ଵିଶୁଦ୍ଧଂ ପରଂ ସଚ୍ଚିଦାନଂଦରୂପଂ
ଗୁଣାଧାରମାଧାରହୀନଂ ଵରେଣ୍ଯମ୍ |
ମହାନ୍ତଂ ଵିଭାନ୍ତଂ ଗୁହାନ୍ତଂ ଗୁଣାନ୍ତଂ
ସୁଖାନ୍ତଂ ସ୍ଵଯଂ ଧାମ ରାମଂ ପ୍ରପଦ୍ଯେ || ୧ ||
ଶିଵଂ ନିତ୍ଯମେକଂ ଵିଭୁଂ ତାରକାଖ୍ଯଂ
ସୁଖାକାରମାକାରଶୂନ୍ଯଂ ସୁମାନ୍ଯମ୍ |
ମହେଶଂ କଲେଶଂ ସୁରେଶଂ ପରେଶଂ
ନରେଶଂ ନିରୀଶଂ ମହୀଶଂ ପ୍ରପଦ୍ଯେ || ୨ ||
ଯଦାଵର୍ଣଯତ୍କର୍ଣମୂଲେଽନ୍ତକାଲେ
ଶିଵୋ ରାମ ରାମେତି ରାମେତି କାଶ୍ଯାମ୍ |
ତଦେକଂ ପରଂ ତାରକବ୍ରହ୍ମରୂପଂ
ଭଜେଽହଂ ଭଜେଽହଂ ଭଜେଽହଂ ଭଜେଽହମ୍ || ୩ ||
ମହାରତ୍ନପୀଠେ ଶୁଭେ କଲ୍ପମୂଲେ
ସୁଖାସୀନମାଦିତ୍ଯକୋଟିପ୍ରକାଶମ୍ |
ସଦା ଜାନକୀଲକ୍ଷ୍ମଣୋପେତମେକଂ
ସଦା ରାମଚଂଦ୍ରଂ ଭଜେଽହଂ ଭଜେଽହମ୍ || ୪ ||
କ୍ଵଣଦ୍ରତ୍ନମଂଜୀରପାଦାରଵିଂଦଂ
ଲସନ୍ମେଖଲାଚାରୁପୀତାଂବରାଢ୍ଯମ୍ |
ମହାରତ୍ନହାରୋଲ୍ଲସତ୍କୌସ୍ତୁଭାଂଗଂ
ନଦଚ୍ଚଂଚରୀମଂଜରୀଲୋଲମାଲମ୍ || ୫ ||
ଲସଚ୍ଚଂଦ୍ରିକାସ୍ମେରଶୋଣାଧରାଭଂ
ସମୁଦ୍ଯତ୍ପତଂଗେଂଦୁକୋଟିପ୍ରକାଶମ୍ |
ନମଦ୍ବ୍ରହ୍ମରୁଦ୍ରାଦିକୋଟୀରରତ୍ନ
ସ୍ଫୁରତ୍କାନ୍ତିନୀରାଜନାରାଧିତାଂଘ୍ରିମ୍ || ୬ ||
ପୁରଃ ପ୍ରାଂଜଲୀନାଂଜନେଯାଦିଭକ୍ତାନ୍
ସ୍ଵଚିନ୍ମୁଦ୍ରଯା ଭଦ୍ରଯା ବୋଧଯନ୍ତମ୍ |
ଭଜେଽହଂ ଭଜେଽହଂ ସଦା ରାମଚଂଦ୍ରଂ
ତ୍ଵଦନ୍ଯଂ ନ ମନ୍ଯେ ନ ମନ୍ଯେ ନ ମନ୍ଯେ || ୭ ||
ଯଦା ମତ୍ସମୀପଂ କୃତାନ୍ତଃ ସମେତ୍ଯ
ପ୍ରଚଂଡପ୍ରକୋପୈର୍ଭଟୈର୍ଭୀଷଯେନ୍ମାମ୍ |
ତଦାଵିଷ୍କରୋଷି ତ୍ଵଦୀଯଂ ସ୍ଵରୂପଂ
ସଦାପତ୍ପ୍ରଣାଶଂ ସକୋଦଂଡବାଣମ୍ || ୮ ||
ନିଜେ ମାନସେ ମଂଦିରେ ସନ୍ନିଧେହି
ପ୍ରସୀଦ ପ୍ରସୀଦ ପ୍ରଭୋ ରାମଚଂଦ୍ର |
ସସୌମିତ୍ରିଣା କୈକଯୀନଂଦନେନ
ସ୍ଵଶକ୍ତ୍ଯାନୁଭକ୍ତ୍ଯା ଚ ସଂସେଵ୍ଯମାନ || ୯ ||
ସ୍ଵଭକ୍ତାଗ୍ରଗଣ୍ଯୈଃ କପୀଶୈର୍ମହୀଶୈ-
-ରନୀକୈରନେକୈଶ୍ଚ ରାମ ପ୍ରସୀଦ |
ନମସ୍ତେ ନମୋଽସ୍ତ୍ଵୀଶ ରାମ ପ୍ରସୀଦ
ପ୍ରଶାଧି ପ୍ରଶାଧି ପ୍ରକାଶଂ ପ୍ରଭୋ ମାମ୍ || ୧୦ ||
ତ୍ଵମେଵାସି ଦୈଵଂ ପରଂ ମେ ଯଦେକଂ
ସୁଚୈତନ୍ଯମେତତ୍ତ୍ଵଦନ୍ଯଂ ନ ମନ୍ଯେ |
ଯତୋଽଭୂଦମେଯଂ ଵିଯଦ୍ଵାଯୁତେଜୋ
ଜଲୋର୍ଵ୍ଯାଦିକାର୍ଯଂ ଚରଂ ଚାଚରଂ ଚ || ୧୧ ||
ନମଃ ସଚ୍ଚିଦାନଂଦରୂପାଯ ତସ୍ମୈ
ନମୋ ଦେଵଦେଵାଯ ରାମାଯ ତୁଭ୍ଯମ୍ |
ନମୋ ଜାନକୀଜୀଵିତେଶାଯ ତୁଭ୍ଯଂ
ନମଃ ପୁଂଡରୀକାଯତାକ୍ଷାଯ ତୁଭ୍ଯମ୍ || ୧୨ ||
ନମୋ ଭକ୍ତିଯୁକ୍ତାନୁରକ୍ତାଯ ତୁଭ୍ଯଂ
ନମଃ ପୁଣ୍ଯପୁଂଜୈକଲଭ୍ଯାଯ ତୁଭ୍ଯମ୍ |
ନମୋ ଵେଦଵେଦ୍ଯାଯ ଚାଦ୍ଯାଯ ପୁଂସେ
ନମଃ ସୁଂଦରାଯେଂଦିରାଵଲ୍ଲଭାଯ || ୧୩ ||
ନମୋ ଵିଶ୍ଵକର୍ତ୍ରେ ନମୋ ଵିଶ୍ଵହର୍ତ୍ରେ
ନମୋ ଵିଶ୍ଵଭୋକ୍ତ୍ରେ ନମୋ ଵିଶ୍ଵମାତ୍ରେ |
ନମୋ ଵିଶ୍ଵନେତ୍ରେ ନମୋ ଵିଶ୍ଵଜେତ୍ରେ
ନମୋ ଵିଶ୍ଵପିତ୍ରେ ନମୋ ଵିଶ୍ଵମାତ୍ରେ || ୧୪ ||
ନମସ୍ତେ ନମସ୍ତେ ସମସ୍ତପ୍ରପଂଚ-
-ପ୍ରଭୋଗପ୍ରଯୋଗପ୍ରମାଣପ୍ରଵୀଣ |
ମଦୀଯଂ ମନସ୍ତ୍ଵତ୍ପଦଦ୍ଵଂଦ୍ଵସେଵାଂ
ଵିଧାତୁଂ ପ୍ରଵୃତ୍ତଂ ସୁଚୈତନ୍ଯସିଦ୍ଧ୍ଯୈ || ୧୫ ||
ଶିଲାପି ତ୍ଵଦଂଘ୍ରିକ୍ଷମାସଂଗିରେଣୁ
ପ୍ରସାଦାଦ୍ଧି ଚୈତନ୍ଯମାଧତ୍ତ ରାମ |
ନରସ୍ତ୍ଵତ୍ପଦଦ୍ଵଂଦ୍ଵସେଵାଵିଧାନା-
-ତ୍ସୁଚୈତନ୍ଯମେତୀତି କିଂ ଚିତ୍ରମତ୍ର || ୧୬ ||
ପଵିତ୍ରଂ ଚରିତ୍ରଂ ଵିଚିତ୍ରଂ ତ୍ଵଦୀଯଂ
ନରା ଯେ ସ୍ମରନ୍ତ୍ଯନ୍ଵହଂ ରାମଚଂଦ୍ର |
ଭଵନ୍ତଂ ଭଵାନ୍ତଂ ଭରନ୍ତଂ ଭଜନ୍ତୋ
ଲଭନ୍ତେ କୃତାନ୍ତଂ ନ ପଶ୍ଯନ୍ତ୍ଯତୋଽନ୍ତେ || ୧୭ ||
ସ ପୁଣ୍ଯଃ ସ ଗଣ୍ଯଃ ଶରଣ୍ଯୋ ମମାଯଂ
ନରୋ ଵେଦ ଯୋ ଦେଵଚୂଡାମଣିଂ ତ୍ଵାମ୍ |
ସଦାକାରମେକଂ ଚିଦାନଂଦରୂପଂ
ମନୋଵାଗଗମ୍ଯଂ ପରଂ ଧାମ ରାମ || ୧୮ ||
ପ୍ରଚଂଡପ୍ରତାପପ୍ରଭାଵାଭିଭୂତ-
-ପ୍ରଭୂତାରିଵୀର ପ୍ରଭୋ ରାମଚଂଦ୍ର |
ବଲଂ ତେ କଥଂ ଵର୍ଣ୍ଯତେଽତୀଵ ବାଲ୍ଯେ
ଯତୋଽଖଂଡି ଚଂଡୀଶକୋଦଂଡଦଂଡମ୍ || ୧୯ ||
ଦଶଗ୍ରୀଵମୁଗ୍ରଂ ସପୁତ୍ରଂ ସମିତ୍ରଂ
ସରିଦ୍ଦୁର୍ଗମଧ୍ଯସ୍ଥରକ୍ଷୋଗଣେଶମ୍ |
ଭଵନ୍ତଂ ଵିନା ରାମ ଵୀରୋ ନରୋ ଵା
ସୁରୋ ଵାଽମରୋ ଵା ଜଯେତ୍କସ୍ତ୍ରିଲୋକ୍ଯାମ୍ || ୨୦ ||
ସଦା ରାମ ରାମେତି ରାମାମୃତଂ ତେ
ସଦାରାମମାନଂଦନିଷ୍ଯଂଦକଂଦମ୍ |
ପିବନ୍ତଂ ନମନ୍ତଂ ସୁଦନ୍ତଂ ହସନ୍ତଂ
ହନୂମନ୍ତମନ୍ତର୍ଭଜେ ତଂ ନିତାନ୍ତମ୍ || ୨୧ ||
ସଦା ରାମ ରାମେତି ରାମାମୃତଂ ତେ
ସଦାରାମମାନଂଦନିଷ୍ଯଂଦକଂଦମ୍ |
ପିବନ୍ନନ୍ଵହଂ ନନ୍ଵହଂ ନୈଵ ମୃତ୍ଯୋ-
-ର୍ବିଭେମି ପ୍ରସାଦାଦସାଦାତ୍ତଵୈଵ || ୨୨ ||
ଅସୀତାସମେତୈରକୋଦଂଡଭୂଷୈ-
-ରସୌମିତ୍ରିଵଂଦ୍ଯୈରଚଂଡପ୍ରତାପୈଃ |
ଅଲଂକେଶକାଲୈରସୁଗ୍ରୀଵମିତ୍ରୈ-
-ରରାମାଭିଧେଯୈରଲଂ ଦୈଵତୈର୍ନଃ || ୨୩ ||
ଅଵୀରାସନସ୍ଥୈରଚିନ୍ମୁଦ୍ରିକାଢ୍ଯୈ-
-ରଭକ୍ତାଂଜନେଯାଦିତତ୍ତ୍ଵପ୍ରକାଶୈଃ |
ଅମଂଦାରମୂଲୈରମଂଦାରମାଲୈ-
-ରରାମାଭିଧେଯୈରଲଂ ଦୈଵତୈର୍ନଃ || ୨୪ ||
ଅସିଂଧୁପ୍ରକୋପୈରଵଂଦ୍ଯପ୍ରତାପୈ-
-ରବଂଧୁପ୍ରଯାଣୈରମଂଦସ୍ମିତାଢ୍ଯୈଃ |
ଅଦଂଡପ୍ରଵାସୈରଖଂଡପ୍ରବୋଧୈ-
-ରରାମାଭିଧେଯୈରଲଂ ଦୈଵତୈର୍ନଃ || ୨୫ ||
ହରେ ରାମ ସୀତାପତେ ରାଵଣାରେ
ଖରାରେ ମୁରାରେଽସୁରାରେ ପରେତି |
ଲପନ୍ତଂ ନଯନ୍ତଂ ସଦାକାଲମେଵଂ
ସମାଲୋକଯାଲୋକଯାଶେଷବଂଧୋ || ୨୬ ||
ନମସ୍ତେ ସୁମିତ୍ରାସୁପୁତ୍ରାଭିଵଂଦ୍ଯ
ନମସ୍ତେ ସଦା କୈକଯୀନଂଦନେଡ୍ଯ |
ନମସ୍ତେ ସଦା ଵାନରାଧୀଶଵଂଦ୍ଯ
ନମସ୍ତେ ନମସ୍ତେ ସଦା ରାମଚଂଦ୍ର || ୨୭ ||
ପ୍ରସୀଦ ପ୍ରସୀଦ ପ୍ରଚଂଡପ୍ରତାପ
ପ୍ରସୀଦ ପ୍ରସୀଦ ପ୍ରଚଂଡାରିକାଲ |
ପ୍ରସୀଦ ପ୍ରସୀଦ ପ୍ରପନ୍ନାନୁକଂପିନ୍
ପ୍ରସୀଦ ପ୍ରସୀଦ ପ୍ରଭୋ ରାମଚଂଦ୍ର || ୨୮ ||
ଭୁଜଂଗପ୍ରଯାତଂ ପରଂ ଵେଦସାରଂ
ମୁଦା ରାମଚଂଦ୍ରସ୍ଯ ଭକ୍ତ୍ଯା ଚ ନିତ୍ଯମ୍ |
ପଠନ୍ସନ୍ତତଂ ଚିନ୍ତଯନ୍ସ୍ଵାନ୍ତରଂଗେ
ସ ଏଵ ସ୍ଵଯଂ ରାମଚଂଦ୍ରଃ ସ ଧନ୍ଯଃ || ୨୯ ||
ଇତି ଶ୍ରୀମଚ୍ଛଂକରାଚାର୍ଯ କୃତଂ ଶ୍ରୀ ରାମ ଭୁଜଂଗପ୍ରଯାତ ସ୍ତୋତ୍ରମ୍ |