ഗലദ്ദാനഗംഡം മിലദ്ഭൃംഗഷംഡം
ചലച്ചാരുശുംഡം ജഗത്ത്രാണശൌംഡമ് |
കനദ്ദംതകാംഡം വിപദ്ഭംഗചംഡം
ശിവപ്രേമപിംഡം ഭജേ വക്രതുംഡമ് || ൧ ||
അനാദ്യംതമാദ്യം പരം തത്ത്വമര്ഥം
ചിദാകാരമേകം തുരീയം ത്വമേയമ് |
ഹരിബ്രഹ്മമൃഗ്യം പരബ്രഹ്മരൂപം
മനോവാഗതീതം മഹഃശൈവമീഡേ || ൨ ||
സ്വശക്ത്യാദിശക്ത്യംതസിംഹാസനസ്ഥം
മനോഹാരിസര്വാംഗരത്നോരുഭൂഷമ് |
ജടാഹീംദുഗംഗാസ്ഥിശമ്യാകമൌളിം
പരാശക്തിമിത്രം നുമഃ പംചവക്ത്രമ് || ൩ ||
ശിവേശാനതത്പൂരുഷാഘോരവാമാ-
-ദിഭിഃ പംചഭിര്ഹൃന്മുഖൈഃ ഷഡ്ഭിരംഗൈഃ |
അനൌപമ്യ ഷട്ത്രിംശതം തത്ത്വവിദ്യാ-
-മതീതം പരം ത്വാം കഥം വേത്തി കോ വാ || ൪ ||
പ്രവാലപ്രവാഹപ്രഭാശോണമര്ധം
മരുത്വന്മണിശ്രീമഹഃശ്യാമമര്ധമ് |
ഗുണസ്യൂതമേതദ്വപുഃ ശൈവമംതഃ
സ്മരാമി സ്മരാപത്തിസംപത്തിഹേതുമ് || ൫ ||
സ്വസേവാസമായാതദേവാസുരേംദ്രാ-
-നമന്മൌലിമംദാരമാലാഭിഷക്തമ് |
നമസ്യാമി ശംഭോ പദാംഭോരുഹം തേ
ഭവാംഭോധിപോതം ഭവാനീവിഭാവ്യമ് || ൬ ||
ജഗന്നാഥ മന്നാഥ ഗൌരീസനാഥ
പ്രപന്നാനുകംപിന്വിപന്നാര്തിഹാരിന് |
മഹഃസ്തോമമൂര്തേ സമസ്തൈകബംധോ
നമസ്തേ നമസ്തേ പുനസ്തേ നമോഽസ്തു || ൭ ||
വിരൂപാക്ഷ വിശ്വേശ വിശ്വാദിദേവ
ത്രയീമൂല ശംഭോ ശിവ ത്ര്യംബക ത്വമ് |
പ്രസീദ സ്മര ത്രാഹി പശ്യാവമുക്ത്യൈ
ക്ഷമാം പ്രാപ്നുഹി ത്ര്യക്ഷ മാം രക്ഷ മോദാത് || ൮ ||
മഹാദേവ ദേവേശ ദേവാദിദേവ
സ്മരാരേ പുരാരേ യമാരേ ഹരേതി |
ബ്രുവാണഃ സ്മരിഷ്യാമി ഭക്ത്യാ ഭവംതം
തതോ മേ ദയാശീല ദേവ പ്രസീദ || ൯ ||
ത്വദന്യഃ ശരണ്യഃ പ്രപന്നസ്യ നേതി
പ്രസീദ സ്മരന്നേവ ഹന്യാസ്തു ദൈന്യമ് |
ന ചേത്തേ ഭവേദ്ഭക്തവാത്സല്യഹാനി-
-സ്തതോ മേ ദയാലോ സദാ സന്നിധേഹി || ൧൦ ||
അയം ദാനകാലസ്ത്വഹം ദാനപാത്രം
ഭവാനേവ ദാതാ ത്വദന്യം ന യാചേ |
ഭവദ്ഭക്തിമേവ സ്ഥിരാം ദേഹി മഹ്യം
കൃപാശീല ശംഭോ കൃതാര്ഥോഽസ്മി തസ്മാത് || ൧൧ ||
പശും വേത്സി ചേന്മാം തമേവാധിരൂഢഃ
കലംകീതി വാ മൂര്ധ്നി ധത്സേ തമേവ |
ദ്വിജിഹ്വഃ പുനഃ സോഽപി തേ കംഠഭൂഷാ
ത്വദംഗീകൃതാഃ ശര്വ സര്വേഽപി ധന്യാഃ || ൧൨ ||
ന ശക്നോമി കര്തും പരദ്രോഹലേശം
കഥം പ്രീയസേ ത്വം ന ജാനേ ഗിരീശ |
തഥാഹി പ്രസന്നോഽസി കസ്യാപി കാംതാ-
-സുതദ്രോഹിണോ വാ പിതൃദ്രോഹിണോ വാ || ൧൩ ||
സ്തുതിം ധ്യാനമര്ചാം യഥാവദ്വിധാതും
ഭജന്നപ്യജാനന്മഹേശാവലംബേ |
ത്രസംതം സുതം ത്രാതുമഗ്രേ മൃകംഡോ-
-ര്യമപ്രാണനിര്വാപണം ത്വത്പദാബ്ജമ് || ൧൪ ||
ശിരോദൃഷ്ടിഹൃദ്രോഗശൂലപ്രമേഹ-
-ജ്വരാര്ശോജരായക്ഷ്മഹിക്കാവിഷാര്താന് |
ത്വമാദ്യോ ഭിഷഗ്ഭേഷജം ഭസ്മ ശംഭോ
ത്വമുല്ലാഘയാസ്മാന്വപുര്ലാഘവായ || ൧൫ ||
ദരിദ്രോഽസ്മ്യഭദ്രോഽസ്മി ഭഗ്നോഽസ്മി ദൂയേ
വിഷണ്ണോഽസ്മി സന്നോഽസ്മി ഖിന്നോഽസ്മി ചാഹമ് |
ഭവാന്പ്രാണിനാമംതരാത്മാസി ശംഭോ
മമാധിം ന വേത്സി പ്രഭോ രക്ഷ മാം ത്വമ് || ൧൬ ||
ത്വദക്ഷ്ണോഃ കടാക്ഷഃ പതേത്ത്ര്യക്ഷ യത്ര
ക്ഷണം ക്ഷ്മാ ച ലക്ഷ്മീഃ സ്വയം തം വൃണാതേ |
കിരീടസ്ഫുരച്ചാമരച്ഛത്രമാലാ-
-കലാചീഗജക്ഷൌമഭൂഷാവിശേഷൈഃ || ൧൭ ||
ഭവാന്യൈ ഭവായാപി മാത്രേ ച പിത്രേ
മൃഡാന്യൈ മൃഡായാപ്യഘഘ്ന്യൈ മഖഘ്നേ |
ശിവാംഗ്യൈ ശിവാംഗായ കുര്മഃ ശിവായൈ
ശിവായാംബികായൈ നമസ്ത്ര്യംബകായ || ൧൮ ||
ഭവദ്ഗൌരവം മല്ലഘുത്വം വിദിത്വാ
പ്രഭോ രക്ഷ കാരുണ്യദൃഷ്ട്യാനുഗം മാമ് |
ശിവാത്മാനുഭാവസ്തുതാവക്ഷമോഽഹം
സ്വശക്ത്യാ കൃതം മേഽപരാധം ക്ഷമസ്വ || ൧൯ ||
യദാ കര്ണരംധ്രം വ്രജേത്കാലവാഹ-
-ദ്വിഷത്കംഠഘംടാഘണാത്കാരനാദഃ |
വൃഷാധീശമാരുഹ്യ ദേവൌപവാഹ്യം
തദാ വത്സ മാ ഭീരിതി പ്രീണയ ത്വമ് || ൨൦ ||
യദാ ദാരുണാഭാഷണാ ഭീഷണാ മേ
ഭവിഷ്യംത്യുപാംതേ കൃതാംതസ്യ ദൂതാഃ |
തദാ മന്മനസ്ത്വത്പദാംഭോരുഹസ്ഥം
കഥം നിശ്ചലം സ്യാന്നമസ്തേഽസ്തു ശംഭോ || ൨൧ ||
യദാ ദുര്നിവാരവ്യഥോഽഹം ശയാനോ
ലുഠന്നിഃശ്വസന്നിഃസൃതാവ്യക്തവാണിഃ |
തദാ ജഹ്നുകന്യാജലാലംകൃതം തേ
ജടാമംഡലം മന്മനോമംദിരം സ്യാത് || ൨൨ ||
യദാ പുത്രമിത്രാദയോ മത്സകാശേ
രുദംത്യസ്യ ഹാ കീദൃശീയം ദശേതി |
തദാ ദേവദേവേശ ഗൌരീശ ശംഭോ
നമസ്തേ ശിവായേത്യജസ്രം ബ്രവാണി || ൨൩ ||
യദാ പശ്യതാം മാമസൌ വേത്തി നാസ്മാ-
-നയം ശ്വാസ ഏവേതി വാചോ ഭവേയുഃ |
തദാ ഭൂതിഭൂഷം ഭുജംഗാവനദ്ധം
പുരാരേ ഭവംതം സ്ഫുടം ഭാവയേയമ് || ൨൪ ||
യദാ യാതനാദേഹസംദേഹവാഹീ
ഭവേദാത്മദേഹേ ന മോഹോ മഹാന്മേ |
തദാ കാശശീതാംശുസംകാശമീശ
സ്മരാരേ വപുസ്തേ നമസ്തേ സ്മരാമി || ൨൫ ||
യദാപാരമച്ഛായമസ്ഥാനമദ്ഭി-
-ര്ജനൈര്വാ വിഹീനം ഗമിഷ്യാമി മാര്ഗമ് |
തദാ തം നിരുംധന്കൃതാംതസ്യ മാര്ഗം
മഹാദേവ മഹ്യം മനോജ്ഞം പ്രയച്ഛ || ൨൬ ||
യദാ രൌരവാദി സ്മരന്നേവ ഭീത്യാ
വ്രജാമ്യത്ര മോഹം മഹാദേവ ഘോരമ് |
തദാ മാമഹോ നാഥ കസ്താരയിഷ്യ-
-ത്യനാഥം പരാധീനമര്ധേംദുമൌളേ || ൨൭ ||
യദാ ശ്വേതപത്രായതാലംഘ്യശക്തേഃ
കൃതാംതാദ്ഭയം ഭക്തവാത്സല്യഭാവാത് |
തദാ പാഹി മാം പാര്വതീവല്ലഭാന്യം
ന പശ്യാമി പാതാരമേതാദൃശം മേ || ൨൮ ||
ഇദാനീമിദാനീം മൃതിര്മേ ഭവിത്രീ-
-ത്യഹോ സംതതം ചിംതയാ പീഡിതോഽസ്മി |
കഥം നാമ മാ ഭൂന്മൃതൌ ഭീതിരേഷാ
നമസ്തേ ഗതീനാം ഗതേ നീലകംഠ || ൨൯ ||
അമര്യാദമേവാഹമാബാലവൃദ്ധം
ഹരംതം കൃതാംതം സമീക്ഷ്യാസ്മി ഭീതഃ |
മൃതൌ താവകാംഘ്ര്യബ്ജദിവ്യപ്രസാദാ-
-ദ്ഭവാനീപതേ നിര്ഭയോഽഹം ഭവാനി || ൩൦ ||
ജരാജന്മഗര്ഭാധിവാസാദിദുഃഖാ-
-ന്യസഹ്യാനി ജഹ്യാം ജഗന്നാഥ ദേവ |
ഭവംതം വിനാ മേ ഗതിര്നൈവ ശംഭോ
ദയാലോ ന ജാഗര്തി കിം വാ ദയാ തേ || ൩൧ ||
ശിവായേതി ശബ്ദോ നമഃപൂര്വ ഏഷ
സ്മരന്മുക്തികൃന്മൃത്യുഹാ തത്ത്വവാചീ |
മഹേശാന മാ ഗാന്മനസ്തോ വചസ്തഃ
സദാ മഹ്യമേതത്പ്രദാനം പ്രയച്ഛ || ൩൨ ||
ത്വമപ്യംബ മാം പശ്യ ശീതാംശുമൌളി-
-പ്രിയേ ഭേഷജം ത്വം ഭവവ്യാധിശാംതൌ |
ബഹുക്ലേശഭാജം പദാംഭോജപോതേ
ഭവാബ്ധൌ നിമഗ്നം നയസ്വാദ്യ പാരമ് || ൩൩ ||
അനുദ്യല്ലലാടാക്ഷിവഹ്നിപ്രരോഹൈ-
-രവാമസ്ഫുരച്ചാരുവാമോരുശോഭൈഃ |
അനംഗഭ്രമദ്ഭോഗിഭൂഷാവിശേഷൈ-
-രചംദ്രാര്ധചൂഡൈരലം ദൈവതൈര്നഃ || ൩൪ ||
അകംഠേകലംകാദനംഗേഭുജംഗാ-
-ദപാണൌകപാലാദഫാലേനലാക്ഷാത് |
അമൌളൌശശാംകാദവാമേകലത്രാ-
-ദഹം ദേവമന്യം ന മന്യേ ന മന്യേ || ൩൫ ||
മഹാദേവ ശംഭോ ഗിരീശ ത്രിശൂലിം-
-സ്ത്വയീദം സമസ്തം വിഭാതീതി യസ്മാത് |
ശിവാദന്യഥാ ദൈവതം നാഭിജാനേ
ശിവോഽഹം ശിവോഽഹം ശിവോഽഹം ശിവോഽഹമ് || ൩൬ ||
യതോഽജായതേദം പ്രപംചം വിചിത്രം
സ്ഥിതിം യാതി യസ്മിന്യദേകാംതമംതേ |
സ കര്മാദിഹീനഃ സ്വയംജ്യോതിരാത്മാ
ശിവോഽഹം ശിവോഽഹം ശിവോഽഹം ശിവോഽഹമ് || ൩൭ ||
കിരീടേ നിശേശോ ലലാടേ ഹുതാശോ
ഭുജേ ഭോഗിരാജോ ഗലേ കാലിമാ ച |
തനൌ കാമിനീ യസ്യ തത്തുല്യദേവം
ന ജാനേ ന ജാനേ ന ജാനേ ന ജാനേ || ൩൮ ||
അനേന സ്തവേനാദരാദംബികേശം
പരാം ഭക്തിമാസാദ്യ യം യേ നമംതി |
മൃതൌ നിര്ഭയാസ്തേ ജനാസ്തം ഭജംതേ
ഹൃദംഭോജമധ്യേ സദാസീനമീശമ് || ൩൯ ||
ഭുജംഗപ്രിയാകല്പ ശംഭോ മയൈവം
ഭുജംഗപ്രയാതേന വൃത്തേന ക്ലുപ്തമ് |
നരഃ സ്തോത്രമേതത്പഠിത്വോരുഭക്ത്യാ
സുപുത്രായുരാരോഗ്യമൈശ്വര്യമേതി || ൪൦ ||
ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ ശിവ ഭുജംഗമ് |