మధురం మధురేభ్యోఽపి మంగళేభ్యోఽపి మంగళమ్ |
పావనం పావనేభ్యోఽపి హరేర్నామైవ కేవలమ్ || ౧ ||
ఆబ్రహ్మస్తంబపర్యంతం సర్వం మాయామయం జగత్ |
సత్యం సత్యం పునః సత్యం హరేర్నామైవ కేవలమ్ || ౨ ||
స గురుః స పితా చాపి సా మాతా బాంధవోఽపి సః |
శిక్షయేచ్చేత్ సదా స్మర్తుం హరేర్నామైవ కేవలమ్ || ౩ ||
నిఃశ్వాసే న హి విశ్వాసః కదా రుద్ధో భవిష్యతి |
కీర్తనీయమతో బాల్యాద్ధరేర్నామైవ కేవలమ్ || ౪ ||
హరిః సదా వసేత్తత్ర యత్ర భాగవతా జనాః |
గాయంతి భక్తిభావేన హరేర్నామైవ కేవలమ్ || ౫ ||
అహో దుఃఖం మహాదుఃఖం దుఃఖాద్దుఃఖతరం యతః |
కాచార్థం విస్మృతం రత్నం హరేర్నామైవ కేవలమ్ || ౬ ||
దీయతాం దీయతాం కర్ణో నీయతాం నీయతాం వచః |
గీయతాం గీయతాం నిత్యం హరేర్నామైవ కేవలమ్ || ౭ ||
తృణీకృత్య జగత్సర్వం రాజతే సకలోపరి |
చిదానందమయం శుద్ధం హరేర్నామైవ కేవలమ్ || ౮ ||
ఇతి కేవలాష్టకమ్ ||