യസ്മിൻ ജഗത്സർവമിദം വിഭാതി
യശ്ചാപ്യനന്യഃ സകലപ്രപഞ്ചാത് |
തിലേഷു തൈലോപമമാസ്ഥിതം ത്വാം
ശ്രീചന്ദ്രമൗളീശ്വരമാശ്രയാമഃ || 1 ||
പശ്യന്തി യന്ന ശ്രുതയഃ ശിരസ്ഥം
ശിരഃസ്ഥിതം വസ്ത്വിവ സർവലോകാഃ |
ത്വാമാത്മഭൂതം ജഗതാം ത്രയാണാം
ശ്രീചന്ദ്രമൗളീശ്വരമാശ്രയാമഃ || 2 ||
അണോരണീയാൻ മഹതോ മഹീയാ-
-നാത്മാ ഗുഹായാം നിഹിതോഽസ്യ ജന്തോഃ |
ത്വം സർവഭൂതസ്ഥിതമാത്മരൂപം
ശ്രീചന്ദ്രമൗളീശ്വരമാശ്രയാമഃ || 3 ||
യഃ സർവസാക്ഷീ തമസഃ പരസ്താ-
-ദ്വിഭാതി സർവം കില യസ്യ ഭാസാ |
ത്വാമാഗമാന്തൈരപി ദുർനിരൂപം
ശ്രീചന്ദ്രമൗളീശ്വരമാശ്രയാമഃ || 4 ||
പുമാനവിജ്ഞായ ശിവം കദാചി-
-ദ്ദുഃഖസ്യ നാന്തം സമുപൈതി ധീരഃ |
ത്വാം സച്ചിദാനന്ദമയം പ്രശാന്തം
ശ്രീചന്ദ്രമൗളീശ്വരമാശ്രയാമഃ || 5 ||
അജം പുരാണം പുരുഷം മഹാന്തം
അനശ്വരം വാങ്മനസാഽതി ദൂരം |
ജ്ഞാനാത്മനാം ഹൃദ്യവഭാസമാനം
ശ്രീചന്ദ്രമൗളീശ്വരമാശ്രയാമഃ || 6 ||
വദന്ത്യമീ യത്പദമേവ വേദാ
ജ്ഞാതേ തു യാസ്മിൻ സകലം വിബുദ്ധം |
ത്വാം പ്രത്യഗാത്മനമചിന്ത്യശക്തിം
ശ്രീചന്ദ്രമൗളീശ്വരമാശ്രയാമഃ || 7 ||
യം നിർവികല്പേന സമാധിനൈവ
തപസ്വിനശ്ചേതസി വീതരാഗാഃ |
ധ്യായന്തി തേജോമയമദ്ഭുതം ത്വാം
ശ്രീചന്ദ്രമൗളീശ്വരമാശ്രയാമഃ || 8 ||
ത്രിലോചനം ചന്ദ്രകലാവതംസം
ഗംഗാതരംഗോല്ലസദുത്തമാംഗം |
സ്മേരാസ്യമിഷ്ടപ്രദമഷ്ടമൂർതിം
ശ്രീചന്ദ്രമൗളീശ്വരമാശ്രയാമഃ || 9 ||
അപാരസച്ചിത്സുഖരാശിമേക-
-മനാദിമധ്യാന്തമനന്തരൂപം |
ത്രിലോചനം നീലഗലം പ്രശാന്തം
ശ്രീചന്ദ്രമൗളീശ്വരമാശ്രയാമഃ || 10 ||
കൈലാസശൈലേന്ദ്രശിരസ്തടേഷു
നഗേന്ദ്രപുത്ര്യാ സഹ സംവസന്തം |
വിഭൂതി രുദ്രാക്ഷവിഭൂഷിതാംഗം
ശ്രീചന്ദ്രമൗളീശ്വരമാശ്രയാമഃ || 11 ||
ഇതി ശിവരഹസ്യാന്തർഗതേ ഗണൈഃ കൃത ശ്രീ ചന്ദ്രമൗളീശ്വര സ്തുതിഃ ||