അസ്യ ശ്രീരാമരക്ഷാസ്തോത്രമംത്രസ്യ ബുധകൌശിക ഋഷിഃ ശ്രീസീതാരാമചംദ്രോ ദേവതാ അനുഷ്ടുപ് ഛംദഃ സീതാ ശക്തിഃ ശ്രീമാന് ഹനുമാന് കീലകം ശ്രീരാമചംദ്രപ്രീത്യര്ഥേ രാമരക്ഷാസ്തോത്രജപേ വിനിയോഗഃ ||
ധ്യാനം |
ധ്യായേദാജാനുബാഹും ധൃതശരധനുഷം ബദ്ധപദ്മാസനസ്ഥം
പീതം വാസോ വസാനം നവകമലദളസ്പര്ധിനേത്രം പ്രസന്നമ് |
വാമാംകാരൂഢസീതാമുഖകമലമിലല്ലോചനം നീരദാഭം
നാനാലംകാരദീപ്തം ദധതമുരുജടാമംഡലം രാമചംദ്രമ് ||
അഥ സ്തോത്രം |
ചരിതം രഘുനാഥസ്യ ശതകോടിപ്രവിസ്തരമ് |
ഏകൈകമക്ഷരം പുംസാം മഹാപാതകനാശനമ് || ൧ ||
ധ്യാത്വാ നീലോത്പലശ്യാമം രാമം രാജീവലോചനമ് |
ജാനകീലക്ഷ്മണോപേതം ജടാമുകുടമംഡിതമ് || ൨ ||
സാഽസിതൂണധനുര്ബാണപാണിം നക്തംചരാംതകമ് |
സ്വലീലയാ ജഗത്ത്രാതുമാവിര്ഭൂതമജം വിഭുമ് || ൩ ||
രാമരക്ഷാം പഠേത്പ്രാജ്ഞഃ പാപഘ്നീം സര്വകാമദാമ് |
ശിരോ മേ രാഘവഃ പാതു ഫാലം ദശരഥാത്മജഃ || ൪ ||
കൌസല്യേയോ ദൃശൌ പാതു വിശ്വാമിത്രപ്രിയഃ ശ്രുതീ |
ഘ്രാണം പാതു മഖത്രാതാ മുഖം സൌമിത്രിവത്സലഃ || ൫ ||
ജിഹ്വാം വിദ്യാനിധിഃ പാതു കംഠം ഭരതവംദിതഃ |
സ്കംധൌ ദിവ്യായുധഃ പാതു ഭുജൌ ഭഗ്നേശകാര്മുകഃ || ൬ ||
കരൌ സീതാപതിഃ പാതു ഹൃദയം ജാമദഗ്ന്യജിത് |
മധ്യം പാതു ഖരധ്വംസീ നാഭിം ജാംബവദാശ്രയഃ || ൭ ||
സുഗ്രീവേശഃ കടീ പാതു സക്ഥിനീ ഹനുമത്പ്രഭുഃ |
ഊരൂ രഘൂത്തമഃ പാതു രക്ഷഃകുലവിനാശകൃത് || ൮ ||
ജാനുനീ സേതുകൃത്പാതു ജംഘേ ദശമുഖാംതകഃ |
പാദൌ വിഭീഷണശ്രീദഃ പാതു രാമോഽഖിലം വപുഃ || ൯ ||
ഏതാം രാമബലോപേതാം രക്ഷാം യഃ സുകൃതീ പഠേത് |
സ ചിരായുഃ സുഖീ പുത്രീ വിജയീ വിനയീ ഭവേത് || ൧൦ ||
പാതാലഭൂതലവ്യോമചാരിണശ്ഛദ്മചാരിണഃ |
ന ദ്രഷ്ടുമപി ശക്താസ്തേ രക്ഷിതം രാമനാമഭിഃ || ൧൧ ||
രാമേതി രാമഭദ്രേതി രാമചംദ്രേതി വാ സ്മരന് |
നരോ ന ലിപ്യതേ പാപൈര്ഭുക്തിം മുക്തിം ച വിംദതി || ൧൨ ||
ജഗജ്ജൈത്രൈകമംത്രേണ രാമനാമ്നാഭിരക്ഷിതമ് |
യഃ കംഠേ ധാരയേത്തസ്യ കരസ്ഥാഃ സര്വസിദ്ധയഃ || ൧൩ ||
വജ്രപംജരനാമേദം യോ രാമകവചം സ്മരേത് |
അവ്യാഹതാജ്ഞഃ സര്വത്ര ലഭതേ ജയമംഗളമ് || ൧൪ ||
ആദിഷ്ടവാന്യഥാ സ്വപ്നേ രാമരക്ഷാമിമാം ഹരഃ |
തഥാ ലിഖിതവാന്പ്രാതഃ പ്രബുദ്ധോ ബുധകൌശികഃ || ൧൫ ||
ആരാമഃ കല്പവൃക്ഷാണാം വിരാമഃ സകലാപദാമ് |
അഭിരാമസ്ത്രിലോകാനാം രാമഃ ശ്രീമാന് സ നഃ പ്രഭുഃ || ൧൬ ||
തരുണൌ രൂപസംപന്നൌ സുകുമാരൌ മഹാബലൌ |
പുംഡരീക വിശാലാക്ഷൌ ചീരകൃഷ്ണാജിനാംബരൌ || ൧൭ ||
ഫലമൂലാശിനൌ ദാംതൌ താപസൌ ബ്രഹ്മചാരിണൌ |
പുത്രൌ ദശരഥസ്യൈതൌ ഭ്രാതരൌ രാമലക്ഷ്മണൌ || ൧൮ ||
ശരണ്യൌ സര്വസത്ത്വാനാം ശ്രേഷ്ഠൌ സര്വധനുഷ്മതാമ് |
രക്ഷഃ കുലനിഹംതാരൌ ത്രായേതാം നോ രഘൂത്തമൌ || ൧൯ ||
ആത്തസജ്യധനുഷാവിഷുസ്പൃശാവക്ഷയാശുഗനിഷംഗസംഗിനൌ |
രക്ഷണായ മമ രാമലക്ഷ്മണാവഗ്രതഃ പഥി സദൈവ ഗച്ഛതാമ് || ൨൦ ||
സന്നദ്ധഃ കവചീ ഖഡ്ഗീ ചാപബാണധരോ യുവാ |
ഗച്ഛന്മനോരഥാന്നശ്ച രാമഃ പാതു സലക്ഷ്മണഃ || ൨൧ ||
രാമോ ദാശരഥിഃ ശൂരോ ലക്ഷ്മണാനുചരോ ബലീ |
കാകുത്സ്ഥഃ പുരുഷഃ പൂര്ണഃ കൌസല്യേയോ രഘൂത്തമഃ || ൨൨ ||
വേദാംതവേദ്യോ യജ്ഞേശഃ പുരാണപുരുഷോത്തമഃ |
ജാനകീവല്ലഭഃ ശ്രീമാനപ്രമേയപരാക്രമഃ || ൨൩ ||
ഇത്യേതാനി ജപേന്നിത്യം മദ്ഭക്തഃ ശ്രദ്ധയാന്വിതഃ |
അശ്വമേധാധികം പുണ്യം സംപ്രാപ്നോതി ന സംശയഃ || ൨൪ ||
രാമം ദൂര്വാദലശ്യാമം പദ്മാക്ഷം പീതവാസസമ് |
സ്തുവംതി നാമഭിര്ദിവ്യൈര്ന തേ സംസാരിണോ നരാഃ || ൨൫ ||
രാമം ലക്ഷ്മണപൂര്വജം രഘുവരം സീതാപതിം സുംദരം
കാകുത്സ്ഥം കരുണാര്ണവം ഗുണനിധിം വിപ്രപ്രിയം ധാര്മികമ് |
രാജേംദ്രം സത്യസംധം ദശരഥതനയം ശ്യാമലം ശാംതമൂര്തിം
വംദേ ലോകാഭിരാമം രഘുകുലതിലകം രാഘവം രാവണാരിമ് || ൨൬ ||
രാമായ രാമഭദ്രായ രാമചംദ്രായ വേധസേ |
രഘുനാഥായ നാഥായ സീതായാഃ പതയേ നമഃ || ൨൭ ||
ശ്രീരാമ രാമ രഘുനംദന രാമ രാമ
ശ്രീരാമ രാമ ഭരതാഗ്രജ രാമ രാമ |
ശ്രീരാമ രാമ രണകര്കശ രാമ രാമ
ശ്രീരാമ രാമ ശരണം ഭവ രാമ രാമ || ൨൮ ||
ശ്രീരാമചംദ്രചരണൌ മനസാ സ്മരാമി
ശ്രീരാമചംദ്രചരണൌ വചസാ ഗൃണാമി |
ശ്രീരാമചംദ്രചരണൌ ശിരസാ നമാമി
ശ്രീരാമചംദ്രചരണൌ ശരണം പ്രപദ്യേ || ൨൯ ||
മാതാ രാമോ മത്പിതാ രാമചംദ്രഃ
സ്വാമീ രാമോ മത്സഖാ രാമചംദ്രഃ |
സര്വസ്വം മേ രാമചംദ്രോ ദയാളുഃ
നാന്യം ജാനേ നൈവ ജാനേ ന ജാനേ || ൩൦ ||
ദക്ഷിണേ ലക്ഷ്മണോ യസ്യ വാമേ ച ജനകാത്മജാ |
പുരതോ മാരുതിര്യസ്യ തം വംദേ രഘുനംദനമ് || ൩൧ ||
ലോകാഭിരാമം രണരംഗധീരം
രാജീവനേത്രം രഘുവംശനാഥമ് |
കാരുണ്യരൂപം കരുണാകരം തം
ശ്രീരാമചംദ്രം ശരണം പ്രപദ്യേ || ൩൨ ||
മനോജവം മാരുതതുല്യവേഗം
ജിതേംദ്രിയം ബുദ്ധിമതാം വരിഷ്ഠമ് |
വാതാത്മജം വാനരയൂഥമുഖ്യം
ശ്രീരാമദൂതം ശരണം പ്രപദ്യേ || ൩൩ ||
കൂജംതം രാമരാമേതി മധുരം മധുരാക്ഷരമ് |
ആരുഹ്യ കവിതാശാഖാം വംദേ വാല്മീകികോകിലമ് || ൩൪ ||
ആപദാമപഹര്താരം ദാതാരം സര്വസംപദാമ് |
ലോകാഭിരാമം ശ്രീരാമം ഭൂയോ ഭൂയോ നമാമ്യഹമ് || ൩൫ ||
ഭര്ജനം ഭവബീജാനാമര്ജനം സുഖസംപദാമ് |
തര്ജനം യമദൂതാനാം രാമരാമേതി ഗര്ജനമ് || ൩൬ ||
രാമോ രാജമണിഃ സദാ വിജയതേ രാമം രമേശം ഭജേ
രാമേണാഭിഹതാ നിശാചരചമൂ രാമായ തസ്മൈ നമഃ |
രാമാന്നാസ്തി പരായണം പരതരം രാമസ്യ ദാസോഽസ്മ്യഹം
രാമേ ചിത്തലയഃ സദാ ഭവതു മേ ഭോ രാമ മാമുദ്ധര || ൩൭ ||
ശ്രീരാമ രാമ രാമേതി രമേ രാമേ മനോരമേ |
സഹസ്രനാമ തത്തുല്യം രാമനാമ വരാനനേ || ൩൮ ||
ഇതി ശ്രീബുധകൌശികമുനി വിരചിതം ശ്രീരാമരക്ഷാ സ്തോത്രമ് |