ଶ୍ରୀମତ୍ପଯୋନିଧିନିକେତନଚକ୍ରପାଣେ
ଭୋଗୀଂଦ୍ରଭୋଗମଣିରାଜିତପୁଣ୍ଯମୂର୍ତେ |
ଯୋଗୀଶ ଶାଶ୍ଵତ ଶରଣ୍ଯ ଭଵାବ୍ଧିପୋତ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧ ||
ବ୍ରହ୍ମେଂଦ୍ରରୁଦ୍ରମରୁଦର୍କକିରୀଟକୋଟି-
-ସଂଘଟ୍ଟିତାଂଘ୍ରିକମଲାମଲକାଂତିକାଂତ |
ଲକ୍ଷ୍ମୀଲସତ୍କୁଚସରୋରୁହରାଜହଂସ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୨ ||
ସଂସାରଦାଵଦହନାକରଭୀକରୋରୁ-
-ଜ୍ଵାଲାଵଲୀଭିରତିଦଗ୍ଧତନୂରୁହସ୍ଯ |
ତ୍ଵତ୍ପାଦପଦ୍ମସରସୀରୁହମାଗତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୩ ||
ସଂସାରଜାଲପତିତସ୍ଯ ଜଗନ୍ନିଵାସ
ସର୍ଵେଂଦ୍ରିଯାର୍ଥବଡିଶାଗ୍ରଝଷୋପମସ୍ଯ |
ପ୍ରୋତ୍କଂପିତପ୍ରଚୁରତାଲୁକମସ୍ତକସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୪ ||
ସଂସାରକୂପମତିଘୋରମଗାଧମୂଲଂ
ସଂପ୍ରାପ୍ଯ ଦୁଃଖଶତସର୍ପସମାକୁଲସ୍ଯ |
ଦୀନସ୍ଯ ଦେଵ କୃପଯା ପଦମାଗତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୫ ||
ସଂସାରଭୀକରକରୀଂଦ୍ରକରାଭିଘାତ-
-ନିଷ୍ପୀଡ୍ଯମାନଵପୁଷଃ ସକଲାର୍ତିନାଶ |
ପ୍ରାଣପ୍ରଯାଣଭଵଭୀତିସମାକୁଲସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୬ ||
ସଂସାରସର୍ପଵିଷଦଗ୍ଧମହୋଗ୍ରତୀଵ୍ର-
-ଦଂଷ୍ଟ୍ରାଗ୍ରକୋଟିପରିଦଷ୍ଟଵିନଷ୍ଟମୂର୍ତେଃ |
ନାଗାରିଵାହନ ସୁଧାବ୍ଧିନିଵାସ ଶୌରେ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୭ ||
ସଂସାରଵୃକ୍ଷମଘବୀଜମନଂତକର୍ମ-
-ଶାଖାଯୁତଂ କରଣପତ୍ରମନଂଗପୁଷ୍ପମ୍ |
ଆରୁହ୍ଯ ଦୁଃଖଫଲିତଂ ପତତୋ ଦଯାଲୋ [ଚକିତଂ]
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୮ ||
ସଂସାରସାଗରଵିଶାଲକରାଲକାଲ-
-ନକ୍ରଗ୍ରହଗ୍ରସିତନିଗ୍ରହଵିଗ୍ରହସ୍ଯ |
ଵ୍ଯଗ୍ରସ୍ଯ ରାଗନିଚଯୋର୍ମିନିପୀଡିତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୯ ||
ସଂସାରସାଗରନିମଜ୍ଜନମୁହ୍ଯମାନଂ
ଦୀନଂ ଵିଲୋକଯ ଵିଭୋ କରୁଣାନିଧେ ମାମ୍ |
ପ୍ରହ୍ଲାଦଖେଦପରିହାରପରାଵତାର
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୦ ||
ସଂସାରଘୋରଗହନେ ଚରତୋ ମୁରାରେ
ମାରୋଗ୍ରଭୀକରମୃଗପ୍ରଚୁରାର୍ଦିତସ୍ଯ |
ଆର୍ତସ୍ଯ ମତ୍ସରନିଦାଘସୁଦୁଃଖିତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୧ ||
ବଦ୍ଧ୍ଵା ଗଲେ ଯମଭଟା ବହୁତର୍ଜଯଂତଃ
କର୍ଷଂତି ଯତ୍ର ଭଵପାଶଶତୈର୍ଯୁତଂ ମାମ୍ |
ଏକାକିନଂ ପରଵଶଂ ଚକିତଂ ଦଯାଳୋ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୨ ||
ଲକ୍ଷ୍ମୀପତେ କମଲନାଭ ସୁରେଶ ଵିଷ୍ଣୋ
ଯଜ୍ଞେଶ ଯଜ୍ଞ ମଧୁସୂଦନ ଵିଶ୍ଵରୂପ |
ବ୍ରହ୍ମଣ୍ଯ କେଶଵ ଜନାର୍ଦନ ଵାସୁଦେଵ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୩ ||
ଏକେନ ଚକ୍ରମପରେଣ କରେଣ ଶଂଖ-
-ମନ୍ଯେନ ସିଂଧୁତନଯାମଵଲଂବ୍ଯ ତିଷ୍ଠନ୍ |
ଵାମେତରେଣ ଵରଦାଭଯପଦ୍ମଚିହ୍ନଂ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୪ ||
ଅଂଧସ୍ଯ ମେ ହୃତଵିଵେକମହାଧନସ୍ଯ
ଚୋରୈର୍ମହାବଲିଭିରିଂଦ୍ରିଯନାମଧେଯୈଃ |
ମୋହାଂଧକାରକୁହରେ ଵିନିପାତିତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୫ ||
ପ୍ରହ୍ଲାଦନାରଦପରାଶରପୁଂଡରୀକ-
-ଵ୍ଯାସାଦିଭାଗଵତପୁଂଗଵହୃନ୍ନିଵାସ |
ଭକ୍ତାନୁରକ୍ତପରିପାଲନପାରିଜାତ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୬ ||
ଲକ୍ଷ୍ମୀନୃସିଂହଚରଣାବ୍ଜମଧୁଵ୍ରତେନ
ସ୍ତୋତ୍ରଂ କୃତଂ ଶୁଭକରଂ ଭୁଵି ଶଂକରେଣ |
ଯେ ତତ୍ପଠଂତି ମନୁଜା ହରିଭକ୍ତିଯୁକ୍ତା-
-ସ୍ତେ ଯାଂତି ତତ୍ପଦସରୋଜମଖଂଡରୂପମ୍ || ୧୭ ||
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ଯ ଶ୍ରୀମଚ୍ଛଂକରାଚାର୍ଯ ଵିରଚିତଂ ଶ୍ରୀଲକ୍ଷ୍ମୀନୃସିଂହ କରାଵଲଂବ ସ୍ତୋତ୍ରମ୍ |
— ଅଧିକଶ୍ଲୋକାଃ —
ସଂସାରଯୋଗ ସକଲେପ୍ସିତନିତ୍ଯକର୍ମ
ସଂପ୍ରାପ୍ଯଦୁଃଖ ସକଲେଂଦ୍ରିଯମୃତ୍ଯୁନାଶ |
ସଂକଲ୍ପ ସିଂଧୁତନଯାକୁଚ କୁଂକୁମାଂକ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୮ ||
ଆଦ୍ଯଂତଶୂନ୍ଯମଜମଵ୍ଯଯମପ୍ରମେଯଂ
ଆଦିତ୍ଯରୁଦ୍ରନିଗମାଦିନୁତପ୍ରଭାଵମ୍ |
ଅଂଭୋଧିଜାସ୍ଯ ମଧୁଲୋଲୁପ ମତ୍ତଭୃଂଗ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୧୯ ||
ଵାରାହ ରାମ ନରସିଂହ ରମାଦିକାଂତା
କ୍ରୀଡାଵିଲୋଲ ଵିଧିଶୂଲି ସୁରପ୍ରଵଂଦ୍ଯ |
ହଂସାତ୍ମକଂ ପରମହଂସ ଵିହାରଲୀଲଂ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୨୦ ||
ମାତା ନୃସିଂହଶ୍ଚ ପିତା ନୃସିଂହଃ
ଭ୍ରାତା ନୃସିଂହଶ୍ଚ ସଖା ନୃସିଂହଃ |
ଵିଦ୍ଯା ନୃସିଂହୋ ଦ୍ରଵିଣଂ ନୃସିଂହଃ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୨୧ ||
ପ୍ରହ୍ଲାଦ ମାନସ ସରୋଜ ଵିହାରଭୃଂଗ
ଗଂଗାତରଂଗ ଧଵଳାଂଗ ରମାସ୍ଥିତାଂକ |
ଶୃଂଗାର ସୁଂଦର କିରୀଟ ଲସଦ୍ଵରାଂଗ
ଲକ୍ଷ୍ମୀନୃସିଂହ ମମ ଦେହି କରାଵଲଂବମ୍ || ୨୨ ||
ଶ୍ରୀଶଂକରାର୍ଯ ରଚିତଂ ସତତଂ ମନୁଷ୍ଯଃ
ସ୍ତୋତ୍ରଂ ପଠେଦିହତୁ ସତ୍ଵଗୁଣପ୍ରସନ୍ନଂ |
ସଦ୍ଯୋଵିମୁକ୍ତ କଲୁଷୋ ମୁନିଵର୍ଯ ଗଣ୍ଯୋ
ଲକ୍ଷ୍ମୀ ପଦମୁପୈତି ସନିର୍ମଲାତ୍ମା || ୨୩ ||
ଯନ୍ମାଯଯୋର୍ଜିତଃ ଵପୁଃ ପ୍ରଚୁର ପ୍ରଵାହ
ମଗ୍ନାର୍ଥ ମତ୍ରନିଵହୋରୁ କରାଵଲଂବଂ |
ଲକ୍ଷ୍ମୀନୃସିଂହ ଚରଣାବ୍ଜ ମଧୁଵ୍ରତେନ
ସ୍ତୋତ୍ରଂ କୃତଂ ଶୁଭକରଂ ଭୁଵି ଶଂକରେଣ || ୨୪ ||
ଶ୍ରୀମନ୍ନୃସିଂହ ଵିଭଵେ ଗରୁଡଧ୍ଵଜାଯ
ତାପତ୍ରଯୋପଶମନାଯ ଭଵୌଷଧାଯ |
ତୃଷ୍ଣାଦି ଵୃଶ୍ଚିକ ଜଲାଗ୍ନି ଭୁଜଂଗ ରୋଗ
କ୍ଲେଶାପହାଯ ହରଯେ ଗୁରଵେ ନମସ୍ତେ || ୨୫ ||
ଇତି ଶ୍ରୀଲକ୍ଷ୍ମୀନୃସିଂହ କରାଵଲଂବ ସ୍ତୋତ୍ରମ୍ |