ଅସ୍ଯ ଶ୍ରୀଚଂଡୀକଵଚସ୍ଯ ବ୍ରହ୍ମା ଋଷିଃ, ଅନୁଷ୍ଟୁପ୍ ଛଂଦଃ, ଶ୍ରୀଚାମୁଂଡା ଦେଵତା, ଅଂଗନ୍ଯାସୋକ୍ତମାତରୋ ବୀଜଂ, ଦିଗ୍ବଂଧଦେଵତାସ୍ତତ୍ଵଂ, ଶ୍ରୀଜଗଦଂବାପ୍ରୀତ୍ଯର୍ଥେ ସପ୍ତଶତୀ ପାଠାଂଗ ଜପେ ଵିନିଯୋଗଃ |

ଓଂ ନମଶ୍ଚଂଡିକାଯୈ |

ମାର୍କଂଡେଯ ଉଵାଚ |
ଯଦ୍ଗୁହ୍ଯଂ ପରମଂ ଲୋକେ ସର୍ଵରକ୍ଷାକରଂ ନୃଣାମ୍ |
ଯନ୍ନ କସ୍ଯଚିଦାଖ୍ଯାତଂ ତନ୍ମେ ବ୍ରୂହି ପିତାମହ || ୧ ||

ବ୍ରହ୍ମୋଵାଚ |
ଅସ୍ତି ଗୁହ୍ଯତମଂ ଵିପ୍ର ସର୍ଵଭୂତୋପକାରକମ୍ |
ଦେଵ୍ଯାସ୍ତୁ କଵଚଂ ପୁଣ୍ଯଂ ତଚ୍ଛୃଣୁଷ୍ଵ ମହାମୁନେ || ୨ ||

ପ୍ରଥମଂ ଶୈଲପୁତ୍ରୀତି ଦ୍ଵିତୀଯଂ ବ୍ରହ୍ମଚାରିଣୀ |
ତୃତୀଯଂ ଚଂଦ୍ରଘଂଟେତି କୂଷ୍ମାଂଡେତି ଚତୁର୍ଥକମ୍ || ୩ ||

ପଂଚମଂ ସ୍କଂଦମାତେତି ଷଷ୍ଠଂ କାତ୍ଯାଯନୀତି ଚ |
ସପ୍ତମଂ କାଲରାତ୍ରୀତି ମହାଗୌରୀତି ଚାଷ୍ଟମମ୍ || ୪ ||

ନଵମଂ ସିଦ୍ଧିଦାତ୍ରୀ ଚ ନଵଦୁର୍ଗାଃ ପ୍ରକୀର୍ତିତାଃ |
ଉକ୍ତାନ୍ଯେତାନି ନାମାନି ବ୍ରହ୍ମଣୈଵ ମହାତ୍ମନା || ୫ ||

ଅଗ୍ନିନା ଦହ୍ଯମାନସ୍ତୁ ଶତ୍ରୁମଧ୍ଯେ ଗତୋ ରଣେ |
ଵିଷମେ ଦୁର୍ଗମେ ଚୈଵ ଭଯାର୍ତାଃ ଶରଣଂ ଗତାଃ || ୬ ||

ନ ତେଷାଂ ଜାଯତେ କିଂଚିଦଶୁଭଂ ରଣସଂକଟେ |
ନାପଦଂ ତସ୍ଯ ପଶ୍ଯାମି ଶୋକଦୁଃଖଭଯଂ ନ ହି || ୭ ||

ଯୈସ୍ତୁ ଭକ୍ତ୍ଯା ସ୍ମୃତା ନୂନଂ ତେଷାଂ ଵୃଦ୍ଧିଃ ପ୍ରଜାଯତେ | [ସିଦ୍ଧିଃ]
ଯେ ତ୍ଵାଂ ସ୍ମରଂତି ଦେଵେଶି ରକ୍ଷସେ ତାନ୍ନ ସଂଶଯଃ || ୮ ||

ପ୍ରେତସଂସ୍ଥା ତୁ ଚାମୁଂଡା ଵାରାହୀ ମହିଷାସନା |
ଐଂଦ୍ରୀ ଗଜସମାରୂଢା ଵୈଷ୍ଣଵୀ ଗରୁଡାସନା || ୯ ||

ମାହେଶ୍ଵରୀ ଵୃଷାରୂଢା କୌମାରୀ ଶିଖିଵାହନା |
ଲକ୍ଷ୍ମୀଃ ପଦ୍ମାସନା ଦେଵୀ ପଦ୍ମହସ୍ତା ହରିପ୍ରିଯା || ୧୦ ||

ଶ୍ଵେତରୂପଧରା ଦେଵୀ ଈଶ୍ଵରୀ ଵୃଷଵାହନା |
ବ୍ରାହ୍ମୀ ହଂସସମାରୂଢା ସର୍ଵାଭରଣଭୂଷିତା || ୧୧ ||

ଇତ୍ଯେତା ମାତରଃ ସର୍ଵାଃ ସର୍ଵଯୋଗସମନ୍ଵିତାଃ |
ନାନାଭରଣଶୋଭାଢ୍ଯା ନାନାରତ୍ନୋପଶୋଭିତାଃ || ୧୨ ||

ଦୃଶ୍ଯଂତେ ରଥମାରୂଢା ଦେଵ୍ଯଃ କ୍ରୋଧସମାକୁଲାଃ |
ଶଂଖଂ ଚକ୍ରଂ ଗଦାଂ ଶକ୍ତିଂ ହଲଂ ଚ ମୁସଲାଯୁଧମ୍ || ୧୩ ||

ଖେଟକଂ ତୋମରଂ ଚୈଵ ପରଶୁଂ ପାଶମେଵ ଚ |
କୁଂତାଯୁଧଂ ତ୍ରିଶୂଲଂ ଚ ଶାର୍ଙ୍ଗମାଯୁଧମୁତ୍ତମମ୍ || ୧୪ ||

ଦୈତ୍ଯାନାଂ ଦେହନାଶାଯ ଭକ୍ତାନାମଭଯାଯ ଚ |
ଧାରଯଂତ୍ଯାଯୁଧାନୀତ୍ଥଂ ଦେଵାନାଂ ଚ ହିତାଯ ଵୈ || ୧୫ ||

ନମସ୍ତେଽସ୍ତୁ ମହାରୌଦ୍ରେ ମହାଘୋରପରାକ୍ରମେ |
ମହାବଲେ ମହୋତ୍ସାହେ ମହାଭଯଵିନାଶିନି || ୧୬ ||

ତ୍ରାହି ମାଂ ଦେଵି ଦୁଷ୍ପ୍ରେକ୍ଷ୍ଯେ ଶତ୍ରୂଣାଂ ଭଯଵର୍ଧିନି |
ପ୍ରାଚ୍ଯାଂ ରକ୍ଷତୁ ମାମୈଂଦ୍ରୀ ଆଗ୍ନେଯ୍ଯାମଗ୍ନିଦେଵତା || ୧୭ ||

ଦକ୍ଷିଣେଽଵତୁ ଵାରାହୀ ନୈରୃତ୍ଯାଂ ଖଡ୍ଗଧାରିଣୀ |
ପ୍ରତୀଚ୍ଯାଂ ଵାରୁଣୀ ରକ୍ଷେଦ୍ଵାଯଵ୍ଯାଂ ମୃଗଵାହିନୀ || ୧୮ ||

ଉଦୀଚ୍ଯାଂ ରକ୍ଷ କୌବେରୀ ଈଶାନ୍ଯାଂ ଶୂଲଧାରିଣୀ | [କୌମାରୀ]
ଊର୍ଧ୍ଵଂ ବ୍ରହ୍ମାଣୀ ମେ ରକ୍ଷେଦଧସ୍ତାଦ୍ଵୈଷ୍ଣଵୀ ତଥା || ୧୯ ||

ଏଵଂ ଦଶ ଦିଶୋ ରକ୍ଷେଚ୍ଚାମୁଂଡା ଶଵଵାହନା |
ଜଯା ମେ ଚାଗ୍ରତଃ ପାତୁ ଵିଜଯା ପାତୁ ପୃଷ୍ଠତଃ || ୨୦ ||

ଅଜିତା ଵାମପାର୍ଶ୍ଵେ ତୁ ଦକ୍ଷିଣେ ଚାପରାଜିତା |
ଶିଖାଂ ମେ ଦ୍ଯୋତିନୀ ରକ୍ଷେଦୁମା ମୂର୍ଧ୍ନି ଵ୍ଯଵସ୍ଥିତା || ୨୧ || [ଉଦ୍ଯୋତିନୀ]

ମାଲାଧରୀ ଲଲାଟେ ଚ ଭ୍ରୁଵୌ ରକ୍ଷେଦ୍ଯଶସ୍ଵିନୀ |
ତ୍ରିନେତ୍ରା ଚ ଭ୍ରୁଵୋର୍ମଧ୍ଯେ ଯମଘଂଟା ଚ ନାସିକେ || ୨୨ ||

ଶଂଖିନୀ ଚକ୍ଷୁଷୋର୍ମଧ୍ଯେ ଶ୍ରୋତ୍ରଯୋର୍ଦ୍ଵାରଵାସିନୀ |
କପୋଲୌ କାଲିକା ରକ୍ଷେତ୍ କର୍ଣମୂଲେ ତୁ ଶାଂକରୀ || ୨୩ ||

ନାସିକାଯାଂ ସୁଗଂଧା ଚ ଉତ୍ତରୋଷ୍ଠେ ଚ ଚର୍ଚିକା |
ଅଧରେ ଚାମୃତାକଲା ଜିହ୍ଵାଯାଂ ଚ ସରସ୍ଵତୀ || ୨୪ ||

ଦଂତାନ୍ ରକ୍ଷତୁ କୌମାରୀ କଂଠମଧ୍ଯେ ତୁ ଚଂଡିକା |
ଘଂଟିକାଂ ଚିତ୍ରଘଂଟା ଚ ମହାମାଯା ଚ ତାଲୁକେ || ୨୫ ||

କାମାକ୍ଷୀ ଚିବୁକଂ ରକ୍ଷେଦ୍ଵାଚଂ ମେ ସର୍ଵମଂଗଳା |
ଗ୍ରୀଵାଯାଂ ଭଦ୍ରକାଳୀ ଚ ପୃଷ୍ଠଵଂଶେ ଧନୁର୍ଧରୀ || ୨୬ ||

ନୀଲଗ୍ରୀଵା ବହିଃକଂଠେ ନଲିକାଂ ନଲକୂବରୀ |
ସ୍କଂଧଯୋଃ ଖଡ୍ଗିନୀ ରକ୍ଷେଦ୍ବାହୂ ମେ ଵଜ୍ରଧାରିଣୀ || ୨୭ ||

ହସ୍ତଯୋର୍ଦଂଡିନୀ ରକ୍ଷେଦଂବିକା ଚାଂଗୁଳୀଷୁ ଚ |
ନଖାଂଛୂଲେଶ୍ଵରୀ ରକ୍ଷେତ୍ କୁକ୍ଷୌ ରକ୍ଷେନ୍ନରେଶ୍ଵରୀ || ୨୮ || [କୁଲେଶ୍ଵରୀ]

ସ୍ତନୌ ରକ୍ଷେନ୍ମହାଦେଵୀ ମନଃ ଶୋକଵିନାଶିନୀ |
ହୃଦଯଂ ଲଲିତା ଦେଵୀ ଉଦରେ ଶୂଲଧାରିଣୀ || ୨୯ ||

ନାଭୌ ଚ କାମିନୀ ରକ୍ଷେଦ୍ଗୁହ୍ଯଂ ଗୁହ୍ଯେଶ୍ଵରୀ ତଥା |
ଭୂତନାଥା ଚ ମେଢ୍ରଂ ମେ ଊରୂ ମହିଷଵାହିନୀ || ୩୦ || [ଗୁଦେ]

କଟ୍ଯାଂ ଭଗଵତୀ ରକ୍ଷେଜ୍ଜାନୁନୀ ଵିଂଧ୍ଯଵାସିନୀ |
ଜଂଘେ ମହାବଲା ପ୍ରୋକ୍ତା ସର୍ଵକାମପ୍ରଦାଯିନୀ || ୩୧ ||

ଗୁଲ୍ଫଯୋର୍ନାରସିଂହୀ ଚ ପାଦପୃଷ୍ଠାମିତୌଜସୀ |
ପାଦାଂଗୁଳୀଷୁ ଶ୍ରୀରକ୍ଷେତ୍ ପାଦାଧଃସ୍ଥଲଵାସିନୀ || ୩୨ ||

ନଖାନ୍ ଦଂଷ୍ଟ୍ରା କରାଲୀ ଚ କେଶାଂଶ୍ଚୈଵୋର୍ଧ୍ଵକେଶିନୀ |
ରୋମକୂପେଷୁ କୌବେରୀ ତ୍ଵଚଂ ଵାଗୀଶ୍ଵରୀ ତଥା || ୩୩ ||

ରକ୍ତମଜ୍ଜାଵସାମାଂସାନ୍ଯସ୍ଥିମେଦାଂସି ପାର୍ଵତୀ |
ଅଂତ୍ରାଣି କାଲରାତ୍ରିଶ୍ଚ ପିତ୍ତଂ ଚ ମୁକୁଟେଶ୍ଵରୀ || ୩୪ ||

ପଦ୍ମାଵତୀ ପଦ୍ମକୋଶେ କଫେ ଚୂଡାମଣିସ୍ତଥା |
ଜ୍ଵାଲାମୁଖୀ ନଖଜ୍ଵାଲାମଭେଦ୍ଯା ସର୍ଵସଂଧିଷୁ || ୩୫ ||

ଶୁକ୍ରଂ ବ୍ରହ୍ମାଣି ମେ ରକ୍ଷେଚ୍ଛାଯାଂ ଛତ୍ରେଶ୍ଵରୀ ତଥା |
ଅହଂକାରଂ ମନୋବୁଦ୍ଧିଂ ରକ୍ଷ ମେ ଧର୍ମଚାରିଣୀ || ୩୬ || [ଧର୍ମଧାରିଣୀ]

ପ୍ରାଣାପାନୌ ତଥା ଵ୍ଯାନମୁଦାନଂ ଚ ସମାନକମ୍ |
ଵଜ୍ରହସ୍ତା ଚ ମେ ରକ୍ଷେତ୍ ପ୍ରାଣାନ୍ କଳ୍ଯାଣଶୋଭନା || ୩୭ ||

ରସେ ରୂପେ ଚ ଗଂଧେ ଚ ଶବ୍ଦେ ସ୍ପର୍ଶେ ଚ ଯୋଗିନୀ |
ସତ୍ତ୍ଵଂ ରଜସ୍ତମଶ୍ଚୈଵ ରକ୍ଷେନ୍ନାରାଯଣୀ ସଦା || ୩୮ ||

ଆଯୂ ରକ୍ଷତୁ ଵାରାହୀ ଧର୍ମଂ ରକ୍ଷତୁ ଵୈଷ୍ଣଵୀ |
ଯଶଃ କୀର୍ତିଂ ଚ ଲକ୍ଷ୍ମୀଂ ଚ ଧନଂ ଵିଦ୍ଯାଂ ଚ ଚକ୍ରିଣୀ || ୩୯ ||

ଗୋତ୍ରମିଂଦ୍ରାଣୀ ମେ ରକ୍ଷେତ୍ ପଶୂନ୍ମେ ରକ୍ଷ ଚଂଡିକେ |
ପୁତ୍ରାନ୍ ରକ୍ଷେନ୍ମହାଲକ୍ଷ୍ମୀର୍ଭାର୍ଯାଂ ରକ୍ଷତୁ ଭୈରଵୀ || ୪୦ ||

ପଂଥାନଂ ସୁପଥା ରକ୍ଷେନ୍ମାର୍ଗଂ କ୍ଷେମକରୀ ତଥା |
ରାଜଦ୍ଵାରେ ମହାଲକ୍ଷ୍ମୀର୍ଵିଜଯା ସର୍ଵତଃ ସ୍ଥିତା || ୪୧ ||

ରକ୍ଷାହୀନଂ ତୁ ଯତ୍ ସ୍ଥାନଂ ଵର୍ଜିତଂ କଵଚେନ ତୁ |
ତତ୍ସର୍ଵଂ ରକ୍ଷ ମେ ଦେଵି ଜଯଂତୀ ପାପନାଶିନୀ || ୪୨ ||

ପଦମେକଂ ନ ଗଚ୍ଛେତ୍ତୁ ଯଦୀଚ୍ଛେଚ୍ଛୁଭମାତ୍ମନଃ |
କଵଚେନାଵୃତୋ ନିତ୍ଯଂ ଯତ୍ର ଯତ୍ର ହି ଗଚ୍ଛତି || ୪୩ ||

ତତ୍ର ତତ୍ରାର୍ଥଲାଭଶ୍ଚ ଵିଜଯଃ ସାର୍ଵକାମିକଃ |
ଯଂ ଯଂ ଚିଂତଯତେ କାମଂ ତଂ ତଂ ପ୍ରାପ୍ନୋତି ନିଶ୍ଚିତମ୍ || ୪୪ ||

ପରମୈଶ୍ଵର୍ଯମତୁଲଂ ପ୍ରାପ୍ସ୍ଯତେ ଭୂତଲେ ପୁମାନ୍ |
ନିର୍ଭଯୋ ଜାଯତେ ମର୍ତ୍ଯଃ ସଂଗ୍ରାମେଷ୍ଵପରାଜିତଃ || ୪୫ ||

ତ୍ରୈଲୋକ୍ଯେ ତୁ ଭଵେତ୍ ପୂଜ୍ଯଃ କଵଚେନାଵୃତଃ ପୁମାନ୍ |
ଇଦଂ ତୁ ଦେଵ୍ଯାଃ କଵଚଂ ଦେଵାନାମପି ଦୁର୍ଲଭମ୍ || ୪୬ ||

ଯଃ ପଠେତ୍ପ୍ରଯତୋ ନିତ୍ଯଂ ତ୍ରିସଂଧ୍ଯଂ ଶ୍ରଦ୍ଧଯାନ୍ଵିତଃ |
ଦୈଵୀ କଲା ଭଵେତ୍ତସ୍ଯ ତ୍ରୈଲୋକ୍ଯେଷ୍ଵପରାଜିତଃ || ୪୭ ||

ଜୀଵେଦ୍ଵର୍ଷଶତଂ ସାଗ୍ରମପମୃତ୍ଯୁଵିଵର୍ଜିତଃ |
ନଶ୍ଯଂତି ଵ୍ଯାଧଯଃ ସର୍ଵେ ଲୂତାଵିସ୍ଫୋଟକାଦଯଃ || ୪୮ ||

ସ୍ଥାଵରଂ ଜଂଗମଂ ଚୈଵ କୃତ୍ରିମଂ ଚାପି ଯଦ୍ଵିଷମ୍ |
ଅଭିଚାରାଣି ସର୍ଵାଣି ମଂତ୍ରଯଂତ୍ରାଣି ଭୂତଲେ || ୪୯ ||

ଭୂଚରାଃ ଖେଚରାଶ୍ଚୈଵ ଜଲଜାଶ୍ଚୋପଦେଶିକାଃ |
ସହଜା କୁଲଜା ମାଲା ଡାକିନୀ ଶାକିନୀ ତଥା || ୫୦ ||

ଅଂତରିକ୍ଷଚରା ଘୋରା ଡାକିନ୍ଯଶ୍ଚ ମହାବଲାଃ |
ଗ୍ରହଭୂତପିଶାଚାଶ୍ଚ ଯକ୍ଷଗଂଧର୍ଵରାକ୍ଷସାଃ || ୫୧ ||

ବ୍ରହ୍ମରାକ୍ଷସଵେତାଲାଃ କୂଷ୍ମାଂଡା ଭୈରଵାଦଯଃ |
ନଶ୍ଯଂତି ଦର୍ଶନାତ୍ତସ୍ଯ କଵଚେ ହୃଦି ସଂସ୍ଥିତେ || ୫୨ ||

ମାନୋନ୍ନତିର୍ଭଵେଦ୍ରାଜ୍ଞସ୍ତେଜୋଵୃଦ୍ଧିକରଂ ପରମ୍ |
ଯଶସା ଵର୍ଧତେ ସୋଽପି କୀର୍ତିମଂଡିତଭୂତଲେ || ୫୩ ||

ଜପେତ୍ସପ୍ତଶତୀଂ ଚଂଡୀଂ କୃତ୍ଵା ତୁ କଵଚଂ ପୁରା |
ଯାଵଦ୍ଭୂମଂଡଲଂ ଧତ୍ତେ ସଶୈଲଵନକାନନମ୍ || ୫୪ ||

ତାଵତ୍ତିଷ୍ଠତି ମେଦିନ୍ଯାଂ ସଂତତିଃ ପୁତ୍ରପୌତ୍ରିକୀ |
ଦେହାଂତେ ପରମଂ ସ୍ଥାନଂ ଯତ୍ସୁରୈରପି ଦୁର୍ଲଭମ୍ || ୫୫ ||

ପ୍ରାପ୍ନୋତି ପୁରୁଷୋ ନିତ୍ଯଂ ମହାମାଯାପ୍ରସାଦତଃ |
ଲଭତେ ପରମଂ ରୂପଂ ଶିଵେନ ସମତାଂ ଵ୍ରଜେତ୍ || ୫୬ ||

| ଓଂ |

ଇତି ଦେଵ୍ଯାଃ କଵଚଂ ସଂପୂର୍ଣମ୍ |