ଶ୍ରୀମଦାତ୍ମନେ ଗୁଣୈକସିନ୍ଧଵେ ନମଃ ଶିଵାୟ
ଧାମଲେଶଧୂତକୋକବନ୍ଧଵେ ନମଃ ଶିଵାୟ |
ନାମଶେଷିତାନମଦ୍ଭଵାନ୍ଧଵେ ନମଃ ଶିଵାୟ
ପାମରେତରପ୍ରଧାନବନ୍ଧଵେ ନମଃ ଶିଵାୟ || ୧ ||
କାଲଭୀତଵିପ୍ରବାଲପାଲ ତେ ନମଃ ଶିଵାୟ
ଶୂଲଭିନ୍ନଦୁଷ୍ଟଦକ୍ଷଫାଲ ତେ ନମଃ ଶିଵାୟ |
ମୂଲକାରଣାୟ କାଲକାଲ ତେ ନମଃ ଶିଵାୟ
ପାଲୟାଧୁନା ଦୟାଲଵାଲ ତେ ନମଃ ଶିଵାୟ || ୨ ||
ଇଷ୍ଟଵସ୍ତୁମୁଖ୍ୟଦାନହେତଵେ ନମଃ ଶିଵାୟ
ଦୁଷ୍ଟଦୈତ୍ୟଵଂଶଧୂମକେତଵେ ନମଃ ଶିଵାୟ |
ସୃଷ୍ଟିରକ୍ଷଣାୟ ଧର୍ମସେତଵେ ନମଃ ଶିଵାୟ
ଅଷ୍ଟମୂର୍ତୟେ ଵୃଷେନ୍ଦ୍ରକେତଵେ ନମଃ ଶିଵାୟ || ୩ ||
ଆପଦଦ୍ରିଭେଦଟଙ୍କହସ୍ତ ତେ ନମଃ ଶିଵାୟ
ପାପହାରିଦିଵ୍ୟସିନ୍ଧୁମସ୍ତ ତେ ନମଃ ଶିଵାୟ |
ପାପଦାରିଣେ ଲସନ୍ନମସ୍ତ ତେ ନମଃ ଶିଵାୟ
ଶାପଦୋଷଖଣ୍ଡନପ୍ରଶସ୍ତ ତେ ନମଃ ଶିଵାୟ || ୪ ||
ଵ୍ୟୋମକେଶ ଦିଵ୍ୟଭଵ୍ୟରୂପ ତେ ନମଃ ଶିଵାୟ
ହେମମେଦିନୀଧରେନ୍ଦ୍ରଚାପ ତେ ନମଃ ଶିଵାୟ |
ନାମମାତ୍ରଦଗ୍ଧସର୍ଵପାପ ତେ ନମଃ ଶିଵାୟ
କାମନୈକତାନହୃଦ୍ଦୁରାପ ତେ ନମଃ ଶିଵାୟ || ୫ ||
ବ୍ରହ୍ମମସ୍ତକାଵଲୀନିବଦ୍ଧ ତେ ନମଃ ଶିଵାୟ
ଜିହ୍ମଗେନ୍ଦ୍ରକୁଣ୍ଡଲପ୍ରସିଦ୍ଧ ତେ ନମଃ ଶିଵାୟ |
ବ୍ରହ୍ମଣେ ପ୍ରଣୀତଵେଦପଦ୍ଧତେ ନମଃ ଶିଵାୟ
ଜିହ୍ମକାଲଦେହଦତ୍ତପଦ୍ଧତେ ନମଃ ଶିଵାୟ || ୬ ||
କାମନାଶନାୟ ଶୁଦ୍ଧକର୍ମଣେ ନମଃ ଶିଵାୟ
ସାମଗାନଜାୟମାନଶର୍ମଣେ ନମଃ ଶିଵାୟ |
ହେମକାନ୍ତିଚାକଚକ୍ୟଵର୍ମଣେ ନମଃ ଶିଵାୟ
ସାମଜାସୁରାଙ୍ଗଲବ୍ଧଚର୍ମଣେ ନମଃ ଶିଵାୟ || ୭ ||
ଜନ୍ମମୃତ୍ୟୁଘୋରଦୁଃଖହାରିଣେ ନମଃ ଶିଵାୟ
ଚିନ୍ମୟୈକରୂପଦେହଧାରିଣେ ନମଃ ଶିଵାୟ |
ମନ୍ମନୋରଥାଵପୂର୍ତିକାରିଣେ ନମଃ ଶିଵାୟ
ସନ୍ମନୋଗତାୟ କାମଵୈରିଣେ ନମଃ ଶିଵାୟ || ୮ ||
ୟକ୍ଷରାଜବନ୍ଧଵେ ଦୟାଲଵେ ନମଃ ଶିଵାୟ
ଦକ୍ଷପାଣିଶୋଭିକାଞ୍ଚନାଲଵେ ନମଃ ଶିଵାୟ |
ପକ୍ଷିରାଜଵାହହୃଚ୍ଛୟାଲଵେ ନମଃ ଶିଵାୟ
ଅକ୍ଷିଫାଲଵେଦପୂତତାଲଵେ ନମଃ ଶିଵାୟ || ୯ ||
ଦକ୍ଷହସ୍ତନିଷ୍ଠଜାତଵେଦସେ ନମଃ ଶିଵାୟ
ଅକ୍ଷରାତ୍ମନେ ନମଦ୍ବିଡୌଜସେ ନମଃ ଶିଵାୟ |
ଦୀକ୍ଷିତପ୍ରକାଶିତାତ୍ମତେଜସେ ନମଃ ଶିଵାୟ
ଉକ୍ଷରାଜଵାହ ତେ ସତାଂ ଗତେ ନମଃ ଶିଵାୟ || ୧୦ ||
ରାଜତାଚଲେନ୍ଦ୍ରସାନୁଵାସିନେ ନମଃ ଶିଵାୟ
ରାଜମାନନିତ୍ୟମନ୍ଦହାସିନେ ନମଃ ଶିଵାୟ |
ରାଜକୋରକାଵତଂସଭାସିନେ ନମଃ ଶିଵାୟ
ରାଜରାଜମିତ୍ରତାପ୍ରକାଶିନେ ନମଃ ଶିଵାୟ || ୧୧ ||
ଦୀନମାନଵାଲିକାମଧେନଵେ ନମଃ ଶିଵାୟ
ସୂନବାଣଦାହକୃତ୍କୃଶାନଵେ ନମଃ ଶିଵାୟ |
ସ୍ଵାନୁରାଗଭକ୍ତରତ୍ନସାନଵେ ନମଃ ଶିଵାୟ
ଦାନଵାନ୍ଧକାରଚଣ୍ଡଭାନଵେ ନମଃ ଶିଵାୟ || ୧୨ ||
ସର୍ଵମଙ୍ଗଲାକୁଚାଗ୍ରଶାୟିନେ ନମଃ ଶିଵାୟ
ସର୍ଵଦେଵତାଗଣାତିଶାୟିନେ ନମଃ ଶିଵାୟ |
ପୂର୍ଵଦେଵନାଶସଂଵିଧାୟିନେ ନମଃ ଶିଵାୟ
ସର୍ଵମନ୍ମନୋଜଭଙ୍ଗଦାୟିନେ ନମଃ ଶିଵାୟ || ୧୩ ||
ସ୍ତୋକଭକ୍ତିତୋଽପି ଭକ୍ତପୋଷିଣେ ନମଃ ଶିଵାୟ
ମାକରନ୍ଦସାରଵର୍ଷିଭାଷିଣେ ନମଃ ଶିଵାୟ |
ଏକବିଲ୍ଵଦାନତୋଽପି ତୋଷିଣେ ନମଃ ଶିଵାୟ
ନୈକଜନ୍ମପାପଜାଲଶୋଷିଣେ ନମଃ ଶିଵାୟ || ୧୪ ||
ସର୍ଵଜୀଵରକ୍ଷଣୈକଶୀଲିନେ ନମଃ ଶିଵାୟ
ପାର୍ଵତୀପ୍ରିୟାୟ ଭକ୍ତପାଲିନେ ନମଃ ଶିଵାୟ |
ଦୁର୍ଵିଦଗ୍ଧଦୈତ୍ୟସୈନ୍ୟଦାରିଣେ ନମଃ ଶିଵାୟ
ଶର୍ଵରୀଶଧାରିଣେ କପାଲିନେ ନମଃ ଶିଵାୟ || ୧୫ ||
ପାହି ମାମୁମାମନୋଜ୍ଞ ଦେହ ତେ ନମଃ ଶିଵାୟ
ଦେହି ମେ ଵରଂ ସିତାଦ୍ରିଗେହ ତେ ନମଃ ଶିଵାୟ |
ମୋହିତର୍ଷିକାମିନୀସମୂହ ତେ ନମଃ ଶିଵାୟ
ସ୍ଵେହିତପ୍ରସନ୍ନ କାମଦୋହ ତେ ନମଃ ଶିଵାୟ || ୧୬ ||
ମଙ୍ଗଲପ୍ରଦାୟ ଗୋତୁରଙ୍ଗ ତେ ନମଃ ଶିଵାୟ
ଗଙ୍ଗୟା ତରଙ୍ଗିତୋତ୍ତମାଙ୍ଗ ତେ ନମଃ ଶିଵାୟ |
ସଙ୍ଗରପ୍ରଵୃତ୍ତଵୈରିଭଙ୍ଗ ତେ ନମଃ ଶିଵାୟ
ଅଙ୍ଗଜାରୟେ କରେକୁରଙ୍ଗ ତେ ନମଃ ଶିଵାୟ || ୧୭ ||
ଈହିତକ୍ଷଣପ୍ରଦାନହେତଵେ ନମଃ ଶିଵାୟ
ଆହିତାଗ୍ନିପାଲକୋକ୍ଷକେତଵେ ନମଃ ଶିଵାୟ |
ଦେହକାନ୍ତିଧୂତରୌପ୍ୟଧାତଵେ ନମଃ ଶିଵାୟ
ଗେହଦୁଃଖପୁଞ୍ଜଧୂମକେତଵେ ନମଃ ଶିଵାୟ || ୧୮ ||
ତ୍ର୍ୟକ୍ଷ ଦୀନସତ୍କୃପାକଟାକ୍ଷ ତେ ନମଃ ଶିଵାୟ
ଦକ୍ଷସପ୍ତତନ୍ତୁନାଶଦକ୍ଷ ତେ ନମଃ ଶିଵାୟ |
ଋକ୍ଷରାଜଭାନୁପାଵକାକ୍ଷ ତେ ନମଃ ଶିଵାୟ
ରକ୍ଷ ମାଂ ପ୍ରପନ୍ନମାତ୍ରରକ୍ଷ ତେ ନମଃ ଶିଵାୟ || ୧୯ ||
ନ୍ୟଙ୍କୁପାଣୟେ ଶିଵଙ୍କରାୟ ତେ ନମଃ ଶିଵାୟ
ସଙ୍କଟାବ୍ଧିତୀର୍ଣକିଙ୍କରାୟ ତେ ନମଃ ଶିଵାୟ |
ପଙ୍କଭୀଷିତାଭୟଙ୍କରାୟ ତେ ନମଃ ଶିଵାୟ
ପଙ୍କଜାସନାୟ ଶଙ୍କରାୟ ତେ ନମଃ ଶିଵାୟ || ୨୦ ||
କର୍ମପାଶନାଶ ନୀଲକଣ୍ଠ ତେ ନମଃ ଶିଵାୟ
ଶର୍ମଦାୟ ନର୍ୟଭସ୍ମକଣ୍ଠ ତେ ନମଃ ଶିଵାୟ |
ନିର୍ମମର୍ଷିସେଵିତୋପକଣ୍ଠ ତେ ନମଃ ଶିଵାୟ
କୁର୍ମହେ ନତୀର୍ନମଦ୍ଵିକୁଣ୍ଠ ତେ ନମଃ ଶିଵାୟ || ୨୧ ||
ଵିଷ୍ଟପାଧିପାୟ ନମ୍ରଵିଷ୍ଣଵେ ନମଃ ଶିଵାୟ
ଶିଷ୍ଟଵିପ୍ରହୃଦ୍ଗୁହାଚରିଷ୍ଣଵେ ନମଃ ଶିଵାୟ |
ଇଷ୍ଟଵସ୍ତୁନିତ୍ୟତୁଷ୍ଟଜିଷ୍ଣଵେ ନମଃ ଶିଵାୟ
କଷ୍ଟନାଶନାୟ ଲୋକଜିଷ୍ଣଵେ ନମଃ ଶିଵାୟ || ୨୨ ||
ଅପ୍ରମେୟଦିଵ୍ୟସୁପ୍ରଭାଵ ତେ ନମଃ ଶିଵାୟ
ସତ୍ପ୍ରପନ୍ନରକ୍ଷଣସ୍ଵଭାଵ ତେ ନମଃ ଶିଵାୟ |
ସ୍ଵପ୍ରକାଶ ନିସ୍ତୁଲାନୁଭାଵ ତେ ନମଃ ଶିଵାୟ
ଵିପ୍ରଡିମ୍ଭଦର୍ଶିତାର୍ଦ୍ରଭାଵ ତେ ନମଃ ଶିଵାୟ || ୨୩ ||
ସେଵକାୟ ମେ ମୃଡ ପ୍ରସୀଦ ତେ ନମଃ ଶିଵାୟ
ଭାଵଲଭ୍ୟତାଵକପ୍ରସାଦ ତେ ନମଃ ଶିଵାୟ |
ପାଵକାକ୍ଷ ଦେଵପୂଜ୍ୟପାଦ ତେ ନମଃ ଶିଵାୟ
ତଵକାଙ୍ଘ୍ରିଭକ୍ତଦତ୍ତମୋଦ ତେ ନମଃ ଶିଵାୟ || ୨୪ ||
ଭୁକ୍ତିମୁକ୍ତିଦିଵ୍ୟଭୋଗଦାୟିନେ ନମଃ ଶିଵାୟ
ଶକ୍ତିକଲ୍ପିତପ୍ରପଞ୍ଚଭାଗିନେ ନମଃ ଶିଵାୟ |
ଭକ୍ତସଙ୍କଟାପହାରୟୋଗିନେ ନମଃ ଶିଵାୟ
ୟୁକ୍ତସନ୍ମନଃସରୋଜୟୋଗିନେ ନମଃ ଶିଵାୟ || ୨୫ ||
ଅନ୍ତକାନ୍ତକାୟ ପାପହାରିଣେ ନମଃ ଶିଵାୟ
ଶନ୍ତମାୟ ଦନ୍ତିଚର୍ମଧାରିଣେ ନମଃ ଶିଵାୟ |
ସନ୍ତତାଶ୍ରିତଵ୍ୟଥାଵିଦାରିଣେ ନମଃ ଶିଵାୟ
ଜନ୍ତୁଜାତନିତ୍ୟସୌଖ୍ୟକାରିଣେ ନମଃ ଶିଵାୟ || ୨୬ ||
ଶୂଲିନେ ନମୋ ନମଃ କପାଲିନେ ନମଃ ଶିଵାୟ
ପାଲିନେ ଵିରିଞ୍ଚିମୁଣ୍ଡମାଲିନେ ନମଃ ଶିଵାୟ |
ଲୀଲିନେ ଵିଶେଷରୁଣ୍ଡମାଲିନେ ନମଃ ଶିଵାୟ
ଶୀଲିନେ ନମଃ ପ୍ରପୁଣ୍ୟଶାଲିନେ ନମଃ ଶିଵାୟ || ୨୭ ||
ଶିଵପଞ୍ଚାକ୍ଷରମୁଦ୍ରାଂ ଚତୁଷ୍ପଦୋଲ୍ଲାସପଦ୍ୟମଣି ଘଟିତାମ୍ |
ନକ୍ଷତ୍ରମାଲିକାମିହ ଦଧଦୁପକଣ୍ଠଂ ନରୋ ଭଵେତ୍ସୋମଃ || ୨୮ ||
ଇତି ଶ୍ରୀମଚ୍ଛଙ୍କରାଚାର୍ୟ କୃତଂ ଶ୍ରୀ ଶିଵ ପଞ୍ଚାକ୍ଷରନକ୍ଷତ୍ରମାଲା ସ୍ତୋତ୍ରମ୍ ||