
શિવાંગ્યૈ શિવાંગાય કુર્મઃ શિવાયૈ
શિવાયાંબિકાયૈ નમસ્ત્ર્યંબકાય || ૧૮ ||
ભવદ્ગૌરવં મલ્લઘુત્વં વિદિત્વા
પ્રભો રક્ષ કારુણ્યદૃષ્ટ્યાનુગં મામ્ |
શિવાત્માનુભાવસ્તુતાવક્ષમોઽહં
સ્વશક્ત્યા કૃતં મેઽપરાધં ક્ષમસ્વ || ૧૯ ||
યદા કર્ણરંધ્રં વ્રજેત્કાલવાહ-
-દ્વિષત્કંઠઘંટાઘણાત્કારનાદઃ |
વૃષાધીશમારુહ્ય દેવૌપવાહ્યં
તદા વત્સ મા ભીરિતિ પ્રીણય ત્વમ્ || ૨૦ ||
યદા દારુણાભાષણા ભીષણા મે
ભવિષ્યંત્યુપાંતે કૃતાંતસ્ય દૂતાઃ |
તદા મન્મનસ્ત્વત્પદાંભોરુહસ્થં
કથં નિશ્ચલં સ્યાન્નમસ્તેઽસ્તુ શંભો || ૨૧ ||
યદા દુર્નિવારવ્યથોઽહં શયાનો
લુઠન્નિઃશ્વસન્નિઃસૃતાવ્યક્તવાણિઃ |
તદા જહ્નુકન્યાજલાલંકૃતં તે
જટામંડલં મન્મનોમંદિરં સ્યાત્ || ૨૨ ||
યદા પુત્રમિત્રાદયો મત્સકાશે
રુદંત્યસ્ય હા કીદૃશીયં દશેતિ |
તદા દેવદેવેશ ગૌરીશ શંભો
નમસ્તે શિવાયેત્યજસ્રં બ્રવાણિ || ૨૩ ||
યદા પશ્યતાં મામસૌ વેત્તિ નાસ્મા-
-નયં શ્વાસ એવેતિ વાચો ભવેયુઃ |
તદા ભૂતિભૂષં ભુજંગાવનદ્ધં
પુરારે ભવંતં સ્ફુટં ભાવયેયમ્ || ૨૪ ||
યદા યાતનાદેહસંદેહવાહી
ભવેદાત્મદેહે ન મોહો મહાન્મે |
તદા કાશશીતાંશુસંકાશમીશ
સ્મરારે વપુસ્તે નમસ્તે સ્મરામિ || ૨૫ ||
યદાપારમચ્છાયમસ્થાનમદ્ભિ-
-ર્જનૈર્વા વિહીનં ગમિષ્યામિ માર્ગમ્ |
તદા તં નિરુંધન્કૃતાંતસ્ય માર્ગં
મહાદેવ મહ્યં મનોજ્ઞં પ્રયચ્છ || ૨૬ ||
યદા રૌરવાદિ સ્મરન્નેવ ભીત્યા
વ્રજામ્યત્ર મોહં મહાદેવ ઘોરમ્ |
તદા મામહો નાથ કસ્તારયિષ્ય-
-ત્યનાથં પરાધીનમર્ધેંદુમૌળે || ૨૭ ||
યદા શ્વેતપત્રાયતાલંઘ્યશક્તેઃ
કૃતાંતાદ્ભયં ભક્તવાત્સલ્યભાવાત્ |
તદા પાહિ માં પાર્વતીવલ્લભાન્યં
ન પશ્યામિ પાતારમેતાદૃશં મે || ૨૮ ||
ઇદાનીમિદાનીં મૃતિર્મે ભવિત્રી-
-ત્યહો સંતતં ચિંતયા પીડિતોઽસ્મિ |
કથં નામ મા ભૂન્મૃતૌ ભીતિરેષા
નમસ્તે ગતીનાં ગતે નીલકંઠ || ૨૯ ||
અમર્યાદમેવાહમાબાલવૃદ્ધં
હરંતં કૃતાંતં સમીક્ષ્યાસ્મિ ભીતઃ |
મૃતૌ તાવકાંઘ્ર્યબ્જદિવ્યપ્રસાદા-
-દ્ભવાનીપતે નિર્ભયોઽહં ભવાનિ || ૩૦ ||
જરાજન્મગર્ભાધિવાસાદિદુઃખા-
-ન્યસહ્યાનિ જહ્યાં જગન્નાથ દેવ |
ભવંતં વિના મે ગતિર્નૈવ શંભો
દયાલો ન જાગર્તિ કિં વા દયા તે || ૩૧ ||
શિવાયેતિ શબ્દો નમઃપૂર્વ એષ
સ્મરન્મુક્તિકૃન્મૃત્યુહા તત્ત્વવાચી |
મહેશાન મા ગાન્મનસ્તો વચસ્તઃ
સદા મહ્યમેતત્પ્રદાનં પ્રયચ્છ || ૩૨ ||
ત્વમપ્યંબ માં પશ્ય શીતાંશુમૌળિ-
-પ્રિયે ભેષજં ત્વં ભવવ્યાધિશાંતૌ |
બહુક્લેશભાજં પદાંભોજપોતે
ભવાબ્ધૌ નિમગ્નં નયસ્વાદ્ય પારમ્ || ૩૩ ||
અનુદ્યલ્લલાટાક્ષિવહ્નિપ્રરોહૈ-
-રવામસ્ફુરચ્ચારુવામોરુશોભૈઃ |
અનંગભ્રમદ્ભોગિભૂષાવિશેષૈ-
-રચંદ્રાર્ધચૂડૈરલં દૈવતૈર્નઃ || ૩૪ ||
અકંઠેકલંકાદનંગેભુજંગા-
-દપાણૌકપાલાદફાલેનલાક્ષાત્ |
અમૌળૌશશાંકાદવામેકલત્રા-
-દહં દેવમન્યં ન મન્યે ન મન્યે || ૩૫ ||
મહાદેવ શંભો ગિરીશ ત્રિશૂલિં-
-સ્ત્વયીદં સમસ્તં વિભાતીતિ યસ્માત્ |
શિવાદન્યથા દૈવતં નાભિજાને
શિવોઽહં શિવોઽહં શિવોઽહં શિવોઽહમ્ || ૩૬ ||
યતોઽજાયતેદં પ્રપંચં વિચિત્રં
સ્થિતિં યાતિ યસ્મિન્યદેકાંતમંતે |
સ કર્માદિહીનઃ સ્વયંજ્યોતિરાત્મા
શિવોઽહં શિવોઽહં શિવોઽહં શિવોઽહમ્ || ૩૭ ||
કિરીટે નિશેશો લલાટે હુતાશો
ભુજે ભોગિરાજો ગલે કાલિમા ચ |
તનૌ કામિની યસ્ય તત્તુલ્યદેવં
ન જાને ન જાને ન જાને ન જાને || ૩૮ ||
અનેન સ્તવેનાદરાદંબિકેશં
પરાં ભક્તિમાસાદ્ય યં યે નમંતિ |
મૃતૌ નિર્ભયાસ્તે જનાસ્તં ભજંતે
હૃદંભોજમધ્યે સદાસીનમીશમ્ || ૩૯ ||
ભુજંગપ્રિયાકલ્પ શંભો મયૈવં
ભુજંગપ્રયાતેન વૃત્તેન ક્લુપ્તમ્ |
નરઃ સ્તોત્રમેતત્પઠિત્વોરુભક્ત્યા
સુપુત્રાયુરારોગ્યમૈશ્વર્યમેતિ || ૪૦ ||
ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ શિવ ભુજંગમ્ |