പശൂനാം പതിം പാപനാശം പരേശം
ഗജേംദ്രസ്യ കൃത്തിം വസാനം വരേണ്യമ് |
ജടാജൂടമധ്യേ സ്ഫുരദ്ഗാംഗവാരിം
മഹാദേവമേകം സ്മരാമി സ്മരാരിമ് || ൧ ||
മഹേശം സുരേശം സുരാരാതിനാശം
വിഭും വിശ്വനാഥം വിഭൂത്യംഗഭൂഷമ് |
വിരൂപാക്ഷമിംദ്വര്കവഹ്നിത്രിനേത്രം
സദാനംദമീഡേ പ്രഭും പംചവക്ത്രമ് || ൨ ||
ഗിരീശം ഗണേശം ഗലേ നീലവര്ണം
ഗവേംദ്രാധിരൂഢം ഗുണാതീതരൂപമ് |
ഭവം ഭാസ്വരം ഭസ്മനാ ഭൂഷിതാംഗം
ഭവാനീകലത്രം ഭജേ പംചവക്ത്രമ് || ൩ ||
ശിവാകാംത ശംഭോ ശശാംകാര്ധമൌളേ
മഹേശാന ശൂലിന് ജടാജൂടധാരിന് |
ത്വമേകോ ജഗദ്വ്യാപകോ വിശ്വരൂപഃ
പ്രസീദ പ്രസീദ പ്രഭോ പൂര്ണരൂപ || ൪ ||
പരാത്മാനമേകം ജഗദ്ബീജമാദ്യം
നിരീഹം നിരാകാരമോംകാരവേദ്യമ് |
യതോ ജായതേ പാല്യതേ യേന വിശ്വം
തമീശം ഭജേ ലീയതേ യത്ര വിശ്വമ് || ൫ ||
ന ഭൂമിര്ന ചാപോ ന വഹ്നിര്ന വായു-
-ര്ന ചാകാശമാസ്തേ ന തംദ്രാ ന നിദ്രാ |
ന ചോഷ്ണം ന ശീതം ന ദേശോ ന വേഷോ
ന യസ്യാസ്തി മൂര്തിസ്ത്രിമൂര്തിം തമീഡേ || ൬ ||
അജം ശാശ്വതം കാരണം കാരണാനാം
ശിവം കേവലം ഭാസകം ഭാസകാനാമ് |
തുരീയം തമഃപാരമാദ്യംതഹീനം
പ്രപദ്യേ പരം പാവനം ദ്വൈതഹീനമ് || ൭ ||
നമസ്തേ നമസ്തേ വിഭോ വിശ്വമൂര്തേ
നമസ്തേ നമസ്തേ ചിദാനംദമൂര്തേ |
നമസ്തേ നമസ്തേ തപോയോഗഗമ്യ
നമസ്തേ നമസ്തേ ശ്രുതിജ്ഞാനഗമ്യ || ൮ ||
പ്രഭോ ശൂലപാണേ വിഭോ വിശ്വനാഥ
മഹാദേവ ശംഭോ മഹേശ ത്രിനേത്ര |
ശിവാകാംത ശാംത സ്മരാരേ പുരാരേ
ത്വദന്യോ വരേണ്യോ ന മാന്യോ ന ഗണ്യഃ || ൯ ||
ശംഭോ മഹേശ കരുണാമയ ശൂലപാണേ
ഗൌരീപതേ പശുപതേ പശുപാശനാശിന് |
കാശീപതേ കരുണയാ ജഗദേതദേക-
-സ്ത്വം ഹംസി പാസി വിദധാസി മഹേശ്വരോഽസി || ൧൦ ||
ത്വത്തോ ജഗദ്ഭവതി ദേവ ഭവ സ്മരാരേ
ത്വയ്യേവ തിഷ്ഠതി ജഗന്മൃഡ വിശ്വനാഥ |
ത്വയ്യേവ ഗച്ഛതി ലയം ജഗദേതദീശ
ലിംഗാത്മകേ ഹര ചരാചരവിശ്വരൂപിന് || ൧൧ ||
ഇതി ശ്രീമത്പരമഹംസ പരിവ്രാജകാചാര്യ ശ്രീമച്ഛംകരാചാര്യ വിരചിതം വേദസാര ശിവ സ്തോത്രം സംപൂര്ണമ് |