ନିତ୍ୟାନନ୍ଦକରୀ ଵରାଭୟକରୀ ସୌନ୍ଦର୍ୟରତ୍ନାକରୀ
ନିର୍ଧୂତାଖିଲଦୋଷପାଵନକରୀ ପ୍ରତ୍ୟକ୍ଷମାହେଶ୍ଵରୀ |
ପ୍ରାଲେୟାଚଲଵଂଶପାଵନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୧ ||
ନାନାରତ୍ନଵିଚିତ୍ରଭୂଷଣକରୀ ହେମାମ୍ବରାଡମ୍ବରୀ
ମୁକ୍ତାହାରଵିଡମ୍ବମାନଵିଲସଦ୍ଵକ୍ଷୋଜକୁମ୍ଭାନ୍ତରୀ |
କାଶ୍ମୀରାଗରୁଵାସିତାଙ୍ଗରୁଚିରା କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୨ ||
ୟୋଗାନନ୍ଦକରୀ ରିପୁକ୍ଷୟକରୀ ଧର୍ମୈକନିଷ୍ଠାକରୀ
ଚନ୍ଦ୍ରାର୍କାନଲଭାସମାନଲହରୀ ତ୍ରୈଲୋକ୍ୟରକ୍ଷାକରୀ |
ସର୍ଵୈଶ୍ଵର୍ୟକରୀ ତପଃ ଫଲକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୩ ||
କୈଲାସାଚଲକନ୍ଦରାଲୟକରୀ ଗୌରୀ ହ୍ୟୁମାଶାଙ୍କରୀ
କୌମାରୀ ନିଗମାର୍ଥଗୋଚରକରୀ ହ୍ୟୋଙ୍କାରବୀଜାକ୍ଷରୀ |
ମୋକ୍ଷଦ୍ଵାରକଵାଟପାଟନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୪ ||
ଦୃଶ୍ୟାଦୃଶ୍ୟଵିଭୂତିଵାହନକରୀ ବ୍ରହ୍ମାଣ୍ଡଭାଣ୍ଡୋଦରୀ
ଲୀଲାନାଟକସୂତ୍ରଖେଲନକରୀ ଵିଜ୍ଞାନଦୀପାଙ୍କୁରୀ |
ଶ୍ରୀଵିଶ୍ଵେଶମନଃ ପ୍ରସାଦନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୫ ||
ଆଦିକ୍ଷାନ୍ତସମସ୍ତଵର୍ଣନକରୀ ଶମ୍ଭୁପ୍ରିୟା ଶାଙ୍କରୀ
କାଶ୍ମୀରତ୍ରିପୁରେଶ୍ଵରୀ ତ୍ରିନୟନୀ ଵିଶ୍ଵେଶ୍ଵରୀ ଶର୍ଵରୀ |
ସ୍ଵର୍ଗଦ୍ଵାରକଵାଟପାଟନକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୬ ||
ଉର୍ଵୀସର୍ଵଜନେଶ୍ଵରୀ ଜୟକରୀ ମାତା କୃପାସାଗରୀ
ନାରୀନୀଲସମାନକୁନ୍ତଲଧରୀ ନିତ୍ୟାନ୍ନଦାନେଶ୍ଵରୀ |
ସାକ୍ଷାନ୍ମୋକ୍ଷକରୀ ସଦା ଶୁଭକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୭ ||
ଦେଵୀ ସର୍ଵଵିଚିତ୍ରରତ୍ନରଚିତା ଦାକ୍ଷାୟଣୀ ସୁନ୍ଦରୀ
ଵାମା ସ୍ଵାଦୁପୟୋଧରା ପ୍ରିୟକରୀ ସୌଭାଗ୍ୟମାହେଶ୍ଵରୀ |
ଭକ୍ତାଭୀଷ୍ଟକରୀ ସଦା ଶୁଭକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୮ ||
ଚନ୍ଦ୍ରାର୍କାନଲକୋଟିକୋଟିସଦୃଶୀ ଚନ୍ଦ୍ରାଂଶୁବିମ୍ବାଧରୀ
ଚନ୍ଦ୍ରାର୍କାଗ୍ନିସମାନକୁଣ୍ଡଲଧରୀ ଚନ୍ଦ୍ରାର୍କଵର୍ଣେଶ୍ଵରୀ |
ମାଲାପୁସ୍ତକପାଶସାଙ୍କୁଶଧରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୯ ||
କ୍ଷତ୍ରତ୍ରାଣକରୀ ମହାଭୟହରୀ ମାତା କୃପାସାଗରୀ
ସର୍ଵାନନ୍ଦକରୀ ସଦା ଶିଵକରୀ ଵିଶ୍ଵେଶ୍ଵରୀ ଶ୍ରୀଧରୀ |
ଦକ୍ଷାକ୍ରନ୍ଦକରୀ ନିରାମୟକରୀ କାଶୀପୁରାଧୀଶ୍ଵରୀ
ଭିକ୍ଷାଂ ଦେହି କୃପାଵଲମ୍ବନକରୀ ମାତାନ୍ନପୂର୍ଣେଶ୍ଵରୀ || ୧୦ ||
ଅନ୍ନପୂର୍ଣେ ସଦାପୂର୍ଣେ ଶଙ୍କରପ୍ରାଣଵଲ୍ଲଭେ |
ଜ୍ଞାନଵୈରାଗ୍ୟସିଦ୍ଧ୍ୟର୍ଥଂ ଭିକ୍ଷାଂ ଦେହି ଚ ପାର୍ଵତି || ୧୧ ||
ମାତା ଚ ପାର୍ଵତୀ ଦେଵୀ ପିତା ଦେଵୋ ମହେଶ୍ଵରଃ |
ବାନ୍ଧଵାଃ ଶିଵଭକ୍ତାଶ୍ଚ ସ୍ଵଦେଶୋ ଭୁଵନତ୍ରୟମ୍ || ୧୨ ||
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିନ୍ଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଙ୍କରଭଗଵତଃ କୃତୌ ଅନ୍ନପୂର୍ଣା ସ୍ତୋତ୍ରମ୍ |