അസ്യ ശ്രീചംഡീകവചസ്യ ബ്രഹ്മാ ഋഷിഃ, അനുഷ്ടുപ് ഛംദഃ, ശ്രീചാമുംഡാ ദേവതാ, അംഗന്യാസോക്തമാതരോ ബീജം, ദിഗ്ബംധദേവതാസ്തത്വം, ശ്രീജഗദംബാപ്രീത്യര്ഥേ സപ്തശതീ പാഠാംഗ ജപേ വിനിയോഗഃ |
ഓം നമശ്ചംഡികായൈ |
മാര്കംഡേയ ഉവാച |
യദ്ഗുഹ്യം പരമം ലോകേ സര്വരക്ഷാകരം നൃണാമ് |
യന്ന കസ്യചിദാഖ്യാതം തന്മേ ബ്രൂഹി പിതാമഹ || ൧ ||
ബ്രഹ്മോവാച |
അസ്തി ഗുഹ്യതമം വിപ്ര സര്വഭൂതോപകാരകമ് |
ദേവ്യാസ്തു കവചം പുണ്യം തച്ഛൃണുഷ്വ മഹാമുനേ || ൨ ||
പ്രഥമം ശൈലപുത്രീതി ദ്വിതീയം ബ്രഹ്മചാരിണീ |
തൃതീയം ചംദ്രഘംടേതി കൂഷ്മാംഡേതി ചതുര്ഥകമ് || ൩ ||
പംചമം സ്കംദമാതേതി ഷഷ്ഠം കാത്യായനീതി ച |
സപ്തമം കാലരാത്രീതി മഹാഗൌരീതി ചാഷ്ടമമ് || ൪ ||
നവമം സിദ്ധിദാത്രീ ച നവദുര്ഗാഃ പ്രകീര്തിതാഃ |
ഉക്താന്യേതാനി നാമാനി ബ്രഹ്മണൈവ മഹാത്മനാ || ൫ ||
അഗ്നിനാ ദഹ്യമാനസ്തു ശത്രുമധ്യേ ഗതോ രണേ |
വിഷമേ ദുര്ഗമേ ചൈവ ഭയാര്താഃ ശരണം ഗതാഃ || ൬ ||
ന തേഷാം ജായതേ കിംചിദശുഭം രണസംകടേ |
നാപദം തസ്യ പശ്യാമി ശോകദുഃഖഭയം ന ഹി || ൭ ||
യൈസ്തു ഭക്ത്യാ സ്മൃതാ നൂനം തേഷാം വൃദ്ധിഃ പ്രജായതേ | [സിദ്ധിഃ]
യേ ത്വാം സ്മരംതി ദേവേശി രക്ഷസേ താന്ന സംശയഃ || ൮ ||
പ്രേതസംസ്ഥാ തു ചാമുംഡാ വാരാഹീ മഹിഷാസനാ |
ഐംദ്രീ ഗജസമാരൂഢാ വൈഷ്ണവീ ഗരുഡാസനാ || ൯ ||
മാഹേശ്വരീ വൃഷാരൂഢാ കൌമാരീ ശിഖിവാഹനാ |
ലക്ഷ്മീഃ പദ്മാസനാ ദേവീ പദ്മഹസ്താ ഹരിപ്രിയാ || ൧൦ ||
ശ്വേതരൂപധരാ ദേവീ ഈശ്വരീ വൃഷവാഹനാ |
ബ്രാഹ്മീ ഹംസസമാരൂഢാ സര്വാഭരണഭൂഷിതാ || ൧൧ ||
ഇത്യേതാ മാതരഃ സര്വാഃ സര്വയോഗസമന്വിതാഃ |
നാനാഭരണശോഭാഢ്യാ നാനാരത്നോപശോഭിതാഃ || ൧൨ ||
ദൃശ്യംതേ രഥമാരൂഢാ ദേവ്യഃ ക്രോധസമാകുലാഃ |
ശംഖം ചക്രം ഗദാം ശക്തിം ഹലം ച മുസലായുധമ് || ൧൩ ||
ഖേടകം തോമരം ചൈവ പരശും പാശമേവ ച |
കുംതായുധം ത്രിശൂലം ച ശാര്ങ്ഗമായുധമുത്തമമ് || ൧൪ ||
ദൈത്യാനാം ദേഹനാശായ ഭക്താനാമഭയായ ച |
ധാരയംത്യായുധാനീത്ഥം ദേവാനാം ച ഹിതായ വൈ || ൧൫ ||
നമസ്തേഽസ്തു മഹാരൌദ്രേ മഹാഘോരപരാക്രമേ |
മഹാബലേ മഹോത്സാഹേ മഹാഭയവിനാശിനി || ൧൬ ||
ത്രാഹി മാം ദേവി ദുഷ്പ്രേക്ഷ്യേ ശത്രൂണാം ഭയവര്ധിനി |
പ്രാച്യാം രക്ഷതു മാമൈംദ്രീ ആഗ്നേയ്യാമഗ്നിദേവതാ || ൧൭ ||
ദക്ഷിണേഽവതു വാരാഹീ നൈരൃത്യാം ഖഡ്ഗധാരിണീ |
പ്രതീച്യാം വാരുണീ രക്ഷേദ്വായവ്യാം മൃഗവാഹിനീ || ൧൮ ||
ഉദീച്യാം രക്ഷ കൌബേരീ ഈശാന്യാം ശൂലധാരിണീ | [കൌമാരീ]
ഊര്ധ്വം ബ്രഹ്മാണീ മേ രക്ഷേദധസ്താദ്വൈഷ്ണവീ തഥാ || ൧൯ ||
ഏവം ദശ ദിശോ രക്ഷേച്ചാമുംഡാ ശവവാഹനാ |
ജയാ മേ ചാഗ്രതഃ പാതു വിജയാ പാതു പൃഷ്ഠതഃ || ൨൦ ||
അജിതാ വാമപാര്ശ്വേ തു ദക്ഷിണേ ചാപരാജിതാ |
ശിഖാം മേ ദ്യോതിനീ രക്ഷേദുമാ മൂര്ധ്നി വ്യവസ്ഥിതാ || ൨൧ || [ഉദ്യോതിനീ]
മാലാധരീ ലലാടേ ച ഭ്രുവൌ രക്ഷേദ്യശസ്വിനീ |
ത്രിനേത്രാ ച ഭ്രുവോര്മധ്യേ യമഘംടാ ച നാസികേ || ൨൨ ||
ശംഖിനീ ചക്ഷുഷോര്മധ്യേ ശ്രോത്രയോര്ദ്വാരവാസിനീ |
കപോലൌ കാലികാ രക്ഷേത് കര്ണമൂലേ തു ശാംകരീ || ൨൩ ||
നാസികായാം സുഗംധാ ച ഉത്തരോഷ്ഠേ ച ചര്ചികാ |
അധരേ ചാമൃതാകലാ ജിഹ്വായാം ച സരസ്വതീ || ൨൪ ||
ദംതാന് രക്ഷതു കൌമാരീ കംഠമധ്യേ തു ചംഡികാ |
ഘംടികാം ചിത്രഘംടാ ച മഹാമായാ ച താലുകേ || ൨൫ ||
കാമാക്ഷീ ചിബുകം രക്ഷേദ്വാചം മേ സര്വമംഗളാ |
ഗ്രീവായാം ഭദ്രകാളീ ച പൃഷ്ഠവംശേ ധനുര്ധരീ || ൨൬ ||
നീലഗ്രീവാ ബഹിഃകംഠേ നലികാം നലകൂബരീ |
സ്കംധയോഃ ഖഡ്ഗിനീ രക്ഷേദ്ബാഹൂ മേ വജ്രധാരിണീ || ൨൭ ||
ഹസ്തയോര്ദംഡിനീ രക്ഷേദംബികാ ചാംഗുളീഷു ച |
നഖാംഛൂലേശ്വരീ രക്ഷേത് കുക്ഷൌ രക്ഷേന്നരേശ്വരീ || ൨൮ || [കുലേശ്വരീ]
സ്തനൌ രക്ഷേന്മഹാദേവീ മനഃ ശോകവിനാശിനീ |
ഹൃദയം ലലിതാ ദേവീ ഉദരേ ശൂലധാരിണീ || ൨൯ ||
നാഭൌ ച കാമിനീ രക്ഷേദ്ഗുഹ്യം ഗുഹ്യേശ്വരീ തഥാ |
ഭൂതനാഥാ ച മേഢ്രം മേ ഊരൂ മഹിഷവാഹിനീ || ൩൦ || [ഗുദേ]
കട്യാം ഭഗവതീ രക്ഷേജ്ജാനുനീ വിംധ്യവാസിനീ |
ജംഘേ മഹാബലാ പ്രോക്താ സര്വകാമപ്രദായിനീ || ൩൧ ||
ഗുല്ഫയോര്നാരസിംഹീ ച പാദപൃഷ്ഠാമിതൌജസീ |
പാദാംഗുളീഷു ശ്രീരക്ഷേത് പാദാധഃസ്ഥലവാസിനീ || ൩൨ ||
നഖാന് ദംഷ്ട്രാ കരാലീ ച കേശാംശ്ചൈവോര്ധ്വകേശിനീ |
രോമകൂപേഷു കൌബേരീ ത്വചം വാഗീശ്വരീ തഥാ || ൩൩ ||
രക്തമജ്ജാവസാമാംസാന്യസ്ഥിമേദാംസി പാര്വതീ |
അംത്രാണി കാലരാത്രിശ്ച പിത്തം ച മുകുടേശ്വരീ || ൩൪ ||
പദ്മാവതീ പദ്മകോശേ കഫേ ചൂഡാമണിസ്തഥാ |
ജ്വാലാമുഖീ നഖജ്വാലാമഭേദ്യാ സര്വസംധിഷു || ൩൫ ||
ശുക്രം ബ്രഹ്മാണി മേ രക്ഷേച്ഛായാം ഛത്രേശ്വരീ തഥാ |
അഹംകാരം മനോബുദ്ധിം രക്ഷ മേ ധര്മചാരിണീ || ൩൬ || [ധര്മധാരിണീ]
പ്രാണാപാനൌ തഥാ വ്യാനമുദാനം ച സമാനകമ് |
വജ്രഹസ്താ ച മേ രക്ഷേത് പ്രാണാന് കള്യാണശോഭനാ || ൩൭ ||
രസേ രൂപേ ച ഗംധേ ച ശബ്ദേ സ്പര്ശേ ച യോഗിനീ |
സത്ത്വം രജസ്തമശ്ചൈവ രക്ഷേന്നാരായണീ സദാ || ൩൮ ||
ആയൂ രക്ഷതു വാരാഹീ ധര്മം രക്ഷതു വൈഷ്ണവീ |
യശഃ കീര്തിം ച ലക്ഷ്മീം ച ധനം വിദ്യാം ച ചക്രിണീ || ൩൯ ||
ഗോത്രമിംദ്രാണീ മേ രക്ഷേത് പശൂന്മേ രക്ഷ ചംഡികേ |
പുത്രാന് രക്ഷേന്മഹാലക്ഷ്മീര്ഭാര്യാം രക്ഷതു ഭൈരവീ || ൪൦ ||
പംഥാനം സുപഥാ രക്ഷേന്മാര്ഗം ക്ഷേമകരീ തഥാ |
രാജദ്വാരേ മഹാലക്ഷ്മീര്വിജയാ സര്വതഃ സ്ഥിതാ || ൪൧ ||
രക്ഷാഹീനം തു യത് സ്ഥാനം വര്ജിതം കവചേന തു |
തത്സര്വം രക്ഷ മേ ദേവി ജയംതീ പാപനാശിനീ || ൪൨ ||
പദമേകം ന ഗച്ഛേത്തു യദീച്ഛേച്ഛുഭമാത്മനഃ |
കവചേനാവൃതോ നിത്യം യത്ര യത്ര ഹി ഗച്ഛതി || ൪൩ ||
തത്ര തത്രാര്ഥലാഭശ്ച വിജയഃ സാര്വകാമികഃ |
യം യം ചിംതയതേ കാമം തം തം പ്രാപ്നോതി നിശ്ചിതമ് || ൪൪ ||
പരമൈശ്വര്യമതുലം പ്രാപ്സ്യതേ ഭൂതലേ പുമാന് |
നിര്ഭയോ ജായതേ മര്ത്യഃ സംഗ്രാമേഷ്വപരാജിതഃ || ൪൫ ||
ത്രൈലോക്യേ തു ഭവേത് പൂജ്യഃ കവചേനാവൃതഃ പുമാന് |
ഇദം തു ദേവ്യാഃ കവചം ദേവാനാമപി ദുര്ലഭമ് || ൪൬ ||
യഃ പഠേത്പ്രയതോ നിത്യം ത്രിസംധ്യം ശ്രദ്ധയാന്വിതഃ |
ദൈവീ കലാ ഭവേത്തസ്യ ത്രൈലോക്യേഷ്വപരാജിതഃ || ൪൭ ||
ജീവേദ്വര്ഷശതം സാഗ്രമപമൃത്യുവിവര്ജിതഃ |
നശ്യംതി വ്യാധയഃ സര്വേ ലൂതാവിസ്ഫോടകാദയഃ || ൪൮ ||
സ്ഥാവരം ജംഗമം ചൈവ കൃത്രിമം ചാപി യദ്വിഷമ് |
അഭിചാരാണി സര്വാണി മംത്രയംത്രാണി ഭൂതലേ || ൪൯ ||
ഭൂചരാഃ ഖേചരാശ്ചൈവ ജലജാശ്ചോപദേശികാഃ |
സഹജാ കുലജാ മാലാ ഡാകിനീ ശാകിനീ തഥാ || ൫൦ ||
അംതരിക്ഷചരാ ഘോരാ ഡാകിന്യശ്ച മഹാബലാഃ |
ഗ്രഹഭൂതപിശാചാശ്ച യക്ഷഗംധര്വരാക്ഷസാഃ || ൫൧ ||
ബ്രഹ്മരാക്ഷസവേതാലാഃ കൂഷ്മാംഡാ ഭൈരവാദയഃ |
നശ്യംതി ദര്ശനാത്തസ്യ കവചേ ഹൃദി സംസ്ഥിതേ || ൫൨ ||
മാനോന്നതിര്ഭവേദ്രാജ്ഞസ്തേജോവൃദ്ധികരം പരമ് |
യശസാ വര്ധതേ സോഽപി കീര്തിമംഡിതഭൂതലേ || ൫൩ ||
ജപേത്സപ്തശതീം ചംഡീം കൃത്വാ തു കവചം പുരാ |
യാവദ്ഭൂമംഡലം ധത്തേ സശൈലവനകാനനമ് || ൫൪ ||
താവത്തിഷ്ഠതി മേദിന്യാം സംതതിഃ പുത്രപൌത്രികീ |
ദേഹാംതേ പരമം സ്ഥാനം യത്സുരൈരപി ദുര്ലഭമ് || ൫൫ ||
പ്രാപ്നോതി പുരുഷോ നിത്യം മഹാമായാപ്രസാദതഃ |
ലഭതേ പരമം രൂപം ശിവേന സമതാം വ്രജേത് || ൫൬ ||
| ഓം |
ഇതി ദേവ്യാഃ കവചം സംപൂര്ണമ് |