ନଂଦିକେଶ୍ଵର ଉଵାଚ |
କୈଲାସସ୍ଯୋତ୍ତରେ ଶୃଂଗେ ଶୁଦ୍ଧସ୍ଫଟିକସନ୍ନିଭେ |
ତମୋଗୁଣଵିହୀନେ ତୁ ଜରାମୃତ୍ଯୁଵିଵର୍ଜିତେ || ୧ ||

ସର୍ଵତୀର୍ଥାସ୍ପଦାଧାରେ ସର୍ଵଜ୍ଞାନକୃତାଲଯେ |
କୃତାଂଜଲିପୁଟୋ ବ୍ରହ୍ମା ଧ୍ଯାନାସୀନଂ ସଦାଶିଵମ୍ || ୨ ||

ପପ୍ରଚ୍ଛ ପ୍ରଣତୋ ଭୂତ୍ଵା ଜାନୁଭ୍ଯାମଵନିଂ ଗତଃ |
ସର୍ଵାର୍ଥସଂପଦାଧାରୋ ବ୍ରହ୍ମା ଲୋକପିତାମହଃ || ୩ ||

ବ୍ରହ୍ମୋଵାଚ |
କେନୋପାଯେନ ଦେଵେଶ ଚିରାଯୁର୍ଲୋମଶୋଽଭଵତ୍ |
ତନ୍ମେ ବ୍ରୂହି ମହେଶାନ ଲୋକାନାଂ ହିତକାମ୍ଯଯା || ୪ ||

ଶ୍ରୀସଦାଶିଵ ଉଵାଚ |
ଶୃଣୁ ବ୍ରହ୍ମନ୍ ପ୍ରଵକ୍ଷ୍ଯାମି ଚିରାଯୁର୍ମୁନିସତ୍ତମଃ |
ସଂଜାତୋ କର୍ମଣା ଯେନ ଵ୍ଯାଧିମୃତ୍ଯୁଵିଵର୍ଜିତଃ || ୫ ||

ତସ୍ମିନ୍ନେକାର୍ଣଵେ ଘୋରେ ସଲିଲୌଘପରିପ୍ଲୁତେ |
କୃତାଂତଭଯନାଶାଯ ସ୍ତୁତୋ ମୃତ୍ଯୁଂଜଯଃ ଶିଵଃ || ୬ ||

ତସ୍ଯ ସଂକୀର୍ତନାନ୍ନିତ୍ଯଂ ମର୍ତ୍ଯୋ ମୃତ୍ଯୁଵିଵର୍ଜିତଃ |
ତ୍ଵମେଵ କୀର୍ତଯନ୍ ବ୍ରହ୍ମନ୍ ମୃତ୍ଯୁଂ ଜେତୁଂ ନ ସଂଶଯଃ || ୭ ||

ଲୋମଶ ଉଵାଚ |
ଦେଵାଧିଦେଵ ଦେଵେଶ ସର୍ଵପ୍ରାଣଭୃତାଂ ଵର |
ପ୍ରାଣିନାମପି ନାଥସ୍ତ୍ଵଂ ମୃତ୍ଯୁଂଜଯ ନମୋଽସ୍ତୁ ତେ || ୮ ||

ଦେହିନାଂ ଜୀଵଭୂତୋଽସି ଜୀଵୋ ଜୀଵସ୍ଯ କାରଣମ୍ |
ଜଗତାଂ ରକ୍ଷକସ୍ତ୍ଵଂ ଵୈ ମୃତ୍ଯୁଂଜଯ ନମୋଽସ୍ତୁ ତେ || ୯ ||

ହେମାଦ୍ରିଶିଖରାକାର ସୁଧାଵୀଚିମନୋହର |
ପୁଂଡରୀକ ପରଂ ଜ୍ଯୋତିର୍ମୁତ୍ଯୁଂଜଯ ନମୋଽସ୍ତୁ ତେ || ୧୦ ||

ଧ୍ଯାନାଧାର ମହାଜ୍ଞାନ ସର୍ଵଜ୍ଞାନୈକକାରଣ |
ପରିତ୍ରାତାସି ଲୋକାନାଂ ମୃତ୍ଯୁଂଜଯ ନମୋଽସ୍ତୁ ତେ || ୧୧ ||

ନିହତା ଯେନ କାଲେନ ସଦେଵାସୁରମାନୁଷାଃ |
ଗଂଧର୍ଵାପ୍ସରସଶ୍ଚୈଵ ସିଦ୍ଧଵିଦ୍ଯାଧରାସ୍ତଥା || ୧୨ ||

ସାଧ୍ଯାଶ୍ଚ ଵସଵୋ ରୁଦ୍ରାସ୍ତଥାଶ୍ଵିନିସୁତାଵୁଭୌ |
ମରୁତଶ୍ଚ ଦିଶୋ ନାଗାଃ ସ୍ଥାଵରା ଜଂଗମାସ୍ତଥା || ୧୩ ||

ଅନଂଗେନ ମନୋଜେନ ପୁଷ୍ପଚାପେନ କେଵଲମ୍ |
ଜିତଃ ସୋଽପି ତ୍ଵଯା ଧ୍ଯାନାନ୍ମୃତ୍ଯୁଂଜଯ ନମୋଽସ୍ତୁ ତେ || ୧୪ ||

ଯେ ଧ୍ଯାଯଂତି ପରାଂ ମୂର୍ତିଂ ପୂଜଯଂତ୍ଯମରାଧିପ |
ନ ତେ ମୃତ୍ଯୁଵଶଂ ଯାଂତି ମୃତ୍ଯୁଂଜଯ ନମୋଽସ୍ତୁ ତେ || ୧୫ ||

ତ୍ଵମୋଂକାରୋଽସି ଵେଦାନାଂ ଦେଵାନାଂ ଚ ସଦାଶିଵଃ |
ଆଧାରଶକ୍ତିଃ ଶକ୍ତୀନାଂ ମୃତ୍ଯୁଂଜଯ ନମୋଽସ୍ତୁ ତେ || ୧୬ ||

ସ୍ଥାଵରେ ଜଂଗମେ ଵାପି ଯାଵତ୍ତିଷ୍ଠତି ମେଦିନୀ |
ଜୀଵତ୍ଵିତ୍ଯାହ ଲୋକୋଽଯଂ ମୃତ୍ଯୁଂଜଯ ନମୋଽସ୍ତୁ ତେ || ୧୭ ||

ସୋମସୂର୍ଯାଗ୍ନିମଧ୍ଯସ୍ଥ ଵ୍ଯୋମଵ୍ଯାପିନ୍ ସଦାଶିଵଃ |
କାଲତ୍ରଯ ମହାକାଲ ମୃତ୍ଯୁଂଜଯ ନମୋଽସ୍ତୁ ତେ || ୧୮ ||

ପ୍ରବୁଦ୍ଧେ ଚାପ୍ରବୁଦ୍ଧେ ଚ ତ୍ଵମେଵ ସୃଜସେ ଜଗତ୍ |
ସୃଷ୍ଟିରୂପେଣ ଦେଵେଶ ମୃତ୍ଯୁଂଜଯ ନମୋଽସ୍ତୁ ତେ || ୧୯ ||

ଵ୍ଯୋମ୍ନି ତ୍ଵଂ ଵ୍ଯୋମରୂପୋଽସି ତେଜଃ ସର୍ଵତ୍ର ତେଜସି |
ପ୍ରାଣିନାଂ ଜ୍ଞାନରୂପୋଽସି ମୃତ୍ଯୁଂଜଯ ନମୋଽସ୍ତୁ ତେ || ୨୦ ||

ଜଗଜ୍ଜୀଵୋ ଜଗତ୍ପ୍ରାଣଃ ସ୍ରଷ୍ଟା ତ୍ଵଂ ଜଗତଃ ପ୍ରଭୁଃ |
କାରଣଂ ସର୍ଵତୀର୍ଥାନାଂ ମୃତ୍ଯୁଂଜଯ ନମୋଽସ୍ତୁ ତେ || ୨୧ ||

ନେତା ତ୍ଵମିଂଦ୍ରିଯାଣାଂ ଚ ସର୍ଵଜ୍ଞାନପ୍ରବୋଧକଃ |
ସାଂଖ୍ଯଯୋଗଶ୍ଚ ହଂସଶ୍ଚ ମୃତ୍ଯୁଂଜଯ ନମୋଽସ୍ତୁ ତେ || ୨୨ ||

ରୂପାତୀତଃ ସୁରୂପଶ୍ଚ ପିଂଡସ୍ଥା ପଦମେଵ ଚ |
ଚତୁର୍ଯୁଗକଲାଧାର ମୃତ୍ଯୁଂଜଯ ନମୋଽସ୍ତୁ ତେ || ୨୩ ||

ରେଚକେ ଵହ୍ନିରୂପୋଽସି ସୋମରୂପୋଽସି ପୂରକେ |
କୁଂଭକେ ଶିଵରୂପୋଽସି ମୃତ୍ଯୁଂଜଯ ନମୋଽସ୍ତୁ ତେ || ୨୪ ||

କ୍ଷଯଂ କରୋଽସି ପାପାନାଂ ପୁଣ୍ଯାନାମପି ଵର୍ଧସମ୍ |
ହେତୁସ୍ତ୍ଵଂ ଶ୍ରେଯସାଂ ନିତ୍ଯଂ ମୃତ୍ଯୁଂଜଯ ନମୋଽସ୍ତୁ ତେ || ୨୫ ||

ସର୍ଵମାଯାକଲାତୀତ ସର୍ଵେଂଦ୍ରିଯପରାଵର |
ସର୍ଵେଂଦ୍ରିଯକଲାଧୀଶ ମୃତ୍ଯୁଂଜଯ ନମୋଽସ୍ତୁ ତେ || ୨୬ ||

ରୂପଂ ଗଂଧୋ ରସଃ ସ୍ପର୍ଶଃ ଶବ୍ଦଃ ସଂସ୍କାର ଏଵ ଚ |
ତ୍ଵତ୍ତଃ ପ୍ରକାଶ ଏତେଷାଂ ମୃତ୍ଯୁଂଜଯ ନମୋଽସ୍ତୁ ତେ || ୨୭ ||

ଚତୁର୍ଵିଧାନାଂ ସୃଷ୍ଟୀନାଂ ହେତୁସ୍ତ୍ଵଂ କାରଣେଶ୍ଵର |
ଭାଵାଭାଵପରିଚ୍ଛିନ୍ନ ମୃତ୍ଯୁଂଜଯ ନମୋଽସ୍ତୁ ତେ || ୨୮ ||

ତ୍ଵମେକୋ ନିଷ୍କଲୋ ଲୋକେ ସକଲଂ ଭୁଵନତ୍ରଯମ୍ |
ଅତିସୂକ୍ଷ୍ମାତିରୂପସ୍ତ୍ଵଂ ମୃତ୍ଯୁଂଜଯ ନମୋଽସ୍ତୁ ତେ || ୨୯ ||

ତ୍ଵଂ ପ୍ରବୋଧସ୍ତ୍ଵମାଧାରସ୍ତ୍ଵଦ୍ବୀଜଂ ଭୁଵନତ୍ରଯମ୍ |
ସତ୍ତ୍ଵଂ ରଜସ୍ତମସ୍ତ୍ଵଂ ହି ମୃତ୍ଯୁଂଜଯ ନମୋଽସ୍ତୁ ତେ || ୩୦ ||

ତ୍ଵଂ ସୋମସ୍ତ୍ଵଂ ଦିନେଶଶ୍ଚ ତ୍ଵମାତ୍ମା ପ୍ରକୃତେଃ ପରଃ |
ଅଷ୍ଟତ୍ରିଂଶତ୍କଲାନାଥ ମୃତ୍ଯୁଂଜଯ ନମୋଽସ୍ତୁ ତେ || ୩୧ ||

ସର୍ଵେଂଦ୍ରିଯାଣାମାଧାରଃ ସର୍ଵଭୂତଗଣାଶ୍ରଯଃ |
ସର୍ଵଜ୍ଞାନମଯାନଂତ ମୃତ୍ଯୁଂଜଯ ନମୋଽସ୍ତୁ ତେ || ୩୨ ||

ତ୍ଵମାତ୍ମା ସର୍ଵଭୂତାନାଂ ଗୁଣାନାଂ ତ୍ଵମଧୀଶ୍ଵରଃ |
ସର୍ଵାନଂଦମଯାଧାର ମୃତ୍ଯୁଂଜଯ ନମୋଽସ୍ତୁ ତେ || ୩୩ ||

ତ୍ଵଂ ଯଜ୍ଞଃ ସର୍ଵଯଜ୍ଞାନାଂ ତ୍ଵଂ ବୁଦ୍ଧିର୍ବୋଧଲକ୍ଷଣା |
ଶବ୍ଦବ୍ରହ୍ମ ତ୍ଵମୋଂକାରୋ ମୃତ୍ଯୁଂଜଯ ନମୋଽସ୍ତୁ ତେ || ୩୪ ||

ଶ୍ରୀସଦାଶିଵ ଉଵାଚ |
ଏଵଂ ସଂକୀର୍ତଯେଦ୍ଯସ୍ତୁ ଶୁଚିସ୍ତଦ୍ଗତମାନସଃ |
ଭକ୍ତ୍ଯା ଶୃଣୋତି ଯୋ ବ୍ରହ୍ମନ୍ ନ ସ ମୃତ୍ଯୁଵଶୋ ଭଵେତ୍ || ୩୫ ||

ନ ଚ ମୃତ୍ଯୁଭଯଂ ତସ୍ଯ ପ୍ରାପ୍ତକାଲଂ ଚ ଲଂଘଯେତ୍ |
ଅପମୃତ୍ଯୁଭଯଂ ତସ୍ଯ ପ୍ରଣଶ୍ଯତି ନ ସଂଶଯଃ || ୩୬ ||

ଵ୍ଯାଧଯୋ ନୋପପଦ୍ଯଂତେ ନୋପସର୍ଗଭଯଂ ଭଵେତ୍ |
ପ୍ରତ୍ଯାସନ୍ନାଂତରେ କାଲେ ଶତୈକାଵର୍ତନେ କୃତେ || ୩୭ ||

ମୃତ୍ଯୁର୍ନ ଜାଯତେ ତସ୍ଯ ରୋଗାନ୍ମୁଂଚତି ନିଶ୍ଚିତମ୍ |
ପଂଚମ୍ଯାଂ ଵା ଦଶମ୍ଯାଂ ଵା ପୌର୍ଣମାସ୍ଯାମଥାପି ଵା || ୩୮ ||

ଶତମାଵର୍ତଯେଦ୍ଯସ୍ତୁ ଶତଵର୍ଷଂ ସ ଜୀଵତି |
ତେଜସ୍ଵୀ ବଲସଂପନ୍ନୋ ଲଭତେ ଶ୍ରିଯମୁତ୍ତମାମ୍ || ୩୯ ||

ତ୍ରିଵିଧଂ ନାଶଯେତ୍ପାପଂ ମନୋଵାକ୍କାଯସଂଭଵମ୍ |
ଅଭିଚାରାଣି କର୍ମାଣି କର୍ମାଣ୍ଯାଥର୍ଵଣାନି ଚ |
କ୍ଷୀଯଂତେ ନାତ୍ର ସଂଦେହୋ ଦୁଃସ୍ଵପ୍ନଂ ଚ ଵିନଶ୍ଯତି || ୪୦ ||

ଇଦଂ ରହସ୍ଯଂ ପରମଂ ଦେଵଦେଵସ୍ଯ ଶୂଲିନଃ |
ଦୁଃଖପ୍ରଣାଶନଂ ପୁଣ୍ଯଂ ସର୍ଵଵିଘ୍ନଵିନାଶନମ୍ || ୪୧ ||

ଇତି ଶ୍ରୀଶିଵବ୍ରହ୍ମସଂଵାଦେ ଶ୍ରୀମୃତ୍ଯୁଂଜଯ ସ୍ତୋତ୍ରମ୍ |