വംദേ വംദാരു മംദാരമിംദിരാനംദകംദലമ് |
അമംദാനംദസംദോഹ ബംധുരം സിംധുരാനനമ് ||
അംഗം ഹരേഃ പുലകഭൂഷണമാശ്രയംതീ
ഭൃംഗാംഗനേവ മുകുളാഭരണം തമാലമ് |
അംഗീകൃതാഖിലവിഭൂതിരപാംഗലീലാ
മാംഗള്യദാസ്തു മമ മംഗളദേവതായാഃ || ൧ ||
മുഗ്ധാ മുഹുര്വിദധതീ വദനേ മുരാരേഃ
പ്രേമത്രപാപ്രണിഹിതാനി ഗതാഗതാനി |
മാലാദൃശോര്മധുകരീവ മഹോത്പലേ യാ
സാ മേ ശ്രിയം ദിശതു സാഗരസംഭവായാഃ || ൨ ||
വിശ്വാമരേംദ്രപദവിഭ്രമദാനദക്ഷ-
-മാനംദഹേതുരധികം മുരവിദ്വിഷോഽപി |
ഈഷന്നിഷീദതു മയി ക്ഷണമീക്ഷണാര്ഥ-
-മിംദീവരോദരസഹോദരമിംദിരായാഃ || ൩ ||
ആമീലിതാക്ഷമധിഗമ്യ മുദാ മുകുംദ-
-മാനംദകംദമനിമേഷമനംഗതംത്രമ് |
ആകേകരസ്ഥിതകനീനികപക്ഷ്മനേത്രം
ഭൂത്യൈ ഭവേന്മമ ഭുജംഗശയാംഗനായാഃ || ൪ ||
ബാഹ്വംതരേ മധുജിതഃ ശ്രിതകൌസ്തുഭേ യാ
ഹാരാവളീവ ഹരിനീലമയീ വിഭാതി |
കാമപ്രദാ ഭഗവതോഽപി കടാക്ഷമാലാ
കള്യാണമാവഹതു മേ കമലാലയായാഃ || ൫ ||
കാലാംബുദാളിലലിതോരസി കൈടഭാരേ-
-ര്ധാരാധരേ സ്ഫുരതി യാ തടിദംഗനേവ |
മാതുസ്സമസ്തജഗതാം മഹനീയമൂര്തിഃ
ഭദ്രാണി മേ ദിശതു ഭാര്ഗവനംദനായാഃ || ൬ ||
പ്രാപ്തം പദം പ്രഥമതഃ ഖലു യത്പ്രഭാവാ-
-ന്മാംഗള്യഭാജി മധുമാഥിനി മന്മഥേന |
മയ്യാപതേത്തദിഹ മംഥരമീക്ഷണാര്ധം
മംദാലസം ച മകരാലയകന്യകായാഃ || ൭ ||
ദദ്യാദ്ദയാനുപവനോ ദ്രവിണാംബുധാരാ-
-മസ്മിന്ന കിംചന വിഹംഗശിശൌ വിഷണ്ണേ |
ദുഷ്കര്മഘര്മമപനീയ ചിരായ ദൂരം
നാരായണപ്രണയിനീനയനാംബുവാഹഃ || ൮ ||
ഇഷ്ടാവിശിഷ്ടമതയോഽപി യയാ ദയാര്ദ്ര-
-ദൃഷ്ട്യാ ത്രിവിഷ്ടപപദം സുലഭം ലഭംതേ |
ദൃഷ്ടിഃ പ്രഹൃഷ്ടകമലോദരദീപ്തിരിഷ്ടാം
പുഷ്ടിം കൃഷീഷ്ട മമ പുഷ്കരവിഷ്ടരായാഃ || ൯ ||
ഗീര്ദേവതേതി ഗരുഡധ്വജസുംദരീതി
ശാകംഭരീതി ശശിശേഖരവല്ലഭേതി |
സൃഷ്ടിസ്ഥിതിപ്രളയകേളിഷു സംസ്ഥിതായൈ
തസ്യൈ നമസ്ത്രിഭുവനൈകഗുരോസ്തരുണ്യൈ || ൧൦ ||
ശ്രുത്യൈ നമോഽസ്തു ശുഭകര്മഫലപ്രസൂത്യൈ
രത്യൈ നമോഽസ്തു രമണീയഗുണാര്ണവായൈ |
ശക്ത്യൈ നമോഽസ്തു ശതപത്രനികേതനായൈ
പുഷ്ട്യൈ നമോഽസ്തു പുരുഷോത്തമവല്ലഭായൈ || ൧൧ ||
നമോഽസ്തു നാളീകനിഭാനനായൈ
നമോഽസ്തു ദുഗ്ധോദധിജന്മഭൂമ്യൈ |
നമോഽസ്തു സോമാമൃതസോദരായൈ
നമോഽസ്തു നാരായണവല്ലഭായൈ || ൧൨ ||
[* അധിക ശ്ലോകാഃ –
നമോഽസ്തു ഹേമാംബുജപീഠികായൈ
നമോഽസ്തു ഭൂമംഡലനായികായൈ |
നമോഽസ്തു ദേവാദിദയാപരായൈ
നമോഽസ്തു ശാര്ങ്ഗായുധവല്ലഭായൈ ||
നമോഽസ്തു ദേവ്യൈ ഭൃഗുനംദനായൈ
നമോഽസ്തു വിഷ്ണോരുരസിസ്ഥിതായൈ |
നമോഽസ്തു ലക്ഷ്മ്യൈ കമലാലയായൈ
നമോഽസ്തു ദാമോദരവല്ലഭായൈ ||
നമോഽസ്തു കാംത്യൈ കമലേക്ഷണായൈ
നമോഽസ്തു ഭൂത്യൈ ഭുവനപ്രസൂത്യൈ |
നമോഽസ്തു ദേവാദിഭിരര്ചിതായൈ
നമോഽസ്തു നംദാത്മജവല്ലഭായൈ ||
*]
സംപത്കരാണി സകലേംദ്രിയനംദനാനി
സാമ്രാജ്യദാനവിഭവാനി സരോരുഹാക്ഷി |
ത്വദ്വംദനാനി ദുരിതാഹരണോദ്യതാനി
മാമേവ മാതരനിശം കലയംതു മാന്യേ || ൧൩ ||
യത്കടാക്ഷസമുപാസനാവിധിഃ
സേവകസ്യ സകലാര്ഥസംപദഃ |
സംതനോതി വചനാംഗമാനസൈ-
-സ്ത്വാം മുരാരിഹൃദയേശ്വരീം ഭജേ || ൧൪ ||
സരസിജനിലയേ സരോജഹസ്തേ
ധവളതമാംശുകഗംധമാല്യശോഭേ |
ഭഗവതി ഹരിവല്ലഭേ മനോജ്ഞേ
ത്രിഭുവനഭൂതികരി പ്രസീദ മഹ്യമ് || ൧൫ ||
ദിഗ്ഘസ്തിഭിഃ കനകകുംഭമുഖാവസൃഷ്ട-
-സ്വര്വാഹിനീവിമലചാരുജലപ്ലുതാംഗീമ് |
പ്രാതര്നമാമി ജഗതാം ജനനീമശേഷ-
-ലോകാധിനാഥഗൃഹിണീമമൃതാബ്ധിപുത്രീമ് || ൧൬ ||
കമലേ കമലാക്ഷവല്ലഭേ ത്വം
കരുണാപൂരതരംഗിതൈരപാംഗൈഃ |
അവലോകയ മാമകിംചനാനാം
പ്രഥമം പാത്രമകൃത്രിമം ദയായാഃ || ൧൭ ||
[* അധിക ശ്ലോകാഃ –
ബില്വാടവീമധ്യലസത്സരോജേ
സഹസ്രപത്രേ സുഖസന്നിവിഷ്ടാമ് |
അഷ്ടാപദാംഭോരുഹപാണിപദ്മാം
സുവര്ണവര്ണാം പ്രണമാമി ലക്ഷ്മീമ് ||
കമലാസനപാണിനാ ലലാടേ
ലിഖിതാമക്ഷരപംക്തിമസ്യ ജംതോഃ |
പരിമാര്ജയ മാതരംഘ്രിണാ തേ
ധനികദ്വാരനിവാസ ദുഃഖദോഗ്ധ്രീമ് ||
അംഭോരുഹം ജന്മഗൃഹം ഭവത്യാഃ
വക്ഷഃസ്ഥലം ഭര്തൃഗൃഹം മുരാരേഃ |
കാരുണ്യതഃ കല്പയ പദ്മവാസേ
ലീലാഗൃഹം മേ ഹൃദയാരവിംദമ് ||
*]
സ്തുവംതി യേ സ്തുതിഭിരമൂഭിരന്വഹം
ത്രയീമയീം ത്രിഭുവനമാതരം രമാമ് |
ഗുണാധികാ ഗുരുതരഭാഗ്യഭാജിനോ
ഭവംതി തേ ഭുവി ബുധഭാവിതാശയാഃ || ൧൮ ||
[* അധിക ശ്ലോകം –
സുവര്ണധാരാസ്തോത്രം യച്ഛംകരാചാര്യ നിര്മിതമ് |
ത്രിസംധ്യം യഃ പഠേന്നിത്യം സ കുബേരസമോ ഭവേത് ||
*]
ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ കനകധാരാസ്തോത്രം സംപൂര്ണമ് |