ଧ୍ଯାନଂ |
ଆପାତାଳ ନଭଃ ସ୍ଥଲାଂତ ଭୁଵନ ବ୍ରହ୍ମାଂଡମାଵିସ୍ଫୁର-
-ଜ୍ଜ୍ଯୋତିଃସ୍ଫାଟିକଲିଂଗ ମୌଳିଵିଲସତ୍ ପୂର୍ଣେଂଦୁ ଵାଂତାମୃତୈଃ |
ଅସ୍ତୋକାପ୍ଲୁତମେକମୀଶମନିଶଂ ରୁଦ୍ରାନୁଵାକାନ୍ ଜପନ୍
ଧ୍ଯାଯେଦୀପ୍ସିତସିଦ୍ଧଯେ ଧ୍ରୁଵପଦଂ ଵିପ୍ରୋଽଭିଷିଂଚେଚ୍ଛିଵମ୍ ||
ବ୍ରହ୍ମାଂଡଵ୍ଯାପ୍ତଦେହା ଭସିତ ହିମରୁଚା ଭାସମାନା ଭୁଜଂଗୈଃ
କଂଠେ କାଲାଃ କପର୍ଦାଃ କଲିତଶଶିକଲାଶ୍ଚଂଡ କୋଦଂଡ ହସ୍ତାଃ |
ତ୍ର୍ଯକ୍ଷା ରୁଦ୍ରାକ୍ଷମାଲାଃ ସୁଲଲିତଵପୁଷଃ ଶାଂଭଵା ମୂର୍ତିଭେଦାଃ
ରୁଦ୍ରାଃ ଶ୍ରୀରୁଦ୍ରସୂକ୍ତ ପ୍ରକଟିତ ଵିଭଵାଃ ନଃ ପ୍ରଯଚ୍ଛଂତୁ ସୌଖ୍ଯମ୍ ||
ଇତ୍ଯୁକ୍ତ୍ଵା ସତ୍ଵରଂ ସାଂବଂ ସ୍ମୃତ୍ଵା ଶଂକରପାଦୁକେ |
ଧ୍ଯାତ୍ଵା ଯଯୌ ଗଣାଧୀଶଃ ଶିଵସନ୍ନିଧିମାଦରାତ୍ ||
ତତଃ ପ୍ରଣମ୍ଯ ବହୁଧା କୃତାଂଜଲିପୁଟଃ ପ୍ରଭୁମ୍ |
ଶଂଭୁଂ ସ୍ତୋତୁଂ ମତିଂ ଚକ୍ରେ ସର୍ଵାଭୀଷ୍ଟପ୍ରଦାଯକମ୍ ||
ଗଣେଶ ଉଵାଚ |
ନମସ୍ତେ ଦେଵଦେଵାଯ ନମସ୍ତେ ରୁଦ୍ରମନ୍ଯଵେ |
ନମସ୍ତେ ଚଂଦ୍ରଚୂଡାଯାପ୍ଯୁତୋତ ଇଷଵେ ନମଃ || ୧ ||
ନମସ୍ତେ ପାର୍ଵତୀକାଂତାଯୈକରୂପାଯ ଧନ୍ଵନେ | [ମେରୁଧନ୍ଵନେ]
ନମସ୍ତେ ଭଗଵନ୍ ଶଂଭୋ ବାହୁଭ୍ଯାମୁତ ତେ ନମଃ || ୨ ||
ଇଷୁଃ ଶିଵତମା ଯା ତେ ତଯା ମୃଡାଯ ରୁଦ୍ର ମାମ୍ |
ଶିଵଂ ଧନୁର୍ଯଦ୍ବଭୂଵ ତେନାପି ମୃଡଯାଧୁନା || ୩ ||
ଶରଵ୍ଯା ଯା ଶିଵତମା ତଯାପି ମୃଡଯ ପ୍ରଭୋ |
ଯା ତେ ରୁଦ୍ର ଶିଵା ନିତ୍ଯଂ ସର୍ଵମଂଗଳସାଧନମ୍ || ୪ ||
ତଯାଭିଚାକଶୀହି ତ୍ଵଂ ତନୁଵା ମାମୁମାପତେ |
ଅଘୋରଯାପି ତନୁଵା ରୁଦ୍ରାଦ୍ଯା ପାପକାଶିନୀ || ୫ ||
ଯା ତଯା ମୃଡଯ ସ୍ଵାମିନ୍ ସଦା ଶଂତମଯା ପ୍ରଭୋ |
ଗିରିଶଂତଂ ମହାରୁଦ୍ର ହସ୍ତେ ଯାମିଷୁମସ୍ତଵେ || ୬ ||
ବିଭର୍ଷି ତାଂ ଗିରିତ୍ରାଦ୍ଯ ଶିଵାଂ କୁରୁ ଶିଵାପତେ |
ଶିଵେନ ଵଚସା ରୁଦ୍ର ନିତ୍ଯଂ ଵାଚା ଵଦାମସି || ୭ ||
ତ୍ଵଦ୍ଭକ୍ତି ପରିପୂତାଂଗଂ ମହିଂସୀଃ ପୁରୁଷଂ ଜଗତ୍ |
ଯଚ୍ଚ ଶର୍ଵ ଜଗତ୍ସର୍ଵମଯକ୍ଷ୍ମଂ ସୁମନା ଅସତ୍ || ୮ ||
ଯଥା ତଥାଵମାଂ ରୁଦ୍ର ତଦନ୍ଯଧାପି ମେ ପ୍ରଭୋ |
ରୁଦ୍ର ତ୍ଵଂ ପ୍ରଥମୋ ଦୈଵ୍ଯୋ ଭିଷକ୍ ପାପଵିନାଶକଃ || ୯ ||
ଅଧିଵକ୍ତାଽଧ୍ଯଵୋଚନ୍ମାଂ ଭାଵଲିଂଗାର୍ଚକଂ ମୁଦା |
ଅହୀନ୍ ସର୍ଵାନ୍ ଯାତୁ ଧାନ୍ଯଃ ସର୍ଵା ଅପ୍ଯଦ୍ଯ ଜଂଭଯନ୍ || ୧୦ ||
ଅସୌ ତାମ୍ରୋରୁଣୋ ବଭ୍ରୁଃ ନୀଲଗ୍ରୀଵଃ ସୁମଂଗଳଃ |
ଵିଲୋହିତୋସ୍ତ୍ଵଯଂ ଶଂଭୋ ତ୍ଵଦଧିଷ୍ଠାନ ଏଵ ହି || ୧୧ ||
ନମୋ ନମସ୍ତେ ଭଗଵନ୍ ନୀଲଗ୍ରୀଵାଯ ମୀଢୁଷେ |
ସହସ୍ରାକ୍ଷାଯ ଶୁଦ୍ଧାଯ ସଚ୍ଚିଦାନଂଦମୂର୍ତଯେ || ୧୨ ||
ଉଭଯୋଗାର୍ତ୍ନିଯୋର୍ଜ୍ଯା ଯା ଧନ୍ଵନସ୍ତାଂ ପ୍ରମୁଂଚତାମ୍ |
ସଂପ୍ରାପ୍ଯ ଧନୁରନ୍ଯେଷାଂ ଭଯାଯ ପ୍ରଭଵିଷ୍ଯତି || ୧୩ ||
ଅସ୍ମଦ୍ଭଯ ଵିନାଶାର୍ଥ ମଧୁନାଭଯଦ ପ୍ରଭୋ |
ଯାଶ୍ଚ ତେ ହସ୍ତ ଇଷଵଃ ପରତା ଭଗଵୋ ଵାପ || ୧୪ ||
ଅଵତତ୍ଯ ଧନୁଶ୍ଚ ତ୍ଵଂ ସହସ୍ରାକ୍ଷ ଶତେଷୁଧେ |
ମୁଖା ନିଶୀର୍ଯ ଶଲ୍ଯାନାଂ ଶିଵୋ ନଃ ସୁମନା ଭଵ || ୧୫ ||
ଵିଜ୍ଯଂ ଧନୁରିଦଂ ଭୂଯାତ୍ ଵିଶଲ୍ଯୋ ବାଣଵାନପି |
ଅନେଶନ୍ନିଷଵଶ୍ଚାପି ହ୍ଯାଭୁରସ୍ତୁ ନିଷଂଗଥିଃ || ୧୬ ||
କପର୍ଦିନୋ ମହେଶସ୍ଯ ଯଦି ନାଭୁର୍ନିଷଂଗଥିଃ |
ଇଷଵୋ ପି ସମର୍ଥାଶ୍ଚେତ୍ ସାମର୍ଥ୍ଯେତୁ ଭଯଂ ଭଵେତ୍ || ୧୭ ||
ଯା ତେ ହେତିର୍ଧନୁର୍ହସ୍ତେ ମୀଢୁଷ୍ଟମ ବଭୂଵ ଯା |
ତଯାଽସ୍ମାନ୍ ଵିଶ୍ଵତସ୍ତେନ ପାଲଯ ତ୍ଵମଯକ୍ଷ୍ମଯା || ୧୮ ||
ଅନାତତାଯାଯୁଧାଯ ନମସ୍ତେ ଧୃଷ୍ଣଵେ ନମଃ |
ବାହୁଭ୍ଯାଂ ଧନ୍ଵନେ ଶଂଭୋ ନମୋ ଭୂଯୋ ନମୋ ନମଃ || ୧୯ ||
ପରିତେ ଧନ୍ଵନୋ ହେତିଃ ଵିଶ୍ଵତୋଽସ୍ମାନ୍ ଵୃଣକ୍ତୁ ନଃ |
ଇଷୁଧିସ୍ତଵ ଯା ତାଵଦସ୍ମଦାରେ ନିଧେହି ତମ୍ || ୨୦ ||
ହିରଣ୍ଯବାହଵେ ତୁଭ୍ଯଂ ସେନାନ୍ଯେ ତେ ନମୋ ନମଃ |
ଦିଶାଂ ଚ ପତଯେ ତୁଭ୍ଯଂ ପଶୂନାଂ ପତଯେ ନମଃ || ୨୧ ||
ତ୍ଵିଷୀମତେ ନମସ୍ତୁଭ୍ଯଂ ନମଃ ସସ୍ପିଂଜରାଯ ତେ |
ନମଃ ପଥୀନାଂ ପତଯେ ବଭ୍ଲୁଶାଯ ନମୋ ନମଃ || ୨୨ ||
ନମୋ ଵିଵ୍ଯାଧିନେନ୍ନାନାଂ ପତଯେ ପ୍ରଭଵେ ନମଃ |
ନମସ୍ତେ ହରିକେଶାଯ ରୁଦ୍ରାଯାସ୍ତୂପଵୀତିନେ || ୨୩ ||
ପୁଷ୍ଟାନାଂ ପତଯେ ତୁଭ୍ଯଂ ଜଗତାଂ ପତଯେ ନମଃ |
ସଂସାର ହେତି ରୂପାଯ ରୁଦ୍ରାଯାପ୍ଯାତତାଯିନେ || ୨୪ ||
କ୍ଷେତ୍ରାଣାଂ ପତଯେ ତୁଭ୍ଯଂ ସୂତାଯ ସୁକୃତାତ୍ମନେ |
ଅହଂତ୍ଯାଯ ନମସ୍ତୁଭ୍ଯଂ ଵନାନାଂ ପତଯେ ନମଃ || ୨୫ ||
ରୋହିତାଯ ସ୍ଥପତଯେ ମଂତ୍ରିଣେ ଵାଣିଜାଯ ଚ |
କକ୍ଷାଣାଂ ପତଯେ ତୁଭ୍ଯଂ ନମସ୍ତୁଭ୍ଯଂ ଭୁଵଂତଯେ || ୨୬ ||
ତଦ୍ଵାରିଵସ୍କୃତାଯାସ୍ତୁ ମହାଦେଵାଯ ତେ ନମଃ |
ଓଷାଧୀନାଂ ଚ ପତଯେ ନମସ୍ତୁଭ୍ଯଂ ମହାତ୍ମନେ || ୨୭ ||
ଉଚ୍ଚୈର୍ଘୋଷାଯ ଧୀରାଯ ଧୀରାନ୍ କ୍ରଂଦଯତେ ନମଃ || ୨୮ ||
ପତ୍ତୀନାଂ ପତଯେ ତୁଭ୍ଯଂ କୃତ୍ସ୍ନଵୀତାଯ ତେ ନମଃ |
ଧାଵତେ ଧଵଲାଯାପି ସତ୍ତ୍ଵନାଂ ପତଯେ ନମଃ || ୨୯ ||
ଆଵ୍ଯାଧିନୀନାଂ ପତଯେ କକୁଭାଯ ନିଷଂଗିଣେ |
ସ୍ତେନାନାଂ ପତଯେ ତୁଭ୍ଯଂ ଦିଵ୍ଯେଷୁଧିମତେ ନମଃ || ୩୦ ||
ତସ୍କରାଣାଂ ଚ ପତଯେ ଵଂଚତେ ପରିଵଂଚତେ |
ସ୍ତାଯୂନାଂ ପତଯେ ତୁଭ୍ଯଂ ନମସ୍ତେଽସ୍ତୁ ନିଚେରଵେ || ୩୧ ||
ନମଃ ପରିଚରାଯାଽପି ମହାରୁଦ୍ରାଯ ତେ ନମଃ |
ଅରଣ୍ଯାନାଂ ଚ ପତଯେ ମୁଷ୍ଣତାଂ ପତଯେ ନମଃ || ୩୨ ||
ଉଷ୍ଣୀଷିଣେ ନମସ୍ତୁଭ୍ଯଂ ନମୋ ଗିରିଚରାଯ ତେ |
କୁଲୁଂଚାନାଂ ଚ ପତଯେ ନମସ୍ତୁଭ୍ଯଂ ଭଵାଯ ଚ || ୩୩ ||
ନମୋ ରୁଦ୍ରାଯ ଶର୍ଵାଯ ତୁଭ୍ଯଂ ପଶୁପତେ ନମଃ |
ନମ ଉଗ୍ରାଯ ଭୀମାଯ ନମଶ୍ଚାଗ୍ରେଵଧାଯ ଚ || ୩୪ ||
ନମୋ ଦୂରେଵଧାଯାଽପି ନମୋ ହଂତ୍ରେ ନମୋ ନମଃ |
ହନୀଯସେ ନମସ୍ତୁଭ୍ଯଂ ନୀଲଗ୍ରୀଵାଯ ତେ ନମଃ || ୩୫ ||
ନମସ୍ତେ ଶିତିକଂଠାଯ ନମସ୍ତେଽସ୍ତୁ କପର୍ଦିନେ |
ନମସ୍ତେ ଵ୍ଯୁପ୍ତକେଶାଯ ସହସ୍ରାକ୍ଷାଯ ମୀଢୁଷେ || ୩୬ ||
ଗିରିଶାଯ ନମସ୍ତେଽସ୍ତୁ ଶିପିଵିଷ୍ଟାଯ ତେ ନମଃ |
ନମସ୍ତେ ଶଂଭଵେ ତୁଭ୍ଯଂ ମଯୋଭଵ ନମୋଽସ୍ତୁ ତେ || ୩୭ ||
ମଯସ୍କର ନମସ୍ତୁଭ୍ଯଂ ଶଂକରାଯ ନମୋ ନମଃ |
ନମଃ ଶିଵାଯ ଶର୍ଵାଯ ନମଃ ଶିଵତରାଯ ଚ || ୩୮ ||
ନମସ୍ତୀର୍ଥ୍ଯାଯ କୂଲ୍ଯାଯ ନମଃ ପାର୍ଯାଯ ତେ ନମଃ |
ଆଵାର୍ଯାଯ ନମସ୍ତେଽସ୍ତୁ ନମଃ ପ୍ରତରଣାଯ ଚ || ୩୯ ||
ନମ ଉତ୍ତରଣାଯାଽପି ହରାତାର୍ଯାଯ ତେ ନମଃ |
ଆଲାଦ୍ଯାଯ ନମସ୍ତେଽସ୍ତୁ ଭକ୍ତାନାଂ ଵରଦାଯ ଚ || ୪୦ ||
ନମଃ ଶଷ୍ପ୍ଯାଯ ଫେନ୍ଯାଯ ସିକତ୍ଯାଯ ନମୋ ନମଃ |
ପ୍ରଵାହ୍ଯାଯ ନମସ୍ତେଽସ୍ତୁ ହ୍ରସ୍ଵାଯାଽସ୍ତୁ ନମୋ ନମଃ || ୪୧ ||
ଵାମନାଯ ନମସ୍ତେଽସ୍ତୁ ବୃହତେ ଚ ନମୋ ନମଃ |
ଵର୍ଷୀଯସେ ନମସ୍ତେଽସ୍ତୁ ନମୋ ଵୃଦ୍ଧାଯ ତେ ନମଃ || ୪୨ ||
ସଂଵୃଧ୍ଵନେ ନମସ୍ତୁଭ୍ଯମଗ୍ରିଯାଯ ନମୋ ନମଃ |
ପ୍ରଥମାଯ ନମସ୍ତୁଭ୍ଯମାଶଵେ ଚାଜିରାଯ ଚ || ୪୩ ||
ଶୀଘ୍ରିଯାଯ ନମସ୍ତେଽସ୍ତୁ ଶୀଭ୍ଯାଯ ଚ ନମୋ ନମଃ |
ନମ ଊର୍ମ୍ଯାଯ ଶର୍ଵାଯାଽପ୍ଯଵସ୍ଵନ୍ଯାଯ ତେ ନମଃ || ୪୪ ||
ସ୍ରୋତସ୍ଯାଯ ନମସ୍ତୁଭ୍ଯଂ ଦ୍ଵୀପ୍ଯାଯ ଚ ନମୋ ନମଃ |
ଜ୍ଯେଷ୍ଠାଯ ଚ ନମସ୍ତୁଭ୍ଯଂ କନିଷ୍ଠାଯ ନମୋ ନମଃ || ୪୫ ||
ପୂର୍ଵଜାଯ ନମସ୍ତୁଭ୍ଯଂ ନମୋସ୍ତ୍ଵପରଜାଯ ଚ |
ମଧ୍ଯମାଯ ନମସ୍ତୁଭ୍ଯମପଗଲ୍ଭାଯ ତେ ନମଃ || ୪୬ ||
ଜଘନ୍ଯାଯ ନମସ୍ତୁଭ୍ଯଂ ବୁଧ୍ନିଯାଯ ନମୋ ନମଃ |
ସୋଭ୍ଯାଯ ପ୍ରତିସର୍ଯାଯ ଯାମ୍ଯାଯ ଚ ନମୋ ନମଃ || ୪୭ ||
କ୍ଷେମ୍ଯାଯ ଚ ନମସ୍ତୁଭ୍ଯଂ ଯାମ୍ଯାଯ ଚ ନମୋ ନମଃ |
ଉର୍ଵର୍ଯାଯ ନମସ୍ତୁଭ୍ଯଂ ଖଲ୍ଯାଯ ଚ ନମୋ ନମଃ || ୪୮ ||
ଶ୍ଲୋକ୍ଯାଯ ଚାଵସାନ୍ଯାଯାଵସ୍ଵନ୍ଯାଯ ଚ ତେ ନମଃ |
ନମୋ ଵନ୍ଯାଯ କକ୍ଷ୍ଯାଯ ମୌଂଜ୍ଯାଯ ଚ ନମୋ ନମଃ || ୪୯ ||
ଶ୍ରଵାଯ ଚ ନମସ୍ତୁଭ୍ଯଂ ପ୍ରତିଶ୍ରଵ ନମୋ ନମଃ |
ଆଶୁଷେଣାଯ ଶୂରାଯ ନମୋସ୍ତ୍ଵାଽଶୁରଥାଯ ଚ || ୫୦ ||
ଵରୂଥିନେ ପର୍ମିଣେ ଚ ବିଲ୍ମିନେ ଚ ନମୋ ନମଃ |
ଶ୍ରୁତାଯ ଶ୍ରୁତସେନାଯ ନମଃ କଵଚିନେ ନମଃ || ୫୧ ||
ଦୁଂଦୁଭ୍ଯାଯ ନମସ୍ତୁଭ୍ଯମାହନନ୍ଯାଯ ତେ ନମଃ |
ପ୍ରହିତାଯ ନମସ୍ତୁଭ୍ଯଂ ଧୃଷ୍ଣଵେ ପ୍ରମୃଶାଯ ଚ || ୫୨ ||
ପାରାଯ ପାରଵିଂଦାଯ ନମସ୍ତୀକ୍ଷ୍ଣେଷଵେ ନମଃ |
ସୁଧନ୍ଵନେ ନମସ୍ତୁଭ୍ଯଂ ସ୍ଵାଯୁଧାଯ ନମୋ ନମଃ || ୫୩ ||
ନମଃ ସ୍ରୁତ୍ଯାଯ ପଥ୍ଯାଯ ନମଃ କାଟ୍ଯାଯ ତେ ନମଃ |
ନମୋ ନୀପ୍ଯାଯ ସୂଦ୍ଯାଯ ସରସ୍ଯାଯ ଚ ତେ ନମଃ || ୫୪ ||
ନମୋ ନାଦ୍ଯାଯ ଭଵ୍ଯାଯ ଵୈଶଂତାଯ ନମୋ ନମଃ |
ଅଵଟ୍ଯାଯ ନମସ୍ତୁଭ୍ଯଂ ନମଃ କୂପ୍ଯାଯ ତେ ନମଃ || ୫୫ ||
ଅଵର୍ଷ୍ଯାଯ ଚ ଵର୍ଷ୍ଯାଯ ମେଘ୍ଯାଯ ଚ ନମୋ ନମଃ |
ଵିଦ୍ଯୁତ୍ଯାଯ ନମସ୍ତୁଭ୍ଯମୀଧ୍ରିଯାଯ ନମୋ ନମଃ || ୫୬ ||
ଆତପ୍ଯାଯ ନମସ୍ତୁଭ୍ଯଂ ଵାତ୍ଯାଯ ଚ ନମୋ ନମଃ |
ରେଷ୍ମିଯାଯ ନମସ୍ତୁଭ୍ଯଂ ଵାସ୍ତଵ୍ଯାଯ ଚ ତେ ନମଃ || ୫୭ ||
ଵାସ୍ତୁପାଯ ନମସ୍ତୁଭ୍ଯଂ ନମଃ ସୋମାଯ ତେ ନମଃ |
ନମୋ ରୁଦ୍ରାଯ ତାମ୍ରାଯାଽପ୍ଯରୁଣାଯ ଚ ତେ ନମଃ || ୫୮ ||
ନମ ଉଗ୍ରାଯ ଭୀମାଯ ନମଃ ଶଂଗାଯ ତେ ନମଃ |
ନମସ୍ତୀର୍ଥ୍ଯାଯ କୂଲ୍ଯାଯ ସିକତ୍ଯାଯ ନମୋ ନମଃ || ୫୯ ||
ପ୍ରଵାହ୍ଯାଯ ନମସ୍ତୁଭ୍ଯମିରିଣ୍ଯାଯ ନମୋ ନମଃ |
ନମସ୍ତେ ଚଂଦ୍ରଚୂଡାଯ ପ୍ରପଥ୍ଯାଯ ନମୋ ନମଃ || ୬୦ ||
କିଂଶିଲାଯ ନମସ୍ତେଽସ୍ତୁ କ୍ଷଯଣାଯ ଚ ତେ ନମଃ |
କପର୍ଦିନେ ନମସ୍ତେଽସ୍ତୁ ନମସ୍ତେଽସ୍ତୁ ପୁଲସ୍ତଯେ || ୬୧ ||
ନମୋ ଗୋଷ୍ଠ୍ଯାଯ ଗୃହ୍ଯାଯ ଗ୍ରହାଣାଂ ପତଯେ ନମଃ |
ନମସ୍ତଲ୍ପ୍ଯାଯ ଗେହ୍ଯାଯ ଗୁହାଵାସାଯ ତେ ନମଃ || ୬୨ ||
କାଟ୍ଯାଯ ଗହ୍ଵରେଷ୍ଠାଯ ହ୍ରଦଯ୍ଯାଯ ଚ ତେ ନମଃ |
ନିଵେଷ୍ପ୍ଯାଯ ନମସ୍ତୁଭ୍ଯଂ ପାଂସଵ୍ଯାଯ ତେ ନମଃ || ୬୩ ||
ରଜସ୍ଯାଯ ନମସ୍ତୁଭ୍ଯଂ ପରାତ୍ପର ତରାଯ ଚ |
ନମସ୍ତେ ହରିକେଶାଯ ଶୁଷ୍କ୍ଯାଯ ଚ ନମୋ ନମଃ || ୬୪ ||
ହରିତ୍ଯାଯ ନମସ୍ତୁଭ୍ଯଂ ହରିଦ୍ଵର୍ଣାଯ ତେ ନମଃ |
ନମଃ ଉର୍ମ୍ଯାଯ ସୂର୍ମ୍ଯାଯ ପର୍ଣ୍ଯାଯ ଚ ନମୋ ନମଃ || ୬୫ ||
ନମୋପଗୁରମାଣାଯ ପର୍ଣଶଦ୍ଯାଯ ତେ ନମଃ |
ଅଭିଘ୍ନତେ ଚାଖ୍ଖିଦତେ ନମଃ ପ୍ରଖ୍ଖିଦତେ ନମଃ || ୬୬ ||
ଵିଶ୍ଵରୂପାଯ ଵିଶ୍ଵାଯ ଵିଶ୍ଵାଧାରାଯ ତେ ନମଃ |
ତ୍ର୍ଯଂବକାଯ ଚ ରୁଦ୍ରାଯ ଗିରିଜାପତଯେ ନମଃ || ୬୭ ||
ମଣିକୋଟୀରକୋଟିସ୍ଥ କାଂତିଦୀପ୍ତାଯ ତେ ନମଃ |
ଵେଦଵେଦାଂତ ଵେଦ୍ଯାଯ ଵୃଷାରୂଢାଯ ତେ ନମଃ || ୬୮ ||
ଅଵିଜ୍ଞେଯସ୍ଵରୂପାଯ ସୁଂଦରାଯ ନମୋ ନମଃ |
ଉମାକାଂତ ନମସ୍ତେଽସ୍ତୁ ନମସ୍ତେ ସର୍ଵସାକ୍ଷିଣେ || ୬୯ ||
ହିରଣ୍ଯବାହଵେ ତୁଭ୍ଯଂ ହିରଣ୍ଯାଭରଣାଯ ଚ |
ନମୋ ହିରଣ୍ଯରୂପାଯ ରୂପାତୀତାଯ ତେ ନମଃ || ୭୦ ||
ହିରଣ୍ଯପତଯେ ତୁଭ୍ଯମଂବିକାପତଯେ ନମଃ |
ଉମାଯାଃ ପତଯେ ତୁଭ୍ଯଂ ନମଃ ପାପପ୍ରଣାଶକ || ୭୧ ||
ମୀଢୁଷ୍ଟମାଯ ଦୁର୍ଗାଯ କଦ୍ରୁଦ୍ରାଯ ପ୍ରଚେତସେ |
ତଵ୍ଯସେ ବିଲ୍ଵପୂଜ୍ଯାଯ ନମଃ କଳ୍ଯାଣରୂପିଣେ || ୭୨ ||
ଅପାର କଳ୍ଯାଣ ଗୁଣାର୍ଣଵାଯ
ଶ୍ରୀ ନୀଲକଂଠାଯ ନିରଂଜନାଯ |
କାଲାଂତକାଯାପି ନମୋ ନମସ୍ତେ
ଦିକ୍କାଲରୂପାଯ ନମୋ ନମସ୍ତେ || ୭୩ ||
ଵେଦାଂତବୃଂଦସ୍ତୁତ ସଦ୍ଗୁଣାଯ
ଗୁଣପ୍ରଵୀଣାଯ ଗୁଣାଶ୍ରଯାଯ |
ଶ୍ରୀ ଵିଶ୍ଵନାଥାଯ ନମୋ ନମସ୍ତେ
କାଶୀନିଵାସାଯ ନମୋ ନମସ୍ତେ || ୭୪ ||
ଅମେଯ ସୌଂଦର୍ଯ ସୁଧାନିଧାନ
ସମୃଦ୍ଧିରୂପାଯ ନମୋ ନମସ୍ତେ |
ଧରାଧରାକାର ନମୋ ନମସ୍ତେ
ଧାରାସ୍ଵରୂପାଯ ନମୋ ନମସ୍ତେ || ୭୫ ||
ନୀହାର ଶୈଲାତ୍ମଜ ହୃଦ୍ଵିହାର
ପ୍ରକାଶହାର ପ୍ରଵିଭାସି ଵୀର |
ଵୀରେଶ୍ଵରାପାର ଦଯାନିଧାନ
ପାହି ପ୍ରଭୋ ପାହି ନମୋ ନମସ୍ତେ || ୭୬ ||
ଵ୍ଯାସ ଉଵାଚ |
ଏଵଂ ସ୍ତୁତ୍ଵା ମହାଦେଵଂ ପ୍ରଣିପତ୍ଯ ପୁନଃ ପୁନଃ |
କୃତାଂଜଲିପୁଟସ୍ତସ୍ଥୌ ପାର୍ଶ୍ଵେ ଡୁଂଠିଵିନାଯକଃ || ୭୭ ||
ତମାଲୋକ୍ଯ ସୁତଂ ପ୍ରାପ୍ତଂ ଵେଦଂ ଵେଦାଂଗପାରଗମ୍ |
ସ୍ନେହାଶ୍ରୁଧାରା ସଂଵୀତଂ ପ୍ରାହ ଡୁଂଠିଂ ସଦାଶିଵଃ || ୭୮ ||
ଇତି ଶ୍ରୀ ଶିଵରହସ୍ଯେ ହରାଖ୍ଯେ ତୃତୀଯାଂଶେ ପୂର୍ଵାର୍ଥେ ଗଣେଶକୃତ ରୁଦ୍ରାଧ୍ଯାଯ ସ୍ତୁତିଃ ନାମ ଦଶମୋଽଧ୍ଯାଯଃ |
ଅନେନ ଶ୍ରୀଗଣେଶକୃତ ଶ୍ଲୋକାତ୍ମକ ରୁଦ୍ରଧ୍ଯାଯ ପାରାଯଣେନ ଶ୍ରୀ ଵିଶ୍ଵେଶ୍ଵରଃ ସୁପ୍ରୀତଃ ସୁପ୍ରସନ୍ନୋ ଵରଦୋ ଭଵତୁ |