(ಶ್ರೀಕಾಲಹಸ್ತಿಕ್ಷೇತ್ರಸ್ಥಜ್ಞಾನಪ್ರಸೂನಾಂಬಿಕಾಸ್ತುತಿಃ)
ಶ್ರೀನರಕಂಠೀರವಶಾಸ್ತ್ರಿವಿರಚಿತಾ |
ಶ್ರೀನಾಕನಾಥಮುಖನಾನಾಸಹಸ್ರಸುರಸೇನಾಗ್ರಮೌಲಿವಲಭೀ-
ಸೂನಾವಲೀಬಹುಲಲೀನಾಲಿನೀಮಧುರಗಾನಾಂಚಿತಾಂಘ್ರಿನಲಿನಾ |
ಮಾನಾತಿಲಂಘಿಮಹಿಮಾನಾದಿರಾನತಜನಾನಾಮನೇಕಫಲದಾ
ಜ್ಞಾನಾಂಬಿಕಾ ಭವತು ದೀನಾವನೀ ಕುಶಲದಾನಾಯ ಮೇ ಭಗವತೀ || 1 ||

ರಾಕಾಶಶಾಂಕರುಚಿರಾಕಾರಚಾರುಪಾದನಾ(ಪತದಾ)ಕಾಶಸಿಂಧುಲಹರೀ-
ನೀಕಾಶಸೂಕ್ತಿಸರಣೀಕಾರಿಣೀ ಪ್ರಕೃತಿಮೂಕಾತ್ಮನಾಮಪಿ ನೃಣಾಂ |
ಪಾಕಾಹಿತಪ್ರಮುಖನಾಕಾಲಯಪ್ರಕರಶೋಕಾಪನೋದನಚಣಾ
ಶ್ರೀಕಾಲಹಸ್ತಿನಗರೈಕಾಯನಾವತು ಪಿನಾಕಾಯುಧಸ್ಯ ದಯಿತಾ || 2 ||

ಶ್ರೇಣೀಭವದ್ದಿವಿಷದೇಣೀದೃಗುಲ್ಲಸಿತವೇಣೀಪಿನದ್ಧಸುಮನೋ-
ದ್ರೋಣೀಮರಂದರಸವೇಣೀಪ್ರಸಾರಭೃಶಶೋಣೀಕೃತಾಂಘ್ರಿಕಮಲಾ |
ಶ್ರೋಣೀನಟತ್ಸರಕೃಪಾಣೀಮನೋಜ್ಞಘನವೇಣೀ ಕೃಪಾರ್ದ್ರಹೃದಯಾ
ಕ್ಷೋಣೀಧರೇಂದ್ರತನಯಾಣೀಯಸೀಮಪಿ ಚ ವಾಣೀಂ ಪ್ರಗಲ್ಭಯತು ಮೇ || 3 ||

ಕೇಲೀಸಮಾಕಲಿತತಾಲೀದಲಶ್ರವಣಪಾಲೀವಿಭೂಷಣಮಣೀ-
ವಾ(ಪಾ)ಲೀ ಮದೋದ್ಧತಮರಾಲೀಗತಿರ್ದಿಂಶತು ನಾಲೀಕದೀರ್ಘನಯನಾ |
ಚೂಲೀತಲಾಭರಣನಾಲೀಕವೈರಿಶಕಲಾಲೀಭವತ್ಸುರವಧೂಃಽ
ಕಾಲೀ ಗಿರಂ ಮೃದು ಮೃಣಾಲೀಭುಜಾ ಮಮ ಮಧೂಲೀರಸೋರ್ಮಿಮಧುರಾಂ || 4 ||

ಹೃದ್ಯಾನವದ್ಯತರಗದ್ಯಾನುಬದ್ಧಮೃದುಪದ್ಯಾಭಿರೂಪಕವಿತಾಂ
ದದ್ಯಾಜ್ಜಗನ್ಮಹಿತವಿದ್ಯಾಂ ತ್ರಯೀಶಿಖರವೇದ್ಯಾ ಹಿಮಾದ್ರಿತನಯಾ |
ಆದ್ಯಾ ಪರಾ ಮಮ ಶರದ್ಯಾಮಿನೀಶಭೃದವಿದ್ಯಾವಿಲಾಸಶಮನೀ
ವಿದ್ಯಾಧರೀ ಸಮಭಿವಾದ್ಯಾ ಜ್ವಲನ್ಮಣಿನಿಷದ್ಯಾಯಮಾಣರಶನಾ || 5 ||

ಹಾಲಾಮದಾಕಲಿತಹೇಲಾಲಸದ್ಬಹುಲಲೋಲಾರುಣಾಕ್ಷಿಯುಗಲೀ
ಲೀಲಾಪಿನದ್ಧಸುರಸಾಲಾವಲೀಪ್ರಸವಮಾಲಾಸುಗಂಧಚಿಕುರಾ |
ಕೈಲಾಸನಾಥಹಿತಶೀಲಾ ಕರಾಂಚಿತಶುಕಾಲಾಪಲೋಲಹೃದಯಾ
ವೇಲಾತಿಲಂಘಿಶುಭಜಾಲಾಯ ಮೇ ಭವತು ಶೈಲಾಧಿನಾಥತನಯಾ || 6 ||

ಚಂಡಾಪದಾನಯುತಚಂಡಾಭಿಧಾಸುರಪಿಚಂಡಾವದಾರಣಚಣಾ
ಭಂಡಾಸುರೋಗ್ರಭುಜದಂಡಾಗ್ರನಿರ್ದಲನಶೌಂಡಾಯುಧೋದ್ಧತಕರಾ |
ಶುಂಡಾನುಕಾರಿಕರಕಾಂಡಾವದೀರ್ಣಜಗದಂಡಾಟ್ಟಹಾಸಭಯದಾ
ದಂಡಾಯುಧಾಯ ಶಶಿಖಂಡಾವತಂಸಿತಶಿಖಂಡಾ ನ ಚಾರ್ಪಯತು ಮಾಂ || 7 ||

ಹುಂಕಾರನಿರ್ಗಲದಶಂಕಾಪತದ್ವಿಷದಹಂಕಾರಮಾರತಿಮಿರಾಂ
ಅಂಕಾಂತಲಂಬಿಸಿತಕ್ಙ್ಕಾಲಹಾರಸದಲಂಕಾರಬಂಧುರಗಲಾಂ |
ಹ್ರೀಂಕಾರಿಣೀಂ ಭಯದಟಂಕಾರಕಾರ್ಮುಕಕರಾಂ ಕಾಲಹಸ್ತಿನಿಲಯಾಂ
ಪಂಕಾಪಹಾಮಪಕಲಂಕಾವತಂಸಹರಿಣಾಂಕಾಂ ಭಜೇ ಭಗವತೀಂ || 8 ||

ಕಂಠಾರವೋದ್ಯದುಪಕಂಠಾರಿದುರ್ವಿಷಹಕಂಠೀರವೇಂದ್ರಗಮನೋ-
ತ್ಕಂಠಾ ನಿಕಾಮಶಿತಿಕಂಠಾನುಕರ್ಷಿಕಲಕಂಠಾನುಲಾಪಲಲಿತಾ |
ಶುಂಠೀಭವದ್ದನುಜಕಂಠೀರವಪ್ರಕರಕುಂಠೀಕೃತಿಕ್ಷಮಬಲಾ
ಕುಂಠೀಕರೋತು ನರಕಂಠೀರವಾಖ್ಯಕವಿಕಂಠೀರವಸ್ಯ ದುರಿತಂ || 9 ||

ಶ್ರೀಕಾಲಹಸ್ತಿನಿಲಯಜ್ಞಾನಪ್ರಸವಾಂಬಿಕಾಮುದೇ ರಚಿತಾ |
ನರಕಂಠೀರವಕೃತಿನಾ ನವರತ್ನಸ್ತುತಿರಿಯಂ ಚಿರಂ ಜಯತು || 10 ||

|| ಇತಿ ಶ್ರೀನರಕಂಠೀರವಶಾಸ್ತ್ರಿವಿರಚಿತಾ ನವರತ್ನಮಾಲಿಕಾ ಸಮಾಪ್ತಾ ||