ଶ୍ରୀ କୃଷ୍ଣ ଉଵାଚ |
ସୁଲଭୋ ଭକ୍ତିଯୁକ୍ତାନାଂ ଦୁର୍ଦର୍ଶୋ ଦୁଷ୍ଟଚେତସାମ୍ |
ଅନନ୍ଯଗତିକାନାଂ ଚ ପ୍ରଭୁର୍ଭକ୍ତୈକଵତ୍ସଲଃ || ୧

ଶନୈଶ୍ଚରସ୍ତତ୍ର ନୃସିଂହଦେଵ
ସ୍ତୁତିଂ ଚକାରାମଲ ଚିତ୍ତଵୃତିଃ |
ପ୍ରଣମ୍ଯ ସାଷ୍ଟାଂଗମଶେଷଲୋକ
କିରୀଟ ନୀରାଜିତ ପାଦପଦ୍ମମ୍ || ୨ ||

ଶ୍ରୀ ଶନିରୁଵାଚ |
ଯତ୍ପାଦପଂକଜରଜଃ ପରମାଦରେଣ
ସଂସେଵିତଂ ସକଲକଲ୍ମଷରାଶିନାଶମ୍ |
କଲ୍ଯାଣକାରକମଶେଷନିଜାନୁଗାନାଂ
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୩ ||

ସର୍ଵତ୍ର ଚଂଚଲତଯା ସ୍ଥିତଯା ହି ଲକ୍ଷ୍ମ୍ଯା
ବ୍ରହ୍ମାଦିଵଂଦ୍ଯପଦଯା ସ୍ଥିରଯାନ୍ଯସେଵୀ |
ପାଦାରଵିଂଦଯୁଗଳଂ ପରମାଦରେଣ
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୪ ||

ଯଦ୍ରୂପମାଗମଶିରଃ ପ୍ରତିପାଦ୍ଯମାଦ୍ଯଂ
ଆଧ୍ଯାତ୍ମିକାଦି ପରିତାପହରଂ ଵିଚିଂତ୍ଯମ୍ |
ଯୋଗୀଶ୍ଵରୈରପଗତାଽଖିଲଦୋଷସଂଘୈଃ
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୫ ||

ପ୍ରହ୍ଲାଦଭକ୍ତଵଚସା ହରିରାଵିରାସୀତ୍
ସ୍ତଂଭେ ହିରଣ୍ଯକଶିପୁଂ ଯ ଉଦାରଭାଵଃ |
ଊର୍ଵୋ ନିଧାଯ ଉଦରଂ ନଖରୈର୍ଦଦାର
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୬ ||

ଯୋ ନୈଜଭକ୍ତମନଲାଂବୁଧି ଭୂଧରୋଗ୍ର-
-ଶୃଂଗପ୍ରପାତ ଵିଷଦଂତସରୀସୃପେଭ୍ଯଃ |
ସର୍ଵାତ୍ମକଃ ପରମକାରୁଣିକୋ ରରକ୍ଷ
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୭ ||

ଯନ୍ନିର୍ଵିକାର ପରରୂପ ଵିଚିଂତନେନ
ଯୋଗୀଶ୍ଵରା ଵିଷଯଵୀତ ସମସ୍ତରାଗାଃ |
ଵିଶ୍ରାଂତିମାପୁର ଵିନାଶଵତୀଂ ପରାଖ୍ଯାଂ
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୮ ||

ଯଦ୍ରୂପମୁଗ୍ରମରିମର୍ଦନ ଭାଵଶାଲୀ
ସଂଚିଂତନେନ ସକଲାଭଵଭୀତିହାରୀ | [ଅଘଵିନାଶକାରି]
ଭୂତ ଜ୍ଵର ଗ୍ରହ ସମୁଦ୍ଭଵ ଭୀତିନାଶଂ
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୯ ||

ଯସ୍ଯୋତ୍ତମଂ ଯଶ ଉମାପତିମଗ୍ରଜନ୍ମ
ଶକ୍ରାଦି ଦୈଵତ ସଭାସୁ ସମସ୍ତଗୀତମ୍ |
ଶ୍ରୁତ୍ଵୈକ ସର୍ଵଶମଲପ୍ରଶମେକଦକ୍ଷଂ [ଶକ୍ତ୍ଯୈଵ]
ସ ତ୍ଵଂ ନୃସିଂହ ମଯି ଦେହି କୃପାଵଲୋକମ୍ || ୧୦ ||

ଶ୍ରୀକୃଷ୍ଣ ଉଵାଚ |
ଇତ୍ଥଂ ଶ୍ରୁତ୍ଵା ସ୍ତୁତିଂ ଦେଵଃ ଶନିନା କଲ୍ପିତାଂ ହରିଃ |
ଉଵାଚ ବ୍ରହ୍ମ ଵୃଂଦସ୍ଥଂ ଶନିଂ ତଂ ଭକ୍ତଵତ୍ସଲଃ || ୧୧ ||

ଶ୍ରୀନୃସିଂହ ଉଵାଚ |
ପ୍ରସନ୍ନୋଽହଂ ଶନେ ତୁଭ୍ଯଂ ଵରଂ ଵରଯ ଶୋଭନମ୍ |
ଯଂ ଵାଂଛସି ତମେଵ ତ୍ଵଂ ସର୍ଵଲୋକ ହିତାଵହମ୍ || ୧୨ ||

ଶ୍ରୀ ଶନିରୁଵାଚ |
ନୃସିଂହ ତ୍ଵଂ ମଯି କୃପାଂ କୁରୁ ଦେଵ ଦଯାନିଧେ |
ମଦ୍ଵାସରସ୍ତଵ ପ୍ରୀତିକରଃ ସ୍ଯାଦ୍ଦେଵତାପତେ || ୧୩ ||

ମତ୍କୃତଂ ତ୍ଵତ୍ପରଂ ସ୍ତୋତ୍ରଂ ଶୃଣ୍ଵନ୍ତି ଚ ପଠନ୍ତି ଚ |
ସର୍ଵାନ୍ କାମନ୍ ପୂରଯେଥାଃ ତେଷାଂ ତ୍ଵଂ ଲୋକଭାଵନ || ୧୪ ||

ଶ୍ରୀ ନୃସିଂହ ଉଵାଚ |
ତଥୈଵାସ୍ତୁ ଶନେଽହଂ ଵୈ ରକ୍ଷୋ ଭୁଵନସଂସ୍ଥିତଃ |
ଭକ୍ତ କାମାନ୍ ପୂରଯିଷ୍ଯେ ତ୍ଵଂ ମମୈକଂ ଵଚଃ ଶୃଣୁ || ୧୫ ||

ତ୍ଵତ୍କୃତଂ ମତ୍ପରଂ ସ୍ତୋତ୍ରଂ ଯଃ ପଠେଚ୍ଛୃଣୁଯାଚ୍ଚ ଯଃ |
ଦ୍ଵାଦଶାଷ୍ଟମ ଜନ୍ମସ୍ଥାତ୍ ତ୍ଵଦ୍ଭଯଂ ମାସ୍ତୁ ତସ୍ଯ ଵୈ || ୧୬ ||

ଶନିର୍ନରହରିଂ ଦେଵଂ ତଥେତି ପ୍ରତ୍ଯୁଵାଚ ହ |
ତତଃ ପରମସଂତୁଷ୍ଟୋ ଜଯେତି ମୁନଯୋଵଦନ୍ || ୧୭ ||

ଶ୍ରୀ କୃଷ୍ଣ ଉଵାଚ |
ଇଦଂ ଶନୈଶ୍ଚରସ୍ଯାଥ ନୃସିଂହ ଦେଵ
ସଂଵାଦମେତତ୍ ସ୍ତଵନଂ ଚ ମାନଵଃ |
ଶୃଣୋତି ଯଃ ଶ୍ରାଵଯତେ ଚ ଭକ୍ତ୍ଯା
ସର୍ଵାଣ୍ଯଭୀଷ୍ଟାନି ଚ ଵିନ୍ଦତେ ଧ୍ରୁଵମ୍ || ୧୮ ||

ଇତି ଶ୍ରୀ ଭଵିଷ୍ଯୋତ୍ତରପୁରାଣେ ଶ୍ରୀ ଶନୈଶ୍ଚର କୃତ ଶ୍ରୀ ନୃସିଂହ ସ୍ତୁତିଃ |