ಶಂಕಾರೂಪೇಣ ಮಚ್ಚಿತ್ತಂ ಪಂಕೀಕೃತಮಭೂದ್ಯಯಾ |
ಕಿಂಕರೀ ಯಸ್ಯ ಸಾ ಮಾಯಾ ಶಂಕರಾಚಾರ್ಯಮಾಶ್ರಯೇ ||೧||
ಪ್ರಹ್ಲಾದವರದೋ ದೇವೋ ಯೋ ನೃಸಿಂಹಃ ಪರೋ ಹರಿಃ |
ನೃಸಿಂಹೋಪಾಸಕಂ ನಿತ್ಯಂ ತಂ ನೃಸಿಂಹಗುರುಂ ಭಜೇ ||೨||
ಶ್ರೀಸಚ್ಚಿದಾನಂದ ಶಿವಾಭಿನವ್ಯನೃಸಿಂಹಭಾರತ್ಯಭಿಧಾನ್ ಯತೀಂದ್ರಾನ್ |
ವಿದ್ಯಾನಿಧೀನ್ ಮಂತ್ರನಿಧೀನ್ ಸದಾತ್ಮನಿಷ್ಠಾನ್ ಭಜೇ ಮಾನವಶಂಭುರೂಪಾನ್ ||೩||
ಸದಾತ್ಮಧ್ಯಾನನಿರತಂ ವಿಷಯೇಭ್ಯಃ ಪರಾಙ್ಮುಖಂ |
ನೌಮಿ ಶಾಸ್ತ್ರೇಷು ನಿಷ್ಣಾತಂ ಚಂದ್ರಶೇಖರಭಾರತೀಂ ||೪||
ವಿವೇಕಿನಂ ಮಹಾಪ್ರಜ್ಞಂ ಧೈರ್ಯೌದಾರ್ಯಕ್ಷಮಾನಿಧಿಂ |
ಸದಾಭಿನವಪೂರ್ವಂ ತಂ ವಿದ್ಯಾತೀರ್ಥಗುರುಂ ಭಜೇ ||೫||
ಅಜ್ಞಾನಾಂ ಜಾಹ್ನವೀತೀರ್ಥಂ ವಿದ್ಯಾತೀರ್ಥಂ ವಿವೇಕಿನಾಂ |
ಸರ್ವೇಷಾಂ ಸುಖದಂ ತೀರ್ಥಂ ಭಾರತೀತೀರ್ಥಮಾಶ್ರಯೇ ||೬||
ವಿದ್ಯಾವಿನಯಸಂಪನ್ನಂ ವೀತರಾಗಂ ವಿವೇಕಿನಂ |
ವಂದೇ ವೇದಾಂತತತ್ತ್ವಜ್ಞಂ ವಿಧುಶೇಖರಭಾರತೀಂ ||೭||
ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯವರ್ಯ-
ಪದವಾಕ್ಯಪ್ರಮಾಣಪಾರಾವಾರಪಾರೀಣ-ಯಮನಿಯಮಾಸನ-
ಪ್ರಾಣಾಯಾಮಪ್ರತ್ಯಾಹಾರಧಾರಣಾಧ್ಯಾನ-
ಸಮಾಧ್ಯಷ್ಟಾಂಗಯೋಗಾನುಷ್ಠಾನನಿಷ್ಠ-ತಪಶ್ಚಕ್ರವರ್ತಿ-
ಅನಾದ್ಯವಿಚ್ಛಿನ್ನಶ್ರೀಶಂಕರಾಚಾರ್ಯಗುರುಪರಂಪರಾಪ್ರಾಪ್ತ-
ಷಡ್ದರ್ಶನಸ್ಥಾಪನಾಚಾರ್ಯ-ವ್ಯಾಖ್ಯಾನಸಿಂಹಾಸನಾಧೀಶ್ವರ-
ಸಕಲನಿಗಮಾಗಮಸಾರಹೃದಯ-ಸಾಂಖ್ಯತ್ರಯಪ್ರತಿಪಾದಕ-
ವೈದಿಕಮಾರ್ಗಪ್ರವರ್ತಕ-ಸರ್ವತಂತ್ರಸ್ವತಂತ್ರ-ಆದಿರಾಜಧಾನೀ-
ವಿದ್ಯಾನಗರಮಹಾರಾಜಧಾನೀ-ಕರ್ಣಾಟಕಸಿಂಹಾಸನಪ್ರತಿಷ್ಠಾಪನಾಚಾರ್ಯ-
ಶ್ರೀಮದ್ರಾಜಾಧಿರಾಜಗುರು-ಭೂಮಂಡಲಾಚಾರ್ಯ-
ಋಷ್ಯಶೃಂಗಪುರವರಾಧೀಶ್ವರ-ತುಂಗಭದ್ರಾತೀರವಾಸಿ-
ಶ್ರೀಮದ್ವಿದ್ಯಾಶಂಕರಪಾದಪದ್ಮಾರಾಧಕ-ಶ್ರೀಮಜ್ಜಗದ್ಗುರು-
ಶ್ರೀಮದಭಿನವವಿದ್ಯಾತೀರ್ಥಮಹಾಸ್ವಾಮಿಗುರುಕರಕಮಲಸಂಜಾತ-
ಶ್ರೀಮಜ್ಜಗದ್ಗುರು-ಶ್ರೀಭಾರತೀತೀರ್ಥಮಹಾಸ್ವಾಮಿನಾಂ ತತ್ಕರಕಮಲಸಂಜಾತ-
ಶ್ರೀಮಜ್ಜಗದ್ಗುರು-ಶ್ರೀವಿಧುಶೇಖರಭಾರತೀ-ಮಹಾಸ್ವಾಮಿನಾಂ ಚ
ಚರಣಾರವಿಂದಯೋಃ ಸಾಷ್ಟಾಂಗಪ್ರಣಾಮಾನ್ ಸಮರ್ಪಯಾಮಃ ||