ധ്യാനം |
ആപാതാള നഭഃ സ്ഥലാംത ഭുവന ബ്രഹ്മാംഡമാവിസ്ഫുര-
-ജ്ജ്യോതിഃസ്ഫാടികലിംഗ മൌളിവിലസത് പൂര്ണേംദു വാംതാമൃതൈഃ |
അസ്തോകാപ്ലുതമേകമീശമനിശം രുദ്രാനുവാകാന് ജപന്
ധ്യായേദീപ്സിതസിദ്ധയേ ധ്രുവപദം വിപ്രോഽഭിഷിംചേച്ഛിവമ് ||
ബ്രഹ്മാംഡവ്യാപ്തദേഹാ ഭസിത ഹിമരുചാ ഭാസമാനാ ഭുജംഗൈഃ
കംഠേ കാലാഃ കപര്ദാഃ കലിതശശികലാശ്ചംഡ കോദംഡ ഹസ്താഃ |
ത്ര്യക്ഷാ രുദ്രാക്ഷമാലാഃ സുലലിതവപുഷഃ ശാംഭവാ മൂര്തിഭേദാഃ
രുദ്രാഃ ശ്രീരുദ്രസൂക്ത പ്രകടിത വിഭവാഃ നഃ പ്രയച്ഛംതു സൌഖ്യമ് ||
ഇത്യുക്ത്വാ സത്വരം സാംബം സ്മൃത്വാ ശംകരപാദുകേ |
ധ്യാത്വാ യയൌ ഗണാധീശഃ ശിവസന്നിധിമാദരാത് ||
തതഃ പ്രണമ്യ ബഹുധാ കൃതാംജലിപുടഃ പ്രഭുമ് |
ശംഭും സ്തോതും മതിം ചക്രേ സര്വാഭീഷ്ടപ്രദായകമ് ||
ഗണേശ ഉവാച |
നമസ്തേ ദേവദേവായ നമസ്തേ രുദ്രമന്യവേ |
നമസ്തേ ചംദ്രചൂഡായാപ്യുതോത ഇഷവേ നമഃ || ൧ ||
നമസ്തേ പാര്വതീകാംതായൈകരൂപായ ധന്വനേ | [മേരുധന്വനേ]
നമസ്തേ ഭഗവന് ശംഭോ ബാഹുഭ്യാമുത തേ നമഃ || ൨ ||
ഇഷുഃ ശിവതമാ യാ തേ തയാ മൃഡായ രുദ്ര മാമ് |
ശിവം ധനുര്യദ്ബഭൂവ തേനാപി മൃഡയാധുനാ || ൩ ||
ശരവ്യാ യാ ശിവതമാ തയാപി മൃഡയ പ്രഭോ |
യാ തേ രുദ്ര ശിവാ നിത്യം സര്വമംഗളസാധനമ് || ൪ ||
തയാഭിചാകശീഹി ത്വം തനുവാ മാമുമാപതേ |
അഘോരയാപി തനുവാ രുദ്രാദ്യാ പാപകാശിനീ || ൫ ||
യാ തയാ മൃഡയ സ്വാമിന് സദാ ശംതമയാ പ്രഭോ |
ഗിരിശംതം മഹാരുദ്ര ഹസ്തേ യാമിഷുമസ്തവേ || ൬ ||
ബിഭര്ഷി താം ഗിരിത്രാദ്യ ശിവാം കുരു ശിവാപതേ |
ശിവേന വചസാ രുദ്ര നിത്യം വാചാ വദാമസി || ൭ ||
ത്വദ്ഭക്തി പരിപൂതാംഗം മഹിംസീഃ പുരുഷം ജഗത് |
യച്ച ശര്വ ജഗത്സര്വമയക്ഷ്മം സുമനാ അസത് || ൮ ||
യഥാ തഥാവമാം രുദ്ര തദന്യധാപി മേ പ്രഭോ |
രുദ്ര ത്വം പ്രഥമോ ദൈവ്യോ ഭിഷക് പാപവിനാശകഃ || ൯ ||
അധിവക്താഽധ്യവോചന്മാം ഭാവലിംഗാര്ചകം മുദാ |
അഹീന് സര്വാന് യാതു ധാന്യഃ സര്വാ അപ്യദ്യ ജംഭയന് || ൧൦ ||
അസൌ താമ്രോരുണോ ബഭ്രുഃ നീലഗ്രീവഃ സുമംഗളഃ |
വിലോഹിതോസ്ത്വയം ശംഭോ ത്വദധിഷ്ഠാന ഏവ ഹി || ൧൧ ||
നമോ നമസ്തേ ഭഗവന് നീലഗ്രീവായ മീഢുഷേ |
സഹസ്രാക്ഷായ ശുദ്ധായ സച്ചിദാനംദമൂര്തയേ || ൧൨ ||
ഉഭയോഗാര്ത്നിയോര്ജ്യാ യാ ധന്വനസ്താം പ്രമുംചതാമ് |
സംപ്രാപ്യ ധനുരന്യേഷാം ഭയായ പ്രഭവിഷ്യതി || ൧൩ ||
അസ്മദ്ഭയ വിനാശാര്ഥ മധുനാഭയദ പ്രഭോ |
യാശ്ച തേ ഹസ്ത ഇഷവഃ പരതാ ഭഗവോ വാപ || ൧൪ ||
അവതത്യ ധനുശ്ച ത്വം സഹസ്രാക്ഷ ശതേഷുധേ |
മുഖാ നിശീര്യ ശല്യാനാം ശിവോ നഃ സുമനാ ഭവ || ൧൫ ||
വിജ്യം ധനുരിദം ഭൂയാത് വിശല്യോ ബാണവാനപി |
അനേശന്നിഷവശ്ചാപി ഹ്യാഭുരസ്തു നിഷംഗഥിഃ || ൧൬ ||
കപര്ദിനോ മഹേശസ്യ യദി നാഭുര്നിഷംഗഥിഃ |
ഇഷവോ പി സമര്ഥാശ്ചേത് സാമര്ഥ്യേതു ഭയം ഭവേത് || ൧൭ ||
യാ തേ ഹേതിര്ധനുര്ഹസ്തേ മീഢുഷ്ടമ ബഭൂവ യാ |
തയാഽസ്മാന് വിശ്വതസ്തേന പാലയ ത്വമയക്ഷ്മയാ || ൧൮ ||
അനാതതായായുധായ നമസ്തേ ധൃഷ്ണവേ നമഃ |
ബാഹുഭ്യാം ധന്വനേ ശംഭോ നമോ ഭൂയോ നമോ നമഃ || ൧൯ ||
പരിതേ ധന്വനോ ഹേതിഃ വിശ്വതോഽസ്മാന് വൃണക്തു നഃ |
ഇഷുധിസ്തവ യാ താവദസ്മദാരേ നിധേഹി തമ് || ൨൦ ||
ഹിരണ്യബാഹവേ തുഭ്യം സേനാന്യേ തേ നമോ നമഃ |
ദിശാം ച പതയേ തുഭ്യം പശൂനാം പതയേ നമഃ || ൨൧ ||
ത്വിഷീമതേ നമസ്തുഭ്യം നമഃ സസ്പിംജരായ തേ |
നമഃ പഥീനാം പതയേ ബഭ്ലുശായ നമോ നമഃ || ൨൨ ||
നമോ വിവ്യാധിനേന്നാനാം പതയേ പ്രഭവേ നമഃ |
നമസ്തേ ഹരികേശായ രുദ്രായാസ്തൂപവീതിനേ || ൨൩ ||
പുഷ്ടാനാം പതയേ തുഭ്യം ജഗതാം പതയേ നമഃ |
സംസാര ഹേതി രൂപായ രുദ്രായാപ്യാതതായിനേ || ൨൪ ||
ക്ഷേത്രാണാം പതയേ തുഭ്യം സൂതായ സുകൃതാത്മനേ |
അഹംത്യായ നമസ്തുഭ്യം വനാനാം പതയേ നമഃ || ൨൫ ||
രോഹിതായ സ്ഥപതയേ മംത്രിണേ വാണിജായ ച |
കക്ഷാണാം പതയേ തുഭ്യം നമസ്തുഭ്യം ഭുവംതയേ || ൨൬ ||
തദ്വാരിവസ്കൃതായാസ്തു മഹാദേവായ തേ നമഃ |
ഓഷാധീനാം ച പതയേ നമസ്തുഭ്യം മഹാത്മനേ || ൨൭ ||
ഉച്ചൈര്ഘോഷായ ധീരായ ധീരാന് ക്രംദയതേ നമഃ || ൨൮ ||
പത്തീനാം പതയേ തുഭ്യം കൃത്സ്നവീതായ തേ നമഃ |
ധാവതേ ധവലായാപി സത്ത്വനാം പതയേ നമഃ || ൨൯ ||
ആവ്യാധിനീനാം പതയേ കകുഭായ നിഷംഗിണേ |
സ്തേനാനാം പതയേ തുഭ്യം ദിവ്യേഷുധിമതേ നമഃ || ൩൦ ||
തസ്കരാണാം ച പതയേ വംചതേ പരിവംചതേ |
സ്തായൂനാം പതയേ തുഭ്യം നമസ്തേഽസ്തു നിചേരവേ || ൩൧ ||
നമഃ പരിചരായാഽപി മഹാരുദ്രായ തേ നമഃ |
അരണ്യാനാം ച പതയേ മുഷ്ണതാം പതയേ നമഃ || ൩൨ ||
ഉഷ്ണീഷിണേ നമസ്തുഭ്യം നമോ ഗിരിചരായ തേ |
കുലുംചാനാം ച പതയേ നമസ്തുഭ്യം ഭവായ ച || ൩൩ ||
നമോ രുദ്രായ ശര്വായ തുഭ്യം പശുപതേ നമഃ |
നമ ഉഗ്രായ ഭീമായ നമശ്ചാഗ്രേവധായ ച || ൩൪ ||
നമോ ദൂരേവധായാഽപി നമോ ഹംത്രേ നമോ നമഃ |
ഹനീയസേ നമസ്തുഭ്യം നീലഗ്രീവായ തേ നമഃ || ൩൫ ||
നമസ്തേ ശിതികംഠായ നമസ്തേഽസ്തു കപര്ദിനേ |
നമസ്തേ വ്യുപ്തകേശായ സഹസ്രാക്ഷായ മീഢുഷേ || ൩൬ ||
ഗിരിശായ നമസ്തേഽസ്തു ശിപിവിഷ്ടായ തേ നമഃ |
നമസ്തേ ശംഭവേ തുഭ്യം മയോഭവ നമോഽസ്തു തേ || ൩൭ ||
മയസ്കര നമസ്തുഭ്യം ശംകരായ നമോ നമഃ |
നമഃ ശിവായ ശര്വായ നമഃ ശിവതരായ ച || ൩൮ ||
നമസ്തീര്ഥ്യായ കൂല്യായ നമഃ പാര്യായ തേ നമഃ |
ആവാര്യായ നമസ്തേഽസ്തു നമഃ പ്രതരണായ ച || ൩൯ ||
നമ ഉത്തരണായാഽപി ഹരാതാര്യായ തേ നമഃ |
ആലാദ്യായ നമസ്തേഽസ്തു ഭക്താനാം വരദായ ച || ൪൦ ||
നമഃ ശഷ്പ്യായ ഫേന്യായ സികത്യായ നമോ നമഃ |
പ്രവാഹ്യായ നമസ്തേഽസ്തു ഹ്രസ്വായാഽസ്തു നമോ നമഃ || ൪൧ ||
വാമനായ നമസ്തേഽസ്തു ബൃഹതേ ച നമോ നമഃ |
വര്ഷീയസേ നമസ്തേഽസ്തു നമോ വൃദ്ധായ തേ നമഃ || ൪൨ ||
സംവൃധ്വനേ നമസ്തുഭ്യമഗ്രിയായ നമോ നമഃ |
പ്രഥമായ നമസ്തുഭ്യമാശവേ ചാജിരായ ച || ൪൩ ||
ശീഘ്രിയായ നമസ്തേഽസ്തു ശീഭ്യായ ച നമോ നമഃ |
നമ ഊര്മ്യായ ശര്വായാഽപ്യവസ്വന്യായ തേ നമഃ || ൪൪ ||
സ്രോതസ്യായ നമസ്തുഭ്യം ദ്വീപ്യായ ച നമോ നമഃ |
ജ്യേഷ്ഠായ ച നമസ്തുഭ്യം കനിഷ്ഠായ നമോ നമഃ || ൪൫ ||
പൂര്വജായ നമസ്തുഭ്യം നമോസ്ത്വപരജായ ച |
മധ്യമായ നമസ്തുഭ്യമപഗല്ഭായ തേ നമഃ || ൪൬ ||
ജഘന്യായ നമസ്തുഭ്യം ബുധ്നിയായ നമോ നമഃ |
സോഭ്യായ പ്രതിസര്യായ യാമ്യായ ച നമോ നമഃ || ൪൭ ||
ക്ഷേമ്യായ ച നമസ്തുഭ്യം യാമ്യായ ച നമോ നമഃ |
ഉര്വര്യായ നമസ്തുഭ്യം ഖല്യായ ച നമോ നമഃ || ൪൮ ||
ശ്ലോക്യായ ചാവസാന്യായാവസ്വന്യായ ച തേ നമഃ |
നമോ വന്യായ കക്ഷ്യായ മൌംജ്യായ ച നമോ നമഃ || ൪൯ ||
ശ്രവായ ച നമസ്തുഭ്യം പ്രതിശ്രവ നമോ നമഃ |
ആശുഷേണായ ശൂരായ നമോസ്ത്വാഽശുരഥായ ച || ൫൦ ||
വരൂഥിനേ പര്മിണേ ച ബില്മിനേ ച നമോ നമഃ |
ശ്രുതായ ശ്രുതസേനായ നമഃ കവചിനേ നമഃ || ൫൧ ||
ദുംദുഭ്യായ നമസ്തുഭ്യമാഹനന്യായ തേ നമഃ |
പ്രഹിതായ നമസ്തുഭ്യം ധൃഷ്ണവേ പ്രമൃശായ ച || ൫൨ ||
പാരായ പാരവിംദായ നമസ്തീക്ഷ്ണേഷവേ നമഃ |
സുധന്വനേ നമസ്തുഭ്യം സ്വായുധായ നമോ നമഃ || ൫൩ ||
നമഃ സ്രുത്യായ പഥ്യായ നമഃ കാട്യായ തേ നമഃ |
നമോ നീപ്യായ സൂദ്യായ സരസ്യായ ച തേ നമഃ || ൫൪ ||
നമോ നാദ്യായ ഭവ്യായ വൈശംതായ നമോ നമഃ |
അവട്യായ നമസ്തുഭ്യം നമഃ കൂപ്യായ തേ നമഃ || ൫൫ ||
അവര്ഷ്യായ ച വര്ഷ്യായ മേഘ്യായ ച നമോ നമഃ |
വിദ്യുത്യായ നമസ്തുഭ്യമീധ്രിയായ നമോ നമഃ || ൫൬ ||
ആതപ്യായ നമസ്തുഭ്യം വാത്യായ ച നമോ നമഃ |
രേഷ്മിയായ നമസ്തുഭ്യം വാസ്തവ്യായ ച തേ നമഃ || ൫൭ ||
വാസ്തുപായ നമസ്തുഭ്യം നമഃ സോമായ തേ നമഃ |
നമോ രുദ്രായ താമ്രായാഽപ്യരുണായ ച തേ നമഃ || ൫൮ ||
നമ ഉഗ്രായ ഭീമായ നമഃ ശംഗായ തേ നമഃ |
നമസ്തീര്ഥ്യായ കൂല്യായ സികത്യായ നമോ നമഃ || ൫൯ ||
പ്രവാഹ്യായ നമസ്തുഭ്യമിരിണ്യായ നമോ നമഃ |
നമസ്തേ ചംദ്രചൂഡായ പ്രപഥ്യായ നമോ നമഃ || ൬൦ ||
കിംശിലായ നമസ്തേഽസ്തു ക്ഷയണായ ച തേ നമഃ |
കപര്ദിനേ നമസ്തേഽസ്തു നമസ്തേഽസ്തു പുലസ്തയേ || ൬൧ ||
നമോ ഗോഷ്ഠ്യായ ഗൃഹ്യായ ഗ്രഹാണാം പതയേ നമഃ |
നമസ്തല്പ്യായ ഗേഹ്യായ ഗുഹാവാസായ തേ നമഃ || ൬൨ ||
കാട്യായ ഗഹ്വരേഷ്ഠായ ഹ്രദയ്യായ ച തേ നമഃ |
നിവേഷ്പ്യായ നമസ്തുഭ്യം പാംസവ്യായ തേ നമഃ || ൬൩ ||
രജസ്യായ നമസ്തുഭ്യം പരാത്പര തരായ ച |
നമസ്തേ ഹരികേശായ ശുഷ്ക്യായ ച നമോ നമഃ || ൬൪ ||
ഹരിത്യായ നമസ്തുഭ്യം ഹരിദ്വര്ണായ തേ നമഃ |
നമഃ ഉര്മ്യായ സൂര്മ്യായ പര്ണ്യായ ച നമോ നമഃ || ൬൫ ||
നമോപഗുരമാണായ പര്ണശദ്യായ തേ നമഃ |
അഭിഘ്നതേ ചാഖ്ഖിദതേ നമഃ പ്രഖ്ഖിദതേ നമഃ || ൬൬ ||
വിശ്വരൂപായ വിശ്വായ വിശ്വാധാരായ തേ നമഃ |
ത്ര്യംബകായ ച രുദ്രായ ഗിരിജാപതയേ നമഃ || ൬൭ ||
മണികോടീരകോടിസ്ഥ കാംതിദീപ്തായ തേ നമഃ |
വേദവേദാംത വേദ്യായ വൃഷാരൂഢായ തേ നമഃ || ൬൮ ||
അവിജ്ഞേയസ്വരൂപായ സുംദരായ നമോ നമഃ |
ഉമാകാംത നമസ്തേഽസ്തു നമസ്തേ സര്വസാക്ഷിണേ || ൬൯ ||
ഹിരണ്യബാഹവേ തുഭ്യം ഹിരണ്യാഭരണായ ച |
നമോ ഹിരണ്യരൂപായ രൂപാതീതായ തേ നമഃ || ൭൦ ||
ഹിരണ്യപതയേ തുഭ്യമംബികാപതയേ നമഃ |
ഉമായാഃ പതയേ തുഭ്യം നമഃ പാപപ്രണാശക || ൭൧ ||
മീഢുഷ്ടമായ ദുര്ഗായ കദ്രുദ്രായ പ്രചേതസേ |
തവ്യസേ ബില്വപൂജ്യായ നമഃ കള്യാണരൂപിണേ || ൭൨ ||
അപാര കള്യാണ ഗുണാര്ണവായ
ശ്രീ നീലകംഠായ നിരംജനായ |
കാലാംതകായാപി നമോ നമസ്തേ
ദിക്കാലരൂപായ നമോ നമസ്തേ || ൭൩ ||
വേദാംതബൃംദസ്തുത സദ്ഗുണായ
ഗുണപ്രവീണായ ഗുണാശ്രയായ |
ശ്രീ വിശ്വനാഥായ നമോ നമസ്തേ
കാശീനിവാസായ നമോ നമസ്തേ || ൭൪ ||
അമേയ സൌംദര്യ സുധാനിധാന
സമൃദ്ധിരൂപായ നമോ നമസ്തേ |
ധരാധരാകാര നമോ നമസ്തേ
ധാരാസ്വരൂപായ നമോ നമസ്തേ || ൭൫ ||
നീഹാര ശൈലാത്മജ ഹൃദ്വിഹാര
പ്രകാശഹാര പ്രവിഭാസി വീര |
വീരേശ്വരാപാര ദയാനിധാന
പാഹി പ്രഭോ പാഹി നമോ നമസ്തേ || ൭൬ ||
വ്യാസ ഉവാച |
ഏവം സ്തുത്വാ മഹാദേവം പ്രണിപത്യ പുനഃ പുനഃ |
കൃതാംജലിപുടസ്തസ്ഥൌ പാര്ശ്വേ ഡുംഠിവിനായകഃ || ൭൭ ||
തമാലോക്യ സുതം പ്രാപ്തം വേദം വേദാംഗപാരഗമ് |
സ്നേഹാശ്രുധാരാ സംവീതം പ്രാഹ ഡുംഠിം സദാശിവഃ || ൭൮ ||
ഇതി ശ്രീ ശിവരഹസ്യേ ഹരാഖ്യേ തൃതീയാംശേ പൂര്വാര്ഥേ ഗണേശകൃത രുദ്രാധ്യായ സ്തുതിഃ നാമ ദശമോഽധ്യായഃ |
അനേന ശ്രീഗണേശകൃത ശ്ലോകാത്മക രുദ്രധ്യായ പാരായണേന ശ്രീ വിശ്വേശ്വരഃ സുപ്രീതഃ സുപ്രസന്നോ വരദോ ഭവതു |