અસ્ય શ્રી શિવરક્ષાસ્તોત્રમંત્રસ્ય યાજ્ઞવલ્ક્ય ઋષિઃ | શ્રી સદાશિવો દેવતા | અનુષ્ટુપ્ છંદઃ | શ્રી સદાશિવપ્રીત્યર્થં શિવરક્ષાસ્તોત્રજપે વિનિયોગઃ ||
ચરિતં દેવદેવસ્ય મહાદેવસ્ય પાવનમ્ |
અપારં પરમોદારં ચતુર્વર્ગસ્ય સાધનમ્ || ૧ ||
ગૌરીવિનાયકોપેતં પંચવક્ત્રં ત્રિનેત્રકમ્ |
શિવં ધ્યાત્વા દશભુજં શિવરક્ષાં પઠેન્નરઃ || ૨ ||
ગંગાધરઃ શિરઃ પાતુ ફાલમર્ધેંદુશેખરઃ |
નયને મદનધ્વંસી કર્ણૌ સર્પવિભૂષણઃ || ૩ ||
ઘ્રાણં પાતુ પુરારાતિઃ મુખં પાતુ જગત્પતિઃ |
જિહ્વાં વાગીશ્વરઃ પાતુ કંધરાં શિતિકંધરઃ || ૪ ||
શ્રીકંઠઃ પાતુ મે કંઠં સ્કંધૌ વિશ્વધુરંધરઃ |
ભુજૌ ભૂભારસંહર્તા કરૌ પાતુ પિનાકધૃક્ || ૫ ||
હૃદયં શંકરઃ પાતુ જઠરં ગિરિજાપતિઃ |
નાભિં મૃત્યુંજયઃ પાતુ કટિં વ્યાઘ્રાજિનાંબરઃ || ૬ ||
સક્થિની પાતુ દીનાર્તશરણાગતવત્સલઃ |
ઊરૂ મહેશ્વરઃ પાતુ જાનુની જગદીશ્વરઃ || ૭ ||
જંઘે પાતુ જગત્કર્તા ગુલ્ફૌ પાતુ ગણાધિપઃ |
ચરણૌ કરુણાસિંધુઃ સર્વાંગાનિ સદાશિવઃ || ૮ ||
એતાં શિવબલોપેતાં રક્ષાં યઃ સુકૃતી પઠેત્ |
સ ભુક્ત્વા સકલાન્ કામાન્ શિવસાયુજ્યમાપ્નુયાત્ || ૯ ||
ગ્રહભૂતપિશાચાદ્યાઃ ત્રૈલોક્યે વિચરંતિ યે |
દૂરાદાશુ પલાયંતે શિવનામાભિરક્ષણાત્ || ૧૦ ||
અભયંકરનામેદં કવચં પાર્વતીપતેઃ |
ભક્ત્યા બિભર્તિ યઃ કંઠે તસ્ય વશ્યં જગત્ત્રયમ્ || ૧૧ ||
ઇમાં નારાયણઃ સ્વપ્ને શિવરક્ષાં યથાઽદિશત્ |
પ્રાતરુત્થાય યોગીંદ્રો યાજ્ઞવલ્ક્યઃ તથાઽલિખત્ || ૧૨ ||
ઇતિ શ્રીયાજ્ઞવલ્ક્યપ્રોક્તં શિવરક્ષાસ્તોત્રમ્ |