જગદ્ધાત્રિ નમસ્તુભ્યં વિષ્ણોશ્ચ પ્રિયવલ્લભે |
યતો બ્રહ્માદયો દેવાઃ સૃષ્ટિસ્થિત્યંતકારિણઃ ||
નમસ્તુલસિ કલ્યાણિ નમો વિષ્ણુપ્રિયે શુભે |
નમો મોક્ષપ્રદે દેવિ નમઃ સંપત્પ્રદાયિકે ||
તુલસી પાતુ માં નિત્યં સર્વાપદ્ભ્યોઽપિ સર્વદા |
કીર્તિતા વાપિ સ્મૃતા વાપિ પવિત્રયતિ માનવમ્ ||
નમામિ શિરસા દેવીં તુલસીં વિલસત્તનું |
યાં દૃષ્ટ્વા પાપિનો મર્ત્યાઃ મુચ્યંતે સર્વકિલ્બિષાત્ ||
તુલસ્યા રક્ષિતં સર્વં જગદેતચ્ચરાચરં |
યા વિનર્હંતિ પાપાનિ દૃષ્ટ્વા વા પાપિભિર્નરૈઃ ||
નમસ્તુલસ્યતિતરાં યસ્યૈ બદ્ધાંજલિં કલૌ |
કલયંતિ સુખં સર્વં સ્ત્રિયો વૈશ્યાસ્તથાઽપરે ||
તુલસ્યા નાપરં કિંચિદ્દૈવતં જગતીતલે |
યથા પવિત્રિતો લોકો વિષ્ણુસંગેન વૈષ્ણવઃ ||
તુલસ્યાઃ પલ્લવં વિષ્ણોઃ શિરસ્યારોપિતં કલૌ |
આરોપયતિ સર્વાણિ શ્રેયાંસિ વરમસ્તકે ||
તુલસ્યાં સકલા દેવા વસંતિ સતતં યતઃ |
અતસ્તામર્ચયેલ્લોકે સર્વાન્ દેવાન્ સમર્ચયન્ ||
નમસ્તુલસિ સર્વજ્ઞે પુરુષોત્તમવલ્લભે |
પાહિ માં સર્વ પાપેભ્યઃ સર્વસમ્પત્પ્રદાયિકે ||
ઇતિ સ્તોત્રં પુરા ગીતં પુંડરીકેણ ધીમતા |
વિષ્ણુમર્ચયતા નિત્યં શોભનૈસ્તુલસીદલૈઃ ||
તુલસી શ્રીર્મહાલક્ષ્મીર્વિદ્યાવિદ્યા યશસ્વિની |
ધર્મ્યા ધર્માનના દેવી દેવદેવમનઃપ્રિયા ||
લક્ષ્મીપ્રિયસખી દેવી દ્યૌર્ભૂમિરચલા ચલા |
ષોડશૈતાનિ નામાનિ તુલસ્યાઃ કીર્તયન્નરઃ ||
લભતે સુતરાં ભક્તિમંતે વિષ્ણુપદં લભેત્ |
તુલસી ભૂર્મહાલક્ષ્મીઃ પદ્મિની શ્રીર્હરિપ્રિયા ||
તુલસિ શ્રીસખિ શુભે પાપહારિણિ પુણ્યદે |
નમસ્તે નારદનુતે નારાયણમનઃપ્રિયે ||
ઇતિ શ્રીપુંડરીકકૃતં તુલસીસ્તોત્રમ્ ||