ଧ୍ଯାତ୍ଵା ସରସ୍ଵତୀଂ ଦେଵୀଂ ଗଣନାଥଂ ଵିନାଯକମ୍ |
ରାଜା ଦଶରଥଃ ସ୍ତୋତ୍ରଂ ସୌରେରିଦମଥାକରୋତ୍ || ୧ ||
ଦଶରଥ ଉଵାଚ |
ନମଃ କୃଷ୍ଣାଯ ନୀଲାଯ ଶିତିକଂଠନିଭାଯ ଚ |
ନମୋ ନୀଲମଯୂଖାଯ ନୀଲୋତ୍ପଲନିଭାଯ ଚ || ୨ || [ମଧୂକାଯ]
ନମୋ ନିର୍ମାଂସଦେହାଯ ଦୀର୍ଘଶ୍ମଶ୍ରୁଜଟାଯ ଚ |
ନମୋ ଵିଶାଲନେତ୍ରାଯ ଶୁଷ୍କୋଦର ଭଯାନକ || ୩ ||
ନମଃ ପରୁଷଗାତ୍ରାଯ ସ୍ଥୂଲରୋମାଯ ଵୈ ନମଃ |
ନମୋ ନିତ୍ଯଂ କ୍ଷୁଧାର୍ତାଯ ନିତ୍ଯତପ୍ତାଯ ଵୈ ନମଃ || ୪ || [ତୃପ୍ତାଯ]
ନମଃ କାଲାଗ୍ନିରୂପାଯ କୃତାଂତକ ନମୋଽସ୍ତୁ ତେ |
ନମସ୍ତେ କୋଟରାକ୍ଷାଯ ଦୁର୍ନିରୀକ୍ଷ୍ଯାଯ ଵୈ ନମଃ || ୫ ||
ନମୋ ଘୋରାଯ ରୌଦ୍ରାଯ ଭୀଷଣାଯ କରାଳିନେ |
ନମସ୍ତେ ସର୍ଵଭକ୍ଷାଯ ଵଲୀମୁଖ ନମୋଽସ୍ତୁ ତେ || ୬ ||
ସୂର୍ଯପୁତ୍ର ନମସ୍ତେଽସ୍ତୁ ଭାସ୍କରେ ଭଯଦାଯକ | [ଭାସ୍ଵରୋ]
ଅଧୋଦୃଷ୍ଟେ ନମସ୍ତୁଭ୍ଯଂ ଵପୁଃଶ୍ଯାମ ନମୋଽସ୍ତୁ ତେ || ୭ || [ସଂଵର୍ତକ]
ନମୋ ମଂଦଗତେ ତୁଭ୍ଯଂ ନିସ୍ତ୍ରିଂଶାଯ ନମୋ ନମଃ | [ନିଷ୍ପ୍ରଭାଯ]
ତପସା ଦଗ୍ଧଦେହାଯ ନିତ୍ଯଯୋଗରତାଯ ଚ || ୮ || [ଜ୍ଞାନ]
ନମସ୍ତେ ଜ୍ଞାନନେତ୍ରାଯ କାଶ୍ଯପାତ୍ମଜସୂନଵେ |
ତୁଷ୍ଟୋ ଦଦାସି ଵୈ ରାଜ୍ଯଂ ରୁଷ୍ଟୋ ହରସି ତତ୍ କ୍ଷଣାତ୍ || ୯ || [କ୍ରୁଦ୍ଧୋ]
ଦେଵାସୁରମନୁଷ୍ଯାଶ୍ଚ ପଶୁପକ୍ଷିସରୀସୃପାଃ |
ତ୍ଵଯା ଵିଲୋକିତାଃ ସୌରେ ଦୈନ୍ଯମାଶୁ ଵ୍ରଜଂତି ଚ || ୧୦ ||
ବ୍ରହ୍ମା ଶକ୍ରୋ ଯମଶ୍ଚୈଵ ଋଷଯଃ ସପ୍ତତାରକାଃ |
ରାଜ୍ଯଭ୍ରଷ୍ଟାଶ୍ଚ ତେ ସର୍ଵେ ତଵ ଦୃଷ୍ଟ୍ଯା ଵିଲୋକିତାଃ || ୧୧ ||
ଦେଶା ନଗରଗ୍ରାମାଶ୍ଚ ଦ୍ଵୀପାଶ୍ଚୈଵାଦ୍ରଯସ୍ତଥା |
ରୌଦ୍ରଦୃଷ୍ଟ୍ଯା ତୁ ଯେ ଦୃଷ୍ଟାଃ କ୍ଷଯଂ ଗଚ୍ଛଂତି ତତ୍ କ୍ଷଣାତ୍ || ୧୨ ||
ପ୍ରସାଦଂ କୁରୁ ମେ ସୌରେ ଵରାର୍ଥେଽହଂ ତଵାଶ୍ରିତଃ |
ସୌରେ କ୍ଷମସ୍ଵାପରାଧଂ ସର୍ଵଭୂତହିତାଯ ଚ || ୧୩ ||
ଇତି ଦଶରଥ କୃତ ଶ୍ରୀ ଶନୈଶ୍ଚର ସ୍ତୋତ୍ରମ୍ ||