ಶ್ರೀಕೃಷ್ಣ ಉವಾಚ |
ಮತ್ತಸಿಂಧುರಮಸ್ತಕೋಪರಿ ನೃತ್ಯಮಾನಪದಾಂಬುಜಂ
ಭಕ್ತಚಿಂತಿತಸಿದ್ಧಿದಾನವಿಚಕ್ಷಣಂ ಕಮಲೇಕ್ಷಣಮ್ |
ಭುಕ್ತಿಮುಕ್ತಿಫಲಪ್ರದಂ ಭವಪದ್ಮಜಾಚ್ಯುತಪೂಜಿತಂ
ಕೃತ್ತಿವಾಸಸಮಾಶ್ರಯೇ ಮಮ ಸರ್ವಸಿದ್ಧಿದಮೀಶ್ವರಮ್ || ೧ ||
ವಿತ್ತದಪ್ರಿಯಮರ್ಚಿತಂ ಕೃತಕೃಚ್ಛ್ರತೀವ್ರತಪಶ್ಚರೈಃ
ಮುಕ್ತಿಕಾಮಿಭಿರಾಶ್ರಿತೈರ್ಮುನಿಭಿರ್ದೃಢಾಮಲಭಕ್ತಿಭಿಃ |
ಮುಕ್ತಿದಂ ನಿಜಪಾದಪಂಕಜಸಕ್ತಮಾನಸಯೋಗಿನಾಂ
ಕೃತ್ತಿವಾಸಸಮಾಶ್ರಯೇ ಮಮ ಸರ್ವಸಿದ್ಧಿದಮೀಶ್ವರಮ್ || ೨ ||
ಕೃತ್ತದಕ್ಷಮಖಾಧಿಪಂ ವರವೀರಭದ್ರಗಣೇನ ವೈ
ಯಕ್ಷರಾಕ್ಷಸಮರ್ತ್ಯಕಿನ್ನರದೇವಪನ್ನಗವಂದಿತಮ್ |
ರಕ್ತಭುಗ್ಗಣನಾಥಹೃದ್ಭ್ರಮರಾಂಚಿತಾಂಘ್ರಿಸರೋರುಹಂ
ಕೃತ್ತಿವಾಸಸಮಾಶ್ರಯೇ ಮಮ ಸರ್ವಸಿದ್ಧಿದಮೀಶ್ವರಮ್ || ೩ ||
ನಕ್ತನಾಥಕಳಾಧರಂ ನಗಜಾಪಯೋಧರನೀರಜಾ-
-ಲಿಪ್ತಚಂದನಪಂಕಕುಂಕುಮಪಂಕಿಲಾಮಲವಿಗ್ರಹಮ್ |
ಶಕ್ತಿಮಂತಮಶೇಷಸೃಷ್ಟಿವಿಧಾಯಕಂ ಸಕಲಪ್ರಭುಂ
ಕೃತ್ತಿವಾಸಸಮಾಶ್ರಯೇ ಮಮ ಸರ್ವಸಿದ್ಧಿದಮೀಶ್ವರಮ್ || ೪ ||
ರಕ್ತನೀರಜತುಲ್ಯಪಾದಪಯೋಜಸನ್ಮಣಿನೂಪುರಂ
ಪತ್ತನತ್ರಯದೇಹಪಾಟನಪಂಕಜಾಕ್ಷಶಿಲೀಮುಖಮ್ |
ವಿತ್ತಶೈಲಶರಾಸನಂ ಪೃಥುಶಿಂಜಿನೀಕೃತತಕ್ಷಕಂ
ಕೃತ್ತಿವಾಸಸಮಾಶ್ರಯೇ ಮಮ ಸರ್ವಸಿದ್ಧಿದಮೀಶ್ವರಮ್ || ೫ ||
ಯಃ ಪಠೇಚ್ಚ ದಿನೇ ದಿನೇ ಸ್ತವಪಂಚರತ್ನಮುಮಾಪತೇಃ
ಪ್ರಾತರೇವ ಮಯಾ ಕೃತಂ ನಿಖಿಲಾಘತೂಲಮಹಾನಲಮ್ |
ತಸ್ಯ ಪುತ್ರಕಳತ್ರಮಿತ್ರಧನಾನಿ ಸಂತು ಕೃಪಾಬಲಾತ್
ತೇ ಮಹೇಶ್ವರ ಶಂಕರಾಖಿಲ ವಿಶ್ವನಾಯಕ ಶಾಶ್ವತ || ೬ ||
ಇತಿ ಶ್ರೀಶಿವಮಹಾಪುರಾಣೇ ಶ್ರೀಕೃಷ್ಣಕೃತ ಶ್ರೀಶಿವಪಂಚರತ್ನಸ್ತುತಿಃ |