(ശ്രീകാലഹസ്തിക്ഷേത്രസ്ഥജ്ഞാനപ്രസൂനാംബികാസ്തുതിഃ)
ശ്രീനരകംഠീരവശാസ്ത്രിവിരചിതാ |
ശ്രീനാകനാഥമുഖനാനാസഹസ്രസുരസേനാഗ്രമൌലിവലഭീ-
സൂനാവലീബഹുലലീനാലിനീമധുരഗാനാംചിതാംഘ്രിനലിനാ |
മാനാതിലംഘിമഹിമാനാദിരാനതജനാനാമനേകഫലദാ
ജ്ഞാനാംബികാ ഭവതു ദീനാവനീ കുശലദാനായ മേ ഭഗവതീ || 1 ||

രാകാശശാംകരുചിരാകാരചാരുപാദനാ(പതദാ)കാശസിംധുലഹരീ-
നീകാശസൂക്തിസരണീകാരിണീ പ്രകൃതിമൂകാത്മനാമപി നൃണാം |
പാകാഹിതപ്രമുഖനാകാലയപ്രകരശോകാപനോദനചണാ
ശ്രീകാലഹസ്തിനഗരൈകായനാവതു പിനാകായുധസ്യ ദയിതാ || 2 ||

ശ്രേണീഭവദ്ദിവിഷദേണീദൃഗുല്ലസിതവേണീപിനദ്ധസുമനോ-
ദ്രോണീമരംദരസവേണീപ്രസാരഭൃശശോണീകൃതാംഘ്രികമലാ |
ശ്രോണീനടത്സരകൃപാണീമനോജ്ഞഘനവേണീ കൃപാര്ദ്രഹൃദയാ
ക്ഷോണീധരേംദ്രതനയാണീയസീമപി ച വാണീം പ്രഗല്ഭയതു മേ || 3 ||

കേലീസമാകലിതതാലീദലശ്രവണപാലീവിഭൂഷണമണീ-
വാ(പാ)ലീ മദോദ്ധതമരാലീഗതിര്ദിംശതു നാലീകദീര്ഘനയനാ |
ചൂലീതലാഭരണനാലീകവൈരിശകലാലീഭവത്സുരവധൂഃഽ
കാലീ ഗിരം മൃദു മൃണാലീഭുജാ മമ മധൂലീരസോര്മിമധുരാം || 4 ||

ഹൃദ്യാനവദ്യതരഗദ്യാനുബദ്ധമൃദുപദ്യാഭിരൂപകവിതാം
ദദ്യാജ്ജഗന്മഹിതവിദ്യാം ത്രയീശിഖരവേദ്യാ ഹിമാദ്രിതനയാ |
ആദ്യാ പരാ മമ ശരദ്യാമിനീശഭൃദവിദ്യാവിലാസശമനീ
വിദ്യാധരീ സമഭിവാദ്യാ ജ്വലന്മണിനിഷദ്യായമാണരശനാ || 5 ||

ഹാലാമദാകലിതഹേലാലസദ്ബഹുലലോലാരുണാക്ഷിയുഗലീ
ലീലാപിനദ്ധസുരസാലാവലീപ്രസവമാലാസുഗംധചികുരാ |
കൈലാസനാഥഹിതശീലാ കരാംചിതശുകാലാപലോലഹൃദയാ
വേലാതിലംഘിശുഭജാലായ മേ ഭവതു ശൈലാധിനാഥതനയാ || 6 ||

ചംഡാപദാനയുതചംഡാഭിധാസുരപിചംഡാവദാരണചണാ
ഭംഡാസുരോഗ്രഭുജദംഡാഗ്രനിര്ദലനശൌംഡായുധോദ്ധതകരാ |
ശുംഡാനുകാരികരകാംഡാവദീര്ണജഗദംഡാട്ടഹാസഭയദാ
ദംഡായുധായ ശശിഖംഡാവതംസിതശിഖംഡാ ന ചാര്പയതു മാം || 7 ||

ഹുംകാരനിര്ഗലദശംകാപതദ്വിഷദഹംകാരമാരതിമിരാം
അംകാംതലംബിസിതക്ങ്കാലഹാരസദലംകാരബംധുരഗലാം |
ഹ്രീംകാരിണീം ഭയദടംകാരകാര്മുകകരാം കാലഹസ്തിനിലയാം
പംകാപഹാമപകലംകാവതംസഹരിണാംകാം ഭജേ ഭഗവതീം || 8 ||

കംഠാരവോദ്യദുപകംഠാരിദുര്വിഷഹകംഠീരവേംദ്രഗമനോ-
ത്കംഠാ നികാമശിതികംഠാനുകര്ഷികലകംഠാനുലാപലലിതാ |
ശുംഠീഭവദ്ദനുജകംഠീരവപ്രകരകുംഠീകൃതിക്ഷമബലാ
കുംഠീകരോതു നരകംഠീരവാഖ്യകവികംഠീരവസ്യ ദുരിതം || 9 ||

ശ്രീകാലഹസ്തിനിലയജ്ഞാനപ്രസവാംബികാമുദേ രചിതാ |
നരകംഠീരവകൃതിനാ നവരത്നസ്തുതിരിയം ചിരം ജയതു || 10 ||

|| ഇതി ശ്രീനരകംഠീരവശാസ്ത്രിവിരചിതാ നവരത്നമാലികാ സമാപ്താ ||