1 कृष्णयजुर्वेद (कठोपनिषत्, मांडुक्योपनिषत्, श्वेतश्वतारोपनिषत्)

ॐ स॒ह ना॑ववतु | स॒ह नौ॑ भुनक्तु |
स॒ह वी॒र्यं॑ करवावहै |
ते॒ज॒स्विना॒वधी॑तमस्तु॒ मा वि॑द्विषा॒वहै᳚ ||

ॐ शांतिः॒ शांतिः॒ शांतिः॑ |

2 कृष्णयजुर्वेद तैत्तिरीयोपनिषत्

ॐ शं नो॑ मि॒त्रः शं वरु॑णः | शं नो॑ भवत्वर्य॒मा | शं न॒ इंद्रो॒
बृह॒स्पतिः॑ | शं नो॒ विष्णु॑रुरुक्र॒मः | नमो॒ ब्रह्म॑णे | नम॑स्ते वायो |
त्वमे॒व प्र॒त्यक्षं॒ ब्रह्मा॑सि | त्वमे॒व प्र॒त्यक्षं॒ ब्रह्म॑ वदिष्यामि | ऋ॒तं
व॑दिष्यामि | स॒त्यं व॑दिष्यामि | तन्माम॑वतु | तद्व॒क्तार॑मवतु | अव॑तु॒ मां |
अव॑तु व॒क्तारं᳚ || ॐ शांतिः॒ शांतिः॒ शांतिः॑ ||

3 अथर्ववेद प्रश्नोपनिषत् मुंडकोपनिषत् मांडुक्योपनिषत्

ॐ भ॒द्रं कर्णे॑भिः शृणु॒याम॑ देवाः |
भ॒द्रं प॑श्येमा॒क्षभि॒र्यज॑त्राः |
स्थि॒रैरंगै᳚स्तुष्टु॒वां+स॑स्त॒नूभिः॑ |
व्यशे॑म दे॒वहि॑तं॒ यदायुः॑ |

स्व॒स्ति न॒ इंद्रो॑ वृ॒द्धश्र॑वाः |
स्व॒स्ति नः॑ पू॒षा वि॒श्ववे॑दाः |
स्व॒स्ति न॒स्तार्क्ष्यो॒ अरि॑ष्टनेमिः |
स्व॒स्ति नो॒ बृह॒स्पति॑र्दधातु |
ॐ शांतिः॒ शांतिः॒ शांतिः॑ ||

4 ॐ नमो॒ ब्रह्म॑णे॒ नमो॑ अस्त्व॒ग्नये॒ नमः॑ पृथि॒व्यै नम॒ ओष॑धीभ्यः |
नमो॑ वा॒चे नमो॑ वा॒चस्पत॑ये॒ नमो॒ विष्ण॑वे बृह॒ते क॑रोमि || ॐ शांतिः॒
शांतिः॒ शांतिः॑ ||

5 ॐ यश्छंद॑सामृष॒भो वि॒श्वरू॑पः |
छंदो॒भ्योऽध्य॒मृता᳚थ्संब॒भूव॑ | स मेंद्रो॑ मे॒धया᳚
स्पृणोतु | अ॒मृत॑स्य देव॒धार॑णो भूयासं | शरी॑रं
मे॒ विच॑र्षणं | जि॒ह्वा मे॒ मधु॑मत्तमा | कर्णा᳚भ्यां॒
भूरि॒विश्रु॑वं | ब्रह्म॑णः को॒शो॑ऽसि मे॒धया पि॑हितः | श्रु॒तं
मे॑ गोपाय | ॐ शांतिः॒ शांतिः॒ शांतिः॑ ||

6 ॐ तच्छं॒ योरावृ॑णीमहे | गा॒तुं य॒ज्ञाय॑ | गा॒तुं य॒ज्ञप॑तये | दैवी᳚
स्व॒स्तिर॑स्तु नः | स्व॒स्तिर्मानु॑षेभ्यः | ऊ॒र्ध्वं जि॑गातु भेष॒जं | शं नो॑
अस्तु द्वि॒पदे᳚ | शं चतु॑ष्पदे || ॐ शांतिः॒ शांतिः॒ शांतिः॑ ||

7 ॐ नमो॑ वा॒चे या चो॑दि॒ता या चानु॑दिता॒ तस्यै॑ वा॒चे नमो॒ नमो॑ वा॒चे नमो॑
वा॒चस्पत॑ये॒ नम॒ ऋषि॑भ्यो मंत्र॒कृद्भ्यो॒ मंत्र॑पतिभ्यो॒ मामामृष॑यो
मंत्र॒कृतो॑ मंत्र॒पत॑यः॒ परा॑दु॒र्मा ऽहमृषी᳚न्मंत्र॒कृतो॑
मंत्र॒पती॒न्परा॑दां वैश्वदे॒वीं वाच॑मुद्यासं+ शि॒वामद॑स्तां॒ जुष्टां᳚
दे॒वेभ्यः॒ शर्म॑ मे॒ द्यौः शर्म॑पृथि॒वी शर्म॒ विश्व॑मि॒दं जग॑त् |
शर्म॑ चं॒द्रश्च॒ सूर्य॑श्च॒ शर्म॑ ब्रह्मप्रजाप॒ती | भू॒तं व॑दिष्ये॒
भुव॑नं वदिष्ये॒ तेजो॑ वदिष्ये॒ यशो॑ वदिष्ये॒ तपो॑ वदिष्ये॒ ब्रह्म॑ वदिष्ये
स॒त्यं व॑दिष्ये॒ तस्मा॑ अ॒हमि॒दमु॑प॒स्तर॑ण॒मुप॑स्तृण उप॒स्तर॑णं
मे प्र॒जायै॑ पशू॒नां भू॑यादुप॒स्तर॑णम॒हं प्र॒जायै॑ पशू॒नां भू॑यासं॒
प्राणा॑पानौ मृ॒त्योर्मा॑पातं॒ प्राण॑पानौ॒ मा मा॑ हासिष्टं॒ मधु॑ मनिष्ये॒ मधु॑
जनिष्ये॒ मधु॑ वक्ष्यामि॒ मधु॑ वदिष्यामि॒ मधु॑मतीं दे॒वेभ्यो॒ वाच॑मुद्यासं+
शुश्रू॒षेण्यां᳚ मनु॒ष्ये᳚भ्य॒स्तं मा॑ दे॒वा अ॑वंतु शो॒भायै॑ पि॒तरोऽनु॑मदंतु
|| ॐ शांतिः॒ शांतिः॒ शांतिः॑ ||

8 ऋग्वेद
ऋ॒जु॒नी॒ती नो॒ वरु॑णो मि॒त्रो न॑यतु वि॒द्वान् |
अ॒र्य॒मा दे॒वैः स॒जोषाः॑ || 1 | 090 | 01
ते हि वस्वो॒ वस॑वाना॒स्ते अप्र॑मूरा॒ महो॑भिः |
व्र॒ता र॑क्षंते वि॒श्वाहा॑ || 1 | 090 | 02
ते अ॒स्मभ्यं॒ शर्म॑ यंसन्न॒मृता॒ मर्त्ये॑भ्यः |
बाध॑माना॒ अप॒ द्विषः॑ || 1 | 090 | 03
वि नः॑ प॒थः सु॑वि॒ताय॑ चि॒यंत्विंद्रो॑ म॒रुतः॑ |
पू॒षा भगो॒ वंद्या॑सः || 1 | 090 | 04
उ॒त नो॒ धियो॒ गोअ॑ग्राः॒ पूष॒न्विष्ण॒वेव॑यावः |
कर्ता॑ नः स्वस्ति॒मतः॑ || 1 | 090 | 05
मधु॒ वाता॑ ऋताय॒ते मधु॑ क्षरंति॒ सिंध॑वः |
माध्वी॑र्नः सं॒त्वोष॑धीः || 1 | 090 | 06
मधु॒ नक्त॑मु॒तोषसो॒ मधु॑म॒त्पार्थि॑वं॒ रजः॑ |
मधु॒ द्यौर॑स्तु नः पि॒ता || 1 | 090 | 07
मधु॑मान्नो॒ वन॒स्पति॒र्मधु॑माँ अस्तु॒ सूर्यः॑ |
माध्वी॒र्गावो॑ भवंतु नः || 1 | 090 | 08
शं नो॑ मि॒त्रः शं वरु॑णः॒ शं नो॑ भवत्वर्य॒मा |
शं न॒ इंद्रो॒ बृह॒स्पतिः॒ शं नो॒ विष्णु॑रुरुक्र॒मः || 1 | 090 | 09

9 ऋग्वेद ऐतरेयोपनिषत् |

ॐ वाङ्मे॒ मन॑सि॒ प्रति॑ष्ठिता॒ मनो॑ मे॒ वाचि॒
प्रति॑ष्ठितमा॒विरा॒वीर्म॑ एधि वे॒दस्य म॒ आणी᳚स्थः श्रु॒तं मे॒ मा
प्रहा॑सीर॒नेना॒धीते॑नाहोरा॒त्रान् संद॑धाम्यृ॒तं व॑दिष्यामि स॒त्यं व॑दिष्यामि॒
तन्माम॑वतु॒ तद्व॒क्तार॑मव॒त्वव॑तु॒ मामव॑तु व॒क्तार॒मव॑तु व॒क्तारं᳚ ||

ॐ शांतिः॒ शांतिः॒ शांतिः॑ ||

10 शुक्लयजुर्वेद ईशावास्योपनिषत् बृहदारण्यकोपनिषत्

ॐ पूर्ण॒मदः॒ पूर्ण॒मिदं॒ पूर्णा॒त्पूर्ण॒मुद॒च्यते | पूर्ण॒स्य
पूर्ण॒मादा॒य पूर्ण॒मेवावशि॒ष्यते || ॐ शांतिः॒ शांतिः॒ शांतिः॒ ||

11 रुद्रप्रश्नः
ॐ इडा॑ देव॒हूर्मनु॑र्यज्ञ॒नीर्बृह॒स्पति॑रुक्थाम॒दानि॑
शꣳसिष॒द्विश्वे॑दे॒वाः सू᳚क्त॒वाचः॒
पृथि॑वीमात॒र्मा मा॑ हिꣳसी॒र्मधु॑ मनिष्ये॒
मधु॑ जनिष्ये॒ मधु॒ वक्ष्यामि॒ मधु॑ वदिष्यामि॒
मधु॒मतीं दे॒वेभ्यो॒ वाच॑मुद्यासꣳ शुश्रू॒षेण्यां᳚
मनु॒ष्ये᳚भ्य॒स्तं मा॑ दे॒वा अ॑वंतु शो॒भायै॑
पि॒तरोऽनु॑मदंतु ||

ॐ शांतिः॒ शांतिः॒ शांतिः॑ ||

12 घोषाशांतिः
ॐ शं नो॒ वातः॑ पवतां मात॒रिश्वा॒ शं न॑स्तपतु॒ सूर्यः॑ | अहा॑नि॒ शं भ॑वंतु
न॒श्शं+ रात्रिः॒ प्रति॑ धीयतां | शमु॒षानो॒ व्यु॑च्छतु॒ शमा॑दि॒त्य उदे॑तु नः |
शि॒वा न॒श्शंत॑माभव सुमृडी॒का सर॑स्वति |
माते॒ व्यो॑म सं॒दृशि॑ | इडा॑यै॒वास्त्व॑सि वास्तु॒ मद्वा᳚स्तु॒मंतो॑ भूयास्म॒
मा वास्तो᳚-श्छिथ्स्मह्यवा॒स्तुस्स भू॑या॒द्यो᳚ऽस्मांद्वेष्टि॒ यं च॑ व॒यं द्वि॒ष्मः |
प्र॒ति॒ष्ठासि॑ प्रति॒ष्ठावं॑तो भूयास्म॒मा
प्र॑ति॒ष्ठाया᳚-श्छिथ्स्मह्यप्रति॒ष्ठस्स भू॑या॒द्यो᳚ऽस्मांद्वेष्टि॒ यं च॑ व॒यं
द्वि॒ष्मः | आवा॑तवाहि भेष॒जं विवा॑तवाहि॒ यद्रपः॑ | त्वं+ हि वि॒श्वभे॑षजो
दे॒वानां᳚ दू॒त ईय॑से | द्वावि॒मौ वातौ॑ वात॒ आसिंधो॒राप॑रा॒वतः॑ ||

दक्षं॑ मे अ॒न्य आ॒वातु॒ परा॒न्योवा॑तु॒ यद्रपः॑ | यद॒दोवा॑तते
गृ॒हे॑ऽमृत॑स्य नि॒धिर्हि॒तः | ततो॑ नो देहि जी॒वसे॒ ततो॑ नो धेहि भेष॒जं
| ततो॑ नो॒ मह॒ आव॑ह॒ वात॒ आवा॑तु भेष॒जं |
शं॒भूर्म॑यो॒भूर्नो॑ हृ॒देप्रण॒ आयूं+षि तारिषत् | इंद्र॑स्य गृ॒हो॑ऽसि॒ तं
त्वा॒ प्रप॑द्ये॒ सगु॒स्साश्वः॑ | स॒ह यन्मे॒ अस्ति॒ तेन॑ | भूः प्रप॑द्ये॒ भुवः॒
प्रप॑द्ये॒ सुवः॒ प्रप॑द्ये॒ भूर्भुव॒स्सुवः॒ प्रप॑द्ये वा॒युं प्रप॒द्येना᳚र्तां
दे॒वतां॒ प्रप॒द्येऽश्मा॑नमाख॒णं प्रप॑द्ये प्र॒जाप॑तेर्ब्रह्मको॒शं
ब्रह्म॒प्रप॑द्य॒ ॐ प्रप॑द्ये |
अं॒तरि॑क्षं म उ॒र्वं॑तरं॑ बृ॒हद॒ग्नयः॒ पर्व॑ताश्च॒ यया॒ वातः॑
स्व॒स्त्या स्व॑स्ति॒मांतया᳚ स्व॒स्त्या स्व॑स्ति॒मान॑सानि |
प्राणा॑पानौ मृ॒त्योर्मा॑पातं॒ प्राणा॑पानौ॒ मा मा॑ हासिष्टं॒ मयि॑ मे॒धां मयि॑
प्र॒जां मय्य॒ग्निस्तेजो॑ दधातु॒ मयि॑ मे॒धां मयि॑ प्र॒जां मयींद्र॑ इंद्रि॒यं
द॑धातु॒ मयि॑ मे॒धां मयि॑ प्र॒जां मयि॒ सूर्यो॒ भ्राजो॑ दधातु ||

द्यु॒भि-र॒क्तुभिः॒ परि॑पातम॒स्मानरि॑ष्टेभिरश्विना॒ सौभ॑गेभिः | तन्नो॑
मि॒त्रो वरु॑णो मामहंता॒मदि॑तिः॒ सिंधुः॑ पृथि॒वी उ॒तद्यौः | कया॑नश्चि॒त्र
आभु॑वदू॒ती स॒दावृ॑ध॒स्सखा᳚ |
कया॒शचि॑ष्ठया वृ॒ता | कस्त्वा॑ स॒त्यो मदा॑नां॒ मं+हि॑ष्ठो मथ्स॒दंध॑सः |
दृ॒ढा चि॑दा॒रुजे॒ वसु॑ | अ॒भीषुण॒स्सखी॑नामवि॒ता ज॑रितॄ॒णां |
श॒तं भ॑वास्यू॒तिभिः॑ | वय॑स्सुप॒र्णा उप॑सेदु॒रिंद्रं॑ प्रि॒यमे॑धा॒ ऋष॑यो॒
नाध॑मानाः | अप॑ध्वां॒तमू᳚र्णु॒हि पू॒र्धिचक्षु॑र्मुमु॒ग्ध्य॑स्मन्नि॒धये॑व
ब॒द्धान् |
शं नो॑ दे॒वीर॒भिष्ट॑य॒ आपो॑ भवंतु पी॒तये᳚ | शंयोर॒भिस्र॑वंतु नः ||

ईशा॑ना॒वार्या॑णां॒ क्षयं॑तीश्चर्षणी॒नां | अ॒पो या॑चामि भेष॒जं |
सु॒मि॒त्रान॒ आप॒ ओष॑धयः संतु दुर्मि॒त्रास्तस्मै॑ भूयासु॒र्यो᳚ऽस्मांद्वेष्टि॒
यं च॑ व॒यं द्वि॒ष्मः |
आपो॒ हिष्ठा म॑यो॒भुव॒स्ता न॑ ऊ॒र्जे द॑धातन | म॒हेरणा॑य॒ चक्ष॑से |
यो वः॑ शि॒वत॑मो रस॒स्तस्य॑ भाजयते॒ ह नः॑ | उ॒श॒तीरि॑व मा॒त॑रः |
तस्मा॒ अरं॑गमामवो॒ यस्य॒ क्षया॑य॒ जिन्व॑थ | आपो॑ ज॒नय॑था च नः |
पृ॒थि॒वी शां॒ता साग्निना॑ शां॒ता सामे॑ शां॒ता शुचं+॑ शमयतु | अं॒तरि॑क्षं+
शां॒तं तद्वा॒युना॑ शां॒तं तन्मे॑ शां॒तं+ शुचं+॑ शमयतु | द्यौश्शां॒ता
सादि॒त्येन॑ शां॒ता सा मे॑ शां॒ता शुचं+॑ शमयतु |
पृ॒थि॒वी शांति॑रं॒तरि॑क्षं॒+॒
शांति॒-र्द्यौ-श्शांति॒र्दिश॒-श्शांति॑-रवांतरदि॒शा-श्शांति॑-र॒ग्नि-
श्शांति॑-र्वा॒यु-श्शांति॑-रादि॒त्य-श्शांति॑-श्चं॒द्रमा॒-श्शांति॒-
र्नक्ष॑त्राणि॒-शांति॒-राप॒-श्शांति॒-रोष॑धय॒-श्शांति॒-
र्वन॒स्पत॑य॒-श्शांति॒-र्गौ-श्शांति॑-र॒जा-शांति॒-रश्व॒-श्शांतिः॒
पुरु॑ष॒-श्शांति॒-र्ब्रह्म॒-श्शांति॑-र्ब्राह्म॒ण-श्शांति॒-श्शांति॑-रे॒व
शांति-श्शांति॑-र्मे अस्तु॒ शांतिः॑ |
तया॒हꣳ शां॒त्या स॑र्वशां॒त्या मह्यं॑ द्वि॒पदे॒ चतु॑ष्पदे च॒ शांतिं॑ करोमि
शांति॑र्मे अस्तु॒ शांतिः॑ ||

एह॒ श्रीश्च॒ ह्रीश्च॒ धृति॑श्च॒ तपो॑ मे॒धा प्र॑ति॒ष्ठा श्र॒द्धा स॒त्यं
धर्म॑श्चै॒तानि॒ मोत्ति॑ष्ठंत॒-मनूत्ति॑ष्ठंतु॒ मा मा॒ग्॒ श्रीश्च॒ ह्रीश्च॒
धृति॑श्च॒ तपो॑ मे॒धा प्र॑ति॒ष्ठा श्र॒द्धा स॒त्यं धर्म॑श्चै॒तानि॑ मा॒
मा हा॑सिषुः |
उदायु॑षा स्वा॒युषोदोष॑धीनां॒+ रसे॒नोत्प॒र्जन्य॑स्य॒
शुष्मे॒णोद॑स्थाम॒मृतां॒+॒ अनु॑ | तच्चक्षु॑र्दे॒वहि॑तं
पु॒रस्ता᳚च्छु॒क्रमु॒च्चर॑त् |
पश्ये॑म श॒रद॑श्श॒तं जीवे॑म श॒रद॑श्श॒तं नंदा॑म श॒रद॑श्श॒तं
मोदा॑म श॒रद॑श्श॒तं भवा॑म श॒रद॑श्श॒तं+ शृ॒णवा॑म
श॒रद॑श्श॒तं प्रब्र॑वाम श॒रद॑श्श॒तमजी॑तास्स्याम श॒रद॑श्श॒तं
ज्योक्च॒ सूर्यं॑ दृ॒शे |
य उद॑गान्मह॒तोऽर्णवा᳚द्वि॒भ्राज॑मानस्सरि॒रस्य॒ मध्या॒थ्समा॑ वृष॒भो
लो॑हिता॒क्षस्सूर्यो॑ विप॒श्चिन्मन॑सा पुनातु ||

ब्रह्म॑ण॒श्चोत॑न्यसि॒ ब्रह्म॑ण आ॒णीस्थो॒ ब्रह्म॑ण आ॒वप॑नमसि धारि॒तेयं
पृ॑थि॒वी ब्रह्म॑णा म॒ही धा॑रि॒तमे॑नेन म॒हदं॒तरि॑क्षं॒ दिवं॑ दाधार
पृथि॒वीं+ सदे॑वां॒ यद॒हं वेद॒ तद॒हं धा॑रयाणि॒ मामद्वेदोऽधि॒ विस्र॑सत् |
मे॒धा॒म॒नी॒षे मावि॑शतां+ स॒मीची॑ भू॒तस्य॒ भव्य॒स्याव॑रुध्यै॒
सर्व॒मायु॑रयाणि॒ सर्व॒मायु॑रयाणि |
आ॒भिर्गी॒र्भिर्यदतो॑न ऊ॒नमाप्या॑यय हरिवो॒ वर्ध॑मानः | य॒दा स्तो॒तृभ्यो॒
महि॑ गो॒त्रा रु॒जासि॑ भूयिष्ठ॒भाजो॒ अध॑ ते स्याम | ब्रह्म॒ प्रावा॑दिष्म॒ तन्नो॒
मा हा॑सीत् || ॐ शांतिः॒ शांतिः॒ शांतिः॑ ||

ॐ सं त्वा॑ सिंचामि॒ यजु॑षा प्र॒जामायु॒र्धनं॑ च || ॐ शांतिः॒ शांतिः॒ शांतिः॑ ||

13 सामवेद केनोपनिषत् छांदोग्योपनिषत्

ॐ आप्यायंतु ममांगानि वाक्प्राणश्चक्षुःश्रोत्रं |
अथो बलमिंद्रियाणि च सर्वाणि |
सर्वं ब्रह्मौपनिषदं माऽहं ब्रह्मनिराकुर्यां |
मा मा ब्रह्मनिराकरोदनिराकरणमस्तु |
अनिराकरणं मेऽस्तु |
तदात्मनि निरते य उपनिषत्सु धर्मास्ते मयि संतु |
ते मयि संतु ||

ॐ शांतिः॒ शांतिः॒ शांतिः॑ ||
ॐ शांतिः शांतिः शांतिः ||