ନମୋଽସ୍ତୁତେ ଭୈରଵ ଭୀମମୂର୍ତେ ତ୍ରୈଲୋକ୍ଯ ଗୋପ୍ତ୍ରେଶିତଶୂଲପାଣେ |
କପାଲପାଣେ ଭୁଜଗେଶହାର ତ୍ରିନେତ୍ର ମାଂ ପାହି ଵିପନ୍ନ ବୁଦ୍ଧିମ୍ || ୧ ||
ଜଯସ୍ଵ ସର୍ଵେଶ୍ଵର ଵିଶ୍ଵମୂର୍ତେ ସୁରାସୁରୈର୍ଵଂଦିତପାଦପୀଠ |
ତ୍ରୈଲୋକ୍ଯ ମାତର୍ଗୁରଵେ ଵୃଷାଂକ ଭୀତଶ୍ଶରଣ୍ଯଂ ଶରଣା ଗତୋସ୍ମି || ୨ ||
ତ୍ଵଂ ନାଥ ଦେଵାଶ୍ଶିଵମୀରଯଂତି ସିଦ୍ଧା ହରଂ ସ୍ଥାଣୁମମର୍ଷିତାଶ୍ଚ |
ଭୀମଂ ଚ ଯକ୍ଷା ମନୁଜା ମହେଶ୍ଵରଂ ଭୂତାନି ଭୂତାଧିପ ମୁଚ୍ଚରଂତି || ୩ ||
ନିଶାଚରାସ୍ତୂଗ୍ରମୁପାଚରଂତି ଭଵେତି ପୁଣ୍ଯାଃ ପିତରୋ ନମସ୍ତେ |
ଦାସୋଽସ୍ମି ତୁଭ୍ଯଂ ହର ପାହି ମହ୍ଯଂ ପାପକ୍ଷଯଂ ମେ କୁରୁ ଲୋକନାଥ || ୪ ||
ଭଵାଂ-ସ୍ତ୍ରିଦେଵ-ସ୍ତ୍ରିଯୁଗ-ସ୍ତ୍ରିଧର୍ମା ତ୍ରିପୁଷ୍କରଶ୍ଚାସି ଵିଭୋ ତ୍ରିନେତ୍ର |
ତ୍ରଯାରୁଣିସ୍ତ୍ଵଂ ଶ୍ରୁତିରଵ୍ଯଯାତ୍ମା ପୁନୀହି ମାଂ ତ୍ଵାଂ ଶରଣଂ ଗତୋଽସ୍ମି || ୫ ||
ତ୍ରିଣାଚିକେତ-ସ୍ତ୍ରିପଦପ୍ରତିଷ୍ଠ-ଷ୍ଷଡଂଗଵିତ୍ ସ୍ତ୍ରୀଵିଷଯେଷ୍ଵଲୁବ୍ଧଃ |
ତ୍ରୈଲୋକ୍ଯନାଥୋସି ପୁନୀହି ଶଂଭୋ ଦାସୋଽସ୍ମି ଭୀତଶ୍ଶରଣାଗତସ୍ତେ || ୬ ||
କୃତୋ ମହାଶଂକର ତେଽପରାଧୋ ମଯା ମହାଭୂତପତେ ଗିରୀଶ |
କାମାରିଣା ନିର୍ଜିତମାନସେନ ପ୍ରସାଦଯେ ତ୍ଵାଂ ଶିରସା ନତୋଽସ୍ମି || ୭ ||
ପାପୋଽହଂ ପାପକର୍ମାଽହଂ ପାପାତ୍ମା ପାପସଂଭଵଃ |
ତ୍ରାହି ମାଂ ଦେଵଦେଵେଶ ସର୍ଵପାପହରୋ ଭଵ || ୮ ||
ମମ ଦୈଵାପରାଧୋସ୍ତି ତ୍ଵଯା ଵୈ ତାଦୃଶୋପ୍ଯହମ୍ |
ସ୍ପୃଷ୍ଟଃ ପାପସମାଚାରୋ ମାଂ ପ୍ରସନ୍ନୋ ଭଵେଶ୍ଵର || ୯ ||
ତ୍ଵଂ କର୍ତା ଚୈଵ ଧାତା ଚ ଜଯତ୍ଵଂ ଚ ମହାଜଯ |
ତ୍ଵଂ ମଂଗଲ୍ଯସ୍ତ୍ଵମୋଂକାର-ସ୍ତ୍ଵମୋଂକାରୋ ଵ୍ଯଯୋ ଧୃତଃ || ୧୦ ||
ତ୍ଵଂ ବ୍ରହ୍ମସୃଷ୍ଟିକୃନ୍ନାଥସ୍ତ୍ଵଂ ଵିଷ୍ଣୁସ୍ତ୍ଵଂ ମହେଶ୍ଵରଃ |
ତ୍ଵମିଂଦ୍ରସ୍ତ୍ଵଂ ଵଷଟ୍କାରୋ ଧର୍ମସ୍ତ୍ଵଂ ତୁ ହିତୋତ୍ତମଃ || ୧୧ ||
ସୂକ୍ଷ୍ମସ୍ତ୍ଵଂ ଵ୍ଯକ୍ତରୂପସ୍ତ୍ଵଂ ତ୍ଵମଵ୍ଯକ୍ତଶ୍ଚଧୀଵରଃ |
ତ୍ଵଯା ସର୍ଵମିଦଂ ଵ୍ଯାପ୍ତଂ ଜଗତ୍ ସ୍ଥାଵରଜଂଗମମ୍ || ୧୨ ||
ତ୍ଵମାଦିରଂତୋ ମଧ୍ଯଂ ଚ ତ୍ଵମେଵ ଚ ସହସ୍ରପାତ୍ |
ଵିଜଯସ୍ତ୍ଵଂ ସହସ୍ରାକ୍ଷୋ ଚିତ୍ତପାଖ୍ଯୋ ମହାଭୁଜଃ || ୧୩ ||
ଅନଂତସ୍ସର୍ଵଗୋ ଵ୍ଯାପୀ ହଂସଃ ପୁଣ୍ଯାଧିକୋଚ୍ଯୁତଃ |
ଗୀର୍ଵାଣପତିରଵ୍ଯଗ୍ରୋ ରୁଦ୍ରଃ ପଶୁପତିଶ୍ଶିଵଃ || ୧୪ ||
ତ୍ରୈଵିଦ୍ଯସ୍ତ୍ଵଂ ଜିତକ୍ରୋଧୋ ଜିତାରାତିର୍ଜିତେଂଦ୍ରିଯଃ |
ଜଯଶ୍ଚ ଶୂଲପାଣି ସ୍ତ୍ଵଂ ପାହି ମାଂ ଶରଣାଗତମ୍ || ୧୫ ||
ଇତି ଶ୍ରୀଵାମନପୁରାଣାନ୍ତର୍ଗତ ଅଂଧକ କୃତ ଶିଵ ସ୍ତୁତିଃ |