ମହିମ୍ନଃ ପାରଂ ତେ ପରମଵିଦୁଷୋ ଯଦ୍ଯସଦୃଶୀ
ସ୍ତୁତିର୍ବ୍ରହ୍ମାଦୀନାମପି ତଦଵସନ୍ନାସ୍ତ୍ଵଯି ଗିରଃ |
ଅଥାଽଵାଚ୍ଯଃ ସର୍ଵଃ ସ୍ଵମତିପରିଣାମାଵଧି ଗୃଣନ୍
ମମାପ୍ଯେଷ ସ୍ତୋତ୍ରେ ହର ନିରପଵାଦଃ ପରିକରଃ || ୧ ||
ଅତୀତଃ ପଂଥାନଂ ତଵ ଚ ମହିମା ଵାଙ୍ମନସଯୋ-
-ରତଦ୍ଵ୍ଯାଵୃତ୍ତ୍ଯା ଯଂ ଚକିତମଭିଧତ୍ତେ ଶ୍ରୁତିରପି |
ସ କସ୍ଯ ସ୍ତୋତଵ୍ଯଃ କତିଵିଧଗୁଣଃ କସ୍ଯ ଵିଷଯଃ
ପଦେ ତ୍ଵର୍ଵାଚୀନେ ପତତି ନ ମନଃ କସ୍ଯ ନ ଵଚଃ || ୨ ||
ମଧୁସ୍ଫୀତା ଵାଚଃ ପରମମମୃତଂ ନିର୍ମିତଵତ-
-ସ୍ତଵ ବ୍ରହ୍ମନ୍ କିଂ ଵାଗପି ସୁରଗୁରୋର୍ଵିସ୍ମଯପଦମ୍ |
ମମ ତ୍ଵେତାଂ ଵାଣୀଂ ଗୁଣକଥନପୁଣ୍ଯେନ ଭଵତଃ
ପୁନାମୀତ୍ଯର୍ଥେଽସ୍ମିନ୍ ପୁରମଥନ ବୁଦ୍ଧିର୍ଵ୍ଯଵସିତା || ୩ ||
ତଵୈଶ୍ଵର୍ଯଂ ଯତ୍ତଜ୍ଜଗଦୁଦଯରକ୍ଷାପ୍ରଲଯକୃତ୍
ତ୍ରଯୀଵସ୍ତୁଵ୍ଯସ୍ତଂ ତିସୃଷୁ ଗୁଣଭିନ୍ନାସୁ ତନୁଷୁ |
ଅଭଵ୍ଯାନାମସ୍ମିନ୍ ଵରଦ ରମଣୀଯାମରମଣୀଂ
ଵିହଂତୁଂ ଵ୍ଯାକ୍ରୋଶୀଂ ଵିଦଧତ ଇହୈକେ ଜଡଧିଯଃ || ୪ ||
କିମୀହଃ କିଂ କାଯଃ ସ ଖଲୁ କିମୁପାଯସ୍ତ୍ରିଭୁଵନଂ
କିମାଧାରୋ ଧାତା ସୃଜତି କିମୁପାଦାନ ଇତି ଚ |
ଅତର୍କ୍ଯୈଶ୍ଵର୍ଯେ ତ୍ଵଯ୍ଯନଵସରଦୁଃସ୍ଥୋ ହତଧିଯଃ
କୁତର୍କୋଽଯଂ କାଂଶ୍ଚିନ୍ମୁଖରଯତି ମୋହାଯ ଜଗତଃ || ୫ ||
ଅଜନ୍ମାନୋ ଲୋକାଃ କିମଵଯଵଵଂତୋଽପି ଜଗତା-
-ମଧିଷ୍ଠାତାରଂ କିଂ ଭଵଵିଧିରନାଦୃତ୍ଯ ଭଵତି |
ଅନୀଶୋ ଵା କୁର୍ଯାଦ୍ଭୁଵନଜନନେ କଃ ପରିକରୋ
ଯତୋ ମଂଦାସ୍ତ୍ଵାଂ ପ୍ରତ୍ଯମରଵର ସଂଶେରତ ଇମେ || ୬ ||
ତ୍ରଯୀ ସାଂଖ୍ଯଂ ଯୋଗଃ ପଶୁପତିମତଂ ଵୈଷ୍ଣଵମିତି
ପ୍ରଭିନ୍ନେ ପ୍ରସ୍ଥାନେ ପରମିଦମଦଃ ପଥ୍ଯମିତି ଚ |
ରୁଚୀନାଂ ଵୈଚିତ୍ର୍ଯାଦୃଜୁକୁଟିଲ ନାନାପଥଜୁଷାଂ
ନୃଣାମେକୋ ଗମ୍ଯସ୍ତ୍ଵମସି ପଯସାମର୍ଣଵ ଇଵ || ୭ ||
ମହୋକ୍ଷଃ ଖଟ୍ଵାଂଗଂ ପରଶୁରଜିନଂ ଭସ୍ମ ଫଣିନଃ
କପାଲଂ ଚେତୀଯତ୍ତଵ ଵରଦ ତଂତ୍ରୋପକରଣମ୍ |
ସୁରାସ୍ତାଂ ତାମୃଦ୍ଧିଂ ଦଧତି ତୁ ଭଵଦ୍ଭ୍ରୂପ୍ରଣିହିତାଂ
ନ ହି ସ୍ଵାତ୍ମାରାମଂ ଵିଷଯମୃଗତୃଷ୍ଣା ଭ୍ରମଯତି || ୮ ||
ଧ୍ରୁଵଂ କଶ୍ଚିତ୍ ସର୍ଵଂ ସକଲମପରସ୍ତ୍ଵଧ୍ରୁଵମିଦଂ
ପରୋ ଧ୍ରୌଵ୍ଯାଧ୍ରୌଵ୍ଯେ ଜଗତି ଗଦତି ଵ୍ଯସ୍ତଵିଷଯେ |
ସମସ୍ତେଽପ୍ଯେତସ୍ମିନ୍ ପୁରମଥନ ତୈର୍ଵିସ୍ମିତ ଇଵ
ସ୍ତୁଵଂଜିହ୍ରେମି ତ୍ଵାଂ ନ ଖଲୁ ନନୁ ଧୃଷ୍ଟା ମୁଖରତା || ୯ ||
ତଵୈଶ୍ଵର୍ଯଂ ଯତ୍ନାଦ୍ଯଦୁପରି ଵିରିଂଚିର୍ହରିରଧଃ
ପରିଚ୍ଛେତ୍ତୁଂ ଯାତାଵନଲମନଲସ୍କଂଧଵପୁଷଃ |
ତତୋ ଭକ୍ତିଶ୍ରଦ୍ଧାଭରଗୁରୁଗୃଣଦ୍ଭ୍ଯାଂ ଗିରିଶ ଯତ୍
ସ୍ଵଯଂ ତସ୍ଥେ ତାଭ୍ଯାଂ ତଵ କିମନୁଵୃତ୍ତିର୍ନ ଫଲତି || ୧୦ ||
ଅଯତ୍ନାଦାପାଦ୍ଯ ତ୍ରିଭୁଵନମଵୈରଵ୍ଯତିକରଂ
ଦଶାସ୍ଯୋ ଯଦ୍ବାହୂନଭୃତ ରଣକଂଡୂପରଵଶାନ୍ |
ଶିରଃପଦ୍ମଶ୍ରେଣୀରଚିତଚରଣାଂଭୋରୁହବଲେଃ
ସ୍ଥିରାଯାସ୍ତ୍ଵଦ୍ଭକ୍ତେସ୍ତ୍ରିପୁରହର ଵିସ୍ଫୂର୍ଜିତମିଦମ୍ || ୧୧ ||
ଅମୁଷ୍ଯ ତ୍ଵତ୍ସେଵାସମଧିଗତସାରଂ ଭୁଜଵନଂ
ବଲାତ୍ କୈଲାସେଽପି ତ୍ଵଦଧିଵସତୌ ଵିକ୍ରମଯତଃ |
ଅଲଭ୍ଯା ପାତାଲେଽପ୍ଯଲସଚଲିତାଂଗୁଷ୍ଠଶିରସି
ପ୍ରତିଷ୍ଠା ତ୍ଵଯ୍ଯାସୀଦ୍ଧ୍ରୁଵମୁପଚିତୋ ମୁହ୍ଯତି ଖଲଃ || ୧୨ ||
ଯଦୃଦ୍ଧିଂ ସୁତ୍ରାମ୍ଣୋ ଵରଦ ପରମୋଚ୍ଚୈରପି ସତୀ-
-ମଧଶ୍ଚକ୍ରେ ବାଣଃ ପରିଜନଵିଧେଯତ୍ରିଭୁଵନଃ |
ନ ତଚ୍ଚିତ୍ରଂ ତସ୍ମିନ୍ ଵରିଵସିତରି ତ୍ଵଚ୍ଚରଣଯୋ-
-ର୍ନ କସ୍ଯାପ୍ଯୁନ୍ନତ୍ଯୈ ଭଵତି ଶିରସସ୍ତ୍ଵଯ୍ଯଵନତିଃ || ୧୩ ||
ଅକାଂଡବ୍ରହ୍ମାଂଡକ୍ଷଯଚକିତଦେଵାସୁରକୃପା-
-ଵିଧେଯସ୍ଯାସୀଦ୍ଯସ୍ତ୍ରିନଯନଵିଷଂ ସଂହୃତଵତଃ |
ସ କଲ୍ମାଷଃ କଂଠେ ତଵ ନ କୁରୁତେ ନ ଶ୍ରିଯମହୋ
ଵିକାରୋଽପି ଶ୍ଲାଘ୍ଯୋ ଭୁଵନଭଯଭଂଗଵ୍ଯସନିନଃ || ୧୪ ||
ଅସିଦ୍ଧାର୍ଥା ନୈଵ କ୍ଵଚିଦପି ସଦେଵାସୁରନରେ
ନିଵର୍ତଂତେ ନିତ୍ଯଂ ଜଗତି ଜଯିନୋ ଯସ୍ଯ ଵିଶିଖାଃ |
ସ ପଶ୍ଯନ୍ନୀଶ ତ୍ଵାମିତରସୁରସାଧାରଣମଭୂତ୍
ସ୍ମରଃ ସ୍ମର୍ତଵ୍ଯାତ୍ମା ନ ହି ଵଶିଷୁ ପଥ୍ଯଃ ପରିଭଵଃ || ୧୫ ||
ମହୀ ପାଦାଘାତାଦ୍ଵ୍ରଜତି ସହସା ସଂଶଯପଦଂ
ପଦଂ ଵିଷ୍ଣୋର୍ଭ୍ରାମ୍ଯଦ୍ଭୁଜପରିଘରୁଗ୍ଣଗ୍ରହଗଣମ୍ |
ମୁହୁର୍ଦ୍ଯୌର୍ଦୌସ୍ଥ୍ଯଂ ଯାତ୍ଯନିଭୃତଜଟାତାଡିତତଟା
ଜଗଦ୍ରକ୍ଷାଯୈ ତ୍ଵଂ ନଟସି ନନୁ ଵାମୈଵ ଵିଭୁତା || ୧୬ ||
ଵିଯଦ୍ଵ୍ଯାପୀ ତାରାଗଣଗୁଣିତଫେନୋଦ୍ଗମରୁଚିଃ
ପ୍ରଵାହୋ ଵାରାଂ ଯଃ ପୃଷତଲଘୁଦୃଷ୍ଟଃ ଶିରସି ତେ |
ଜଗଦ୍ଦ୍ଵୀପାକାରଂ ଜଲଧିଵଲଯଂ ତେନ କୃତମି-
-ତ୍ଯନେନୈଵୋନ୍ନେଯଂ ଧୃତମହିମ ଦିଵ୍ଯଂ ତଵ ଵପୁଃ || ୧୭ ||
ରଥଃ କ୍ଷୋଣୀ ଯଂତା ଶତଧୃତିରଗେଂଦ୍ରୋ ଧନୁରଥୋ
ରଥାଂଗେ ଚଂଦ୍ରାର୍କୌ ରଥଚରଣପାଣିଃ ଶର ଇତି |
ଦିଧକ୍ଷୋସ୍ତେ କୋଽଯଂ ତ୍ରିପୁରତୃଣମାଡଂବରଵିଧି-
-ର୍ଵିଧେଯୈଃ କ୍ରୀଡଂତ୍ଯୋ ନ ଖଲୁ ପରତଂତ୍ରାଃ ପ୍ରଭୁଧିଯଃ || ୧୮ ||
ହରିସ୍ତେ ସାହସ୍ରଂ କମଲବଲିମାଧାଯ ପଦଯୋ-
-ର୍ଯଦେକୋନେ ତସ୍ମିନ୍ ନିଜମୁଦହରନ୍ନେତ୍ରକମଲମ୍ |
ଗତୋ ଭକ୍ତ୍ଯୁଦ୍ରେକଃ ପରିଣତିମସୌ ଚକ୍ରଵପୁଷା
ତ୍ରଯାଣାଂ ରକ୍ଷାଯୈ ତ୍ରିପୁରହର ଜାଗର୍ତି ଜଗତାମ୍ || ୧୯ ||
କ୍ରତୌ ସୁପ୍ତେ ଜାଗ୍ରତ୍ତ୍ଵମସି ଫଲଯୋଗେ କ୍ରତୁମତାଂ
କ୍ଵ କର୍ମ ପ୍ରଧ୍ଵସ୍ତଂ ଫଲତି ପୁରୁଷାରାଧନମୃତେ |
ଅତସ୍ତ୍ଵାଂ ସଂପ୍ରେକ୍ଷ୍ଯ କ୍ରତୁଷୁ ଫଲଦାନପ୍ରତିଭୁଵଂ
ଶ୍ରୁତୌ ଶ୍ରଦ୍ଧାଂ ବଦ୍ଧ୍ଵା ଦୃଢପରିକରଃ କର୍ମସୁ ଜନଃ || ୨୦ ||
କ୍ରିଯାଦକ୍ଷୋ ଦକ୍ଷଃ କ୍ରତୁପତିରଧୀଶସ୍ତନୁଭୃତା-
-ମୃଷୀଣାମାର୍ତ୍ଵିଜ୍ଯଂ ଶରଣଦ ସଦସ୍ଯାଃ ସୁରଗଣାଃ |
କ୍ରତୁଭ୍ରେଷସ୍ତ୍ଵତ୍ତଃ କ୍ରତୁଫଲଵିଧାନଵ୍ଯସନିନୋ
ଧ୍ରୁଵଂ କର୍ତୁଃ ଶ୍ରଦ୍ଧାଵିଧୁରମଭିଚାରାଯ ହି ମଖାଃ || ୨୧ ||
ପ୍ରଜାନାଥଂ ନାଥ ପ୍ରସଭମଭିକଂ ସ୍ଵାଂ ଦୁହିତରଂ
ଗତଂ ରୋହିଦ୍ଭୂତାଂ ରିରମଯିଷୁମୃଷ୍ଯସ୍ଯ ଵପୁଷା |
ଧନୁଷ୍ପାଣେର୍ଯାତଂ ଦିଵମପି ସପତ୍ରାକୃତମମୁଂ
ତ୍ରସଂତଂ ତେଽଦ୍ଯାପି ତ୍ଯଜତି ନ ମୃଗଵ୍ଯାଧରଭସଃ || ୨୨ ||
ସ୍ଵଲାଵଣ୍ଯାଶଂସାଧୃତଧନୁଷମହ୍ନାଯ ତୃଣଵତ୍
ପୁରଃ ପ୍ଲୁଷ୍ଟଂ ଦୃଷ୍ଟ୍ଵା ପୁରମଥନ ପୁଷ୍ପାଯୁଧମପି |
ଯଦି ସ୍ତ୍ରୈଣଂ ଦେଵୀ ଯମନିରତ ଦେହାର୍ଧଘଟନା-
-ଦଵୈତି ତ୍ଵାମଦ୍ଧା ବତ ଵରଦ ମୁଗ୍ଧା ଯୁଵତଯଃ || ୨୩ ||
ଶ୍ମଶାନେଷ୍ଵାକ୍ରୀଡା ସ୍ମରହର ପିଶାଚାଃ ସହଚରା-
-ଶ୍ଚିତାଭସ୍ମାଲେପଃ ସ୍ରଗପି ନୃକରୋଟୀପରିକରଃ |
ଅମଂଗଳ୍ଯଂ ଶୀଲଂ ତଵ ଭଵତୁ ନାମୈଵମଖିଲଂ
ତଥାପି ସ୍ମର୍ତୄଣାଂ ଵରଦ ପରମଂ ମଂଗଳମସି || ୨୪ ||
ମନଃ ପ୍ରତ୍ଯକ୍ଚିତ୍ତେ ସଵିଧମଵଧାଯାତ୍ତମରୁତଃ
ପ୍ରହୃଷ୍ଯଦ୍ରୋମାଣଃ ପ୍ରମଦସଲିଲୋତ୍ସଂଗିତଦୃଶଃ |
ଯଦାଲୋକ୍ଯାହ୍ଲାଦଂ ହ୍ରଦ ଇଵ ନିମଜ୍ଯାମୃତମଯେ
ଦଧତ୍ଯଂତସ୍ତତ୍ତ୍ଵଂ କିମପି ଯମିନସ୍ତତ୍ କିଲ ଭଵାନ୍ || ୨୫ ||
ତ୍ଵମର୍କସ୍ତ୍ଵଂ ସୋମସ୍ତ୍ଵମସି ପଵନସ୍ତ୍ଵଂ ହୁତଵହ-
-ସ୍ତ୍ଵମାପସ୍ତ୍ଵଂ ଵ୍ଯୋମ ତ୍ଵମୁ ଧରଣିରାତ୍ମା ତ୍ଵମିତି ଚ |
ପରିଚ୍ଛିନ୍ନାମେଵଂ ତ୍ଵଯି ପରିଣତା ବିଭ୍ରତି ଗିରଂ
ନ ଵିଦ୍ମସ୍ତତ୍ତତ୍ତ୍ଵଂ ଵଯମିହ ତୁ ଯତ୍ତ୍ଵଂ ନ ଭଵସି || ୨୬ ||
ତ୍ରଯୀଂ ତିସ୍ରୋ ଵୃତ୍ତୀସ୍ତ୍ରିଭୁଵନମଥୋ ତ୍ରୀନପି ସୁରା-
-ନକାରାଦ୍ଯୈର୍ଵର୍ଣୈସ୍ତ୍ରିଭିରଭିଦଧତ୍ ତୀର୍ଣଵିକୃତି |
ତୁରୀଯଂ ତେ ଧାମ ଧ୍ଵନିଭିରଵରୁଂଧାନମଣୁଭିଃ
ସମସ୍ତଂ ଵ୍ଯସ୍ତଂ ତ୍ଵାଂ ଶରଣଦ ଗୃଣାତ୍ଯୋମିତି ପଦମ୍ || ୨୭ ||
ଭଵଃ ଶର୍ଵୋ ରୁଦ୍ରଃ ପଶୁପତିରଥୋଗ୍ରଃ ସହମହାଂ-
-ସ୍ତଥା ଭୀମେଶାନାଵିତି ଯଦଭିଧାନାଷ୍ଟକମିଦମ୍ |
ଅମୁଷ୍ମିନ୍ ପ୍ରତ୍ଯେକଂ ପ୍ରଵିଚରତି ଦେଵ ଶ୍ରୁତିରପି
ପ୍ରିଯାଯାସ୍ମୈ ଧାମ୍ନେ ପ୍ରଵିହିତନମସ୍ଯୋଽସ୍ମି ଭଵତେ || ୨୮ ||
ନମୋ ନେଦିଷ୍ଠାଯ ପ୍ରିଯଦଵ ଦଵିଷ୍ଠାଯ ଚ ନମୋ
ନମଃ କ୍ଷୋଦିଷ୍ଠାଯ ସ୍ମରହର ମହିଷ୍ଠାଯ ଚ ନମଃ |
ନମୋ ଵର୍ଷିଷ୍ଠାଯ ତ୍ରିନଯନ ଯଵିଷ୍ଠାଯ ଚ ନମୋ
ନମଃ ସର୍ଵସ୍ମୈ ତେ ତଦିଦମିତି ଶର୍ଵାଯ ଚ ନମଃ || ୨୯ ||
ବହୁଲରଜସେ ଵିଶ୍ଵୋତ୍ପତ୍ତୌ ଭଵାଯ ନମୋ ନମଃ
ପ୍ରବଲତମସେ ତତ୍ସଂହାରେ ହରାଯ ନମୋ ନମଃ |
ଜନସୁଖକୃତେ ସତ୍ତ୍ଵୋଦ୍ରିକ୍ତୌ ମୃଡାଯ ନମୋ ନମଃ
ପ୍ରମହସି ପଦେ ନିସ୍ତ୍ରୈଗୁଣ୍ଯେ ଶିଵାଯ ନମୋ ନମଃ || ୩୦ ||
କୃଶପରିଣତି ଚେତଃ କ୍ଲେଶଵଶ୍ଯଂ କ୍ଵ ଚେଦଂ
କ୍ଵ ଚ ତଵ ଗୁଣସୀମୋଲ୍ଲଂଘିନୀ ଶଶ୍ଵଦୃଦ୍ଧିଃ |
ଇତି ଚକିତମମଂଦୀକୃତ୍ଯ ମାଂ ଭକ୍ତିରାଧା-
-ଦ୍ଵରଦ ଚରଣଯୋସ୍ତେ ଵାକ୍ଯପୁଷ୍ପୋପହାରମ୍ || ୩୧ ||
ଅସିତଗିରିସମଂ ସ୍ଯାତ୍କଜ୍ଜଲଂ ସିଂଧୁପାତ୍ରେ
ସୁରତରୁଵରଶାଖା ଲେଖନୀ ପତ୍ରମୁର୍ଵୀ |
ଲିଖତି ଯଦି ଗୃହୀତ୍ଵା ଶାରଦା ସର୍ଵକାଲଂ
ତଦପି ତଵ ଗୁଣାନାମୀଶ ପାରଂ ନ ଯାତି || ୩୨ ||
ଅସୁରସୁରମୁନୀଂଦ୍ରୈରର୍ଚିତସ୍ଯେଂଦୁମୌଳେ-
-ର୍ଗ୍ରଥିତଗୁଣମହିମ୍ନୋ ନିର୍ଗୁଣସ୍ଯେଶ୍ଵରସ୍ଯ |
ସକଲଗଣଵରିଷ୍ଠଃ ପୁଷ୍ପଦଂତାଭିଧାନଃ
ରୁଚିରମଲଘୁଵୃତ୍ତୈଃ ସ୍ତୋତ୍ରମେତଚ୍ଚକାର || ୩୩ ||
ଅହରହରନଵଦ୍ଯଂ ଧୂର୍ଜଟେଃ ସ୍ତୋତ୍ରମେତତ୍
ପଠତି ପରମଭକ୍ତ୍ଯା ଶୁଦ୍ଧଚିତ୍ତଃ ପୁମାନ୍ ଯଃ |
ସ ଭଵତି ଶିଵଲୋକେ ରୁଦ୍ରତୁଲ୍ଯସ୍ତଥାତ୍ର
ପ୍ରଚୁରତରଧନାଯୁଃ ପୁତ୍ରଵାନ୍ କୀର୍ତିମାଂଶ୍ଚ || ୩୪ ||
ମହେଶାନ୍ନାପରୋ ଦେଵୋ ମହିମ୍ନୋ ନାପରା ସ୍ତୁତିଃ |
ଅଘୋରାନ୍ନାପରୋ ମଂତ୍ରୋ ନାସ୍ତି ତତ୍ତ୍ଵଂ ଗୁରୋଃ ପରମ୍ || ୩୫ ||
ଦୀକ୍ଷା ଦାନଂ ତପସ୍ତୀର୍ଥଂ ଜ୍ଞାନଂ ଯାଗାଦିକାଃ କ୍ରିଯାଃ |
ମହିମ୍ନଃ ସ୍ତଵ ପାଠସ୍ଯ କଲାଂ ନାର୍ହଂତି ଷୋଡଶୀମ୍ || ୩୬ ||
କୁସୁମଦଶନନାମା ସର୍ଵଗଂଧର୍ଵରାଜଃ
ଶିଶୁଶଶିଧରମୌଲେର୍ଦେଵଦେଵସ୍ଯ ଦାସଃ |
ସ ଖଲୁ ନିଜମହିମ୍ନୋ ଭ୍ରଷ୍ଟ ଏଵାସ୍ଯ ରୋଷାତ୍
ସ୍ତଵନମିଦମକାର୍ଷୀଦ୍ଦିଵ୍ଯଦିଵ୍ଯଂ ମହିମ୍ନଃ || ୩୭ ||
ସୁରଵରମୁନିପୂଜ୍ଯଂ ସ୍ଵର୍ଗମୋକ୍ଷୈକହେତୁଂ
ପଠତି ଯଦି ମନୁଷ୍ଯଃ ପ୍ରାଂଜଲିର୍ନାନ୍ଯଚେତାଃ |
ଵ୍ରଜତି ଶିଵସମୀପଂ କିନ୍ନରୈଃ ସ୍ତୂଯମାନଃ
ସ୍ତଵନମିଦମମୋଘଂ ପୁଷ୍ପଦଂତପ୍ରଣୀତମ୍ || ୩୮ ||
ଆସମାପ୍ତମିଦଂ ସ୍ତୋତ୍ରଂ ପୁଣ୍ଯଂ ଗଂଧର୍ଵଭାଷିତମ୍ |
ଅନୌପମ୍ଯଂ ମନୋହାରି ଶିଵମୀଶ୍ଵରଵର୍ଣନମ୍ || ୩୯ ||
ଇତ୍ଯେଷା ଵାଙ୍ମଯୀ ପୂଜା ଶ୍ରୀମଚ୍ଛଂକରପାଦଯୋଃ |
ଅର୍ପିତା ତେନ ଦେଵେଶଃ ପ୍ରୀଯତାଂ ମେ ସଦାଶିଵଃ || ୪୦ ||
ତଵ ତତ୍ତ୍ଵଂ ନ ଜାନାମି କୀଦୃଶୋଽସି ମହେଶ୍ଵର |
ଯାଦୃଶୋଽସି ମହାଦେଵ ତାଦୃଶାଯ ନମୋ ନମଃ || ୪୧ ||
ଏକକାଲଂ ଦ୍ଵିକାଲଂ ଵା ତ୍ରିକାଲଂ ଯଃ ପଠେନ୍ନରଃ |
ସର୍ଵପାପଵିନିର୍ମୁକ୍ତଃ ଶିଵଲୋକେ ମହୀଯତେ || ୪୨ ||
ଶ୍ରୀପୁଷ୍ପଦଂତମୁଖପଂକଜନିର୍ଗତେନ
ସ୍ତୋତ୍ରେଣ କିଲ୍ବିଷହରେଣ ହରପ୍ରିଯେଣ |
କଂଠସ୍ଥିତେନ ପଠିତେନ ସମାହିତେନ
ସୁପ୍ରୀଣିତୋ ଭଵତି ଭୂତପତିର୍ମହେଶଃ || ୪୩ ||
ଇତି ଶ୍ରୀପୁଷ୍ପଦଂତ ଵିରଚିତଂ ଶ୍ରୀ ଶିଵ ମହିମ୍ନଃ ସ୍ତୋତ୍ରମ୍ |