సప్తపఞ్చాశత్తమదశకమ్ (౫౭) – ప్రలంబాసురవధమ్
రామసఖః క్వాపి దినే కామద భగవన్ గతో భవాన్విపినమ్ |
సూనుభిరపి గోపానాం ధేనుభిరభిసంవృతో లసద్వేషః || ౫౭-౧ ||
సన్దర్శయన్బలాయ స్వైరం వృన్దావనశ్రియం విమలామ్ |
కాణ్డీరైః సహ బాలైర్భాణ్డీరకమాగమో వటం క్రీడన్ || ౫౭-౨ ||
తావత్తావకనిధన-స్పృహయాలుర్గోపమూర్తిరదయాలుః |
దైత్యః ప్రలంబనామా ప్రలంబబాహుం భవన్తమాపేదే || ౫౭-౩ ||
జానన్నప్యవిజానన్నివ తేన సమం నిబద్ధసౌహార్దః |
వటనికటే పటుపశుపవ్యాబద్ధం ద్వన్ద్వయుద్ధమారబ్ధాః || ౫౭-౪ ||
గోపాన్విభజ్య తన్వన్సఙ్ఘం బలభద్రకం భవత్కమపి |
త్వద్బలభీతం దైత్యం త్వద్బలగతమన్వమన్యథా భగవన్ || ౫౭-౫ ||
[** త్వద్బలభీరుం **]
కల్పితవిజేతృవహనే సమరే పరయూథగం స్వదయితతరమ్ |
శ్రీదామానమధత్థాః పరాజితో భక్తదాసతాం ప్రథయన్ || ౫౭-౬ ||
ఏవం బహుషు విభూమన్ బాలేషు వహత్సు వాహ్యమానేషు |
రామవిజితః ప్రలంబో జహార తం దూరతో భవద్భీత్యా || ౫౭-౭ ||
త్వద్దూరం గమయన్తం తం దృష్ట్వా హలిని విహితగరిమభరే |
దైత్యః స్వరూపమాగాద్యద్రూపాత్స హి బలోఽపి చకితోఽభూత్ || ౫౭-౮ ||
ఉచ్చతయా దైత్యతనోస్త్వన్ముఖమాలోక్య దూరతో రామః |
విగతభయో దృఢముష్ట్యా భృశదుష్టం సపది పిష్టవానేనమ్ || ౫౭-౯ ||
హత్వా దానవవీరం ప్రాప్తం బలమాలిలిఙ్గిథ ప్రేమ్ణా |
తావన్మిలతోర్యువయోః శిరసి కృతా పుష్పవృష్టిరమరగణైః || ౫౭-౧౦ ||
ఆలంబో భువనానాం ప్రాలంబం నిధనమేవమారచయన్ |
కాలం విహాయ సద్యో లోలంబరుచే హరే హరేః క్లేశాన్ || ౫౭-౧౧ ||
ఇతి సప్తపఞ్చాశత్తమదశకం సమాప్తం