પશૂનાં પતિં પાપનાશં પરેશં
ગજેંદ્રસ્ય કૃત્તિં વસાનં વરેણ્યમ્ |
જટાજૂટમધ્યે સ્ફુરદ્ગાંગવારિં
મહાદેવમેકં સ્મરામિ સ્મરારિમ્ || ૧ ||
મહેશં સુરેશં સુરારાતિનાશં
વિભું વિશ્વનાથં વિભૂત્યંગભૂષમ્ |
વિરૂપાક્ષમિંદ્વર્કવહ્નિત્રિનેત્રં
સદાનંદમીડે પ્રભું પંચવક્ત્રમ્ || ૨ ||
ગિરીશં ગણેશં ગલે નીલવર્ણં
ગવેંદ્રાધિરૂઢં ગુણાતીતરૂપમ્ |
ભવં ભાસ્વરં ભસ્મના ભૂષિતાંગં
ભવાનીકલત્રં ભજે પંચવક્ત્રમ્ || ૩ ||
શિવાકાંત શંભો શશાંકાર્ધમૌળે
મહેશાન શૂલિન્ જટાજૂટધારિન્ |
ત્વમેકો જગદ્વ્યાપકો વિશ્વરૂપઃ
પ્રસીદ પ્રસીદ પ્રભો પૂર્ણરૂપ || ૪ ||
પરાત્માનમેકં જગદ્બીજમાદ્યં
નિરીહં નિરાકારમોંકારવેદ્યમ્ |
યતો જાયતે પાલ્યતે યેન વિશ્વં
તમીશં ભજે લીયતે યત્ર વિશ્વમ્ || ૫ ||
ન ભૂમિર્ન ચાપો ન વહ્નિર્ન વાયુ-
-ર્ન ચાકાશમાસ્તે ન તંદ્રા ન નિદ્રા |
ન ચોષ્ણં ન શીતં ન દેશો ન વેષો
ન યસ્યાસ્તિ મૂર્તિસ્ત્રિમૂર્તિં તમીડે || ૬ ||
અજં શાશ્વતં કારણં કારણાનાં
શિવં કેવલં ભાસકં ભાસકાનામ્ |
તુરીયં તમઃપારમાદ્યંતહીનં
પ્રપદ્યે પરં પાવનં દ્વૈતહીનમ્ || ૭ ||
નમસ્તે નમસ્તે વિભો વિશ્વમૂર્તે
નમસ્તે નમસ્તે ચિદાનંદમૂર્તે |
નમસ્તે નમસ્તે તપોયોગગમ્ય
નમસ્તે નમસ્તે શ્રુતિજ્ઞાનગમ્ય || ૮ ||
પ્રભો શૂલપાણે વિભો વિશ્વનાથ
મહાદેવ શંભો મહેશ ત્રિનેત્ર |
શિવાકાંત શાંત સ્મરારે પુરારે
ત્વદન્યો વરેણ્યો ન માન્યો ન ગણ્યઃ || ૯ ||
શંભો મહેશ કરુણામય શૂલપાણે
ગૌરીપતે પશુપતે પશુપાશનાશિન્ |
કાશીપતે કરુણયા જગદેતદેક-
-સ્ત્વં હંસિ પાસિ વિદધાસિ મહેશ્વરોઽસિ || ૧૦ ||
ત્વત્તો જગદ્ભવતિ દેવ ભવ સ્મરારે
ત્વય્યેવ તિષ્ઠતિ જગન્મૃડ વિશ્વનાથ |
ત્વય્યેવ ગચ્છતિ લયં જગદેતદીશ
લિંગાત્મકે હર ચરાચરવિશ્વરૂપિન્ || ૧૧ ||
ઇતિ શ્રીમત્પરમહંસ પરિવ્રાજકાચાર્ય શ્રીમચ્છંકરાચાર્ય વિરચિતં વેદસાર શિવ સ્તોત્રં સંપૂર્ણમ્ |