കുലശേഖരപാംഡ്യ ഉവാച –
മഹാനീപാരണ്യാംതര കനകപദ്മാകരതടീ
മഹേംദ്രാനീതാഷ്ടദ്വിപധൃതവിമാനാംതരഗതമ് |
മഹാലീലാഭൂതപ്രകടിതവിശിഷ്ടാത്മവിഭവം
മഹാദേവം വംദേ മധുരശഫരാക്ഷീസഹചരമ് || ൧ ||
നമന്നാളീകാക്ഷാംബുജ ഭവസുനാശീര മകുടീ
വമന്മാണിക്യാംശുസ്ഫുരദരുണപാദാബ്ജയുഗളമ് |
അമംദാനംദാബ്ധിം ഹരിനയനപദ്മാര്ചിതപദം
മഹാദേവം വംദേ മധുരശഫരാക്ഷീസഹചരമ് || ൨ ||
മഹാമാതംഗാസൃഗ്വരവസനമദീംദ്രതനയാ
മഹാഭാഗ്യം മത്താംധകകരടികംഠീരവവരമ് |
മഹാഭോഗീംദ്രോദ്യത്ഫണഗണിഗണാലംകൃതതനും
മഹാദേവം വംദേ മധുരശഫരാക്ഷീസഹചരമ് || ൩ ||
സമീരാഹാരേംദ്രാംഗദമഖിലലോകൈകജനനം
സമീരാഹാരാത്മാ പ്രണതജനഹൃത്പദ്മനിലയമ് |
സുമീനാക്ഷീ വക്ത്രാംബുജ തരുണസൂരം സുമനസം
മഹാദേവം വംദേ മധുരശഫരാക്ഷീസഹചരമ് || ൪ ||
നതാഘൌഘാരണ്യാനലമനിലഭുങ്നാഥവലയം
സുധാംശോരര്ധാംശം ശിരസി ദധതം ജഹ്നുതനയാമ് |
വദാന്യാനാമാദ്യം വരവിബുധവംദ്യം വരഗുണം
മഹാദേവം വംദേ മധുരശഫരാക്ഷീസഹചരമ് || ൫ ||
മഹാദുഗ്ധാംബോധൌമഥനജവസംഭൂതമസിതം
മഹാകാളം കംഠേ സകലഭയഭംഗായ ദധതമ് |
മഹാകാരുണ്യാബ്ധിം മധുമഥന ദൃഗ്ദൂരചരണം
മഹാദേവം വംദേ മധുരശഫരാക്ഷീസഹചരമ് || ൬ ||
ദശാസ്യാഹംകാര ദ്രുമ കുലിശിതാംഗുഷ്ഠനഖരം
നിശാനാഥ ശ്രീജിന്നിജവദനബിംബം നിരവധിമ് |
വിശാലാക്ഷം വിശ്വപ്രഭവ ഭരണോപായകരണം
മഹാദേവം വംദേ മധുരശഫരാക്ഷീസഹചരമ് || ൭ ||
അനാകാരംഹാരികൃതഭുജഗരാജം പുരഹരം
സനാഥം ശര്വാണ്യാ സരസിരുഹപത്രായതദൃശമ് |
ദിനാരംഭാദിത്യായുതശതനിഭാനംദവപുഷം
മഹാദേവം വംദേ മധുരശഫരാക്ഷീസഹചരമ് || ൮ ||
ഉമാപീനോത്തുംഗ സ്തനതടല സത്കുംകുമരജ-
സ്സമാഹാരാത്യംതാരുണവിപുലദോരംതരതലമ് |
രമാ വാണീംദ്രാണീരതിവിരചിതാരാധനവിധിം
മഹാദേവം വംദേ മധുരശഫരാക്ഷീസഹചരമ് || ൯ ||
ധരാപാഥസ്സ്വാഹാസഹചര ജഗത്പ്രാണശശഭൃ-
ത്സുരാധ്വാഹര്നാദാധ്വര കരശരീരം ശശിധരമ് |
സുരാഹാരാസ്വാദാതിശയ നിജവാചം സുഖകരം
മഹാദേവം വംദേ മധുരശഫരാക്ഷീസഹചരമ് || ൧൦ ||
ധരാപീഠം ധാരാധരകലശമാകാശവപുഷം
ധരാഭൃദ്ദോദ്ദംഡം തപന ശശി വൈശ്വാനരദൃശമ് |
വിരാജന്നക്ഷത്ര പ്രസവമുദരീഭൂത ജലധിം
മഹാദേവം വംദേ മധുരശഫരാക്ഷീസഹചരമ് || ൧൧ ||
സുപര്ണാംകാംഭോജാസന ദൃഗതി ദൂരാംഘ്രിമകുടം
സുവര്ണാഹാര സ്രക്സുരവിടപിശാഖായുതഭുജമ് |
അപര്ണാപാദാബ്ജാഹതി ചലിത ചംദ്രാര്ഥിത ജടം
മഹാദേവം വംദേ മധുരശഫരാക്ഷീസഹചരമ് || ൧൨ ||
മഖാരാതിം മംദസ്മിത മധുരബിംബാധര ലസ-
ന്മുഖാംഭോജം മുഗ്ധാമൃതകിരണചൂഡാമണിധരമ് |
നഖാകൃഷ്ടേഭത്വക്പരിവൃത ശരീരം പശുപതിം
മഹാദേവം വംദേ മധുരശഫരാക്ഷീസഹചരമ് || ൧൩ ||
സഹസ്രാബ്ജൈകോനേ നിജനയനമുദ്ധൃത്യ ജയതേ
സഹസ്രാഖ്യാപൂര്ത്യൈ സരസിജദൃശേ യേന കൃപയാ |
സഹസ്രാരം ദത്തം തപന നിയുതാഭം രഥപദം
മഹാദേവം വംദേ മധുരശഫരാക്ഷീസഹചരമ് || ൧൪ ||
രഥാവന്യാമ്നായാശ്വമജരഥകാരം രണപടും
രഥാംഗാദിത്യേംദും രഥപദ ധരാസ്ത്രം രഥിവരമ് |
രഥാധാരേഷ്വാസം രഥധര ഗുണം രമ്യഫലദം
മഹാദേവം വംദേ മധുരശഫരാക്ഷീസഹചരമ് || ൧൫ ||
ധരാകര്ഷാപാസ്ത പ്രചുര ഭുജകംഡൂയന ജലം
ധരാഹാര്യദ്വൈധീ കരണഹൃതലോകത്രയഭയമ് |
സ്മരാകാരാഹാരാവൃതചടുല പാലാനലകണം
മഹാദേവം വംദേ മധുരശഫരാക്ഷീസഹചരമ് || ൧൬ ||
സോമസുംദരനാഥസ്യ സ്തോത്രം ഭക്ത്യാ പഠംതി യേ |
ശ്രിയാപരമയാ യുക്താശ്ശിവമംതേ ഭജംതി തേ || ൧൭ ||
ഇതി ശ്രീഹാലാസ്യമഹാത്മ്യേ കുലശേഖരപാംഡ്യകൃതാ ശ്രീശിവസ്തുതിഃ |